1 ଆତେନ୍‌ ବେଲା ଯୋଷେଫ ନିଜର୍‌ ଆବାନେ ସାର୍ମୁଆଃନ୍ନିଆ ସାର୍ମୁଆଃ ବିଚେ ଅଃଚେ ବଏନ୍ତାକେ । 2 ଯୋଷେଫ ମେଁନେ ଡିସାରିଇଂକେ ମେଁନେ ଆବାନେ ଗାଗ୍‌ଡ଼େକେ ଆତିନ୍‌ସା ତିଆର୍‌ ଡିଙ୍ଗ୍‌ନ୍‌ସା ଆଦେସ୍‌ ବିକେ । ମେଇଂ ଇସ୍ରାଏଲ୍‌ନେ ଗାଗ୍‌ଡ଼େକେ ମିଶରୀୟ ରକମ୍‌ ତିଆର୍‌ ଡିଙ୍ଗ୍‌ଆର୍‌କେ । 3 ମିସର୍‌ନେ ରେମୁଆଁଇଂ ମେଁନ୍‌ସା ସତୁରି ଦିନ୍‌ ଜାକ ଦୁକ୍‌ ଡିଂଆର୍କେ । ଗାଗ୍‌ଡ଼େ ଜଗ୍‌ତ୍ଲାଗ୍‌ ନ୍‌ସା ତିଆର୍‌ ଡିଙ୍ଗ୍‌ନେ ଚାଲିସ୍‌ ଦିନ୍‌ ଡିଙ୍ଗ୍‌ଲା ଡାକେ ।

4 ଏନ୍‌ ସତୁରି ଦିନ୍‌ ଇଡ଼ିଙ୍ଗ୍‌ କେଡ଼େସ ଦିନ୍‌ ଡାକେ । ତେସା ଯୋଷେଫ ଫାରୋନେ ରେମୁଆଁଇଂକେ ବାଲିର୍‌କେ, "ପେ ଜଦି ନେଙ୍ଗ୍‌ନେ ମଙ୍ଗଲ୍‌ ବାବେ ପେଡିଙ୍ଗ୍‌କେ, ଦୟା ଡିଙ୍ଗ୍‌ଚେ ଫାରୋକେ ବାସଙ୍ଗ୍‌ପା । 5 ନେଙ୍ଗ୍‌ ଆବା ଆନେଙ୍ଗ୍‌ ପାର୍‌ମାନ୍‌ ଆଡିଙ୍ଗ୍‌ଚେ ବାଲିର୍‌ବକେ, ନେ ନେଗୁଏଲା, କିଣାନ ଦେସ୍‌ନ୍ୟା ନିଜର୍‌ ନ୍‌ସା ଆଣ୍ଡିନେ କୁରୁ ଗଃନେବକେ, ଆତ୍‌ଡାଗ୍ରା ଆନେକେ ଆତି ଆର୍‌ଏ । ଏନ୍‌ସା ଏବେ ଆନେଙ୍ଗ୍‌ ୱିଗ୍‌ ନ୍‌ସା ବିଲାପା । ନେଙ୍ଗ୍‌ ଆବାକେ ଆତି ବିଚେ ବାରି ମୁଇଂତର୍‌ ମ୍ପାଙ୍ଗ୍‌ଏ ।"

6 ଆତ୍‌ବା ଫାରୋ ବାସଙ୍ଗ୍‌କେ, ୱେଲା, ନାଁ ଆବା ଆନାକେ ଆଣ୍ଡିନେ ପାର୍‌ମାନ୍‌ ଆଡିଙ୍ଗ୍‌ବକେ, ନାଁ ଦେତ୍‌ରକମ୍‌ ଆମେକେ ଆତିବି ।

