1 ଶିନୀୟରନେ ଅମ୍ରାଫଲ୍‌ ଇଃସାଙ୍ଗ୍‌ ବାରି ଇଲ୍ଲାସରନେ ଅରୀୟୋକ ଇଃସାଙ୍ଗ୍‌ ଲେଃଗେ । କଦର୍ଲାୟୋମନେ ଆରି ଏଲମନେ ଇଃସାଙ୍ଗ୍‌ ଲେଃଗେ ବାରି ଗୋୟିମନେ ତିଦିୟଲନେ ଇଃସାଙ୍ଗ୍‌ ଲେଃଗେ । 2 ଏନ୍‌ ସାପା ଇଃସାଙ୍ଗ୍‌ଇଂ ମିସୁଚେ ସଦୋମନେ ଇଃସାଙ୍ଗ୍‌ ବିରା, ହମୋରାନେ ଇଃସାଙ୍ଗ୍‌ ବିର୍ଶା,ଅଦ୍ମାନେ ଇଃସାଙ୍ଗ୍‌ ଶିନାବ୍‌ ବାରି ସବୋୟୀମନେ ଇଃସାଙ୍ଗ୍‌ ଶିମେବର ବାରି ବିଲାର, ସୋୟରନେ ଇଃସାଙ୍ଗ୍‌ ଏତେ ଜୁଦ୍‌ ଡିଙ୍ଗ୍‌ଆର୍କେ । 3 ଏନ୍‌ ସାପା ଇଃସାଙ୍ଗ୍‌ଇଂ ସୀଦ୍ଦୀମ ପାଦାନ୍ୟା ଣ୍ଡୁଲା ବିତିଗ୍‌ କେଣ୍ଡିଆ ଡାଗ୍ରା ମୁଇଂଅରିଆ ଡିଙ୍ଗ୍‌ଲେଆର୍‌ଗେ । 4 ଏନ୍‌ ଇଃସାଙ୍ଗ୍‌ଇଂ ବାର ମୁଆଁ‌ ଜାକ କଦର୍ଲାୟୋମନେ ଇଃସାଙ୍ଗ୍‌ନେ ସେବା ଡିଂଚେଃ ତେର ମୁଆଁ ବେଲା ମେଇଂନେ ବିରଦ୍‌ ଡିଙ୍ଗ୍‌ଲେଃଗେ । 5 ଦେକ୍‌ରକମ୍‌ ଚ‍ଉଦ ମୁଆଁ ବେଲା କଦର୍ଲାୟୋମନ୍ୟା ଇଃସାଙ୍ଗ୍‌ ବାରି ଆଣ୍ଡିନେ ଇଃସାଙ୍ଗ୍‌ଇଂ ମେଁନେ ଏତେ ଲେଃଆର୍‌ଗେ ପାଙ୍ଗ୍‌ଚେ ଅସ୍ତରୋତ୍‌ କର୍ଣ୍ଣୟିମନ୍ୟା ରଫାୟୀମ ରେମୁଆଁଇଂକେ ବାରି ହମନ୍ୟା ସୁଷୀୟ ରେମୁଆଁଇଂକେ ଆରି ଶାବୀ କିରିୟାଥୟିମନ୍ୟା ଏମୀୟ ରେମୁଆଁଇଂକେ, 6 କଣ୍ଡା ଡାଗ୍ରା ଏଲ୍‌ପାରଣ ଜାକ ସେୟୀର କଣ୍ଡା ବାସାକ୍ନେ ହୋରୀୟ ରେମୁଆଁଇଂକେ ଜିତେ ଆର୍କେ । 7 ବାରି ମେଇଂ ଆତେନ୍‌ ଜାଗା ବାନ୍‌ ଆଣ୍ଡେଚେ ଐଣ୍‌ମିସ୍‌ପଟ୍‌ ଣ୍ଡୁଲା, କାଦେସକେ ୱେଚେ ଅମାଲେକୀୟ ରେମୁଆଁଇଂନେ ସାପା ଦେସ୍‌ ବାରି ହତ-ସସୋନ୍‌-ତାମର୍‌ ବାସାକ୍ନେ ରେମୁଆଁଇଂ ଇମୋରୀୟ ରେମୁଆଁଇଂକେ ଆଃଆରେ ଆର୍କେ ।

