1 ଯୋଷେଫ ମେଁନେ ଚାକର୍‌ଇଂକେ ଆଦେସ୍‌ ବିଚେ ବାସଙ୍ଗ୍‌କେ, "ଆତେନ୍‌ ରେମୁଆଁଇଂନେ ମୁନାନ୍ୟା ମେଇଂ ଉଡ଼ି ରାଙ୍ଗ୍‌ଡ ୟାଆର୍‌ଏ, ଅଃତେନ୍‌ କିଆଉଁଆଃ ବର୍ତି ଆଡିଙ୍ଗ୍‌ପା ବାରି ମେଇଂନେ ଡାବୁ ଡିଗ୍‌ ମେଇଂନେ ମୁନା ବିତ୍ରେ ବପା । 2 ଡାଆଁ ବୟାଁନେ ମୁନାନ୍ୟା ମେଁନେ ଡାବୁ ସାପା ବର୍ତି ଆଡିଙ୍ଗ୍‌ପା । ବାରି ମେଁନେ ମୁନାନ୍ୟା ନେଙ୍ଗ୍‌ନେ ରୁପା ତାଲି ବପା ।" ଯୋଷେଫ ଆମେଇଂକେ ଡିରକମ୍‌ ବାସଙ୍ଗ୍‌କେ, ମେଇଂ ଟିକ୍‌ ଦେତ୍‌ରକମ୍‌ ଡିଙ୍ଗ୍‌ଆର୍କେ । 3 ବାରି ତାରାକ୍ନେ ଦାପ୍ରେ ଆମେଇଂକେ ମେଇଂନେ ଗଦ ଏତେ ମେଇଂନେ ଦେସ୍‌ ବେବିକେ । 4 ବାରି ଇନି ବାଏରେ ଜାବର୍‌ ସ୍ଲ ୱେଚା ଆଲେଃଆର୍‌ଗେ, ଯୋଷେଫ ନିଜର୍‌ ଚାକର୍‌ଇଂକେ ବାସଙ୍ଗ୍‌କେ, ପେ ତଡ଼୍ୟାପା, ଆତେନ୍‌ ରେମୁଆଁଇଂନେ ପ୍ଲା ପ୍ଲା ୱିର୍‌ ୱେଚେ ଆମେଇଂକେ ସାଚେ ବାସଙ୍ଗ୍‌ପା, ପେଇଂ ପୁରୁସ୍‌କାର୍‌ ବାଦୁଲ୍‌ରେ ମେଃନ୍‌ସା କାରାପ୍‌ କାମ୍‌ ପେଡିଙ୍ଗ୍‌କେ ? 5 ନେ ମାପ୍‌ରୁ ଆତ୍‌ଡାଗ୍ରା ଚଙ୍ଗ୍‌ ମ୍ୟାକେ ବାରି ଆତେନ୍‌ବାନ୍‌ ପାଞ୍ଜି କେମ୍ୟାଃକେ, ଆତେନ୍‌ ଗିନା ଲେଃ ଣ୍ଡୁ ? ଦେକ୍‌ରକମ୍‌ କାମ୍‌ବାନ୍‌ ପେଇଂ ଦସି ଡିଂପେବକେ ।

6 ଯଷେପ୍‌ନେ ଚାକର୍‌ଇଂ ମେଁନେ ସାମୁଆଁ ମାନେଚେ ବାରି ଗଡ଼ା ଆଡ଼ାତ୍ରା ଡେଃଚେ ଆମେଇଂକେ ନୁଆଁଆର୍କେ । ଆତାବାନ୍‌ ଚାକର୍‌ଇଂ ଆମେଇଂକେ ଅବାଚେ ଯୋଷେଫନେ ସାମୁଆଁ ବାସଙ୍ଗ୍‌ଆର୍କେ । 7 ମାତର୍‌ ବୟାଁଇଂ ଆତେନ୍‌ ଚାକର୍‌କେ ବାସଙ୍ଗ୍‌ଆର୍କେ, "ପେନେ ସାକାର୍‌ ଦେକ୍‌ରକମ୍‌ ମେଃନ୍‌ସା ବାସଙ୍ଗ୍‌କେ ? ନେ ଦେକ୍‌ରକମ୍‌ ମେଃଡିଗ୍‌ ନେଡିଙ୍ଗ୍‌କେ ଣ୍ଡୁ । 