ଯାକୁବ ଏଷୌନେ ଏତେ ବାର୍ମୁଇଂତର୍ ମିସୁଃନେ
1 ଏନ୍ସା ଯାକୁବ ଆତେନ୍ ଜାଗା ଆନ୍ତାର୍କେ । ମେଁ ୱିଗ୍ନେ ଗାଲି ପର୍ମେସର୍ନେ ଦୁତ୍ଇଂ ଆମେକେ ଅବାକେ । 2 ଆତେନ୍ ବେଲା ଯାକୁବ ଆମେଇଂକେ କେଚେ ବାସଙ୍ଗ୍କେ, କ୍ମେଇଂ ପର୍ମେସର୍ନେ ମାନ୍ଦା । ଏନ୍ସା ଆତେନ୍ ଜାଗାନେ ମ୍ନି ମହନୟିମ୍ ବିକେ ।
3 ଯାକୁବନେ ବୟାଁ ଏଷୌ ସେୟୀର ଏରିଆ ପାକା ବାସା ଲେଃଗେ । ଆତାନ୍ ଏରିଆ ଲେଃଗେ ଇଦୋମନେ କଣ୍ଡା ରକମ୍ ଦେସ୍ । ଯାକୁବ ଏଷୌଅରିଆ ଦୁତ୍ଇଂକେ ବେକେ । 4 ଯାକୁବ ଦୁତ୍ଇଂକେ ବାସଙ୍ଗ୍କେ, "ଏନ୍ ସାମୁଆଁ ନେଙ୍ଗ୍ନେ ସାକାର୍ ଏଷୌକେ ବାଲିର୍ପା । ନାଁ ଚାକର୍ ଯାକୁବ ବାସଙ୍ଗ୍କେ, ଏନ୍ ଦିନ୍ଇଂ ନେଙ୍ଗ୍ ଲାବନ ଏତେ ବାସା ନ୍ଲେଃଗେ । 5 ନେଙ୍ଗ୍ନେ, ଅରେଃ, ଗଦ,ମେଣ୍ଡା ମାନ୍ଦା ବାରି ଚାକର୍ ଚାକ୍ରାନି ଲେଃଆର୍କେ । ନେଙ୍ଗ୍ ନିଜର୍ ମାପ୍ରୁନେ ଡାଗ୍ରା ଅନୁଗ୍ରହ ବାନ୍ସା ନାଁନେ ଡାଗ୍ରା କବର୍ ମ୍ୱେକେ ।"
6 ଆରି ଦୁତ୍ଇଂ ଆଣ୍ଡେ ପାଙ୍ଗ୍ଚେ ଯାକୁବକେ ବାସଂଆର୍କେ, ନେ ନାଁବୟାଁ ଏଷୌ ଡାଗ୍ରା ୱେନେଲେଗେ । ମେଁ ଅଁ ଶହ ରେମୁଆଁ ସଙ୍ଗେ ସାଃଚେ ଆନାକେ କେନ୍ସା ପାଙ୍ଗ୍କେ । 7 ଆତେନ୍ କବର୍ ଅଁଚେ ଯାକୁବ ବୁଟକେ ଆରି ଇରିୟାତୁଗ୍ ୱେକେ । ମେଁ ମେଁନେ ଏତେ ଲେଃକ୍ନେ ରେମୁଆଁଇଂକେ ମ୍ୱାର୍ ବାଗ୍ ଆଡିଙ୍ଗ୍କେ । ଅରେଃ ମେଣ୍ଡା ସାପା ମାନ୍ଦା ବାରି ଉଁଟ୍ଇଂକେ ବିନ୍ ବିନ୍ ମ୍ୱାର୍ ଦଲ୍ ଆଃଡିଙ୍ଗ୍କେ । 8 ଯାକୁବ ଚିନ୍ତା ଡିଗ୍କେ, "ଜଦି ଏଷୌ ପାଙ୍ଗ୍ଚେ ମୁଇଂ ଦଲ୍କେ ନସ୍ଟ ଆଡିଙ୍ଗ୍ଏ, ତେଲା ବିନ୍ନେ ଦଲ୍ ଲାଗ୍ଡଚେ ଜିବନ୍ ଆମ୍ବ୍ରଏ ।"
