1 ରାହେଲ କେକେ ଜେ, ମେଁ ମେଃଡିଗ୍ ଗଡ଼େଅ ଜନମ୍ ଡିଙ୍ଗ୍ ଆୟାକେ ଣ୍ଡୁ । ରାହେଲ ମେଁନେ ବାଇଡ଼େ ଲେୟା ଆଡ଼ାତ୍ରା ଇଂସା ଡିଂକେ । ତେସା ରାହେଲ ଯାକୁବକେ ବାସଙ୍ଗ୍କେ, "ଆନେଙ୍ଗ୍ ଗଡ଼େଅ ବିଲା ଣ୍ଡୁଲା ନେଙ୍ଗ୍ ଙ୍ଗୁଏଃଏ ।"
2 ଯାକୁବ ରାହେଲ ଆଡ଼ାତ୍ରା ରିସା ଡିଙ୍ଗ୍କେ । ମେଁ ବାସଙ୍ଗ୍କେ, "ନେଙ୍ଗ୍ ପର୍ମେସର୍ ଣ୍ଡୁ । ମାତର୍ ପର୍ମେସର୍ ଆଃ ଆନାକେ ଗଡ଼େଅ ଆବିକେ ।"
3 ଏନ୍ ଇଡ଼ିଙ୍ଗ୍ ରାହେଲ ବାସଙ୍ଗ୍କେ, "ନେଙ୍ଗ୍ନେ ଚାକର୍ବୁଏଃ ବିଲହା ଲେଃକେ, ମେଁ ଏତେ ଡୁଲେଗ୍ । ମେଁ ଗଡ଼େଅ ଜନମ୍ ଆଡିଙ୍ଗ୍ଲା ନେଙ୍ଗ୍ ଇୟାଙ୍ଗ୍ ଡିଙ୍ଗ୍ ଇଁୟାଏ ।" 4 ବାରି ରାହେଲ ନିଜର୍ ଦାସି ବିଲହାକେ ଯାକୁବ ଏତେ ବିବା ଆଡିଙ୍ଗ୍କେ । 5 ଆତ୍ବା ଯାକୁବ ମେଁ ଏତେ ଡୁଲେଗ୍ଲା, ବିଲହା ଗାଗ୍ଡ଼େଚେ ଯାକୁବ ନ୍ସା ମୁଇଂ ଗଡ଼େଅ ଜନମ୍ ଆଡିଙ୍ଗ୍କେ । 6 ରାହେଲ ବାସଙ୍ଗ୍କେ, "ପର୍ମେସର୍ ନେଙ୍ଗ୍ନେ ପାର୍ତନା ଅଁ ଲେଃଗେ, ଆନେଙ୍ଗ୍ ମୁଇଂ ଗଡ଼େଅ ବିନ୍ସା ମେଁ ଇକ୍ଚା ଡିଙ୍ଗ୍କେ ।" ତେସା ରାହେଲ ମେଁନେ ମ୍ନି ଦାନ ବିକେ । 7 ରାହେଲନେ ଦାସି ବିଲହା ବାର୍ମୁଇଂତର୍ ଗାଗ୍ଡ଼େକେ ବାରି ମେଁ ଯାକୁବ ନ୍ସା ଦୁତିୟ ଗଡ଼େଅ ଜନମ୍ ଆଡିଙ୍ଗ୍କେ । 8 ଅଃତେନ୍ବେଲା ରାହେଲ ବାସଙ୍ଗ୍କେ, ନେଙ୍ଗ୍ ନେତନା ଏଃତେ ପର୍ମେସର୍ ବିସୟ୍ରେ ଜୁଜ୍ ଡିଙ୍ଗ୍ଚେ ଞ୍ଜିତେକେ; ଏନ୍ସା ମେଁ ମେଁନେ ମ୍ନି ନପ୍ତାଲୀ ବକେ ।