8 ନେ କିଣାନ ଦେସ୍‌ବାନ୍‌ ପାଙ୍ଗ୍‌ନେଲେଃକେ । ନେନେ ମୁନାଅରିଆ ଲେଃକ୍ନେ ଡାବୁ ଆଣ୍ଡେ ନ୍‌ସା । ତେସା ନେ ମେଃନ୍‌ସା ମେଃଡିଗ୍‌ ସୁନା ବାରି ରୁପା ମାପ୍‌ରୁନେ ଡୁଆବାନ୍‌ ନେଡଙ୍ଗାଏ ? 9 ଜଦି ପେ ଜାନେ ଡିଗ୍‌ ରେମୁଆଁନେ ମୁନାବାନ୍‌ ରୁପା ତାଲି ପେବାଏ, ପେ ଆମେକେ ବାଗୁଏ ପେବିଏ, ବାରି ନେ ବାଃଗାରେ ପେ ସାକାର୍‌ନେ ଚାକର୍‌ଇଂ ନେଡିଙ୍ଗ୍‌ଏ ।" 10 ଚାକର୍‌ ବାସଙ୍ଗ୍‌କେ, "ପେ ମେଃନି ପେବାସଙ୍ଗ୍‌ଏ, ନେ ଦେତ୍‌ରକମ୍‌ ନେଡିଙ୍ଗ୍‌ଏ । ଜା ବାନ୍‌ ଆତେନ୍‌ ରୁପା ତାଲି ନେବାଏ, ତେଲା ଆତେନ୍‌ ରେମୁଆଁ ନେନେ ଚାକର୍‌ ଡିଙ୍ଗ୍‌ଏ । ବାରି ବିନ୍‌ଣ୍ଡ୍ରେଇଂ ନିର୍ଦସ୍‌ ଡିଙ୍ଗ୍‌ଆର୍‌ଏ ।"

11 ଏନ୍‌ ଇଡ଼ିଙ୍ଗ୍‌ ସାପା ବୟାଁଇଂ ମୁନା ସାପା ଆଲ ବଆର୍‌କେ ବାରି ଆତେନ୍‌ ସାପା ତଃଡ଼ାଆର୍କେ । 12 ଯୋଷେଫନେ ଚାକର୍‌ ଆତେନ୍‌ ମୁନାଇଂକେ କେକେ । ମେଁ ମ୍ନା ବୟାଁନେ ମୁନା ସେନୁଗ୍‌ କେକେ, ଦେକ୍‌ରକମ୍‌ ଦାଡ଼ି ବାବ୍‌ରେ ଡାଆଁରେନେ ମୁନା କେକେ । ସାରାସାରି ବିନ୍ୟାମୀନନେ ମୁନାବାନ୍‌ ତାଲିକେ ଅବାକେ । 13 ବୟାଁଇଂ ଜାବର୍‌ ଦୁକ୍‌ ଡିଙ୍ଗ୍‌ଆର୍କେ ବାରି ମେଇଂନେ ସକା ସେକ୍‌ପୁଆଃ ସେଗାର୍‌ ଜଗ୍‌ତ୍ଲାଗ୍‌ ଆର୍କେ । ମେଇଂ ମେଇଂନେ ମୁନାଇଂ ଗଦ ଆଡ଼ାତ୍ରା ତ୍ଲାଗ୍‌ଚେ ଇନିନ୍ୟା ଆଣ୍ଡେ ଆର୍କେ ।

14 ଯିହୁଦା ବାରି ମେଁନେ ବୟାଁଇଂ ଯୋଷେଫନେ ଡୁଆ ୱେଆର୍କେ । ଯୋଷେଫ ଆତ୍‌ଡାଗ୍ରା ଲେଃଗେ । ବୟାଁଇଂ ମେଁନେ ଞ୍ଚ ବୁନ୍ଦେ ଲଃଆର୍କେ । 