ଆଦି 4

କୟିନ ଆରି ହେବଲ

1 ଆରି ଆଦମ ନିଜର୍‌ ସେଲାମ୍ବୁଏଃ ହବା ଏଃତେ କୁଡ଼େଃମାଡ଼େଃଲା, ମେଁ ଗାଗ୍‌ଡ଼େଚେ କୟିନ ମ୍ନିକ୍ନେ ମୁଇଂ ଗଡ଼େଅ ଜନମ୍‌ ଆଡିଂଚେ ବାସଙ୍ଗ୍‌କେ, ମାପ୍‌ରୁନେ ସାଇଜରେ ନେଙ୍ଗ୍‌ନେ ମୁଇଂ ଗଡ଼େଅ ଜନମ୍‌ ଡିଂଲେଃକେ । 2 ଏନ୍‌ ଇଡ଼ିଙ୍ଗ୍‌ ଅବା କୟିନନେ ବୟାଁ ହେବଲକେ ଜନମ୍‌ ବିଃକେ । ହେବଲ ମେଣ୍ଡା ତୁର୍‌ତିଆରେ ବାରି କୟିନ ଚାସି ରେମୁଆଁ ଲେଃଆର୍‌ଗେ । 3 ଉଡ଼ି ଦିନ୍‌ ଇଡ଼ିଙ୍ଗ୍‌ କୟିନ ମାପ୍‌ରୁନେ ମ୍ନିରେ ତୁବନ୍ୟା ଚୁକ୍ନେ ଚୁଚୁ ଡୁଙ୍ଗ୍‌ପାଙ୍ଗ୍‌ଚେ ପୁଜା ଡିଂକେ । 4 ଆରି ହେବଲ ଡିଗ୍‌ ନିଜର୍‌ ରାସିନେ ପର୍‌ତୁମ୍‌ ଜନମ୍‌ ଡିଂକ୍ନେ ଉଃଡ଼ିକ୍ଲିଗ୍‌ ମେଣ୍ଡା ଆରି ମେଇଂନେ କ୍ରି ପୁଜା ଡିଂକେ । ମାପ୍‌ରୁ ହେବଲକେ ଆରି ମେଁନେ ପୁଜାକେ ଗ୍ରହନ୍‌ ଡିଂକେ । 5 ମାତର୍‌ ମାପ୍‌ରୁ କୟିନକେ ବାରି ମେଁ ପୁଜା ଡିଂକ୍ନେ ଜିନିସ୍‌କେ ଗ୍ରହନ୍‌ ଆଡିଙ୍ଗ୍‌କେ ଣ୍ଡୁ । ଏନ୍‌ସା କୟିନ ଜାବର୍‌ ରିସା ଡିଂଚେ ଦୁକ୍‌ ଡିଂକେ । 6 ମାପ୍‌ରୁ କୟିନକେ ବାସଙ୍ଗ୍‌କେ, ନାଁ ମେଃନ୍‌ସା ରିସା ଡିଂନାଡିଂକେ ? ଆରି ମେଃନ୍‌ସା ଦୁକ୍‌ ଡିଂନାଡିଂକେ ? 7 ସତ୍‌ କାମ୍‌ ଡିଂଲା, କି ନା ଆଡ଼ାତ୍ରା ସାର୍ମୁଁଆଃ ଆଡିଂ ଣ୍ଡୁ ? ସତ୍‌ କାମ୍‌ ନାଡିଂଲା, ପାପ୍‌ ର୍ଣ୍ଣସାଂନିଆ ଉର୍‌ଲେଏ । ମେଁ ଆନାକେ ସାସନ୍‌ ଡିଂଡିଂକେ, ମାତର୍‌ ନା ମେଁ ଆଡ଼ାତ୍ରା ସାସନ୍‌ ନାଡିଂଏ ।

8 କୟିନ ମେଁନେ ବୟାଁ ହେବଲ ଏଃତେ ବାଃଲିର୍‌ବାତାକେ । ତେଲା ମେଇଂ ଲିଜଅରିଆ ଲେଃନେ ବେଲା କୟିନ ନିଜେନେ ବୟାଁ ହେବଲକେ ବଗ୍‌ଚେ ବାଗୁଏଃକେ ।

9 ଆରି ମାପ୍‌ରୁ କୟିନକେ ସାଲିଆକୁକେ, ନାଁ ବୟାଁ ହେବଲ ଆଣ୍ଡିଅରିଆ ? ମେଁ ବାସଙ୍ଗ୍‌କେ, ନେଙ୍ଗ୍‌ ନ୍ନାମ୍ୟାକେ ଣ୍ଡୁ, ନେଙ୍ଗ୍ ମେଃନେ ନେଙ୍ଗ୍‌ ବୟାଁନେ ଜାଗୁଆଲ୍‌ ?