8 ଆତେନ୍‌ ବେଲା ସଦୋମନେ ଇଃସାଙ୍ଗ୍‌, ହମୋରାନେ ଇଃସାଙ୍ଗ୍‌ ଅଦ୍ମାନେ ଇଃସାଙ୍ଗ୍‌, ସବୋୟୀମନେ ଇଃସାଙ୍ଗ୍‌ ବାରି ବିଲାର, ଡାଗ୍‌ଲା, ସୋୟରନେ ଇଃସାଙ୍ଗ୍, ଏନ୍‌ ମାଲ୍ ଇଃସାଙ୍ଗ୍‌ ମିସୁଃଚେ, 9 ମେଇଂ ଏଲମନେ ଇଃସାଙ୍ଗ୍‌ କଦର୍ଲାୟୋମନେ ବାରି ଗୋୟିମନେ ତିଦିୟଲନେ ଇଃସାଙ୍ଗ୍‌ ବାରି ଶିନୀୟରନେ ଅମ୍ରାଫଲ୍‌ନେ ଇଃସାଙ୍ଗ୍‌ ବାରି ଇଲ୍ଲାସରନେ ଅରୀୟୋକ ଇଃସାଙ୍ଗ୍‌ । ଏନ୍‌ ଅଣ୍ଡ୍ରୁଆ ଇଃସାଙ୍ଗ୍‌ ଏତେ ସୀଦ୍ଦୀମ ପଦାନ୍ୟା ଜୁଦ୍‌ ଡିଙ୍ଗ୍‌ନେ ମୁଲେ ଆର୍କେ । 10 ଆତେନ୍‌ ସୀଦ୍ଦୀମ ଟିକ୍‌ରାନ୍ୟା ଚିକ୍‌ଟାଲଃନେ ଗୁଲୁଏ କୁରୁ ଲେଃଗେ; ବାରି ସଦୋମନେ ଇଃସାଙ୍ଗ୍‌ ବାରି ହମୋରାନେ ଇଃସାଙ୍ଗ୍‌ ଲାଗ୍‌ଡଆର୍କେ, ବାରି ଆତ୍‌ଅରିଆ ଲଆର୍କେ ବାରି ବାକି ଲେଃକ୍ନେ ସନ୍ୟଇଂ କଣ୍ଡା ପାକା ଲାଗ୍‌ଡଆର୍କେ । 11 ଏନ୍‌ସା ମେଇଂ ସଦୋମ ବାରି ହମୋରାନେ ସାପା ଦନ୍‌ସମ୍ପତି ବାରି କାଦି ରାଃଚେ ରାଙ୍ଗ୍‌ଡଆର୍କେ । 12 ବାରି ଅବ୍ରାମନେ ବୟାଁନେ ଉଂଡେ ଲୋଟ ସଦୋମନ୍ୟା ବାସା ଲେଃଗେ ବାରି ମେଁନେ ସାପା ଦନ୍‌ସମ୍ପତି ଡୁଙ୍ଗ୍‌ୱେଆର୍କେ ।

13 ଆତେନ୍‌ ବେଲା ମୁଇଂ ଡୁଡଡିଂକ୍ନେ ଏବ୍ରୀୟ ଅବ୍ରାମକେ ସୁସମାଚାର୍‌ ବାସଙ୍ଗ୍‌କେ । ଆତାନ୍ ବେଲା ଅବ୍ରାମ ଇଷ୍କୋଲନେ ବାରି ଆନେରନେ ବୟାଁ ଇମୋରୀୟ ମମ୍ରିନେ ଅଲୋନ୍‌ ସ୍ଲାଃ ବୁନ୍ଦେ ବାସା ଲେଃଗେ । ମେଇଂ ଡିଗ୍‌ ଅବ୍ରାମ୍‌ନେ ସାପଟ୍‌ ଲେଃଆର୍‌ଗେ । 