15 ଯୋଷେଫ ଆମେଇଂକେ ବାସଙ୍ଗ୍‌କେ, "ପେ ମେଃନ୍‌ସା ଦେକ୍‌ରକମ୍‌ ପେଡିଙ୍ଗ୍‌କେ ? ପେ ମେଃନି ମ୍ୟା ପେୟାକେ ଣ୍ଡୁ । ନେଙ୍ଗ୍‌ ସାପା ମ୍ବୁଡ଼ିକ୍ନେ ସାମୁଆଁ ମ୍ୟା ଇଁୟାଏ । ନେ ରକମ୍‌ ରେମୁଆଁ ଡିଡିଲା ଡିଗ୍‌ ପାଞ୍ଜି କେଚେ କେୟାଏ ।" 16 ଆତ୍‌ବା ଯିହୁଦା ବାଲିର୍‌କେ, ନେ ବାରି ମାପ୍‌ରୁନେ ଡାଗ୍ରା ମେଃନି ଉତର୍‌ ନେବିଏ ? ବାରି ମେଃ ସାମୁଆଁ ନେବାସଙ୍ଗ୍‌ଏ ? ବାରି ଡିରକମ୍‌ ନିଜେକେ ନିର୍ଦସ୍‌ ନେଡାଗ୍‌ଏ ? ପର୍‌ମେସର୍‌ ନିଜର୍‌ ଚାକର୍‌ଇଂକେ ଦସି ଆଡିଙ୍ଗ୍‌ବକେ । କେଲା, ନେ ବାରି ଜାଣ୍ଡେବାନ୍‌ ତାଲି ମିଲେ ଲେଃକେ, ନେ ସାପାରେ ମାପ୍‌ରୁନେ ଚାକର୍‌ ନେଡିଙ୍ଗ୍‌ଏ । 17 ମାତର୍‌ ଯୋଷେଫ ବାସଙ୍ଗ୍‌କେ, "ପର୍‌ମେସର୍‌ ଦେକ୍‌ରକମ୍‌ ଆଡିଙ୍ଗ୍‌ଲେଃ ଜେ, ନେଙ୍ଗ୍‌ ଆପେ ସାପାରେକେ ଚାକର୍‌ ଆଡିଙ୍ଗ୍‌ ମ୍ୱଏ, ମାତର୍‌ ଜା ନେଙ୍ଗ୍‌ନେ ତାଲି ଡଙ୍ଗା ବକେ, ମେଁ ନେଙ୍ଗ୍‌ନେ ଚାକର୍‌ ଡିଙ୍ଗ୍‌ଏ । ବିନ୍‌ଣ୍ଡ୍ରେଇଂ ସାନ୍ତିରେ ପେନେ ଆବା ଡାଗ୍ରା ୱିଗ୍‌ଲାପା ।"

18 ଏନ୍‌ ଇଡ଼ିଙ୍ଗ୍‌ ଯିହୁଦା ଯୋଷେଫନେ ଡାଗ୍ରା ୱେଚେ ବାସଙ୍ଗ୍‌କେ, "ଅ ମାପ୍‌ରୁ, ଆନେଙ୍ଗ୍‌ ଇଃତୁଡ଼ା ବାଲିର୍‌ନେ ବିଲା । ଦୟା ଡିଙ୍ଗ୍‌ଚେ ନେଙ୍ଗ୍‌ ଆଡ଼ାତ୍ରା ରିସା ଆଡିଂଗେ । ନେଙ୍ଗ୍‌ ମ୍ୟାଃନ୍‌ଲେ, ନାଁ ଫାରୋନେ ରକମ୍‌ । 19 ମାପ୍‌ରୁ ନିଜର୍ ଦାସ୍‌ଇଂକେ ସାଲ୍ୟାଃକୁକେ, ପେନେ ବୟାଁ ଣ୍ଡୁଲା ଆବା ଲେଃଆର୍‌କେ ଲେଃ ?" 20 ଆତ୍‌ବା ନେ ମାପ୍‌ରୁକେ ନେବାସଙ୍ଗ୍‌କେ,ନେନେ ଆବା ଲେଃକେ, ମେଁ ଡକ୍ରା ରେମୁଆଁ । ବାରି ମେଁନେ ଡକ୍ରାକ୍ନେ ମୁଇଂ ଉଂଡେ ଲେଃକେ, ଆତେନ୍‌ ରେମୁଆଁ ଡାଆଁ । ମାତର୍‌ ମେଁନେ ମ୍ନା ବୟାଁ ଗୁଏଃଲେଃକେ, ମେଁ ମାତର୍‌ ମେଁନେ ଇୟାଙ୍ଗ୍‌ଡେନେ ମୁଇଂ ଆଃ ଉଂଡେ । ଆତେନ୍‌ସା ମେଁନେ ବାଡ଼େ ଆମେକେ ବଲ୍‌ ବା ମ୍ୟାଃକେ । 