ସଦୋମ ହମୋରାନେ ପାପ୍
1 ଆତାନ୍ ଲମ୍ଡିଗ୍ ବେଲା ମ୍ୱାୟା କିତଂନେ ଦୁତ୍ ସଦୋମନ୍ୟା ୱେଚାକେ । ଆତେନ୍ ବେଲା ଲୋଟ ଇନିନେ ଗାଲି ଡାଗ୍ରା କଲେଃଗେ । ମେଁ ଆତାନ୍ ବେଲା କିତଂନେ ଦୁତ୍ଇଂକେ କେକେ, ମେଁ ତଡ଼୍ୟାଚେ ଆମେଇଂକେ ଅବା ନ୍ସା ୱେକେ । ମେଁ ସନ୍ମାନ୍ ବାବ୍ରେ ଆମେଇଂକେ ସାର୍ଲକେ । 2 ଲୋଟ ଆମେଇଂକେ ଗୁଆରେଚେ ବାସଙ୍ଗ୍କେ, "ଅ ନିଂନେ ମାପ୍ରୁଇଂ, ନେଙ୍ଗ୍ନେ ଡୁଆ ପାଙ୍ଗ୍ଲାପା, ନେଙ୍ଗ୍ ପେନେ ସେବା ଣ୍ଡିଙ୍ଗ୍ଏ । ପେଇଂ ଞ୍ଚ ଗୁଏଚଚେ ନେଙ୍ଗ୍ନେ ଡୁଆ ପାଙ୍ଗ୍ଲାପା, ବାରି ଆକ୍ଅରିଆ ମୁଇଂ ମିଡିଗ୍ ଲାଲାପା । ଏନ୍ ଇଡ଼ିଙ୍ଗ୍ ଞ୍ଜିର୍ ତଡ଼୍ୟାଚେ ପେୱିଗ୍ଏ ।" କିତଂନେ ଦୁତ୍ଇଂ ବାସଙ୍ଗ୍ଆର୍କେ, "ଣ୍ଡୁ, ନେ ଏନ୍ ଇନିନେ ବାଏରେ ମିଡିଗ୍ ନେକାଟେଏ ।"
3 ମାତର୍ ଲୋଟ ଆମେଇଂକେ ମେଁନେ ଡୁଆ ୱେ ନ୍ସା ବାରମ୍ୱାର୍ କୁସାମୁତି ଡିଙ୍ଗ୍କେ । ତେସା କିତଂନେ ଦୁତ୍ଇଂ ମେଁନେ ଡୁଆ ୱେ ନ୍ସା ରାଜି ଡିଙ୍ଗ୍ଆର୍କେ । ଲୋଟ ମେଇଂ ଆତ୍ଲା ଖମୀର୍ ଆମିସୁଃକ୍ନେ ରୁଟି ତିଆର୍ ଡିଙ୍ଗ୍ଚେ ଆମେଇଂକେ ଚଙ୍ଗ୍ ନ୍ସା ବିକେ ।
4 ମାତର୍ ମେଇଂ ଡୁଲେଗ୍ନେ ସେନୁଗ୍ ଆତେନ୍ ଇନିନେ ରେମୁଆଁଇଂ, ଅର୍ତାତ୍, ସଦୋମନେ ଙ୍ଗିରେ ବାରି ଡକ୍ରା ସାପା ରେମୁଆଁ ପିତୁର୍ ପାକା ପାଙ୍ଗ୍ଚେ ମେଁନେ ଡୁଆକେ ଗେରେଆର୍କେ । 5 ବାରି ଲୋଟକେ ୱାଚେ ବାସଙ୍ଗ୍କେ, "ଏଃ ମିଡିଗ୍ ଆଣ୍ଡିନେ ରେମୁଆଁଇଂ ପେନେ ଡୁଆ ପାଙ୍ଗ୍ଆର୍କେ, ମେଇଂ ଆଣ୍ଡିକା ? ଆମେଇଂକେ ବାଏରେ ଆଃତାର୍ପା । ନେ ମେଇଂ ଏଃତେ କାରାପ୍ କାମ୍ ନେଡିଂଏ ।"