7 ତେସା ଯୋଷେଫ ନିଜର୍‌ ଆବାକେ ଆତିବି ନ୍‌ସା ୱେକେ । ଆତ୍‌ବା ଫାରୋନେ ଚାକର୍‌ଇଂ ବାରି ମେଁନେ ଡୁଆନେ ମ୍ନା ରେମୁଆଁଇଂ ବାରି ମିସର୍‌ ଦେସ୍‌ନେ ମ୍ନା ରେମୁଆଁଇଂ ଯୋଷେଫନେ ଏତେ ୱେଆର୍କେ । 8 ଯୋଷେଫନେ ପରିବାର୍‌ ସାପା ରେମୁଆଁ ମେଁନେ ବୟାଁଇଂ ବାରି ମେଁନେ ଆବାନେ ସାପା ବଂସ ମେଁନେ ଏତେ ୱେଆର୍କେ । ଗୋଶନନ୍ୟା ଅରେଃ ଗିମିଃ ରାସି ବାରି ଗଡ଼େଇଂକେ ଆନ୍ତାର୍‌ଚେ ୱେଆର୍କେ । 9 ମେଁନେ ସଙ୍ଗେ ରତ୍‌ ବାରି ଗଡ଼ା ଚାଲେଣ୍ଡ୍ରେ ୱେଆର୍କେ । ମେଁନେ ଏତେ ମ୍ନା କୁକପାର୍‌ ଡିଙ୍ଗ୍‌କେ ।

10 ଆରି ମେଇଂ ଯର୍ଦ୍ଦନ ପାକାପାକି ଆଟଦର କଳାନ୍ୟା ୱେଚାଚେ, ଜାବର୍‌ ମନେ ତ୍ଲାଗ୍‌ଚେ ଅଃଆର୍କେ । ଯୋଷେଫ ଆତ୍‌ଡାଗ୍ରା ନିଜର୍‌ ଆବା ନ୍‌ସା ଗୁ ଦିନ୍‌ ଜାକ ଦୁକ୍‌ ଡିଂକେ । 11 ବାରି ଆତେନ୍‌ ଦେସ୍‌ ବାସାକ୍ନେ କିଣାନିୟ ରେମୁଆଁଇଂ ଆଟଦର ଖଳାନ୍ନିଆ ମେଇଂନେ ଦେକ୍‌ରକମ୍‌ କିଡ଼େସଃ ଲେଃନେ କେଚେ ବାଲିର୍‌ଆର୍କେ, ମିଶରିୟଇଂନେ ଏନ୍‌ ଜାବର୍‌ ବୟଙ୍କାର୍‌ ଦୁକ୍‌ । ତେସା ଯର୍ଦ୍ଦନ ପାକାପାକି ଆତେନ୍‌ ଜାଗା ଆବେଲ୍‌ ମିସର ମ୍ନିରେ ଉଡ୍ରା ଡିଙ୍ଗ୍‌କେ ।

12 ଆରି ଯାକୁବ ନିଜର୍‌ ଉଂଣ୍ଡେଇଂ ଡିରକମ୍‌ ଆଦେସ୍‌ ବିବକେ, ମେଇଂ ମେଇଂନେ ଆଡ଼ାତ୍ରା ଦେତ୍‌ରକମ୍‌ ଡିଙ୍ଗ୍‌ଆର୍କେ । 13 ଯାକୁବନେ ଉଂଣ୍ଡେଇଂ ଆମେକେ କିଣାନ ଦେସ୍‌ନ୍ୟା ରାଙ୍ଗ୍‌ୱେଚେ ମକ୍‌ପେଲା ଲିଜନେ ଗୁହାନ୍ୟା ଆତି ବିଃଆର୍କେ । ମମ୍ରି ଡାଗ୍ରା ଆତେନ୍‌ ଗୁହା ଲିଜ ରାଚ୍ୟା ଲିଜ ରକମ୍‌ ଇଫ୍ରୋଣ ବାରି ହିତ୍ତୀୟବାନ୍‌ ଅବ୍ରହାମନେ ବାନ୍‌ ବିଆର୍‌ ବଆର୍‌କେ । 14 ଯୋଷେଫ ନିଜର୍‌ ଆବାକେ ଆତିବି ଆଡାକ୍ନେ ଇଡ଼ିଙ୍ଗ୍‌ ମେଁ ମେଁନେ ବୟାଁଇଂ ବାରି ମେଁନେ ଏତେ ୱେଲେଃକ୍ନେ ସାପା ରେମୁଆଁ ମିସର୍‌ ଆଣ୍ଡେଆର୍କେ ।