9 ଲେୟା କେକେ ଜେ ବାରି ଗଡ଼େଅ ଜନମ୍ ଆଡିଙ୍ଗ୍ ଆୟା ଣ୍ଡୁ । ତେସା ମେଁ ନିଜର୍ ଦାସି ସିଲ୍ପାକେ ରାଙ୍ଗ୍ପାଙ୍ଗ୍ଚେ ଯାକୁବ ଏତେ ବିବା ଆଡିଙ୍ଗ୍କେ । 10 ଏନ୍ଇଡ଼ିଙ୍ଗ୍ ଲେୟାନେ ଚାକର୍ବୁଏଃ ସିଲ୍ପାବାନ୍ ଯାକୁବନେ ମୁଇଂ ଗଡ଼େଅ ଜନମ୍ ଡିଂକେ । 11 ଲେୟା ବାସଙ୍ଗ୍କେ, "ନେଙ୍ଗ୍ ଗାଗ୍ଡ଼େ ନ୍ଲେଃଗେ" ତେସା ମେଁ ମେଁନେ ମ୍ନି ବିକେ ଗାଦ୍ । 12 ଲେୟାନେ ଦାସି ସିଲ୍ପା ଦୁତିୟ ଉଂଡେ ଯାକୁବ ନ୍ସା ଜନମ୍ ଆଡିଙ୍ଗ୍କେ । 13 ଲେୟା ବାସଙ୍ଗ୍କେ, "ନେଙ୍ଗ୍ ଜାବର୍ ସାର୍ଦା, ସେଲାଇଂ ଆନେଙ୍ଗ୍ ମ୍ଲେଃଡ଼ିଆଃବୁଏ ଡାଗ୍ଚେ ବାସଙ୍ଗ୍ଆର୍ଏ ।" ଏନ୍ସା ମେଁ ମେଁନେ ମ୍ନି ଆଶେର୍ ବକେ ।
14 ଆରି ଗହମ ୱେଃନେ ବେଲା ରୁବେନ୍ ବାଏରେ ୱେଚେ ଲିଜବାନ୍ ଦୂଦା ଚୁଚୁ ଅବାଚେ ନିଜର୍ ଇୟାଙ୍ଗ୍ ଲେୟାକେ ବିକେ । ଆତ୍ବା ରାହେଲ ଲେୟାକେ ବାସଙ୍ଗ୍କେ, "ଦୟା ଡିଙ୍ଗ୍ଚେ ନାଁନେ ଉଂ ରାଙ୍ଗ୍ପାଙ୍ଗ୍କ୍ନେ ଦୂଦା ଚୁଚୁ ଇକୁଡ଼ା ଆନେଙ୍ଗ୍ ବିଲା ।"
15 ଲେୟା ଉତର୍ ବିକେ, "ନାଁ ନେଙ୍ଗ୍ ଆଣ୍ଡାକେ ରାଃ ଡୁଙ୍ଗ୍ନାଡକେ, ନାଁ ନେଙ୍ଗ୍ ଉଂନେ ଦୂଦା ଚୁଚୁ ରାଃ ରାଙ୍ଗ୍ଡ ନ୍ସା ଚେସ୍ଟା ଡିଙ୍ଗ୍ନାଡିଙ୍ଗ୍ ।" ମାତର୍ ରାହେଲ ବାଲିର୍କେ, "ଜଦି ନାଁ ଆନେଙ୍ଗ୍ ନାଁ ଉଂନେ ଦୂଦା ଚୁଚୁ ନାବିଏ, ତେଲା ଏଃକେ ମିଡିଗ୍ ଯାକୁବ ଏତେ ଡୁଲେଗ୍ ନାୟାଏ ।"
