1 ଆରି ଯାକୁବ ଏଷୌ ପାଙ୍ଗ୍‌ଡିଙ୍ଗ୍‌କ୍ନେ କେକେ । ଏଷୌ ମେଁନେ ଏତେ ଅଁସ ରେମୁଆଁକେ ସାଃଚେ ପାଙ୍ଗ୍‌ଡିଙ୍ଗ୍‌କେ । ଯାକୁବ ମେଁନେ ଡୁଆଣ୍ଡ୍ରେକେ ଅଁ ବାଗ୍‌ରେ ବାଗ୍‌ ଆଡିଙ୍ଗ୍‌କେ । ଲେୟା ବାରି ମେଁନେ ଗଡ଼େଇଂକେ ମୁଇଂ ଦଲ୍‌ନ୍ୟା ବଗେ । ରାହେଲ ବାରି ଯୋଷେଫ ମୁଇଂ ଦଲ୍‌ନ୍ୟା ଲେଃଆର୍‌ଗେ । ମ୍ୱାୟା ଚାକ୍‌ରାନି ବାରି ମେଁନେ ଗଡ଼େଇଂ ମ୍ୱାକ୍ଲିଗ୍‌ ଦଲ୍‌ନ୍ୟା ଲେଃଆର୍ଗେ । 2 ସେନୁଗ୍‌ ମ୍ୱାକ୍ଲିଗ୍‌ ଚାକ୍‌ରାନି ବାରି ମେଇଂନେ ଗଡ଼େଇଂକେ ମେଁନେ ପ୍ଲା, ଲେୟା ବାରି ମେଁନେ ଗଡ଼େଇଂକେ, ସାପାବାନ୍ ପ୍ଲା, ରାହେଲ ବାରି ଯୋଷେଫକେ ବଗେ । 3 ମେଇଂନେ ସେନୁଗ୍‌ ଯାକୁବ ୱେକେ, ମେଁ ଉଡ଼ିବେଲା ବୟାଁନେ ଡାଗ୍ରା ଡିଙ୍ଗ୍‌କେ । ସନ୍‌ମାନ୍ ବାବ୍‌ରେ ଯାକୁବ ଗୁତର୍‌ ସାର୍‌ଲକେ । 4 ଉଡ଼ିବେଲା ଏଷୌ ଯାକୁବକେ କେକେ, ମେଁ ଆମେକେ ଅବା ନ୍‌ସା ୱିର୍‌ ରାଙ୍ଗ୍‌ୱେକେ । ଏନ୍‌ଇଡ଼ିଙ୍ଗ୍‌ ମେଁ ମେଁନେ ଲୁଗ ସାଃଚେ କଣ୍ଡକେ ବାରି ବ‍ଏନ୍ତାକେ, ବାରି ମ୍ୱାୟା ଅଃଆର୍‌କେ । 5 ଏଷୌ ସେଲାମ୍ବୁଏଃ ବାରି ଗଡ଼େଇଂକେ କେକେ, ମେଁ ସାଲ୍ୟାଃକୁକେ, "ନାଁ ଏତେ ଏନ୍‌ ରେମୁଆଁଇଂ ଜାଣ୍ଡେ ?" ଯାକୁବ ଉତର୍‌ ବିକେ, "ପର୍‌ମେସର୍‌ ଆନେଙ୍ଗ୍‌ ଦୟା ଡିଙ୍ଗ୍‌ଚେ ଏନ୍‌ ସାପା ସେଲାମ୍ବୁଏଃ ବାରି ଗଡ଼େଇଂ ବିଃବକେ ।" 6 ଏନ୍‌ ଇଡ଼ିଙ୍ଗ୍‌ ମ୍ୱାକ୍ଲିଗ୍‌ ଚାକ୍‌ରାନିଇଂ ବାରି ମେଁନେ ଗଡ଼େଇଂ ଏଷୌ ଡାଗ୍ରା ୱେକେ । ମେଇଂ ଏଷୌକେ ସାର୍‌ଲଆର୍କେ । 7 ଏନ୍‌ଇଡ଼ିଙ୍ଗ୍‌ ଲେୟା ବାରି ମେଁନେ ଗଡ଼େଇଂ ଏଷୌକେ ସାର୍‌ଲଆର୍କେ । ବାରି ଏନ୍‌ଇଡ଼ିଙ୍ଗ୍‌ ରାହେଲ ବାରି ଯୋଷେଫ ଏଷୌ ଡାଗ୍ରା ୱେଚେ ସାର୍‌ଲଆର୍କେ ।