6 ଆତ୍ବାନ୍ ଲୋଟ ବାଏରେ ପାଙ୍ଗ୍ଚେ କାପାଟ୍ ଆନ୍ତଃଚେ ବାସଙ୍ଗ୍କେ, 7 ଅ ବୟାଁଇଂ, "ନେଙ୍ଗ୍ କୁସାମୁତି ଡିଙ୍ଗ୍ଣ୍ଡିଂକେ, ଦେକ୍ରକମ୍ କାରାପ୍ କାମ୍ ଆଡିଙ୍ଗ୍ପା । 8 କେଲାପା, ନେଙ୍ଗ୍ନେ ଆବିହେକ୍ନେ ମ୍ୱାକ୍ଲିଗ୍ ସେଲା ଲେଃଆର୍କେ । ଆମେଇଂକେ ପେନେ ଡାଗ୍ରା ଡୁଙ୍ଗ୍ପାଙ୍ଗ୍ଣ୍ଡିଙ୍ଗ୍ । ପେନେ ମ୍ମୁଁଆଃନ୍ନିଆ ମେଃନେ ନିମାଣ୍ଡା, ଆତେନ୍ ମେଇଂନେ ଏତେ ଡିଙ୍ଗ୍ପା । ମାତର୍ ଆତେନ୍ ରେମୁଆଁଇଂକେ ମେଃଡିଗ୍ ଆଡିଙ୍ଗ୍ପା । ମେଃଡାଗ୍ଲା ମେଇଂ ନିଂନେ କୁଲାରେ ଆରି ନିଂନେ ଡୁଆ ମେଇଂ ପୁଣ୍ଡେନେ ଜାଗା ଡୁଙ୍ଗ୍ଡବଆର୍କେ ।"
9 ଆତେନ୍ ବେଲା ମେଇଂ ବାସଙ୍ଗ୍ଆର୍କେ, ଗୁଚେ ୱେଲା । ବାରି ବାସଙ୍ଗ୍ଆର୍କେ, ଏନ୍ ରେମୁଆଁ ଲୋଟ ନେଇଂନେ ବିତ୍ରେ ବାସାନେ ପାଙ୍ଗ୍ଚେ ନେନେ ବିଚାର୍ କର୍ତା ଡିଙ୍ଗ୍ନେ ଚାଏଁ ଡିଙ୍ଗ୍କେ, ଏବେ ମେଇଂନେବାନ୍ ନାଁ ଆଡ଼ାତ୍ରା ଜାବର୍ କରାପ୍ ବେବଆର୍ ନେଡିଙ୍ଗ୍ଏ । ଆତ୍ବାନ୍ ମେଇଂ ଆତାନ୍ ଲୋଟ ଆଡ଼ାତ୍ରା ବପୁ ବେବଆର୍ ଡିଂଚେ କାପାଟ୍ ପାକ୍ଚି ନ୍ସା ୱେଆର୍କେ । 10 ମାତର୍ ଆତେନ୍ ମ୍ୱାୟା ରେମୁଆଁ ଲୋଟନେ ନ୍ତି ସାଚେ ଡୁଆ ବିତ୍ରେ ଗୁଃ ଡୁଙ୍ଗ୍ଗାଚେ କାପାଟ୍ ଆନ୍ତଃ ବିଃଆର୍କେ । 11 ଏନ୍ ଇଡ଼ିଙ୍ଗ୍ ବାଏରେ ଲେଃକ୍ନେ ସାପା ଙ୍ଗିରେ ବାରି ଡକ୍ରାଇଂକେ କାନା ଆଃଡିଙ୍ଗ୍ବିଃଆର୍କେ; ତେସା ଆତେନ୍ ରେମୁଆଁଇଂ ଡୁଆନେ ଗାଲି ଆଅବା ଆର୍କେ ।
ଲୋଟ ସଦୋମ ଇନି ଆନ୍ତାର୍କେ