16 ଆତେନ୍ ଲମ୍ଡିଗ୍ ବେଲା ଯାକୁବ ଲିଜବାନ୍ ଆଣ୍ଡେକ୍ନେ ଇଡ଼ିଙ୍ଗ୍ ଲେୟା ବାଏରେ ୱେକେ, ଆମେକେ ଅବାଚେ ବାସଙ୍ଗ୍କେ, "ନାଁ ଏଃ ମିଡିଗ୍ ନେଙ୍ଗ୍ ଡାଗ୍ରା ନାଡୁଲେଗ୍ଏ । ଡାଗ୍ଲା ନେଙ୍ଗ୍ ନାଁ ଏତେ ଡୁଲେଗ୍ ନ୍ସା ଦୂଦା ଚୁଚୁ ବିଚେ ଆତେନ୍ ବାଦୁଲ୍ରେ ଆନାକେ ବାନ୍ଲେଃକେ ।" ଆତେନ୍ସା ଆତେନ୍ ମିଡିଗ୍ ମେଁ ମେଁନେ ଏତେ ଡୁଲେଗ୍କେ ।
17 ଏନ୍ ଇଡ଼ିଙ୍ଗ୍ ପର୍ମେସର୍ ଲେୟାନେ ପାର୍ତନା ଅଁକେ ବାରି ମେଁ ଗାଗ୍ଡ଼େକେ । ମେଁ ଯାକୁବ ନ୍ସା ମାଲିକ୍ଲିଗ୍ ଉଂ ଜନମ୍ ଆଡିଙ୍ଗ୍କେ । 18 ଲେୟା ବାଲିର୍କେ, "ନେଙ୍ଗ୍ ଆଣ୍ଡା ନ୍ସା ନେଙ୍ଗ୍ ଦାସିକେ ବିମ୍ୱକେ, ପର୍ମେସର୍ ମେଁନେ ବାଦୁଲ୍ରେ ଆନେଙ୍ଗ୍ ବିବକେ ।" ଏନ୍ସା ମେଁ ମେଁନେ ମ୍ନି ଇଷାଖର ବକେ । 19 ଲେୟା ବାରି ଗାଗ୍ଡ଼େଚେ ଯାକୁବନେ ତୁର୍ ନମ୍ବର୍ ଗଡ଼େଅ ଜନମ୍ ବିକେ । 20 ଲେୟା ବାଲିର୍କେ, "ପର୍ମେସର୍ ଆନେଙ୍ଗ୍ ମୁଇଂ ନିମାଣ୍ଡା ଜଉତୁକ୍ ରକମ୍ ଜିନିସ୍ ବିବକେ । ଏବେ ଯାକୁବ ନେଙ୍ଗ୍ ଡାଗ୍ରା ବାସାଚେ ଲେଃଏ । ଡାଗ୍ଲା ନେଙ୍ଗ୍ ଆମେକେ ତୁର୍କ୍ଲିଗ୍ ଉଂ ବିମ୍ୱକେ ।" ତେସା ଲେୟା ମେଁନେ ମ୍ନି ସବୂଲୂନ୍ ବିକେ । 21 ଏନ୍ ଇଡ଼ିଙ୍ଗ୍ ଲେୟା ମୁଇଂ ସେଲାମ୍ବଃଅ ଜନମ୍ ବିକେ । ମେଁ ମେଁନେ ମ୍ନି ବିକେ ଦୀଣା ।
22 ଏନ୍ ଇଡ଼ିଙ୍ଗ୍ ପର୍ମେସର୍ ରାହେଲନେ ପାର୍ତନା ଗ୍ରହନ୍ ଡିଙ୍ଗ୍କେ, ପର୍ମେସର୍ ରାହେଲକେ ଗାଗ୍ଡ଼େ ସାଃନେ ବପୁ ବିକେ । 23 ରାହେଲ ଗାଗ୍ଡ଼େଚେ ବାରି ମୁଇଂ ଗଡ଼େଅ ଜନମ୍ ଆଡିଙ୍ଗ୍କେ, "ପର୍ମେସର୍ ନେଙ୍ଗ୍ନେ ଅପମାନ୍ ଦୁର୍ ଆଡିଙ୍ଗ୍କେ ।" 24 ରାହେଲ ବାଲିର୍କେ, "ପର୍ମେସର୍ ଆନେଙ୍ଗ୍ ବାର୍ମୁଇଂ ଗଡ଼େଅ ବିଲେ ।" ଆତେନ୍ସା ରାହେଲ ମେଁନେ ମ୍ନି ଯୋଷେଫ ବିକେ ।