15 ଯାକୁବ ଗୁଏକ୍ନେ ଇଡ଼ିଙ୍ଗ୍‌, ଯୋଷେଫନେ ବୟାଁଇଂ ତେରେପେତେ ଡିଙ୍ଗ୍‌ଆର୍କେ । ମେଇଂ ବୁଟମେଗ୍‌ ଆର୍କେ ଜେ ସେନୁଗ୍‌ ନେ ଯୋଷେଫକେ ଡିରକମ୍‌ ଡିଙ୍ଗ୍‌ନେବକେ । ମେଇଂ ବାସଙ୍ଗ୍‌ଆର୍କେ, "ଯୋଷେଫ ଆନେକେ ଇଞ୍ଚେଏ, ବାରି ମେଁନେ ବାଦୁଲ୍‌ ଆନେକେ ବିଏ ।" 16 ତେସା ମେଁନେ ବୟାଁଇଂ ଯୋଷେଫନେ ଡାଗ୍ରା ବାସଙ୍ଗ୍‌ ବେଆର୍କେ । ନାଁ ଆବା ଗୁଏନେ ସେନୁଗ୍‌ ବାସଙ୍ଗ୍‌ବକେ, ପେଇଂ ଯୋଷେଫକେ ଏନ୍‌ ସାମୁଆଁ ପେବାସଙ୍ଗ୍‌ଏ । 17 ଯୋଷେଫକେ ବାଲିର୍‌ପା, "ନାବୟାଁଇଂ ନାଁ ଆଡ଼ାତ୍ରା କରାପ୍‌ କାମ୍‌ ଡିଙ୍ଗ୍‌ବଆର୍କେ । ମାତର୍‌ ନାଁ ଦୟା ଡିଙ୍ଗ୍‌ଚେ ଆମେଇଂକେ ଆତେନ୍‌ ଅଦରମ୍‌ ବାରି ପାପ୍‌ କେମା ଡିଙ୍ଗ୍‌ ।" ଏନ୍‌ସା ନେ କୁସାମୁତି ଡିଙ୍ଗ୍‌ନେଡିଙ୍ଗ୍‌କେ, ନାଁ ପେମ୍ବାନେ ପର୍‌ମେସର୍‌ନେ ଚାକର୍‌ଇଂକେ ଅଦରମ୍‌ କେମା ଡିଙ୍ଗ୍‌ । ମେଇଂ ଏନ୍‌ ବାଲିର୍‌ନେ ବେଲା ଯୋଷେଫ ଅଃନେ ମୁଲେଃକେ ।

18 ମେଁନେ ବୟାଁଇଂ ମେଁନେ ଡାଗ୍ରା ୱେଆର୍କେ, ବାରି ଆମେକେ ସାର୍‌ଲ ଆର୍କେ । ମେଇଂ ଆମେକେ ବାସଙ୍ଗ୍‌ଆର୍କେ, "ନେ ନାନେ ଚାକର୍‌ ନେଡିଙ୍ଗ୍‌ଏ ।"

19 ଏନ୍‌ ଇଡ଼ିଙ୍ଗ୍‌ ଯୋଷେଫ ଆମେଇଂକେ ବାସଙ୍ଗ୍‌କେ, "ଆବ୍‌ଟଗେପା । ନେଙ୍ଗ୍‌ ପର୍‌ମେସର୍‌ ଣ୍ଡୁ । ନେଙ୍ଗ୍‌ନେ ଡଣ୍ଡ୍‌ ବିନେ ଅଦିକାର୍‌ ଣ୍ଡୁ । 20 ଏନ୍‌ ସତ୍‌ ଜେ ପେଇଂ ନେଙ୍ଗ୍‌ ବିରଦ୍‌ରେ କରାପ୍‌ ଚିନ୍ତା ଡିଙ୍ଗ୍‌ପେବକେ । ମାତର୍‌ ସତ୍‌ରେ ପର୍‌ମେସର୍‌ନେ ଚିନ୍ତା ନିମାଣ୍ଡା ଲେଃଗେ । ପର୍‌ମେସର୍‌ ଚିନ୍ତା ଡିଙ୍ଗ୍‌ବକେ ଜେ ମେଁ ନେଙ୍ଗ୍‌ ବାନ୍‌ ଜାବର୍‌ ଜିବନ୍‌ ରକ୍ୟା ଡିଙ୍ଗ୍‌ଏ । ବାରି ଆତେନ୍‌ସା ଦେକ୍‌ରକମ୍‌ ଡିଙ୍ଗ୍‌କେ । 21 ତେସା ଆବ୍‌ଟଗେପା । ନେଙ୍ଗ୍‌ ପେନେ ବାରି ପେ ଉଂଣ୍ଡେଇଂନେ ଜତନ୍‌ ଣ୍ଡିଙ୍ଗ୍‌ଏ ।" ଦେକ୍‌ରକମ୍‌ ଯୋଷେଫ ମେଁନେ ବୟାଁଇଂ ନିମାଣ୍ଡା ବ୍ନାସା ବାସଙ୍ଗ୍‌ଆର୍‌କେ । ଦେକ୍‌ରକମ୍‌ ବ୍ନାସାରେ ମେଁ ମେଁନେ ବୟାଁଇଂକେ ସାନ୍ତି ଆଡିଙ୍ଗ୍‌କେ ।