12 ଆତେନ୍ ମ୍ୱାୟା ଲୋଟକେ ବାସଙ୍ଗ୍ଆର୍କେ, "ନାଁ ପରିବାର୍ନେ ବିନ୍ନେ ଜା ଡିଗ୍ ଏନ୍ ଇନିନ୍ୟା ବାସା ଲେଃଆର୍କେ କି ? ଙ୍ଗିର୍ବୁଏଃଅ, ସେଲାମ୍ବୁଏଃଅ ଆରି ମାଚୁଆଉଂ ନାନେ ଗୁଲୁଏ ଉଡ଼ି ରେମୁଆଁ ଏନ୍ ଇନିନ୍ୟା ଲେଃଆର୍କେ, ତେନ୍ ସାପାରେକେ ଏନ୍ ଜାଗାବାନ୍ ଡୁଙ୍ଗ୍ୱେଲା । 13 ନେ ଏବେ ଏନ୍ ଇନିକେ ଦଂସ ନେଡିଂଏ । ମେଃଡାଗ୍ଲା ମାପ୍ରୁ ପର୍ମେସର୍ ମ୍ୟାଲେଃଗେ, ଏନ୍ ଇନି ଉଡ଼ି କରାପ୍ ଡିଂଲେଃକେ, ଏନ୍ସାଃ ମାପ୍ରୁ ଏନ୍ ଇନିକେ ଦଂସ ଆଡିଙ୍ଗ୍ ନ୍ସା ଆନେକେ ବେବକେ ।"
14 ତେସା ଲୋଟ ବାଏରେ ୱେଚେ ମେଇଂନେ ମାଚୁଆଉଂଇଂକେ ବାସଙ୍ଗ୍କେ, "ଦାପ୍ରେ ଏନ୍ ଇନି ଆନ୍ତାର୍ପା । ପର୍ମେସର୍ ଦାପ୍ରେ ଏନ୍ ଇନି ଦଂସ ଆଡିଙ୍ଗ୍ଏ ।" ମାତର୍ ଆତେନ୍ ରେମୁଆଁଇଂ ବାବେଆର୍କେ, ଲୋଟ ମେଇଂନେ ଏତେ ଟାକ୍ରିଆ ଡିଂକେ ।
15 ବାର୍ମୁଇଂ ଦିନ୍ ତାରାଃଲା, ଦୁତ୍ଇଂ ଲୋଟକେ ତାନ୍ଦ୍ରା ଆଡିଙ୍ଗ୍ଚେ ବାସଙ୍ଗ୍କେ, ତଃଡ଼ିଆଃ, ନାଁନେ ସେଲାମ୍ବୁଏଃ ବାରି ମ୍ୱାକ୍ଲିଗ୍ ସେଲାମ୍ବଃଅ ଏତେ ଆକାନ୍ ଜାଗା ଆନ୍ତାର୍ବି, ଣ୍ଡୁଲା ଇନିନେ ଡଣ୍ଡ୍ଅରିଆ ନସ୍ଟ ଡିଙ୍ଗ୍ଏ । 16 ଏଲେଡିଗ୍ ଲୋଟ ଆଃତଙ୍ଗାର୍କେ, ଆତ୍ବାନ୍ ମେଁନେ ଆଡ଼ାତ୍ରା ମାପ୍ରୁ ଦୟା ଡିଙ୍ଗ୍ଲା, କିତଂନେ ଦୁତ୍ଇଂ ଲୋଟକେ ବାରି ମେଁନେ ସେଲାମ୍ବୁଏଃକେ ବାରି ମ୍ୱାକ୍ଲିଗ୍ ସେଲାମ୍ବଃଅଇଂନେ ନ୍ତି ସାଚେ ଆମେଇଂକେ ଇନିନେ ବାଏରେ ୱାରାଙ୍ଗ୍ୱେକେ । 