ଯାକୁବନେ ଦନ୍
25 ରାହେଲ ଯୋଷେଫକେ ଜନମ୍ ବିଃକ୍ନେ ଇଡ଼ିଙ୍ଗ୍, ଯାକୁବ ଲାବନକେ ବାସଙ୍ଗ୍କେ, "ଏବେ ଆନେଙ୍ଗ୍ ନିଜର୍ ଦେସ୍ ୱେନ୍ସା ବିଲା । 26 ନେଙ୍ଗ୍ ଜାଣ୍ଡେ ନ୍ସା ନାଁ ଡାଗ୍ରା ଚାକର୍ କାମ୍ ଡିଙ୍ଗ୍ମ୍ୱକେ, ନେଙ୍ଗ୍ନେ ଆତେନ୍ ସେଲାମ୍ବୁଏଃଇଂକେ ଆରି ଉଂଣ୍ଡେଇଂକେ ଡୁଙ୍ଗ୍ୱିଗ୍ ନ୍ସା ଆଦେସ୍ ବିଲା । ନାଁ ମ୍ୟା ନାଲେଃକେ ଜେ, ନେଙ୍ଗ୍ ବଲ୍ ବାବ୍ରେ ନାଁନେ କାମ୍ ଡିଙ୍ଗ୍ମ୍ୱକେ ।"
27 ଆତେନ୍ ବେଲା ଲାବନ ଆମେକେ ବାସଙ୍ଗ୍କେ, "କୁସାମୁତି ଡିଙ୍ଗ୍ଣ୍ଡିଂକେ, ନାଁ ନେଙ୍ଗ୍ ଆଡ଼ାତ୍ରା ଦୟା ଡିଙ୍ଗ୍ । ଡାଗ୍ଲା ନାଁ ଆତ୍ଲା ମାପ୍ରୁ ଆନେଙ୍ଗ୍ ଆସିର୍ବାଦ୍ ଡିଙ୍ଗ୍ବକେ । ଏନ୍ ନେଙ୍ଗ୍ ଏଜାଚେଃ ମ୍ୟାଃନ୍ଲେକେ । 28 ନା ନିଜେନେ କୁଲି ବିସଏରେ ବାସଙ୍ଗ୍, ଆତେନ୍ ନେଙ୍ଗ୍ ଆନାକେ ମ୍ୱିଏ ।"
29 ଆତ୍ବା ଯାକୁବ ଲାବନକେ ବାସଙ୍ଗ୍କେ, ନେଙ୍ଗ୍ ନାଁଡାଗ୍ରା ଡିରକମ୍ ଚାକର୍ କାମ୍ ଡିଙ୍ଗ୍ମ୍ୱକେ ବାରି ନେଙ୍ଗ୍ ଡାଗ୍ରା ନାଁନେ ପସୁଇଂ ଡିରକମ୍ ଲେଃଆର୍କେ, ଆତେନ୍ ନାଁ ମ୍ୟା ନାଲେଃକେ । 30 ଡାଗ୍ଲା ନେଙ୍ଗ୍ ପାଙ୍ଗ୍ନେ ସେନୁଗ୍ ନାଁନେ ଗଣ୍ଡା ଦନ୍ସମ୍ପତି ଲେଃଗେ । ମାତର୍ ଏବେ ଜାବର୍ ଡିଙ୍ଗ୍ୱେଲେଃକେ । ମାପ୍ରୁ ନେଙ୍ଗ୍ କାରନ୍ବାନ୍ ଆନାକେ ଆସିର୍ବାଦ୍ ଡିଙ୍ଗ୍ବକେ । ଏବେ ନେଙ୍ଗ୍ନେ ନିଜର୍ ପରିବାର୍ ନ୍ସା ଅଃନା ଙାର୍ଜେଏ ?
