1 ଆରି ଅବ୍ରାମ ନିଜର୍‌ ସେଲାମ୍ବୁଏଃ ବାରି ସାପା ଦନ୍‌ସମ୍ପତି ସାଚେ ଲୋଟ ଏତେ ମିସର୍‌ ଦେସ୍‌ବାନ୍‌ ତାର୍‌ଚେ ମିସର୍‌ନେ ଦକିନ୍‌ ଦିଗ୍‌ ପାକା ୱେଆର୍କେ । 2 ଅବ୍ରାମ ପସୁ ବାରି ସୁନା ରୁପାନ୍ୟା ଜାବର୍‌ ସାକାର୍‌ ଲେଃଗେ । 3 ଅବ୍ରାମ ମେଁନେ ଅଲେଙ୍ଗ୍‌ନେ ଚାଲେ ଲେଃଗେ । ମେଁ ଦକିନ୍‌ବାନ୍‌ ବୈଥେଲ ପାକା ୱେକେ । ମେଁ ବୈଥେଲ ଅୟନେ ମଜେ ଆଣ୍ଡିନେ ଜାଗାନ୍ୟା ସେନୁଗ୍‌ ମେଁନେ ତମ୍ୱୁ ତିଆର୍‌ ଡିଙ୍ଗ୍‌ବଗେ, 4 ଆତେନ୍‌ ଜାଗାନ୍ୟା ୱେଚେ ସେନୁଗ୍‌ ଅବ୍ରାମ ମୁଇଂ ପୁଜା ବେଦି ତିଆର୍‌ ଡିଙ୍ଗ୍‌ବଗେ । ତେସା ଆତ୍‌ଅରିଆ ଅବ୍ରାମ ମାପ୍‌ରୁକେ ପାର୍‌ତନା ଡିଙ୍ଗ୍‌କେ ।

5 ବାରି ଅବ୍ରାମନେ ସାଙ୍ଗ ଲୋଟନେ ଡିଗ୍‌ ଗୁଲୁଏ ମେଣ୍ଡା, ଅରେଃ ବାରି ତମ୍ୱୁ ଲେଃଗେ । 6 ଅବ୍ରାମ ବାରି ଲୋଟ ଆତେନ୍‌ ଦେସ୍‌ନ୍ୟା ମେଇଂ ମୁଇଂଅରିଆ ବାସାନେ ଇକ୍‌ଚା ଆଡିଙ୍ଗ୍‌ଆର୍‌କେ ଣ୍ଡୁ । ଡାଗ୍ଲା ମେଇଂନେ ଜାବର୍‌ ପସୁ ମାନ୍ଦା ଲେଃଗେସା ମେଇଂ ମୁଇଂଅରିଆ ବାସା ଆୟାଆର୍କେ ଣ୍ଡୁ । 7 ଅବ୍ରାମନେ ବାରି ଲୋଟନେ ପସୁ ତୁର୍‌ତ୍ୟାରେ ଏତେ ୱିଙ୍ଗ୍‌ଆଃ ଆର୍କେ । ଆତେନ୍‌ ବେଲା ଆତେନ୍‌ ଦେସ୍‌ନ୍ୟା କିଣାନୀୟ ବାରି ପରିଷୀୟ ରେମୁଆଁଇଂ ବାସା ଲେଆର୍‌ଗେ ।

8 ଏନ୍‌ସା ଅବ୍ରାମ ଲୋଟକେ ବାସଙ୍ଗ୍‌କେ ନେଙ୍ଗ୍‌ ଗୁଆରି ଡିଙ୍ଗ୍‌ଣ୍ଡିଂକେ, ନାଁନେ ନେଙ୍ଗ୍‌ନେ ବିତ୍ରେ, ବାରି ନାଁନେ ପସୁ ତୁର୍‌ତ୍ୟାରେ ବାରି ନେଙ୍ଗ୍‌ନେ ପସୁ ତୁର୍‌ତ୍ୟାରେଇଂନେ ବିତ୍ରେ ୱିଙ୍ଗ୍‌ଆଃରିଙ୍ଗ୍‌ଆ ଆଡିଙ୍ଗ୍‌ଲେ । ଡାଗ୍ଲା ନେ ବୟାଁ । 9 ଆକାନ୍‌ ନିମାଣ୍ଡା ଜେ, ନେ ଅଲ୍‌ଗା ଅଲ୍‌ଗା ବାସାନେ ଉଚିତ୍‌ । ନାଁନେ ଇକ୍‌ଚା ଅନୁସାରେ ଜାଗା ସ୍ରି । ନାଁ ଆଣ୍ଡିନେ ଦିଗ୍‌ ପାକା ନାୱେଏ, ନିଂ ତେନ୍‌ ଉଲ୍‌ଟା ଦିଗ୍‌ ପାକା ଉଁୱେଏ ।

