1 ବନ୍ୟା ଇଡ଼ିଙ୍ଗ୍‌ ମଚ୍‌ପୁର୍‌ନ୍ୟା ମୁଇଂ ରକମ୍‌ ବ୍ନାସା ବାଲିର୍‌ ଡିଙ୍ଗ୍‌ଆର୍‌ଗେ । ସାପା ରେମୁଆଁ ମୁଇଂ ରକମ୍‌ ସବଦ୍‌ ବେବଆର୍‌ ଡିଙ୍ଗ୍‌ଆର୍‌ଡିଂଗେ । 2 ରେମୁଆଁଇଂ ପୁର୍ବ ଦିଗ୍‌ପାକା ଅଲେଙ୍ଗ୍‌ ଅଲେଙ୍ଗ୍‌ ମେଇଂ ଶିନୀୟର୍‌ ଦେସ୍‌ନ୍ୟା ମୁଇଂ ସମ୍ ଜାଗା ବାଚେ ଆତ୍‌ଅରିଆ ବାସା ଆର୍କେ । 3 ରେମୁଆଁଇଂ ବାସଙ୍ଗ୍‌କେ, "ଗେଲାପା, ନେ ଇଟା ଆଃରେଚେ ନିମାଣ୍ଡା ବାବ୍‌ରେ ବାନେଃବିପା ।" ତେଲା ରେମୁଆଁଇଂ ବ୍ରି ବେବଆର୍‌ ମାଡିଙ୍ଗ୍‌ଚେ ଇଟାକେ ଡୁଆ ଆରେ ନ୍‌ସା ବେବଆର୍‌ ଡିଙ୍ଗ୍‌ଆର୍‌କେ । ବାରି ମେଇଂ ଚିକଟ୍‌ଲଃକେ ଚୁନ୍‌ ରକମ୍‌ ବେବଆର୍‌ ଡିଙ୍ଗ୍‌ଆର୍‌କେ । 4 ବାରି ରେମୁଆଁଇଂ ବାସଙ୍ଗ୍‌କେ, "ଗେଲାପା, ନେ ନ୍‌ସା ମୁଇଂ ଇନି ବାରି କିତଂ ଲିଗ୍‌କେ ସୁଗୁଆ ମୁଇଂ ତିଆର୍‌ ଡୁଆ ନେଃରାଃରେପା, ଆତ୍‌ବାନ୍‌ ମେଇଂନେ ମ୍ନି ଉଡ୍ରା ଡିଙ୍ଗ୍‌ଏ, ତେଲା ନେ ମଚ୍‌ପୁର୍‌ନେ ପିତୁର୍‌ ପାକା ଚିନ୍‌ଚତର୍‌ ନେଃଡିଙ୍ଗ୍‌ ଣ୍ଡୁ ।"

5 ମାପ୍‌ରୁ ରେମୁଆଁଇଂନେ ବାନ୍‌ ତିଆର୍‌ ଡିଙ୍ଗ୍‌କ୍ନେ ଇନି ବାରି ତିଆର୍‌ ଡୁଆ କେନ୍‌ସା ଜାର୍‌କେ । 6 ମାପ୍‌ରୁ ବାସଙ୍ଗ୍‌କେ, "ଏନ୍‌ ସାପା ରେମୁଆଁ ମୁଇଂ ବାରି ମେଇଂନେ ବ୍ନାସା ମୁଇଂ, ମେଇଂ ଏନ୍‌ କାମ୍‌ ଡିଙ୍ଗ୍‌ନ୍‌ସା ମୁଇଂଅରିଆ ଡିଙ୍ଗ୍‌ଲେଆର୍‌କେ । ଏବେ ମେଇଂ ତିଆର୍‌ ଡିଂନେ ଆରାମ୍‌ ଡିଂଆର୍‌ଡିଂକେ । ମେଇଂ ଉଡ଼ିବେଲା ମେଃନେ ଇକ୍‌ଚା ଡିଂଆର୍‌ଏ, ଆତେନ୍‌ ଡିଙ୍ଗ୍‌ଆର୍‌ଏ । 7 ତେସା ପାଙ୍ଗ୍‌ଲାପା, ଜାର୍‌ଚେ ‍ନେୱେପା ବାରି ମେଇଂନେ ବିତ୍ରେ ବିନ୍‌ ବିନ୍‌ ବ୍ନାସା ତିଆର୍‌ ନେଡିଙ୍ଗ୍‌ପା । ତେଲା ମେଇଂ ନିଜର୍‌ ନିଜର୍‌ ବ୍ନାସା ବୁଜେ ଆୟାଆର୍‌ ଣ୍ଡୁ ।" 8 ଦେକ୍‌ରକମ୍‌ ମାପ୍‌ରୁ ଆତେନ୍‌ ଜାଗାବାନ୍‌ ଆମେଇଂକେ ମଚ୍‌ପୁର୍‌ନେ ସାପା ପାକା ଚିନ୍‌ଚତର୍‌ ଆଡିଙ୍ଗ୍‌କେ । ତେସା ଆତେନ୍‌ ରେମୁଆଁଇଂ ସହର୍‌ ତିଆର୍‌ ଡିଙ୍ଗ୍‌ନେ ଆଡା ଆୟାଆର୍‌ର୍କେ ଣ୍ଡୁ । 9 ଆତେନ୍‌ ଜାଗାନେ ମ୍ନି ବାବିଲ୍ ଡିଙ୍ଗ୍‌କେ । ଏଲେଡିଗ୍‌ ମାପ୍‌ରୁ ସାପା ମଚ୍‌ପୁର୍‌ନେ ବାସା ଅଲ୍‌ଗା ଆଡିଙ୍ଗ୍‌କେ ବାରି ଆତେନ୍‌ ଜାଗାବାନ୍‌ ରେମୁଆଁଇଂକେ ଚିନ୍‌ଚତର୍‌ ଆଡିଙ୍ଗ୍‌କେ ।