8 ଏଷୌ ବାଲିର୍‌କେ, "ନେଙ୍ଗ୍‌ ପାଙ୍ଗ୍‌ନେ ବେଲା ଜାଣ୍ଡେଇଂକେ ଙ୍କେକେ ମେଇଂ ଜାଣ୍ଡେ ? ଆତେନ୍‌ ପସୁଇଂ ଜା ନ୍‌ସା ରାଙ୍ଗ୍‌ୱେ ଡିଂଆର୍‌କେ ।" ଯାକୁବ ଉତର୍‌ ବିକେ, "ଆତେନ୍‌ଇଂ ନେଙ୍ଗ୍‌ନେ ମାପ୍‌ରୁନେ ମ୍‌ମୁଁଆଃନ୍ନିଆ ଦୟା ବାନ୍‌ସା ପୁରୁସ୍‌କାର୍‌ ବିଃମ୍ୱ । ତେସା ଆନେଙ୍ଗ୍‌ ଗ୍ରହନ୍‌ ଡିଙ୍ଗ୍‌ ।"

9 ଏଷୌ ବାଲିର୍‌କେ, "ନାଁନେ ନେଙ୍ଗ୍‌ ଆତ୍‌ଲା ମେଃଡିଗ୍‌ ଦର୍‌କାର୍‌ ଣ୍ଡୁ, ବୟାଁ ଆନେଙ୍ଗ୍‌ ଜାବର୍‌ ଲେଃଗେ ।"

10 ଯାକୁବ ବାଲିର୍‌କେ, "ଣ୍ଡୁ ବୟାଁ, ନେଙ୍ଗ୍‌ ଆନାକେ କୁସାମୁତି ଡିଙ୍ଗ୍‌ଣ୍ଡିଂକେ । ଜଦି ନାଁ ଆନେଙ୍ଗ୍‌ ସତ୍‌ରେ ଦୟା ଡିଙ୍ଗ୍‌ନାବକେ, ତେଲା ନେଙ୍ଗ୍‌ନେ ପୁରୁସ୍‌କାର୍‌ଇଂ ଗ୍ରହନ୍‌ ଡିଙ୍ଗ୍‌, ମେଃନି ନେଙ୍ଗ୍‌ ଆନାକେ ବିଃମ୍ୱକେ । ନେଙ୍ଗ୍‌ ଆନାକେ ବାଚେ ଜାବର୍‌ ସାର୍ଦା । ନେଙ୍ଗ୍‌ ପର୍‌ମେସର୍‌କେ ଙ୍କେକେ ରକମ୍‌ ଲାଗେଡିଂକେ । ସାର୍ଦାରେ ଆନେଙ୍ଗ୍‌ ଗ୍ରହନ୍‌ ଡିଙ୍ଗ୍‌ନାବକେସା ନେଙ୍ଗ୍‌ ଜାବର୍‌ ସାର୍ଦା । 11 ଏନ୍‌ସା ନେଙ୍ଗ୍‌ କୁସାମୁତି ଡିଙ୍ଗ୍‌ଣ୍ଡିଂକେ । ପର୍‌ମେସର୍‌ ଆନେଙ୍ଗ୍‌ ଦୟା ଡିଙ୍ଗ୍‌ବକେ । ନେଙ୍ଗ୍‌ନେ ଦର୍‌କାର୍‌ ଲେଃକ୍ନେ ବାନ୍‌ ଜାବର୍‌ ବାନ୍ଲେଃକେ ।" ଯାକୁବ ଏଷୌକେ ପୁରୁସ୍‌କାର୍‌ଇଂ ଗ୍ରହନ୍‌ ଡିଙ୍ଗ୍‌ ନ୍‌ସା ବାସଙ୍ଗ୍‌କେ । ତେସା ମେଁ ଆତେନ୍‌ଇଂ ଗ୍ରହନ୍‌ ଡିଙ୍ଗ୍‌କେ ।

12 ଆରି ଏଷୌ ବାଲିର୍‌କେ, "ପାଙ୍ଗ୍‌ଲା, ନେଃ ନେଃୱିଗ୍‌ପା, ନେଙ୍ଗ୍‌ ଡିଗ୍‌ ପେନେ ସିସେ ସିସେ ୱେଣ୍ଡିଂକେ ।"

