1 ଅବ୍ରାମନେ ଅନେସତ ମୁଆଁ ବୟସ୍‌ରେ ମାପ୍‌ରୁ ଆମେକେ ଆତ୍ନାଚେ ବାସଙ୍ଗ୍‌କେ, "ନେ ସାପାଟୁ ବପୁନେ ପର୍‌ମେସର୍‌ । ନେନେ ଡାଗ୍ରା ଦରମ୍‌ କାମ୍‌ ଡିଙ୍ଗ୍‌ଚେ ନାଁ ମୁକ୍ତି ଡିଙ୍ଗ୍‌ । 2 ନେ ନାଁନେ ଏତେ ନିଜର୍‌ ନିଅମ୍‌ ତିଆର୍‌ ଡିଙ୍ଗ୍‌ଚେ ଆନାକେ ଜାବର୍‌ ମ୍ନା ନେରାଡିଙ୍ଗ୍‌ଏ ।" 3 ଆତ୍‌ବାନ୍‌ ଅବ୍ରାମ ପର୍‌ମେସର୍‌ନେ ଡାଗ୍ରା ବାଆଃ ବ୍ରିଙ୍ଗ୍‌ଚେ ସାର୍‌ଲକେ, ପର୍‌ମେସର୍‌ ଆମେକେ ବାସଙ୍ଗ୍‌କେ, 4 "ଏନ୍‌ ଡିଙ୍ଗ୍‌ଡିଂକେ ନାଁନେ ଏତେ ନିଅମ୍‌ନେ ମୁଇଂ ବାଗ୍‌ । ନେଙ୍ଗ୍‌ ଆନାକେ ଜାବର୍‌ ଜାତିନେ ଆବା ନ୍ନାଡିଙ୍ଗ୍‌ଏ । 5 ବାରି ନାଁନେ ମ୍ନି ଅବ୍ରାମ ଆଲେଃ ଣ୍ଡୁ । ମାତର୍‌ ଅବ୍ରହାମ ଡିଙ୍ଗ୍‌ଏ । ଜେନ୍ତିକି ନେ ଆନାକେ ଗୁଲୁଏ ଜାତିନେ ଆଦିପିତା ନ୍ନାଡିଙ୍ଗ୍‌କେ । 6 ନେ ଆନାକେ ଜାବର୍‌ ବଂସକୁଲ୍‌ ନେରାଡିଙ୍ଗ୍‌ଏ । ତ୍ମି ଜାତି ବାରି ତ୍ମି ଇଃସାଙ୍ଗ୍‌ ନାବାନ୍‌ ତିଆର୍ ଡିଙ୍ଗ୍‌ଏ ।

7 ନେଙ୍ଗ୍‌ ନାଁ ଏତେ ମୁଇଂ ନିଅମ୍‌ ଣ୍ଡିଙ୍ଗ୍‌ଏ । ଆତେନ୍‌ ନିଅମ୍‌ ଡିଗ୍‌ ନାଁନେ ବଂସକୁଲ୍‌ ନ୍‌ସା ଡିଙ୍ଗ୍‌ଏ । ଏନ୍‌ ନିଅମ୍‌ କାଲାଆଃ ନ୍‌ସା ଲେଃଏ । ଆତ୍‌ବାନ୍‌ ନେଙ୍ଗ୍‌ ନାଁନେ ବାରି ନାଁ ବବିସତ୍‌ ବଂସନେ ପର୍‌ମେସର୍‌ ଣ୍ଡିଙ୍ଗ୍‌ଏ । 8 ଏବେ ନାଁ ଆଣ୍ଡିନେ ଦେସ୍‌ନ୍ୟା ବାସା ନାଲେକେ, ଆତେନ୍‌ କାଲାଆଃ ନ୍‌ସାଃ ନାଁନେ ଡିଙ୍ଗ୍‌ଏ । ନେଙ୍ଗ୍‌ ଆନାକେ ବାରି ନାଁନେ ବବିସତ୍‌ ବଂସକେ କିଣାନନେ ସାପା ଦେସ୍‌ କାଲାଆଃ ନ୍‌ସା ମ୍ୱିଏ ବାରି ନେଙ୍ଗ୍‌ ମେଇଂନେ ପର୍‌ମେସର୍‌ ଣ୍ଡିଙ୍ଗ୍‌ଏ ।"