10 ଏନ୍‌ ଇଡ଼ିଙ୍ଗ୍‌ ମାପ୍‌ରୁ ବାସଙ୍ଗ୍‌କେ, "ନାଁ ମେଃନେ ଡିଂନାବକେ ? ନାବୟାଁନେ ମିଆଁ ତୁବବାନ୍‌ ଆନିଂକେ ୱାଡିଂକେ । 11 ତୁବନ୍ୟା ନାବୟାଁନେ ମିଆଁ ନାକିଗ୍‌କେ । ଆତେନ୍‌ସା ନାଁ ଅବିସାପ୍‌ ନାବାଗେ ଆରି ଆନାକେ ତୁବବାନ୍‌ ଆଃତାର୍‌ ମ୍ୱିଏ ।" 12 ତୁବନ୍ୟା ଚାସ୍ କାମ୍‌ ଡିଙ୍ଗ୍‌ଲା ଡିଗ୍‌ ଆତେନ୍‌ ନିଜର୍‌ ବପୁ ବିଚେ ଆରି ନାଁନେ ସେବା ଆଡିଙ୍ଗ୍‌ ଣ୍ଡୁ । ନାଁ ମୁଇଂ ଜାଗାବାନ୍‌ ବିନେ ମୁଇଂ ଜାଗା ପାକା ଅଲେଙ୍ଗ୍‌ଣ୍ଡ୍ରେ ନାଡିଂଏ, ମଚ୍‌ପୁର୍‌ନ୍ୟା ନାଁନେ ଡୁଆ ଆଲେଃ ଣ୍ଡୁ ।

13 କୟିନ ମାପ୍‌ରୁକେ ବାସଙ୍ଗ୍‌କେ, "ନେଙ୍ଗ୍‌ନେ ଡଣ୍ଡ୍‌ ଜାବର୍‌ ସାମ୍ବାଲେ ନ୍ନାୟା ଣ୍ଡୁ । 14 ଏଃକେ ନାଁ ଆନେଙ୍ଗ୍‌ ଏନ୍‌ ତୁବବାନ୍ ନୁଆଁ ନାବିକେ, ଆତ୍‌ବା ନେଙ୍ଗ୍‌ ନାଁନେବାନ୍‌ ବୁଃଡ଼ି ମ୍ୱିଏ । ନେଙ୍ଗ୍‌ ମୁଇଂ ଡୁଡଣ୍ଡ୍ରେ ଆରି ମଚ୍‌ପୁର୍‌ନ୍ୟା ଅଲେଙ୍ଗ୍‌ଣ୍ଡ୍ରେ ଣ୍ଡିଙ୍ଗ୍‌ଏ । ଦେକ୍‌ରକମ୍‌ ଡିଙ୍ଗ୍‌ଏ ଜେ, ମେଃଡିଗ୍‌ ରେମୁଆଁ ଆନେଙ୍ଗ୍‌ ଅବାଲା ବାଗୁଏଃଏ ।"

15 ଆରି ମାପ୍‌ରୁ କୟିନକେ ବାସଙ୍ଗ୍‌କେ, ଜଦି ଜାଣ୍ଡେ କୟିନକେ ବାଗୁଏଃଏ, ମେଁ ଗୁ ଗୁନ୍‌ ଡଣ୍ଡ୍‌ ବାଏ । ବାରି ଜାଣ୍ଡେ ଆମେକେ କେଚେ ଡିରକମ୍‌ ଆବାଗୁଏଃଆର୍‌ ଣ୍ଡୁ, ଏନ୍‌ସା ମାପ୍‌ରୁ କୟିନ ନ୍‌ସା ମୁଇଂ ଚିନ୍‌ ଆଃରେକେ ।

16 ଆରି କୟିନ ମାପ୍‌ରୁନେ ସାମ୍ନାବାନ୍‌ ଡଚେ ଏଦନନେ ପୁର୍ବ ଦିଗ୍‌ ପାକା ନୋଦ ମ୍ନିକ୍ନେ ଦେସ୍‌ନ୍ୟା ବାସାକେ ।