10 ଆତେନ୍‌ ବେଲା ଲୋଟ ପ୍ଲେଗ୍‌ଚେ କେକେ, ସୋୟର ଜାକ ଯର୍ଦ୍ଦନନେ ସାପା ଜାଗା ମାପ୍‌ରୁନେ ଡୁଗ୍‌ଡି ରକମ୍‌ ଜାବର୍‌ ବାବ୍‌ରେ ଣ୍ଡିଆ ଲେଃକେ; ବାରି ମିସର୍‌ ଦେସ୍‌ ରକମ୍‌ ତ୍ନାମ୍ୟାଃକେ, ଡାଗ୍ଲା ଆତେନ୍‌ ବେଲା ସଦୋମ ବାରି ହମୋରା ମାପ୍‌ରୁନେବାନ୍‌ ନସ୍ଟ ଡିଙ୍ଗ୍‌ ଆଲେଗେ । 11 ତେସା ଲୋଟ ଯର୍ଦ୍ଦନ ଆଡ଼ାତ୍ରା ପାକା ସ୍ରିକେ । ଏନ୍‌ ମ୍ୱାୟା ଅଲ୍‌ଗା ଡିଙ୍ଗ୍‌ଆର୍କେ ବାରି ଲୋଟ ପୁର୍ବ ଦିଗ୍‌ ପାକା ୱେକେ । 12 ଅବ୍ରାମ କିଣାନୀୟନେ ଦେସ୍‌ନ୍ୟା ଲେଃଗେ ବାରି ଲୋଟ ଆଡ଼ାତ୍ରା ଇନିନ୍ୟା ବାସା ଲେଃଗେ । ଲୋଟ ସଦୋମ ଜାକ ତମ୍ୱୁ ତିଆର୍‌ ଡିଙ୍ଗ୍‌କେ । 13 ସଦୋମନେ ରେମୁଆଁଇଂ ମୁର୍କ‌ ବାରି ମାପ୍‌ରୁନେ ମ୍ମୁଆଃନ୍ୟା ଜାବର୍‌ ପାପି ଲେଃଆର୍‌ଗେ ।

14 ଏନ୍‌ଇଡ଼ିଂ ଅବ୍ରାମବାନ୍ ଲୋଟ ବିନେ ଡିଂକ୍ନେ ଇଡ଼ିଂ ମାପ୍‌ରୁ ଅବ୍ରାମକେ ବାସଙ୍ଗ୍‌କେ, "ଏବେ ନା ଆଣ୍ଡିଅରିଆ ନାଲାଏଃକେ; ଆତ୍‌ବାନ୍ ଇଲାଙ୍ଗ୍‌ଚେଃ ଉତ୍ତର୍, ଦକିନ୍‌, ପୁରୁବ୍ ଆରି ପସ୍‌ଚିମ୍ ଦିଗ୍ ପାକା କେଲା; 15 ଆଣ୍ଡିନେ ସାପା ଲିଜ ନାଁନେ ସାମ୍‌ନ୍ନାନ୍ୟା ନାଁ କାଲାଆଃ କେନାଡିଙ୍ଗ୍‌, ନେଙ୍ଗ୍‌ ଆତେନ୍‌ ଆନାକେ ବାରି ନାନେ ବଁସ୍‌କୁଲ୍‌କେ ମ୍ୱିଏ । 16 ମଚ୍‌ପୁର୍‌ନ୍ୟା ଦୁଲି ରକମ୍‌ ନେଙ୍ଗ୍‌ ନାନେ ବଁସ୍‌କୁଲ୍‌ ମ୍ନା ଆଡିଙ୍ଗ୍‌ ମ୍ୱିଏ । ଜଦି ଜାଣ୍ଡେ ମଚ୍‌ପୁର୍‌ନେ ଦୁଲି ଏଜା ୟାଏ, ତେଲା ମେଁ ନାନେ ବଁସ୍‌କୁଲ୍‌ନେ ରେମୁଆଁଇଂକେ ଏଜା ୟାଏ । 17 ତେସା ତଃଡ଼ିଆ, ନାଁ ୱେଲା ବାରି ସାପା ଦେସ୍‌ନ୍ୟା ଅଲେଙ୍ଗ୍‌ପା । ଏବେ ନେଙ୍ଗ୍‌ ଏନ୍‌ ଆନାକେ ମ୍ୱିଏ ।" 18 ତେସା ଅବ୍ରାମ ମେଁନେ ତମ୍ୱୁକେ ଅଲ୍‌ଗା ଆଡିଂକେ । ମେଁ ହିବ୍ରୋଣ ଡାଗ୍ରା ମମ୍ରିନେ ଅଲୋନ୍‌ ସ୍ଲାଃ ବୁନ୍ଦେ ୱେଚେ ଆତ୍‌ଅରିଆ ବାସାକେ । ଆତାନ୍ ଜାଗାନ୍ୟା ଅବ୍ରାମ ମାପ୍‌ରୁନେ ପାର୍‌ତନା ନ୍‌ସା ମୁଇଂ ପୁଜା ବେଦି ତିଆର୍‌ ଡିଂକେ ।