ଆଦି 7

ବନ୍ୟା

1 ଆରି ମାପ୍‌ରୁ ନୋହକେ ବାସଙ୍ଗ୍‌କେ, ନାଁ କ୍ଲିଗ୍‌ ଡୁଆଣ୍ଡ୍ରେ ଏତେ ଜାହାଜ୍‌ନ୍ୟା ଗାଲାପା, ଡାଗ୍ଲା ଏନ୍‌ କାଲ୍‌ନେ ରେମୁଆଁଇଂନେ ବିତ୍ରେ ନେ ନିଜର୍‌ ସାମ୍ନାନ୍ୟା ଆନାକେ ଦରମ୍‌ କେନେଡିଙ୍ଗ୍‌କେ । 2 ନାଁ ନାନେ ଏତେ ଗୁ ଗୁକ୍ଲିଗ୍‌ ଜଡ଼ି ପର୍‌ଚଲ୍‌ ପସୁ ବାରି ମୁଇଂ ମୁଇଂ ଜଡ଼ି ଅସୁଚି ପସୁ ଡୁଙ୍ଗ୍‌ ନାପାଙ୍ଗ୍‌ଏ । ସାପା ଜଡ଼ିନ୍ୟା ମୁଇଂ ଙ୍ଗିର୍‌ବୁଏଃ ବାରି ମୁଇଂ ସେଲାମ୍ବୁଏଃ ଡିଲାଡିଗ୍‌ ଲେଃଆର୍‌ଏ । 3 ସାପା ପ୍ଲିଗ୍‌ ଜାତିନେ ତ୍ମାକ୍ଲିଗ୍‌ ତ୍ମାକ୍ଲିଗ୍‌ ଜଡ଼ି ନିଜେନେ ଏତେ ଡୁଙ୍ଗ୍‌ୱେଲା । ମେଃଡାଗ୍‌ଲା ବାର୍‌ମୁଇଂତର୍‌ ଏନ୍‌ ଦର୍‌ତନିଅରିଆ ବଂସ ରକ୍ୟା ଡିଂନ୍‌ସାଃ ସାପା ରକମ୍‌ନେ ପ୍ଲିଗ୍‌ ଆରି ପ୍ରାନି ଆମ୍ବ୍ରଚେ ଲେଃଆର୍‌ଲେଃ । 4 ଗୁ ଦିନ୍‌ ଇଡ଼ିଙ୍ଗ୍‌ ନେଙ୍ଗ୍‌ ଚାଲିସ୍‌ ସ୍ମି ଚାଲିସ୍‌ ମିଡିଗ୍‌ ମଚ୍‌ପୁର୍‌ନ୍ୟା ଣ୍ଡିଆଃ ଆଃଗୁର୍‌ଚେ ଆଣ୍ଡିନେ ନେଙ୍ଗ୍‌ ତିଆର୍‌ ଡିଙ୍ଗ୍‌ମ୍ୱକେ ମଚ୍‌ପୁର୍‌ନେ ସାପା ଜିବନ୍‌ ଲେଃକ୍ନେ ପ୍ରାନି ବାରି ଆତ୍‌ଅରିଆନେ ସାପା ଜିନିସ୍‌ ଦଂସ ନ୍ନାଡିଙ୍ଗ୍‌ଏ । 5 ନୋହ ମାପ୍‌ରୁନେ ସାମୁଆଁ ଅନୁସାରେ ସାପା କାମ୍‌ ଡିଙ୍ଗ୍‌କେ ।