9 ଆତେନ୍ ବେଲା ଯାକୁବ ବାସଙ୍ଗ୍କେ, "ଅ ନେଙ୍ଗ୍ନେ ଆବା ଅବ୍ରହାମନେ ପର୍ମେସର୍, ନେଙ୍ଗ୍ନେ ଆବା ଇସ୍ହାକନେ ପର୍ମେସର୍ ଅ ମାପ୍ରୁ ନାଁ ଆନେଙ୍ଗ୍ ନାବାସଙ୍ଗ୍କେ, ନେଙ୍ଗ୍ନେ ଜନମ୍ ଜାଗା ୱେନ୍ସା । ନାଁ ନେଙ୍ଗ୍ନେ ସାହା ନାଡିଙ୍ଗ୍ଏ । 10 ନାଁ ଆନେଙ୍ଗ୍ ଲିବିସଃ ଡିଙ୍ଗ୍ନାବକେ । ନାଁ ନେଙ୍ଗ୍ନେ ସାପା ମଙ୍ଗଲ୍ ଡିଙ୍ଗ୍ନାବକେ । ନେଙ୍ଗ୍ ଜେ ମେଃଡିଗ୍ ବିସଏ ନ୍ସା ଜଗ୍ୟ ଣ୍ଡୁ । ନେଙ୍ଗ୍ ଉଡ଼ିବେଲା ପର୍ତୁମ୍ ତର୍ ଯର୍ଦ୍ଦନ ଲଣ୍ଡିଆ ମ୍ପୁଆକେ, ମାତର୍ ଏନ୍ ଡୁଡୁ ଆନ୍ତାର୍ଚେ ମେଃଡିଗ୍ ଆଲେକେ । ମାତର୍ ଏବେ ନେଙ୍ଗ୍ନେ ପରିବାର୍, ଅରେଃ ମେଣ୍ଡା ଅଃକେନ୍ ଜାବର୍ ଜେ ମ୍ୱାର୍ ଦଲ୍ ଡିଙ୍ଗ୍ୟାଏ । 11 ନେଙ୍ଗ୍ କୁସାମୁତି ଡିଙ୍ଗ୍ଣ୍ଡିଂ, ଲିବିସଚେ ଆନେଙ୍ଗ୍ ନେଙ୍ଗ୍ନେ ବୟାଁବାନ୍ ଆନେଙ୍ଗ୍ ରକ୍ୟା ଡିଂ । ଆନେଙ୍ଗ୍ ଏଷୌବାନ୍ ରକ୍ୟା ଡିଂ । ନେଙ୍ଗ୍ ଆମେକେ ବୁଟମେଗ୍ ଣ୍ଡିଂକେ । ନେଙ୍ଗ୍ ବୁଟମେଗ୍ ଣ୍ଡିଂକେ ଜେ, ଆନେ ସାପାରେକେ ବାଗୁଏ ବିଃଏ । ଦେକ୍ରକମ୍ କି ଇୟାଙ୍ଗ୍ ବାରି ମେଁନେ ଗଡ଼େଇଂକେ । 12 ଅ ମାପ୍ରୁ, ନାଁ ଆନେଙ୍ଗ୍ ନାବାସଙ୍ଗ୍କେ, ନେଙ୍ଗ୍ ଆନାକେ ସାଇଜ ଣ୍ଡିଙ୍ଗ୍ଏ । ନେଙ୍ଗ୍ ନାନେ ପରିବାର୍କେ କେଣ୍ଡିଆନେ ବାଲି ରକମ୍ ଜାବର ଣ୍ଡ୍ରାଃଡିଂଏ, ଆଜାକେ ଜାଣ୍ଡେ ଗନେ ଆୟା ଣ୍ଡୁ ।"