13 ମାତର୍‌ ଯାକୁବ ବାଲିର୍‌କେ, "ନେଙ୍ଗ୍‌ନେ ମାପ୍‌ରୁ ମ୍ୟାଃଲାଏଃକେ, ଆକେନ୍ ଗଡ଼େଇଂ କଅଁଲ୍, ଆରି ତ୍ରାଃଡ଼୍ୟାଃ ଆଃବୁଃନେ ଡିଆ ମେଣ୍ଡା ଆରି ଅରେଃଇଂ ନେଙ୍ଗ୍ ଏଃତେ ଲେଃଆର୍‌କେ; ମେଃସୁଆ ଜାବର୍ ଆଃଅଲେଙ୍ଗ୍‌ଲା ସାପା ରାସି ଗୁଏଃୱେଆର୍‌ଏ । 14 ଏନ୍‌ସା କୁସାମୁତି ଡିଙ୍ଗ୍‌ଣ୍ଡିଂକେ, ନେଙ୍ଗ୍‌ନେ ମାପ୍‌ରୁ ନିଜର୍‌ ଚାକର୍‌ନେ ସେନୁଗ୍‌ ସେନୁଗ୍‌ ଅଲେଙ୍ଗ୍‌ । ସେୟୀର ଦେସ୍‌ନ୍ୟା ନେଙ୍ଗ୍‌ ମାପ୍‌ରୁନେ ଡାଗ୍ରା ୱେଚା ଜାକ ନେଙ୍ଗ୍‌ ପସୁଇଂ ଅଲେଙ୍ଗ୍‌ ୟାକେ ରକମ୍‌ ବାରି ଗଡ଼େଇଂ ଅଲେଙ୍ଗ୍‌ ୟାକେ ରକମ୍‌ ଲେଃଗା ଲେଃଗା ଆଃଅଲେଙ୍ଗ୍‌ ମ୍ପାଂଏ ।"

15 ତେସା ଏଷୌ ବାଲିର୍‌କେ, "ନାଁନେ ସାଇଜ ନ୍‌ସା ନେଙ୍ଗ୍‌ ନେଙ୍ଗ୍‌ନେ ରେମୁଆଁଇଂକେ ଆନ୍ତାର୍‌ଚେ ୱେଣ୍ଡିଙ୍ଗ୍‌ ।" ମାତର୍‌ ଯାକୁବ ବାସଙ୍ଗ୍‌କେ, "ଏନ୍‌ ନାଁନେ ଦୟା ଡିଙ୍ଗ୍‌ଏ । ମାତର୍‌ ଏନ୍‌ସାପା ଡିଙ୍ଗ୍‌ନେ ଦର୍‌କାର୍‌ ଣ୍ଡୁ ।" ମାତର୍‌ ମାପ୍‌ରୁନେ ଅନୁଗ୍ରହ ଲେଃଲେ । 16 ତେସା ଏଷୌ ଆତେନ୍‌ ଦିନ୍‌ ସେୟୀରନ୍ୟା ୱେଚା ନ୍‌ସା ଅଲେଙ୍ଗ୍‌ ମୁଲେକେ । 17 ମାତର୍‌ ଯାକୁବ ସୁକ୍କୋତନ୍ୟା ୱେକେ । ଆତେନ୍‌ ଜାଗାନ୍ୟା ମେଁ ନିଜର୍‌ ନ୍‌ସା ମୁଇଂ ଡୁଆ ତିଆର୍‌ ଡିଙ୍ଗ୍‌କେ ବାରି ପସୁଇଂ ନ୍‌ସା କୁଡ଼ିଆ ତିଆର୍‌ ଡିଙ୍ଗ୍‌କେ । ଆତେନ୍‌ସା ଆତେନ୍‌ ଜାଗାନେ ମ୍ନି ସୁକ୍କୋତ ଡିଙ୍ଗ୍‌କେ ।

18 ଦେକ୍‌ ରକମ୍‌ ଯାକୁବ ପଦ୍ଦନ ଅରାମବାନ୍‌ ତାର୍‌ଚେ ସୁକ୍‌ ସାନ୍ତିରେ କିଣାନ ଦେସ୍‌ ଡାଗ୍ରା ଶିଖିମନେ ମୁଇଂ ଇନିନ୍ୟା ୱେଚାଚେ ଇନିନେ ବାଏରେ ତମ୍ୱୁ ତିଆର୍‌ ଡିଙ୍ଗ୍‌କେ । 19 ଆରି ଶିଖିମନେ ଆବା ହମୋରନେ ଗଡ଼େଇଂକେ ମୁଇଂସ କାସୁ ରୁପାନେ ଡାବୁ ବିଚେ ଆତ୍‌ଅରିଆ କୁଡ଼ିଆ ତିଆର୍‌ ଡିଙ୍ଗ୍‌ବକ୍ନେ ଜାଗା ବିଆର୍‌କେ । 20 ବାରି ଯାକୁବ ଆତ୍‌ଡାଗ୍ରା ପର୍‌ମେସର୍‌ନେ ପାର୍‌ତନା ନ୍‌ସା ମୁଇଂ ପୁଜା ବେଦି ତିଆର୍‌ ଡିଙ୍ଗ୍‌କେ । ଯାକୁବ ଆତେନ୍‌ ଜାଗାନେ ମ୍ନି ବିକେ, "ଏଲ-ଇଲୋହେ ଇସ୍ରାଏଲ, ଡାଗ୍‌ଲା, ପର୍‌ମେସର୍‌ ଇସ୍ରାଏଲ୍‌ନେ ପର୍‌ମେସର୍‌ ।"