6 ବନ୍ୟା ପାଙ୍ଗ୍‌ନେ ବେଲା ନୋହକେ ତୁର୍‌ସ ମୁଆଁ ବୟସ୍‌ ଡିଙ୍ଗ୍‌ଲେଃଗେ । 7 ନୋହ ବାରି ମେଁନେ ପରିବାର୍‌ ବନ୍ୟା ବାନ୍‌ ରକ୍ୟା ବାନ୍‌ସା ଜାହାଜ୍‌ ବିତ୍ରେ ଗାଆର୍କେ । ଜାହାଜ୍‌ନ୍ୟା ନୋହ, ମେଁନେ ସେଲାମ୍ବୁଏଃ ବାରି ଉଂଡେଇଂ ଆରି ଉଂଡେଇଂନେ ସେଲାମ୍ବୁଏଃଇଂ ଲେଃଆର୍‌ଗେ । 8 ବାରି ନୋହନେ ଆଡ଼ାତ୍ରା ପର୍‌ମେସର୍‌ନେ ସାମୁଆଁ ଅନୁସାରେ ପର୍‌ଚଲ୍‌ ବାରି ଅସୁଚି ପସୁ ପ୍ଲିଗ୍‌ଇଙ୍ଗ୍‌ ବାରି ତୁବନ୍ୟା ଅଲେଙ୍ଗ୍‌ନେ ଜନ୍ତୁଇଙ୍ଗ୍‌ ଜଡ଼ା ଜଡ଼ା ଡିଙ୍ଗ୍‌ଚେ, 9 ନୋହନେ ଡାଗ୍ରା ୱେଚାଚେ ଜାହାଜ୍‌ଅରିଆ ଗାଆର୍କେ । 10 ଆରି ଆତେନ୍‌ ଗୁ ଦିନ୍‌ ଇଡ଼ିଙ୍ଗ୍‌ ମଚ୍‌ପୁର୍‌ନ୍ୟା ବନ୍ୟା ଡିଙ୍ଗ୍‌ନେ ଆରାମ୍‌ ଡିଙ୍ଗ୍‌କେ ।

11 ଉଃଡ଼ିବେଲା ନୋହକେ ତୁର୍‌ସ ମୁଆଁ ବଏସ୍‌ ଡିଙ୍ଗ୍‌ଲେଃଗେ, ଦୁତିୟ ଆର୍କେନେ ସତର ଦିନା ଆତେନ୍‌ ମ୍ନା କେଣ୍ଡିଆନେ ସାପା ବନ୍ଦ୍‌ ପାକ୍‌ଚି ୱେଗେ ବାରି ତ୍ରିଗ୍‌ଡ୍ୟାନେ ଗାଲି ସାପା ରଃୱେଗେ । 12 ଆତ୍‌ବାନ୍‌ ଚାଲିସ୍‌ ସ୍ମି ଚାଲିସ୍‌ ମିଡିଗ୍‌ ଦର୍‌ତନିଅରିଆ ଣ୍ଡିଆ ଗୁର୍‌କେ । 13 ଆତେନ୍‌ ଦିନା ନୋହ, ଶେମ, ହାମ ବାରି ଯେଫତ୍‌ ମ୍ନିକ୍ନେ ନୋହନେ ଉଂଡେଇଂ, ଆରି ମେଇଂନେ ସେଲାମ୍ବୁଏଃ ଆରି ଞ୍ଜିକ୍ଲିଗ୍‌ ମାଚୁଆ ଜାହାଜ୍‌ ବିତ୍ରେ ଗାଆର୍କେ । 14 ବାରି ସାପା ଜାତିନେ ଇନି ଆରି କଣ୍ଡା ପସୁ ଆରି ସାପା ଜାତିନେ ପ୍ଲିଗ୍ଇଂ ଆରି ସାପା ଜାତିନେ ତୁବନ୍ୟା ଅଲେଙ୍ଗ୍‌ନେ ଆରି ୱାଲେନେ ପ୍ଲିଗ୍‌ ମେଇଂ ଏଃତେ ଗାଆର୍‌କେ । 15 ଜିବନ୍‌ ଲେଃକ୍ନେ ସାପା ରକମ୍‌ନେ ଜିବଜନ୍ତୁ ଜଡ଼ା ଜଡ଼ା ଡିଙ୍ଗ୍‌ଚେ ନୋହନେ ଡାଗ୍ରା ୱେଚାଚେ ଜାହାଜ୍‌ ବିତ୍ରେ ଗାଆର୍କେ । 16 ପର୍‌ମେସର୍‌ନେ ସାମୁଆଁ ଅନୁସାରେ ସାପା ରକମ୍‌ନେ ମୁଇଂ ଙ୍ଗିର୍‌ବୁଏଃ ବାରି ମୁଇଂ ସେଲାମ୍ବୁଏଃ ପ୍ରାନି ଜାହାଜ୍‌ ଡାଗ୍ରା ୱେଚାଆର୍କେ, ଏନ୍‌ ଇଡ଼ିଙ୍ଗ୍‌ ମାପ୍‌ରୁ ଜାହାଜ୍‌ନେ କାପାଟ୍‌ ଆନ୍ତଃ ବିକେ ।