13 ଯାକୁବ ମିଡିଗ୍ ଆତେନ୍ ଜାଗାନ୍ୟା ଲେଃଗେ, ମେଁନେ ବୟାଁ ଏଷୌକେ ଉଡ଼ି ପୁରୁସ୍କାର୍ ବିନ୍ସା ଯାକୁବ ତିଆର୍ ଡିଙ୍ଗ୍କେ । 14 ଯାକୁବ ମ୍ୱାର୍ସ ପାଃଡ଼ିମିଃ ମୁଇଂକୁଡ଼ି ବଙ୍କାମିଃ, ମ୍ୱାର୍ସ ଡିଆ ମେଣ୍ଡା ବାରି ମୁଇଂକୁଡ଼ି ଙ୍ଗିର୍ବୁଏଃ ମେଣ୍ଡା ବିଃନ୍ସା ତିଆର୍ ଡିଙ୍ଗ୍କେ । 15 ଯାକୁବ ସବତ୍ସା ମନ୍ବତି ତିରିସ୍ ଡିଆ ଉଁଟ୍ ଆରି ଚାଲିସ୍ ଡିଆ ଅରେଃ ଗୁଆ ଙ୍ଗିର୍ବୁଏଃ ଅରେଃ ମୁଇଂକୁଡ଼ି ଡିଆ ଗଦ ବାରି ଗୁଆକ୍ଲିଗ୍ ଙ୍ଗିର୍ବୁଏଃ ଗଦ ତିଆର୍ ଆଃଡିଂକେ । 16 ଯାକୁବ ମାନ୍ଦା ସାପା ଅଲ୍ଗା ଆଡିଙ୍ଗ୍ଚେ ନିଜର୍ ଚାକର୍ଇଂନେ ନ୍ତିନ୍ୟା ମୁଇଂ ମାନ୍ଦା ସର୍ପେ ବିଃଚେ ଆମେଇଂକେ ବାଲିର୍କେ, "ପେଇଂ ନେଙ୍ଗ୍ନେ ସେନୁଗ୍ ସେନୁଗ୍ ୱେଲାପା । ବାରି ମଜେ ମଜେ ଟାନ୍ ବଚେ ସାପା ମାନ୍ଦାକେ ଅଲ୍ଗା ଆଡିଙ୍ଗ୍ପା ।" 17 ଯାକୁବ ଏନ୍ ଆଦେସ୍ ମେଁନେ ଚାକର୍ଇଂକେ ବିଃକେ । ପର୍ତୁମ୍ ଚାକର୍କେ ଯାକୁବ ବାସଙ୍ଗ୍କେ, "ଉଡ଼ିବେଲା ଏଷୌ ନେଙ୍ଗ୍ନେ ବୟାଁ ପେ ଡାଗ୍ରା ପାଙ୍ଗ୍ଚେ ସାଲିଆଃକୁଏ, ନାଁ ଜାନେ ଚାକର୍ ? ନାଁ ଆଣ୍ଡିପାକା ୱେନାଡିଂକେ ? ଏନ୍ ପସୁଇଂ ଜାନେ ? 18 ଏନ୍ ଇଡ଼ିଙ୍ଗ୍ ପେ ଉତର୍ ପେବିଏ, ଏନ୍ ପସୁଇଙ୍ଗ୍ ନାନେ ଚାକର୍ ଯାକୁବନେ, ନେଙ୍ଗ୍ନେ ସାକାର୍ ଯାକୁବ ଆନାକେ ଏନ୍ ପୁରୁସ୍କାର୍ ବିଃବକେ । ବାରି ଯାକୁବ ଡିଗ୍ ନେଙ୍ଗ୍ ପ୍ଲା ପ୍ଲା ପାଙ୍ଗ୍ଡିଙ୍ଗ୍କେ ।" 19 ଯାକୁବ ଦେକ୍ରକମ୍ ବାସଙ୍ଗ୍ ନ୍ସା ଦୁତିୟ ମାନ୍ଦାନେ ଚାକର୍ ବାରି ତୁର୍ତିୟ ମାନ୍ଦାନେ ଚାକର୍ ବାରି ସାପା ଚାକର୍କେ ଦେକ୍ରକମ୍ ବାଲିର୍କେ । ମେଁ ବାଲିର୍କେ, "ପେ ସାପାରେ ଦେକ୍ରକମ୍ ପେବାସଙ୍ଗ୍ଏ, ଉଡ଼ିବେଲା ଏଷୌକେ ପେ ପେଅବାଲା । 