10 ଶେମନେ ବଁସ୍‌କୁଲ୍‌ ଏନ୍‌ । ବନ୍ୟା ଡିଙ୍ଗ୍‌କ୍ନେ ମ୍ୱାର୍‌ ମୁଆଁ ଇଡ଼ିଙ୍ଗ୍‌ ଶେମ ସହେ ମୁଆଁ ବଏସ୍‌ରେ ଅର୍ଫକ୍ଷଦକେ ଜନମ୍‌ ଆଡିଙ୍ଗ୍‌କେ । 11 ଅର୍ଫକ୍ଷଦ ଜନମ୍‌ ଡିଙ୍ଗ୍‌କ୍ନେ ଇଡ଼ିଙ୍ଗ୍‌ ଶେମ ମାଲ୍‌ସ ମୁଆଁ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

12 ବାରି ଅର୍ଫକ୍ଷଦ ପଇଁତିରିସ୍‌ ମୁଆଁ‌ ବଏସ୍‌ରେ ଶେଲହକେ ଜନମ୍‌ ଆଡିଙ୍ଗ୍‌କେ । 13 ଶେଲହନେ ଜନମ୍‌ ଇଡ଼ିଙ୍ଗ୍‌ ଅର୍ଫକ୍ଷଦ ଅଁଶହ ଞ୍ଜି ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

14 ବାରି ଶେଲହ ତିରିସ୍‌ ମୁଆଁ‌ ବଏସ୍‌ରେ ଏବରକେ ଜନମ୍‌ ଆଡିଙ୍ଗ୍‌କେ । 15 ଏବରନେ ଜନମ୍‌ ଇଡ଼ିଙ୍ଗ୍‌ ଶେଲହ ଅଁଶହ ଞ୍ଜି ମୁଆଁ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

16 ବାରି ଏବର ଚ‍ଉତିରିସ୍‌ ମୁଆଁ‌ ବ‍ଏସ୍‌ରେ ପେଲଗକେ ଜନମ୍‌ ଆଡିଙ୍ଗ୍‌କେ । 17 ପେଲଗନେ ଜନମ୍‌ ଇଡ଼ିଙ୍ଗ୍‌ ଏବର ଅଁସହ ତିରିସ୍‌ ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

18 ପେଲଗ ତିରିସ୍‌ ମୁଆଁ‌ ବ‍ଏସ୍‌ରେ ରିୟୁକେ ଜନମ୍‌ ଆଡିଙ୍ଗ୍‌କେ । 19 ରିୟୁନେ ଜନମ୍‌ ଇଡ଼ିଙ୍ଗ୍‌ ପେଲଗ ମ୍ୱାର୍‌ସ ନ‍ଅ ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

20 ରିୟୁ ବତିସ୍‌ ମୁଆଁ‌ ବୟସ୍‌ରେ ସରୁଗକେ ଜନମ୍‌ ଆଡିଙ୍ଗ୍‌କେ । 21 ସରୁଗନେ ଜନମ୍‌ ଇଡ଼ିଙ୍ଗ୍‌ ରିୟୁ ମ୍ୱାର୍‌ସ ଗୁ ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