22 ଯୋଷେଫ ମେଁନେ ଆବାନେ ପରିବାର୍‌ ଏତେ ମିସର୍‌ନ୍ୟା ଲେଃଆର୍‌ଗେ । ଯୋଷେଫକେ ଉଡ଼ିବେଲା ସ‍ଏ ଦସ୍‌ ମୁଆଁ ଡିଙ୍ଗ୍‌କେ, ତେଲା ମେଁ ଗୁଏଃକେ । 23 ଯୋଷେଫ ଇଫ୍ରୟିମନେ ଞ୍ଜି ପିଡ଼ି ଜାକ ଗଗିସିଆ କେକେ । ଯୋଷେଫ ମନଃଶିନେ ମାଖୀର ମ୍ନିକ୍ନେ ଉଂଣ୍ଡେନେ ଗଡ଼େଅକେ କଃକେ । 24 ଏନ୍‌ ଇଡ଼ିଙ୍ଗ୍‌ ଯୋଷେଫ ମେଁନେ ବୟାଁଇଂକେ ବାସଙ୍ଗ୍‌କେ, "ନେଙ୍ଗ୍‌ ଗୁଏଃଣ୍ଡିଙ୍ଗ୍‌କେ, ମାତର୍‌ ପର୍‌ମେସର୍‌ ଡିଲାଡିଗ୍‌ ପେଇଂନେ ଜତନ୍‌ ଡିଙ୍ଗ୍‌ଏ । ଏନ୍‌ ଇଡ଼ିଙ୍ଗ୍‌ ଏନ୍‌ ଦେସ୍‌ବାନ୍‌ ଆପେକେ ଆଃତାର୍‌ଚେ ରାଙ୍ଗ୍‌ଡଏ, ବାରି ଆଣ୍ଡିନେ ଦେସ୍‌ ବିଃନ୍‌ସା ମେଁ ଅବ୍ରହାମ, ଇସ୍‌ହାକ ବାରି ଯାକୁବନେ ଡାଗ୍ରା ପାର୍‌ମାନ୍‌ ଡିଙ୍ଗ୍‌ବକେ, ଆତେନ୍‌ ଦେସ୍‌ନ୍ୟା ଆପେକେ ୱା ରାଙ୍ଗ୍‌ୱେଏ ।" 25 ବାରି ଯୋଷେଫ ଇସ୍ରାଏଲ୍‌ନେ ଗଡ଼େଇଂକେ ଏନ୍‌ ପାର୍‌ମାନ୍‌ ଆଡିଙ୍ଗ୍‌ଚେ ବାସଙ୍ଗ୍‌କେ, "ପର୍‌ମେସର୍‌ ଡିଲାଡିଗ୍‌ ପେଇଂନେ ଜତନ୍‌ ଡିଙ୍ଗ୍‌ଏ । ଆତେନ୍‌ ବେଲା ପେଇଂ ଏନ୍‌ ଜାଗାବାନ୍‌ ନେଙ୍ଗ୍‌ନେ ଞ୍ଚିଆ ରାଙ୍ଗ୍‌ପେୱେଏ ।" 26 ଦେକ୍‌ରକମ୍‌ ଯୋଷେଫ ସ‍ଏ ଦସ୍‌ ମୁଆଁ ଡିଙ୍ଗ୍‌ଲା ମିସର୍‌ ଦେସ୍‌ ଗୁଏକେ । ମେଇଂ ମଡ଼ାକେ ଆତି ନ୍‌ସା ତିଆର୍‌ ଡିଙ୍ଗ୍‌ଆର୍କେ, ବାରି ଆମେକେ ମିଶର୍‌ନ୍ୟା ମୁଇଂ ପିଡ଼ି ବିତ୍ରେ ବଆର୍‌କେ ।