20 ବାରି ପେବାସଙ୍ଗ୍ଏ, କେଲା, ନାନେ ଚାକର୍ ଯାକୁବ ନେନେ ପ୍ଲା ପାଙ୍ଗ୍ଡିଙ୍ଗ୍କେ । ଡାଗ୍ଲା ମେଁ ମନେ ବାବେକେ, ସେନୁଗ୍ ପୁରୁସ୍କାର୍ ବେଚେ ଆମେକେ ସାନ୍ତି ଆଡିଙ୍ଗ୍ଚେ ଇଡ଼ିଙ୍ଗ୍ ମେଁନେ ଏତେ ଆଃମିସୁଏ, ଆତ୍ବା ମେଁ ନେନେ ଆଡ଼ାତ୍ରା କେମା ଡିଙ୍ଗ୍ଲା ଡିଙ୍ଗ୍ପାରେ । 21 ତେସା ଯାକୁବ ପୁରୁସ୍କାର୍ଇଂ ଏଷୌ ଡାଗ୍ରା ବେବିଃକେ । ମାତର୍ ଯାକୁବ ମିଡିଗ୍ ଆତେନ୍ ତମ୍ୱୁନ୍ୟା ଲେଃଗେ ।"
ଇସ୍ପର୍ନେ ଏତେ ଯାକୁବନେ ଜୁଜ୍
22 ଆତେନ୍ ମିଡିଗ୍ ଯାକୁବ ତଡ଼୍ୟାଚେ ଆତେନ୍ ଜାଗା ଆନ୍ତାର୍କେ । ଯାକୁବ ମେଁନେ ମ୍ୱାକ୍ଲିଗ୍ ସେଲାମ୍ବୁଏଃ, ଗୋମୁଇଂକ୍ଲିଗ୍ ଗଡ଼େଇଂକେ, ବାରି ମେଁନେ ଚାକ୍ରାନିଇଂକେ ରାଙ୍ଗ୍ୱେକେ । ମେଁ ଯବ୍ବୋକ ଆଃପୁଆ ବିଃନ୍ସା ସଙ୍ଗେ ରାଙ୍ଗ୍ୱେକେ । 23 ଯାକୁବ ମେଁନେ ପରିବାର୍କେ ବାରି ମେଁନେ ସାପା ଜିନିସ୍କେ କେଣ୍ଡିଆ ଆଃପୁଆ ବିଃକେ ।
24 ଯାକୁବ ମୁଇଂଜାଆ ଲେଃୱେଗେ ବାରି ମୁଇଂ ରେମୁଆଁ ମେଁନେ ଏତେ ତାରାଃ ଜାକ ଡାଆଁ ଜୁଦ୍ ଡିଙ୍ଗ୍କେ । 25 ଆତେନ୍ ରେମୁଆଁ କେକେ, ମେଁ ଯାକୁବକେ ଜିତେ ଆୟା ଣ୍ଡୁ । ତେସା ମେଁ ଯାକୁବନେ ଞ୍ଚକେ ଗୁଃବିଲା ମେଁନେ ବୁଲୁନେ ଞ୍ଚ୍ୟା ପୁଏଚଗ୍ ୱେଗେ । 26 ବାରି ଆତେନ୍ ରେମୁଆଁ ଯାକୁବକେ ବାଲିର୍କେ, "ଆନେଙ୍ଗ୍ ୱିଗ୍ ନ୍ସା ବିଃଲା, ମେଃଡାଗ୍ଲା ତାରାଃଗେ ।" ଆତ୍ବା ଯାକୁବ ବାଲିର୍କେ, ନାଁ ଆନେଙ୍ଗ୍ ଆସିର୍ବାଦ୍ ମାଡିଙ୍ଗ୍ ଜାକ ନେଙ୍ଗ୍ ଆନାକେ ନ୍ନାଆନ୍ତାର୍ ଣ୍ଡୁ ।