17 ଦେକ୍ରକମ୍ ଆମେଇଂକେ ବାଏରେ ଆତାର୍ଚେ ଡୁଙ୍ଗ୍ପାଙ୍ଗ୍କ୍ନେ ଇଡ଼ିଙ୍ଗ୍ ଦୁତ୍ଇଂନେ ବିତ୍ରେବାନ୍ ମୁଇଂଜା ଲୋଟକେ ବାସଙ୍ଗ୍କେ, ଜିବନ୍ ଆମ୍ୱ୍ର ନ୍ସା ଲାଗ୍ଡଲାପା । ପ୍ଲା ପାକା ପ୍ଲେଗ୍ଚେ ଆକେଗ୍ପା ବାରି ଏନ୍ ଇନି ପାକାପାକି ଆଲେଃଗ୍ପା, କଣ୍ଡା ଆଡ଼ାତ୍ରା ଲାଗ୍ଡଲାପା, ଣ୍ଡୁଲା ଏନ୍ ନଗର୍ ଏତେ ପେ ଡିଗ୍ ଦଂସ ପେଡିଙ୍ଗ୍ଏ ।
18 ଆତ୍ବାନ୍ ଲୋଟ ବାସଙ୍ଗ୍କେ, ଅ ନେଙ୍ଗ୍ନେ ମାପ୍ରୁ, ଦେକ୍ରକମ୍ ଆଡିଙ୍ଗ୍ଲେ; 19 ଏବେ ଏନ୍ ଦାସ ଆଡ଼ାତ୍ରା ଲିବିସ ବାରି ଦୟା ଡିଙ୍ଗ୍ଚେ ଜିବନ୍ ରକ୍ୟା ପେଡିଙ୍ଗ୍ଲା, ଇଙ୍ଗ୍ଚାଃ ବିପଦ୍ ଗଟେଲା ନେଙ୍ଗ୍ କଣ୍ଡା ଆଡ଼ାତ୍ରା ଲାଗ୍ଡନେ ସେନୁଗ୍ ଗୁଏଃ ଉଁୱେଏ । 20 କେଲାପା, ଏନ୍ ଜାଗା ବିତ୍ରେ ମୁଇଂ ଡାଆଁ ଇନି ଲେଃକେ । ପେ ଆନେଙ୍ଗ୍ ଆତାନ୍ ଜାଗାନ୍ୟା ଲାଗ୍ଡ ନ୍ସା ଆଦେସ୍ ବିଃଲାପା । ନେଙ୍ଗ୍ ଆତ୍ଡାଗ୍ରା ମାବ୍ଟକୁଟା ବାସା ନ୍ଲେଃଏ । ଆତେନ୍ କି ଡାଆଁ ଣ୍ଡୁ ?
21 କିତଂନେ ଦୁତ୍ ଲୋଟକେ ବାସଙ୍ଗ୍କେ, "ନିମାଣ୍ଡା, ନେ ଆନାକେ ଆଦେସ୍ ନେବିକେ । ନେଙ୍ଗ୍ ଆତେନ୍ ଇନିକେ ଦଂସ ନାଡିଙ୍ଗ୍ ଣ୍ଡୁ । 22 ନାଁ ଦାପ୍ରେ ଆତେନ୍ ଜାଗାନ୍ୟା ଲାଗ୍ଡଲା, ଉଃଡ଼ିବେଲା ଜାକ ପେଇଂ ଆତ୍ଅରିଆ ପେୱେଚା ଣ୍ଡୁ, ନେଙ୍ଗ୍ ସଦୋମକେ ଦଂସ ନାଡିଙ୍ଗ୍ ଣ୍ଡୁ ।" ଆତେନ୍ ଇନିନେ ମ୍ନି ଲେଃଗେ ସୋୟର । ଡାଗ୍ଲା ଏନ୍ ଜାବର୍ ଡାଆଁ ଲେଃଗେ ।
ସଦୋମ ବାରି ହମୋରା ଦଂସ ଡିଙ୍ଗ୍କେ