14 ଆତେନ୍‌ ବେଲା ଅବ୍ରାମ ନିଜର୍‌ ମ୍ୟାଃକ୍ନେ ଦାରାପଡ଼େ ୱେଲା ସୁସମାଚାର୍‌ ଅଁକେ । ଅବ୍ରାମ ମେଁନେ ସାପା ପରିବାର୍‌କେ ମୁଇଂଅରିଆ ଆଡିଙ୍ଗ୍‌କେ । ଆତ୍‌ଅରିଆ ଞ୍ଜିସ ଅଟର ରେମୁଆଁ ସିକ୍ୟା ବାକ୍ନେ ସନ୍ୟ ଲେଃଆର୍‌ଗେ । ଅବ୍ରାମ ଆତେନ୍‌ ସତ୍ରୁଇଂନେ ପ୍ଲା ପ୍ଲା ନୁଆଁଚେ ଦାନ ଇନି ଜାକ ୱେକେ । 15 ଆତେନ୍‌ ମିଡିଗ୍‌ ମେଁ ବାରି ମେଁନେ ସନ୍ୟଇଂ ସାପାରେ କୁଡ଼େଚେ ମେଁନେ ସତ୍ରୁଇଂନେ ବିରଦ୍‌ରେ ମାରିଆଃନୁଗ୍‌ ଆକ୍ରମନ୍‌ ଡିଙ୍ଗ୍‌ଆର୍କେ । ମେଇଂ ଆମେଇଂକେ ଆଃଆରେଚେ ଆମେଇଂକେ ଦମ୍ମେଶକନେ ଉତର୍‌ ଦିଗ୍‌ ପାକା ଲେଃକ୍ନେ ହୋବା ଜାକ ନୁଆଁଆର୍କେ । 16 ଏନ୍‌ ଇଡ଼ିଙ୍ଗ୍‌ ମେଁ ମେଁନେ ବୟାଁନେ ଉଂଡେ ଲୋଟ ମେଁନେ ସମ୍ପତି ଆରି ସେଲାମ୍ବୁଏଃ ଆରି ସନ୍ୟଇଂକେ ଆଃଆଣ୍ଡେ ଡୁଙ୍ଗ୍‌ପାଙ୍ଗ୍‌କେ ।

17 ଏନ୍‌ ଇଡ଼ିଙ୍ଗ୍‌ ଅବ୍ରାମ କଦର୍ଲାୟୋମରନେ ବାରି ମେଁନେ ସାଇଜ ଇସାଙ୍ଗ୍‌କେ ଜିତେଚେ ଆଣ୍ଡେକ୍ନେ ଇଡ଼ିଙ୍ଗ୍‌ ସଦୋମନେ ଇଃସାଙ୍ଗ୍‌ ମେଁନେ ଆତେ ବେଟ୍‌ଗାଟ୍ ଡିଙ୍ଗ୍‌ ନ୍‌ସା ଶାବୀ ଟିକ୍ରା, ଣ୍ଡୁଲା ଇଃସାଙ୍ଗ୍‌ନେ ପାଦାନ୍ୟା ୱେକେ । 18 ବାରି ଶାଲମନେ ଇଃସାଙ୍ଗ୍‌ ମଲ୍‌କୀଷେଦକ ରୁଟି ବାରି ଦ୍ରାକ୍ୟା ରସ୍‌ ସାଚେ ପାଙ୍ଗ୍‌କେ, ମେଁ ସାପାଅରିଆ ଲେଃକ୍ନେ ପର୍‌ମେସର୍‌ନେ ପୁଜାରି । 19 ମେଁ ଅବ୍ରାମକେ ଆସିର୍ବାଦ୍‌ ଡିଙ୍ଗ୍‌ଚେ ବାସଙ୍ଗ୍‌କେ, "ଅବ୍ରାମ କିତଂଇନି ବାରି ମଚ୍‌ପୁର୍‌ନେ ଅଦିକାର୍‌ ସାପା ପର୍‌ମେସର୍‌ନେ ଆସିର୍ବାଦ୍‌ ଡିଂଲେଃ । 