31 ଆତ୍ବା ଲାବନ ବାସଙ୍ଗ୍କେ, "ନେଙ୍ଗ୍ ଆନାକେ ମେଃନି ମ୍ୱିଏ ?" ତେଲା ଯାକୁବ ବାସଙ୍ଗ୍କେ, "ଆନାକେ ମେଃଡିଗ୍ ବିନେ ଆପଡ଼େ ଣ୍ଡୁ, ଅଃନା ନାଁ ନେଙ୍ଗ୍ ନ୍ସା ମୁଇଂ କାମ୍ ନାଡିଙ୍ଗ୍ଏ, ତେଲା ନେଙ୍ଗ୍ ନାଁନେ ପସୁଇଂକେ ବାର୍ମୁଇଂତର୍ ତୁର୍ତ୍ୟାଚେ ଯତନ୍ ଣ୍ଡିଙ୍ଗ୍ଏ । 32 ଏଃକେ ନାଁନେ ସାପା ଗିମିଃ ମାନ୍ଦା ବିତ୍ରେ ୱେଚେ ମେଣ୍ଡା ମାନ୍ଦା ବିତ୍ରେ ବାନା ବାନା ବାରି ଚିନ୍ଇଂ ବାରି କାଲା ବାନାନେ ମେଣ୍ଡାଇଂକେ ବାରି ଗିମିଃଇଂ ବିତ୍ରେ ଚିନ୍ଇଂ ବାରି ବାନା ବାନା ଗିମିଃଇଂକେ ଅଲ୍ଗା ନ୍ନାଃଡିଙ୍ଗ୍ଏ । ଆତେନ୍ ସାପା ନେଙ୍ଗ୍ନେ କୁଲି ଡିଂକ୍ନେ ରକମ୍ ଡିଙ୍ଗ୍ଏ । 33 ଇଡ଼ିଂଡେ ଉଃଡ଼ିବେଲା ନେଙ୍ଗ୍ ଦରମ୍ ଡାଗ୍ଚେ ନାଁ ମ୍ୟା ନାୟାଏ । ଜଦି ନାଁ ନେଙ୍ଗ୍ନେ ଗିମିଃଇଂ ମାନ୍ଦା କେନ୍ସା ପାଙ୍ଗ୍ ନାୟାଏ । ନାଁ ନେଙ୍ଗ୍ନେ ମାନ୍ଦାକେ ନାକେଏ । ମାତର୍ ଗିମିଃଇଂନେ ବିତ୍ରେ ବାନା ବାନା ଚିନ୍ଇଂ ଗିମିଃଇଂ ଆନ୍ତାର୍ଚେ ବାରି ମେଣ୍ଡା ମାନ୍ଦା ବିତ୍ରେ କାଲା ବାନାନେ ମେଣ୍ଡାଇଂ ଉଡ଼ି ଲେଃଆର୍ଏ, ଆତେନ୍ ନେଙ୍ଗ୍ନେ ଜିନିସ୍ ଡାଗ୍ଚେ ଇସାବ୍ ନାଡିଙ୍ଗ୍ଏ ।"
34 ଲାବନ ଉତର୍ ବିକେ, "ନିମାଣ୍ଡାଃ, ନାଁ ନାବାସଙ୍ଗ୍କେ ରକମ୍ ଡିଙ୍ଗ୍ଲେ ।" 35 ଆତେନ୍ ଦିନ୍ ଲାବନ ଚିନ୍ଇଂକେ ବଙ୍କାମିଃଇଂକେ ବୁଡ଼ି ବିକେ । ବାରି ବାନା ବାନା ଗିମିଃ ବୁଃଡ଼ି ବିକେ । ଲାବନ ସାପା ଏଡ଼େଃ ବାନାନେ ମେଣ୍ଡାଇଂକେ ମେଁ ମେଁନେ ଉଂଣ୍ଡେଇଂକେ ଜତନ୍ ଡିଙ୍ଗ୍ ନ୍ସା ବିଃକେ । 36 ଆତେନ୍ ନ୍ସା ମେଁନେ ଉଂଣ୍ଡେଇଂ ସାପା ଚିନ୍ ଡିଂକ୍ନେ ପସୁଇଂକେ ଜିର୍ସି ଗାଲି ସ୍ଲନେ ମୁଇଂ ଜାଗାନ୍ୟା ରାଙ୍ଗ୍ୱେଆର୍କେ । ଯାକୁବ ଲାବନନେ ବାକି ସାପା ଆନ୍ତାର୍କ୍ନେ ପସୁଇଂନେ ଜତନ୍ ଡିଙ୍ଗ୍କେ ।