23 ସ୍ନି ତାର୍କ୍ନେ ଇଡ଼ିଙ୍ଗ୍ ଲୋଟ ସୋୟର ଇନିନ୍ୟା ୱେଚାଆର୍କେ । 24 ତେଲା ମାପ୍ରୁ କିତଂବାନ୍ ମାପ୍ରୁନେ ଡାଗ୍ରାବାନ୍ ସଦୋମ ବାରି ହମୋରା ଆଡ଼ାତ୍ରା ଗନ୍ଧକ ବାରି ସୁଆ ଆଗୁର୍କେ । 25 ଆତେନ୍ ସାପା ଇନି ଆରି ଇନିନେ ପାକାପାକି ଆରି ଆତେନ୍ ବିତ୍ରେନେ ରେମୁଆଁ ବାରି ଆତେନ୍ ତୁବଃନ୍ୟା ଜନମ୍ ଡିଙ୍ଗ୍କ୍ନେ ସାପା ଜିନିସ୍ ଦଂସ ଆଃଡିଂକେ । 26 ମାତର୍ ଲୋଟନେ ସେଲାମ୍ବୁଏଃ ପ୍ଲାପାକା ଆଣ୍ଡେ କେଲା ମେଁ ବିତିଗ୍ କୁଟ୍ ଡିଙ୍ଗ୍କେ ।
27 ବାରି ଅବ୍ରହାମ୍ ଞ୍ଜିର୍ନୁଗ୍ ତଡ଼୍ୟାଚେ ଅଃସେ ଆଣ୍ଡିନେ ଜାଗାନ୍ୟା ମାପ୍ରୁନେ ଡାଗ୍ରା ତୁଆଁଲେଃଗେ, ଆତେନ୍ ଜାଗାନ୍ୟା ତୁଆଁକେ । 28 ସଦୋମ ଆରି ହମୋରା ବାରି ପାକାପାକି ସାପା ଏରିଆ ଆଡ଼ାତ୍ରା କେଲା, ଆତେନ୍ ଦେସ୍ନେ ବାଟିନ୍ୟା ମାଃସ ତାର୍କେ ରକମ୍ ମାଃସ ତାର୍ନେ କେକେ । 29 ଦେକ୍ରକମ୍ ଆତେନ୍ ପାକାପାକି ଇନି ଦଂସ ବେଲା ପର୍ମେସର୍ ଅବ୍ରହାମ୍କେ ମନେ ତ୍ଲାଗ୍କେ । ବାରି ଲୋଟ ଆଣ୍ଡି ଆଣ୍ଡିନେ ଇନିନ୍ୟା ବାସା ଲେଃଗେ । ଆତେନ୍ ଇନି ଦଂସ ଆଡିଙ୍ଗ୍ନେ ବେଲା ମେଁ ଲୋଟକେ ଆତେନ୍ ବିତ୍ରେବାନ୍ ଆଃତାର୍ ବିକେ ।
ମୋୟାବୀୟ ଆରି ଅମ୍ମୋନୀୟଇଂନେ ତାର୍ନେ
30 ଲୋଟ ସୋୟରନ୍ୟା ଲେଃନ୍ସା ବୁଟମେଗ୍କେ । ତେସା ମେଁ ବାରି ମେଁନେ ମ୍ୱାକ୍ଲିଗ୍ ସେଲାମ୍ବଃଅଇଂ ଏଃତେ ଲେଃନ୍ସା କଣ୍ଡା ଆଡ଼ାତ୍ରା ଲାଗ୍ଡଆର୍କେ, ମେଇଂ ଆତ୍ଅରିଆ ମୁଇଂ ପାର୍ଅରିଆ ବାସାଆର୍କେ । 31 ମେଃସୁଆ ମ୍ନା ତନାଣ୍ଡେ ମେଁନେ ଡାଆଁ ତନାଣ୍ଡେକେ ବାସଙ୍ଗ୍କେ, "ନେନେ ଆବା ଡକ୍ରା, ବାରି ସଂସାର୍ନ୍ୟା ଆନେକେ ବିବା ଡିଙ୍ଗ୍ ନ୍ସା ଜାଡିଗ୍ ମୁଇଂଜା ଡିଗ୍ ଣ୍ଡୁ । 