20 ସାପାଅରିଆ ଲେଃକ୍ନେ ପର୍‌ମେସର୍‌ ଦନ୍ୟ ଡିଙ୍ଗ୍‌ଲେ, ଜାଣ୍ଡେ ନାନେ ସତ୍ରୁଇଂକେ ନାନେ ନ୍ତିନ୍ୟା ବିକେ ।" ବାରି ଅବ୍ରାମ ଜୁଦ୍‌ନ୍ୟା ଡୁଙ୍ଗ୍‌ୱେକ୍ନେ ସାପା ଜିନିସ୍‌ବାନ୍‌ ଗୁଆ ବାଗ୍‌ବାନ୍‌ ମୁଇଂ ବାଗ୍‌ ଆମେକେ ବିକେ ।

21 ଏନ୍‌ ଇଡ଼ିଙ୍ଗ୍‌ ସଦୋମନେ ଇଃସାଙ୍ଗ୍‌ ଅବ୍ରାମକେ ବାସଙ୍ଗ୍‌କେ, "ପେ ସାପା ସମ୍ପତି ଡୁଙ୍ଗ୍‌ୱେଲା, ମାତର୍‌ ନିଂନେ ରେମୁଆଁକେ ଆନିଂ ଆଃଆଣ୍ଡେ ବିଲା ।"

22 ମାତର୍‌ ଅବ୍ରାମ ସଦୋମନେ ଇଃସାଙ୍ଗ୍‌କେ ବାସଙ୍ଗ୍‌କେ, "ନେଙ୍ଗ୍‌ କିତଂଇନି ବାରି ମଚ୍‌ପୁର୍‌ନେ ଅଦିକାରି ମାପ୍‌ରୁ ପର୍‌ମେସର୍‌ନେ ମ୍ନିରେ ପାର୍‌ମାନ୍‌ ଡିଂଚେ ବାସଙ୍ଗ୍‌ମ୍ବକେ ଜେ, 23 ନେଙ୍ଗ୍‌ ପାର୍‌ମାନ୍‌ ଡିଙ୍ଗ୍‌ମ୍ୱକେ ଜେ ନେଙ୍ଗ୍‌ ନାନେ ମେଃଡିଗ୍‌ ନାବ ଣ୍ଡୁ । ଦେକ୍‌ ରକମ୍‌ କି ନାଁନେ ଡାଗ୍ରା ଲେଃକ୍ନେ ସୁତା ଣ୍ଡୁଲା ଚପଲ୍‌ନେ ପିତା ଡିଗ୍‌ ରାଙ୍ଗ୍‌ନାୱେ ଣ୍ଡୁ । ନେଙ୍ଗ୍‌ ଆନାକେ ବାସଙ୍ଗ୍ ନ୍‌ସା ଚାଏଁନେଡିଂକେ ଣ୍ଡୁ, ନେଙ୍ଗ୍‌ ଅବ୍ରାମକେ ଦନି ଆଡିଙ୍ଗ୍‌ ମ୍ୱକେ । 24 ମାତର୍‌ ନେଙ୍ଗ୍‌ନେ ସନ୍ୟଇଂ ମେଃନି ସାପା ଚଙ୍ଗ୍‌ଲେଃଆର୍କେ, ଆତେନ୍‌ ଡିଗ୍‌ ଡୁଙ୍ଗ୍‌ଣ୍ଡଏ । ବାରି ନେଙ୍ଗ୍‌ନେ ଜାଣ୍ଡେ ସାଇଜ ଡିଂଣ୍ଡ୍ରେ ସଙ୍ଗେ ୱେ ଲେଃଆର୍କେ, ମେଇଂ ଣ୍ଡୁଲା ଆନେର ଆରି ଇଷ୍କୋଲ ଆରି ମମ୍ରି ନିଜର୍‌ ନିଜର୍‌ ବାକ୍ନେ ବାଗ୍‌ ଗ୍ରହନ୍‌ ଡିଙ୍ଗ୍‌ଆର୍‌ଲେ ।"