37 ଯାକୁବ ଲିବ୍ନୀ, ଲୂସ୍ ବାରି ଅର୍ମୋନ୍ ସ୍ଲାଃନେ ତ୍ମି କେନ୍ଦା ଗୁଆଃଚେ ଆତ୍ବାନ୍ ଚାଲି ଗୁଆଃଚେ ସୁଆନେ ନ୍ସୁଆର୍କ୍ନେ ଗୁଣ୍ଡ୍ ଆଃତାର୍କେ । 38 ଏନ୍ ଇଡ଼ିଙ୍ଗ୍ ଆଣ୍ଡିନେ ଜାଗାନ୍ୟା ପସୁଇଂ ଣ୍ଡିଆଃ ଉଗ୍ ନ୍ସା ପାଙ୍ଗ୍ଆର୍ଏ । ଆତେନ୍ ଜାଗାନ୍ୟା ମେଇଂନେ ସାମ୍ନେ ଣ୍ଡିଆ କୁଣ୍ଡ୍ ଡାଗ୍ରା ଆତେନ୍ ଚାଲି ଆଲେଃକ୍ନେ କେନ୍ଦାଇଂ ତିଆର୍ ଆଃଡିଙ୍ଗ୍ଚେ ବକେ । ତେସା ଣ୍ଡିଆ ଉଗ୍ନେ ବେଲା ମେଇଂ ସୁବିଦା ବାଆର୍କେ । 39 ବାରି ଆତେନ୍ କେନ୍ଦା ଡାଗ୍ରା ମେଇଂ ଡୁଲେଗ୍ଆର୍ଲା ପସୁଇଂ ଗିରା ଡିଂକ୍ନେ ବାନା ବାରି ଚିନ୍ ରକମ୍ ମେଣ୍ଡା ଉଂଣ୍ଡେଇଂ ଜନମ୍ ଡିଙ୍ଗ୍ଆର୍କେ ।
40 ଯାକୁବ ଆତେନ୍ ବାନା ଉଂଣ୍ଡେଇଂକେ ବିନ୍ ପାକାବାନ୍ ବିନେ ବିନେ ଆଡିଙ୍ଗ୍କେ । ବାରି ଲାବନ ଗିରା ଗୁଆର୍କ୍ନେ ବାରି କାଲା ବାନାନେ ସାପା ମେଣ୍ଡା ଆଡ଼ାତ୍ରା ଡିଆ ମେଣ୍ଡାଇଂନେ ଆଡ଼ାତ୍ରା ମ୍ମୁଆଃ ଆଃବକେ । ଦେକ୍ରକମ୍ ବାବ୍ରେ ଲାବନନେ ମାନ୍ଦା ଏତେ ନିଜର୍ ମାନ୍ଦାକେ ଇତୁଡ଼ା ସ୍ଲ ଆଡିଙ୍ଗ୍କେ ।
41 ବାରି ଗାଗ୍ଡ଼େକ୍ନେ ପସୁ ଡିରକମ୍ କେନ୍ଦା ଡାଗ୍ରା ଗାଗ୍ଡ଼େ ଆର୍ଏ, ଏନ୍ସା ଣ୍ଡିଆ କୁଣ୍ଡ୍ ଡାଗ୍ରା ପସୁଇଂନେ ସାମ୍ନେ ଆତେନ୍ କେନ୍ଦା ବକେ । ମାତର୍ ରୁଗଚ୍ୟା ପସୁଇଂନେ ସାମ୍ନେ ଆବକେ ଣ୍ଡୁ; 42 ଆତ୍ବା ରୁଗଚ୍ୟା ପସୁଇଂନେ ଲାବନନେ ଡିଙ୍ଗ୍କେ ବାରି ଗାଗ୍ଡ଼େକ୍ନେ ପସୁଇଂ ଯାକୁବନେ ଡିଙ୍ଗ୍କେ । 43 ଦେକ୍ରକମ୍ ଯାକୁବ ଜାବର୍ ସାକାର୍ ଡିଙ୍ଗ୍କେ । ବାରି ମେଁନେ ପସୁ, ଦାସ ଦାସି, ଉଁଟ୍ ବାରି ଗଦଇଂ ଜାବର୍ ଡିଙ୍ଗ୍ଆର୍କେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)