27 ବାର୍ମୁଇଂତର୍ ଆତେନ୍ ରେମୁଆଁ ବାସଙ୍ଗ୍କେ, ନାଁ ମ୍ନି ମେଃନି ? ମେଁ ବାସଙ୍ଗ୍କେ, ଯାକୁବ ।
28 ଏନ୍ଇଡ଼ିଙ୍ଗ୍ ଆତେନ୍ ରେମୁଆଁ ବାସଙ୍ଗ୍କେ, "ବାରି ନାଁ ମ୍ନି ଯାକୁବ ଆଡିଙ୍ଗ୍ ଣ୍ଡୁ । ନାଁ ମ୍ନି ଇସ୍ରାଏଲ ଡିଙ୍ଗ୍ଏ ବାରି ନାଁ ଆତେନ୍ ମ୍ନିରେ ସ୍ନାମୁଁଆଃ ନାଡିଙ୍ଗ୍ଏ, ଡାଗ୍ଲା ନାଁ ପର୍ମେସର୍ନେ ଏତେ ବାରି ରେମୁଆଁଇଂନେ ଏତେ ଜୁଦ୍ ଡିଙ୍ଗ୍ଚେ ଜିତେ ନାଲେକେ ।"
29 ଏନ୍ଇଡ଼ିଙ୍ଗ୍ ଯାକୁବ ଆମେକେ ସାଲିଆଃକୁକେ, "ଦୟା ଡିଙ୍ଗ୍ଚେ ନାଁ ମ୍ନି ବାସଙ୍ଗ୍ ।" ମାତର୍ ଆତେନ୍ ରେମୁଆଁ ବାଲିର୍କେ, "ନାଁ ମେଃନ୍ସା ନେଙ୍ଗ୍ନେ ମ୍ନି ସାଲିଆଃକୁ ନାଡିଙ୍ଗ୍ ?" ଏନ୍ବେଲା ଆତେନ୍ ରେମୁଆଁ ଯାକୁବକେ ଆସିର୍ବାଦ୍ ଡିଙ୍ଗ୍କେ ।
30 ଆତେନ୍ ବେଲା ଆତେନ୍ ଜାଗାନେ ମ୍ନି ପନୂୟେଲ ବିଃକେ । ଆତେନ୍ ଇଡ଼ିଙ୍ଗ୍ ମେଁ ବାସଙ୍ଗ୍କେ, "ନେଙ୍ଗ୍ ପର୍ମେସର୍କେ ସାମ୍ନାସାମ୍ନି ଙ୍କେଲା ଆଃ ନେଙ୍ଗ୍ ଜିବନ୍ ମ୍ୱ୍ରକେ ।" 31 ଏନ୍ ଇଡ଼ିଙ୍ଗ୍ ସ୍ନି ତାର୍ନେ ବେଲା ମେଁ ପନୂୟେଲ ପୁଆଃକେ । ମାତର୍ ମେଁ ବୁଲୁ ଗୁଟି ନ୍ସା ଚଟା ଚଟାଚେ ଅଲେଙ୍ଗ୍କେ । 32 ତେସା ଏଃ ଜାକ ଇସ୍ରାଏଲନେ ଗଡ଼େଇଂ ଆଡ଼ାତ୍ରାନେ ବୁଲୁନେ କଞ୍ଜନ୍ ଞ୍ଚିଆ ସିରା ବାରି ଚିଲି ଚଙ୍ଗ୍ ଆମ୍ୟାଃଆର୍କେ ଣ୍ଡୁ । ଡାଗ୍ଲା ବୁଲୁନେ ସିରାନ୍ୟା ଯାକୁବକେ ଚିନା ଡିଙ୍ଗ୍ଲେଃଗେ ।
/images/a/Tcg2NiV7ce24OT6kCIQGR)
/images/a/lTDTr17sdXbuk0Q46fQTo)