21 ଏନ୍‌ଇଡ଼ିଙ୍ଗ୍‌ ନାଁ ଆନେକେ ନାବାସଙ୍ଗ୍‌କେ, "ତେଲା ଆତେନ୍‌ ଡାଆଁ ବୟାଁକେ ଆକ୍‌ଡାଗ୍ରା ରାଙ୍ଗ୍‌ପାଙ୍ଗ୍‌ଲାପା, ନେଙ୍ଗ୍‌ କିକେନ୍‌ସା ଚାଏଁ ଣ୍ଡିଂକେ ।" 22 ତେଲା ନେ ମାପ୍‌ରୁକେ ବାସଙ୍ଗ୍‌ନେବଗେ, ନେନେ ଡାଆଁ ବୟାଁ ପାଙ୍ଗ୍‌ ଆୟା ଣ୍ଡୁ । ମେଁ ଆବାକେ ଆନ୍ତାର୍‌ଚେ ପାଙ୍ଗ୍‌ଆୟା ଣ୍ଡୁ । ଜଦି ଆବା ଆମେକେ ଆରେ ବିଏ, ତେଲା ଆବା ଦୁକ୍‌ ଡିଙ୍ଗ୍‌ଚେ ଗୁଏଃୱେଏ । 23 ମାତର୍‌ ନାଁ ଆନେକେ ନାବାସଙ୍ଗ୍‌କେ, ପେ ଜଦି ପେନେ ଡାଆଁ ବୟାଁକେ ରାଙ୍ଗ୍‌ପେପାଙ୍ଗ୍‌, ପେ ଆରି ଅଃନା ଆନେଙ୍ଗ୍‌ ପେକେ ଣ୍ଡୁ । 24 ତେନ୍‌ଇଡ଼ିଂ ନେ ନାନେ ଦାସ୍ ଜେ ନେମ୍ବା, ମେଁ ଡାଗ୍ରା ୱେଚେଃ ଆମେକେ ମାପ୍‌ରୁନେ ଆକେନ୍ ସାପା ସାମୁଆଁ ନେବାସଙ୍ଗ୍‌କେ । 25 ଏନ୍‌ ଇଡ଼ିଙ୍ଗ୍‌ ନେ ଆବା ବାସଙ୍ଗ୍‌କେ, ପେଇଂ ୱେଚେ ଉଡ଼ି କାଦି ନେଃ ନ୍‌ସା ବିଆର୍‌ ରାଙ୍ଗ୍‌ପାଙ୍ଗ୍‌ଲାପା । 26 ବାରି ନେ ଆବାକେ ନେବାସଙ୍ଗ୍‌କେ, "ନେ ନେନେ ଡାଆଁ ବୟାଁ ଣ୍ଡୁଲା ୱେ ନେୟା ଣ୍ଡୁ । ଜଦି ନେନେ ବୟାଁ ନେନେ ଏତେ ୱେ ଆୟା ଣ୍ଡୁ, ତେଲା ଆତେନ୍‌ ରେମୁଆଁନେ ସାର୍ମୁଁଆଃ କେ ନେୟା ଣ୍ଡୁ ।" 27 ଏନ୍‌ଇଡ଼ିଙ୍ଗ୍‌ ନେ ଆବା ଆନେକେ ବାସଙ୍ଗ୍‌କେ, "ପେ ମ୍ୟାଃ ପେଲେଃଗେ, ନେଙ୍ଗ୍‌ନେ ସେଲାମ୍ବୁଏଃ ରାହେଲବାନ୍‌ ମାତର୍‌ ମ୍ୱାକ୍ଲିଗ୍‌ ଉଂ ଜନମ୍‌ ଡିଙ୍ଗ୍‌ଲେଃଗେ । 