32 ପାଙ୍ଗ୍ଲା, ନେ ଆବାକେ ଅଙ୍ଗୁର୍ରସ୍ ଆଉଗ୍ଚେ ଆବାନେ ବଂସ ରକ୍ୟା ଆଡିଂନ୍ସା ମେଁ ଏତେ ନେଃଡୁଲେଗ୍ । 33 ଆତ୍ବା ଆତେନ୍ ମିଡିଗ୍ ମେଇଂ ନିଜର୍ ଆବାକେ ଅଙ୍ଗୁର୍ରସ୍ ଆଉଗ୍ଚେ ମ୍ନା ଉଂଡେ ତଡ଼୍ୟା ୱେଚେ ଆବା ଏତେ ଡୁଲେଗ୍କେ, ମାତର୍ ମେଁ ଡୁଲେଗ୍ଚେ ତଡ଼୍ୟା ୱେକ୍ନେ ଲୋଟ ମ୍ୟାଃ ଆୟାକେ ଣ୍ଡୁ ।"
34 ବାର୍ମୁଇଂ ଦିନା ମ୍ନା ତନାଣ୍ଡେ ଡାଆଁ ତନାଣ୍ଡେକେ ବାସଙ୍ଗ୍କେ, କେଲା, ନେଙ୍ଗ୍ ତୁଗୁଆ ମିଡିଗ୍ ଆବାନେ ଏତେ ଣ୍ଡୁଲେଗ୍କେ । ପାଙ୍ଗ୍ଲା, ହେଃ ମିଡିଗ୍ ଡିଗ୍ ଆବାକେ ଅଙ୍ଗୁର୍ରସ୍ ନେଃରାଉଗ୍, ଆତ୍ବା ନାଁ ଆବାନେ ବଂସ ରକ୍ୟା ନ୍ସା ମେଁନେ ଏତେ ଡୁଲେଗ୍ । 35 ଆତ୍ବା ମେଇଂ ଆତେନ୍ ମିଡିଗ୍ ଡିଗ୍ ଆବାକେ ଅଙ୍ଗୁର୍ରସ୍ ଆଉଗ୍ଲା, ଡାଆଁ ତନା ତଡ଼୍ୟା ୱେଚେ ଆବାନେ ଏତେ ଡୁଲେଗ୍କେ, ମାତର୍ ମେଁ ଡୁଲେଗ୍ଚେ ତଡ଼୍ୟା ୱେକ୍ନେ ଲୋଟ ମ୍ୟାଃ ଆୟାକେ ଣ୍ଡୁ । 36 ଦେକ୍ ରକମ୍ ଲୋଟନେ ମ୍ୱାକ୍ଲିଗ୍ ସେଲାମ୍ବଃଅ ଗାଗ୍ଡ଼େ ଆର୍କେ । 37 ମ୍ନା ସେଲାମ୍ବଃଅ ମୁଇଂ ଗଡ଼େଅ ଜନମ୍ ଆଃଡିଂଚେ ମେଁନେ ମ୍ନି ମୋୟାବ ବିକେ; ମେଁ ଏବେନେ କାଲ୍ନେ ମୋୟାବୀୟ ରେମୁଆଁଇଂନେ ଆଦିଆବା । 38 ବାରି ଡାଆଁ ସେଲାମ୍ବଃଅ ଗଡ଼େଅ ଜନମ୍ ଆଡିଙ୍ଗ୍ଚେ ମେଁନେ ମ୍ନି ବିନ-ଅମ୍ମି ବିକେ; ମେଁ ଏବେନେ କାଲ୍ନେ ଅମ୍ମୋନୀୟ ରେମୁଆଁଇଂନେ ଆଦିଆବା ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)