22 ବାରି ସରୁଗ ତିରିସ୍‌ ମୁଆଁ‌ ବ‍ଏସ୍‌ରେ ନାହୋରକେ ଜନମ୍‌ ଆଡିଙ୍ଗ୍‌କେ । 23 ନାହୋରନେ ଜନମ୍‌ ଇଡ଼ିଙ୍ଗ୍‌ ସରୁଗ ମ୍ୱାର୍‌ସ ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

24 ବାରି ନାହୋର ଅନ୍‌ତିରିସ୍‌ ମୁଆଁ‌ ବ‍ଏସ୍‌ରେ ତେରହକେ ଜନମ୍‌ ଆଡିଙ୍ଗ୍‌କେ । 25 ତେରହନେ ଜନମ୍‌ ଇଡ଼ିଙ୍ଗ୍‌ ନାହୋର ସହେ ଅନିସ୍‌ ମୁଆଁ‌ ମ୍ୱ୍ରଚେ ବାରି ଗଡ଼େଅ ଗଡ଼େଇଂ ଜନମ୍‌ ଆଡିଙ୍ଗ୍‌କେ ।

26 ବାରି ତେରହକେ ସତୁରି ମୁଆଁ‌ ବ‍ଏସ୍‌ ଡିଙ୍ଗ୍‌କେ । ମେଁ ଅବ୍ରାମ, ନାହୋର ବାରି ହାରୋଣ କ୍ମେଇଂକେ ଜନମ୍‌ ଆଡିଙ୍ଗ୍‌କେ ।

27 ତେରହନେ ବଁସ୍‌କୁଲ୍‌ ଆକେନ୍‌ । ତେରହ, ଅବ୍ରାମ, ନାହୋର ଆରି ହାରୋଣକେ ଜନମ୍‌ ଆଡିଙ୍ଗ୍‌କେ । ବାରି ଆତେନ୍‌ ହାରୋଣ ଲୋଟକେ ଜନମ୍‌ ଆଡିଙ୍ଗ୍‌କେ । 28 ମାତର୍‌ ହାରୋଣ ନିଜର୍‌ ଆବା ତେରହନେ ସାମ୍ନାନ୍ୟା କଲଦୀୟଇଂନେ ଊର୍‌ ମ୍ନିକ୍ନେ ନିଜର୍‌ ଜନମ୍‌ ଜାଗାଅରିଆ ଗୁଏଃକେ । 29 ଏନ୍‌ ଇଡ଼ିଙ୍ଗ୍‌ ଅବ୍ରାମ ବାରି ନାହୋର ବିବା ଡିଙ୍ଗ୍‌ଆର୍କେ । ଅବ୍ରାମନେ ସେଲାମ୍ବୁଏଃନେ ମ୍ନି ସାରୀ ବାରି ନାହୋରନେ ସେଲାମ୍ବୁଏଃନେ ମ୍ନି ମିଲ୍‌କା । ମିଲ୍‌କା ହାରୋଣନେ ସେଲାମ୍ବଃଅ ଲେଃଗେ । ହାରୋଣନେ ଆର୍‌ମୁଇଂ ସେଲାମ୍ବଃଅନେ ମ୍ନି ଯିସ୍କା । 30 ଆତେନ୍‌ ସାରୀ ବାଞ୍ଜି ଲେଃଗେ, ମେଁନେ ମୁଇଂଡିଗ୍‌ ଗଗସିଆ ଆଲେଃଗେ ।

31 ତେରହ ନିଜର୍ ଉଂଡେ ଅବ୍ରାମକେ ବାରି ହାରୋଣନେ ଉଂଡେ ଲୋଟ ମ୍ନିକ୍ନେ ନାତିକେ ବାରି ଅବ୍ରାମନେ ସେଲାମ୍ବୁଏଃ ସାରୀ ଉଂମାଚୁଆକେ ସଙ୍ଗେ ଡୁଙ୍ଗ୍‌ୱେକେ । ବାରି ମେଁ ସାପା କଲଦୀୟଇଂନେ ଊର୍‌ବାନ୍‌ କିଣାନ ଦେସ୍‌ ଜାକ ୱେଚେ ହାରୋଣ ଇନିନ୍ୟା ବାସା ଆର୍କେ । 32 ତେରହ ମ୍ୱାର୍‌ସ ମାଲ୍‌ ମୁଆଁ‌ ବ‍ଏସ୍‌ରେ ହାରୋଣ ଇନିନ୍ୟା ଲେଃଚେ ଗୁଏକେ ।