28 ମୁଇଂ ଉଂ ନେଙ୍ଗ୍‌ବାନ୍‌ ସ୍ଲ ଲାଗ୍‌ଡଗେ । ଆତେନ୍‌ ଦିନ୍‌ବାନ୍‌ ନେଙ୍ଗ୍‌ ଆମେକେ ନ୍ନାକେକେ ଣ୍ଡୁ । ନେଙ୍ଗ୍‌ ବିସ୍‌ବାସ୍‌ ଣ୍ଡିଙ୍ଗ୍‌ଏ, ମେଁ ଡିଲାଡିଗ୍‌ କଣ୍ଡା ପସୁଇଂନେ ବାନ୍‌ ଚିନ୍‌ ଚତୁର୍‌ ଡିଂଚେ ଗୁଏଃଲେଏ । 29 ଜଦି ପେ ନେଙ୍ଗ୍‌ନେ ଉଂ ନେଙ୍ଗ୍‌ବାନ୍‌ ସ୍ଲ ରାଙ୍ଗ୍‌ପେୱେଏ । ବାରି ଜଦି ମେଁନେ ମେଃଡିଗ୍‌ ଡିଙ୍ଗ୍‌ଏ, ତେଲା ନେଙ୍ଗ୍‌ ଦୁକ୍‌ରେ ଗୁଏ ଉଁୱେଏ । 30 ଏବେ ଚିନ୍ତା ଡିଙ୍ଗ୍‌, ମେଃନେ ଡିଙ୍ଗ୍‌ଏ । ଅଃନା ନେନେ ଡାଆଁ ବୟାଁ ଆଲେଃଣ୍ଡୁ, ତେଲା ଆକେନ୍‌ ଙ୍ଗିରେ ମାଲେଃନେ କେଚେ ମେଁ ଅଃତେନ୍‌ବେଲା ଗୁଏଃୱେଏ । ତେଲା ଆତେନ୍‌ ଗଡ଼େଅ ନେ ଆବାନେ ଅମୁଲ୍ୟ ସମ୍ପତି । 31 ନେ ଆବା ମୁଇଂ ଦୁକ୍‌ କସ୍ଟରେ ମ୍ବ୍ରନେ ଡକ୍ରା ରେମୁଆଁ, ମେଁ ଉଡ଼ିବେଲା କେଏ, ବିନ୍ୟାମୀନ୍ ନେ ଏତେ ଣ୍ଡୁ । ବାରି ଆକାନ୍‌ ନେନେ ଦସ୍‌ ଡିଙ୍ଗ୍ଏ । ନେନ୍‌ସା ମେଁ ଦୁକ୍‌ ରେମୁଆଁ ରକମ୍‌ ଗୁଏଃୱେଏ । 32 ନେଙ୍ଗ୍‌ ଆକାନ୍‌ ବୟାଁ ନ୍‌ସା ଦାଇ ଡିଂ ନ୍‌ଲେଃକେ । ନେଙ୍ଗ୍‌ ନେନେ ଆବାକେ ବାଲିର୍‌ ମ୍ୱକେ, ଜଦି ନେଙ୍ଗ୍‌ ବିନ୍ୟାମୀନକେ ସଙ୍ଗେ ରାଙ୍ଗ୍‌ନାୱେ, ତେଲା ମେଁ ଆନେଙ୍ଗ୍‌ ଜିବନ୍‌ ସାରା ଦସି ଆଡିଙ୍ଗ୍‌ଏ । 33 ତେସା ନେଙ୍ଗ୍‌ ଆନାକେ ଗୁଆରି ଡିଙ୍ଗ୍‌ଣ୍ଡିଂକେ, ମାପ୍‌ରୁନେ ଡାଗ୍ରା ଆକେନ୍ ଙ୍ଗିରେନେ ବାଦୁଲ୍ ନାନେ ଦାସ୍ ନିଂ ନାନେ ଦାସ୍ ଡିଂନ୍‌ଲେଃଏ, ମାତର୍ ଆକେନ୍ ଙ୍ଗିରେକେ ବୟାଁଇଂ ଏଃତେ ବେବିଃ । 34 ଜଦି ବିନ୍ୟାମୀନ୍ ନେଙ୍ଗ୍‌ ଏତେ ଆଲେଃ ଣ୍ଡୁ, ତେଲା ନେଙ୍ଗ୍‌ ଆବାନେ ଡାଗ୍ରା ଡିରକମ୍‌ ୱେ ଇଁୟାଏ ? ବାରି ଆବାନେ ମୁଃଡ଼ି ବିପଦ୍‌ ଗଟେଏ, ଆତେନ୍‌ ଡିରକମ୍‌ ନିଂ କିକେ ଇଁୟାଏ ?"