17 ଚାଲିସ୍‌ ଦିନ୍‌ ବନ୍ୟା ଡିଙ୍ଗ୍‌କେ, ବାରି ଣ୍ଡିଆ ଜାବର୍‌ ଡିଙ୍ଗ୍‌ଲା ଜାହାଜ୍‌ ତୁବକେ ଆନ୍ତାର୍‌ଚେ ଡୁଙ୍ଗ୍‌ଡ୍ୟାନେ ମୁଲେକେ । 18 ମଚ୍‌ପୁର୍‌ନ୍ୟା ଲେଃଗା ଲେଃଗା ଣ୍ଡିଆ ଜାବର୍‌ ଡିଙ୍ଗ୍‌ଲା ଜାହାଜ୍‌ ଣ୍ଡିଆଃ ଆଡ଼ାତ୍ରା ଡୁଙ୍ଗ୍‌ଡ୍ୟାକେ । 19 ମଚ୍‌ପୁର୍‌ ଆଡ଼ାତ୍ରା ଣ୍ଡିଆ ଜାବର୍‌ ଡିଙ୍ଗ୍‌ଚେ କିତଙ୍ଗ୍‌ ଆଲ ଲେଃକ୍ନେ ସାପା ମ୍ନା କଣ୍ଡା ଲଗ୍‌ଡ୍ୟାଃ ୱେଗେ । 20 ତେସାଃ କଣ୍ଡାଇଂ ଲଗ୍‌ଡ୍ୟାଃକ୍ନେ ଇଡ଼ିଂ ପନ୍ଦ୍‌ର ନ୍ତି ଜାକ ଣ୍ଡିଆଃ ଡେଃକେ । 21 ତେସାଃ ସାପା ରେଃସ ଅଲେଙ୍ଗ୍‌ନେ ପ୍ରାନି, ଡାଗ୍‌ଲା, ପ୍ଲିଗ୍‌, ଇନି ଆରି କଣ୍ଡା ଜନ୍ତୁ ଆରି ଦର୍‌ତନିଅରିଆ ରେଃସ ଅଲେଙ୍ଗ୍‌ନେ ଜନ୍ତୁ ଆରି ସାପା ରେମୁଆଁ ଗୁଏଃଆର୍‌କେ । 22 ଆରି ନ୍‌ସୁଆର୍‌କ୍ନେ ତୁବଃନ୍ୟା ଲେଃକ୍ନେ ଉଃଡ଼ି ପ୍ରାନିନେ ମ୍‌ମୁଁନ୍ୟା ଜିବନ୍‌ ୱେଡ଼ିଆଃ ଲେଃଗେ, ସାପାରେ ଗୁଏଃଆର୍‌କେ । 23 ଦେକ୍‌ରକମ୍‌ ପର୍‌ମେସର୍‌ ମଚ୍‌ପୁର୍‌ନ୍ୟା ବାସା ଲେଃକ୍ନେ ସାପା ମ୍ୱ୍ରଲେକ୍ନେ ପ୍ରାନିକେ, ୱାଲେନେ ପ୍ଲିଗ୍‌, ମଚ୍‌ପୁର୍‌ନ୍ୟା ଗୁଏଃଆର୍‌କେ । ମାତର୍‌ ନୋହ ବାରି ଜାହାଜ୍‌ନ୍ୟା ଲେଃକ୍ନେ ରେମୁଆଁଇଂ ବାରି ପସୁଇଂ ରକ୍ୟା ବାଆର୍‌କେ । 24 ଦେକ୍‌ରକମ୍‌ ବାବ୍‌ରେ ମଚ୍‌ପୁର୍‌ ସଏ ପଚାସ୍‌ ଦିନ୍‌ ଣ୍ଡିଆନ୍ୟା ଲଗ୍‌ଡ୍ୟା ଲେଃଗେ ।