କୟିନନେ କୁଟୁମ୍‌

17 ଆରି କୟିନ ନିଜର୍‌ ସେଲାମ୍ବୁଏଃ ଏତେ କୁଡ଼େଃମାଡ଼େଃଲା, ମେଁ ଗାଗ୍‌ଡ଼େଚେ ହନୋକକେ ଜନମ୍‌ ବିକେ, ବାରି ମେଁ ମୁଇଂ ଇନି ତିଆର୍‌ ଡିଙ୍ଗ୍‌ଚେ ନିଜର୍‌ ଉଂଣ୍ଡେନେ ମ୍ନି ଅନୁସାରେ ଆତେନ୍‌ ଇନିନେ ମ୍ନି ହନକ ବିକେ । 18 ଆତେନ୍‌ ହନୋକନେ ଉଂଡେ ଇରଦ ଆରି ଇରଦନେ ଉଂଡେ ମହୁୟାୟେଲ ଆରି ମହୁୟାୟେଲନେ ଉଂଡେ ମଥୁଶାୟେଲ ଆରି ମଥୁଶାୟେଲନେ ଉଂଡେ ଲେମକ । 19 ଏନ୍‌ ଲେମକ ମ୍ୱାକ୍ଲିଗ୍‌ ସେଲାମ୍ବୁଏଃ ବିବା ଡିଙ୍ଗ୍‌କେ, ମୁଇଂଡାନେ ମ୍ନି ଆଦା ଆରି ବିନ୍‌ରେନେ ମ୍ନି ସିଲ୍ଲା ଲେଃଗେ । 20 ଆଦାନେ ସୁଲୁଏବାନ୍‌ ଜାବଳ ଜନମ୍‌ ଡିଙ୍ଗ୍‌କେ, ମେଁ ତମ୍ୱୁନ୍ୟା ବାସାଚେ ପସୁ ବିଃଚଙ୍ଗ୍‌ଣ୍ଡ୍ରେନେ ଆଦିପୁରୁଷ୍‌ ଲେଃଗେ । 21 ମେଁନେ ବୟାଁନେ ମ୍ନି ଯୁବଳ, ମେଁ ଡୁମ୍‌ରା ଆରି ବାଉଁସି ପିଃଣ୍ଡ୍ରେଇଂନେ ଆଦିପୁରୁଷ ଲେଃଗେ । 22 ସିଲ୍ଲାନେ ସୁଲୁଏନ୍ୟା ତୁବଳ-କୟିନ ଜନମ୍‌ ଡିଙ୍ଗ୍‌କେ, ମେଁ ପିତଲ୍‌ ବାରି ଲୁହାନେ ବିନ୍‌ ବିନ୍‌ ରକମ୍‌ କାଣ୍ଡା ଆଃରେଣ୍ଡ୍ରେ ଲେଃଗେ; ତୁବଳ କୟିନନେ ନୟମା ମ୍ନିକ୍ନେ ମୁଇଂ ତନା ଲେଃଗେ ।

23 ଲେମକ ମେଁନେ ସେଲାମ୍ବୁଏଃକେ ବାସଙ୍ଗ୍‌କେ,

"ଅ ଆଦା ଆରି ସିଲ୍ଲା, ନେଙ୍ଗ୍‌ ସାମୁଆଁ ଅଁପା, ଅ ଲେମକନେ ସେଲାମ୍ବୁଏଃଇଂ, ପେଇଂ ନେଙ୍ଗ୍‌ ସାମୁଆଁ ଅଁପା,

ମୁଇଂ ରେମୁଆଁ ଆନେଙ୍ଗ୍‌ ବଗ୍‌କେ; ତେସା ନେଙ୍ଗ୍‌ ଆମେକେ ବାଗୁଏଃ ମ୍ୱିକେ । ମୁଇଂ ଙ୍ଗିରେ ଆନେଙ୍ଗ୍‌ ବଗ୍‌କେ ତେସା ନେଙ୍ଗ୍‌ ଆମେକେ ବାଗୁଏଃ ମ୍ୱିକେ ।

24 ଅଃନା ଜଦି କୟିନ ଗୁଏଃକ୍ନେ ପ୍ରତିସଦ୍‌ ଗୁ ଗୁନ୍‌ ଡିଙ୍ଗ୍‌ଏ ।

ତେଲା ଲେମକନେ ପ୍ରତିସଦ୍‌ ସତସ୍ତୁରି ଗୁନ୍‌ ଡିଙ୍ଗ୍‌ଏ ।"

ଶେଥ ଆରି ଈନୋଶ

25 ଆଦମ ଆରି ମୁଇଂତର୍‌ ନିଜର୍‌ ସେଲାମ୍ବୁଏଃ ଏତେ କୁଡ଼େଃମାଡ଼େଃଲା, ମେଁ ମୁଇଂ ଉଂଡେ ଜନମ୍‌ ଆଡିଙ୍ଗ୍‌ଚେ ମେଁନେ ମ୍ନି ଶେଥ ବିଃକେ । ହବା ବାସଙ୍ଗ୍‌କେ, "ପର୍‌ମେସର୍‌ ହେବଲନେ ବାଦୁଲ୍‌ ବାର୍‌ମୁଇଂ ଗଡ଼େଅ ଆନିଂକେ ବିଃବକେ, ଡାଗ୍ଲା କୟିନ ଆମେକେ ବାଗୁଏଃ ବଗେ । 26 ଶେଥନେ ଡିଗ୍‌ ମୁଇଂ ଗଡ଼େଅ ଜନମ୍‌ ଡିଙ୍ଗ୍‌କେ, ଆରି ମେଁ ମେଁନେ ମ୍ନି ଇନୋଶ ବିଃକେ । ଏନ୍‌ ବେଲା ରେମୁଆଁଇଂ ମାପ୍‌ରୁନେ ମ୍ନିରେ ପାର୍‌ତନା ଡିଙ୍ଗ୍‌ନେ ମୁଲେଆର୍‌କେ ।