9 ପର୍‌ମେସର୍‌ ଅବ୍ରହାମ୍‌କେ ବାସଙ୍ଗ୍‌କେ, ଏବେ ଏନ୍‌ ନାଁନେ ନିଅମ୍‌ନେ ମୁଇଂ ବାଗ୍‌ । ନାଁ ନାଁନେ ବଂସ ନେନେ ନିଅମ୍‌କେ ମାନେଚେ ପେଲେଃଏ । 10 ଏନ୍‌ ନିଅମ୍‌କେ ପେଇଂ ଡିଲାଡିଗ୍‌ ପାଲନ୍‌ ପେଡିଙ୍ଗ୍‌ଏ । ଏନ୍‌ ଡିଙ୍ଗ୍‌ଡିଂକେ ନାଁ ବାରି ନେଙ୍ଗ୍‌ ବିତ୍ରେନେ ନିଅମ୍‌ ବାରି ଏନ୍‌ ଡିଗ୍‌ ନାଁନେ ବଂସକୁଲ୍‌ଇଂ ନ୍‌ସା । ଆତେନ୍‌ ଏନ୍‌ ସାପା ଜନମ୍‌ ଡିଙ୍ଗ୍‌କ୍ନେ ରେମୁଆଁକେ ଡିଲାଡିଗ୍‌ ସୁନ୍ନତ ପେଡିଙ୍ଗ୍‌ଏ । 11 ପେଇଂ ଡିଲାଡିଗ୍‌ ସୁନ୍ନତ ପେଡିଙ୍ଗ୍‌ଏ । ଏନ୍‌ ପେଇଂନେ ନିଅମ୍‌ନେ ଚିନ୍‌ ଡିଙ୍ଗ୍‌ଏ । 12 ପେନେ ଗଡ଼େଇଂକେ ଉଡ଼ିବେଲା ଆଟ୍‌ଦିନ୍‌ ଡିଙ୍ଗ୍‌ଏ, ପେ ଆତେନ୍‌ ବେଲା ଆମେଇଂକେ ସୁନ୍ନତ ପେଡିଙ୍ଗ୍‌ଏ । ପେଇଂନେ ବାରି ପେନେ ଚାକର୍‌ଇଂନେ, ପେନେ ଡୁଆ ଜାଣ୍ଡେଃଇଂ ଜନମ୍‌ ଡିଙ୍ଗ୍‌ଲେଆର୍କେ, ଜାଣ୍ଡେଇଂ ବିଦେସ୍‌ବାନ୍‌ ଡାବୁ ବିଃଚେ ବିଆର୍‌ ବଆର୍‌କେ, ସାପା ଗଡ଼େଇଂକେ ସୁନ୍ନତ ପେରାଡିଙ୍ଗ୍‌ଏ । 13 ବାରି, ନାନେ ଡୁଆ ଜନମ୍ ଡିଂକ୍ନେ ଡାଗ୍‌ଲା ଡାବୁ ବିଃଚେଃ ବିଆର୍‌କ୍ନେ ରେମୁଆଁନେ ସୁନ୍ନତ ଡିଂନେ ଡିଲାଡିଗ୍ ଦର୍‌କାର୍; ତେଲା ମାଡାନେ କାଲ୍ ନ୍‌ସାଃ ପେନେ ଚିଲିଅରିଆ ନେନେ ନିଅମ୍‌ନେ ଚିନ୍ ଲେଃଏ । 14 ଆଣ୍ଡିନେ ଙ୍ଗିର୍‌ବୁଏଃଇଂ ସୁନ୍ନତ ଆଡିଙ୍ଗ୍‌ ଣ୍ଡୁ, ଆମେଇଂକେ ମେଁନେ ରେମୁଆଁଇଂନେବାନ୍‌ ଅଲ୍‌ଗା ଆଡିଙ୍ଗ୍‌ ବିଃଏ । ଡାଗ୍ଲା ମେଁ ନେଙ୍ଗ୍‌ନେ ନିଅମ୍‌ ଅମାନି ଡିଂଡିଂକେ ।

15 ପର୍‌ମେସର୍‌ ଅବ୍ରହାମ୍‌କେ ବାସଙ୍ଗ୍‌କେ, "ନାଁ ନାଁନେ ସେଲାମ୍ବୁଏଃ ସାରୀକେ ଆରି ସାରୀ ଡାଗ୍‌ଚେ ନାୱା ଣ୍ଡୁ; ନେଙ୍ଗ୍‌ ନାଁନେ ସେଲାମ୍ବୁଏଃ ସାରୀନେ ମୁଇଂ ତ୍ମି ମ୍ନି ମ୍ୱିଏ । ମେଁନେ ତ୍ମି ମ୍ନି ସାରା ଡିଙ୍ଗ୍‌ଏ । 16 ନେଙ୍ଗ୍‌ ଆମେକେ ଆସିର୍ବାଦ୍‌ ଣ୍ଡିଙ୍ଗ୍‌ଏ । ନେଙ୍ଗ୍‌ ମେଁନେ ନ୍ତିନ୍ୟା ମୁଇଂ ଉଂଡେ ମ୍ୱିଏ । ବାରି ନାଁ ମେଁନେ ଆବା ନାଡିଙ୍ଗ୍‌ଏ । ମେଁ ଗୁଲୁଏ ଜାତିନେ ଆଦିମାତା ଡିଙ୍ଗ୍‌ଏ । ଜାତିଇଂନେ ରାଜାଇଂ ମେଁଡାଗ୍ରା ଜନମ୍‌ ପାଙ୍ଗ୍‌ଆର୍‌ଏ ।"

17 ଅବ୍ରହାମ୍‌ ସାର୍ମୁଆଃ ବୁନ୍ଦେ ଆଡିଙ୍ଗ୍‌ଚେ ତୁବନ୍ୟା ଲଃଚେ ବାରି ଲୁଆଃକେ । ମେଁ ନିଜେକେ ବାସଙ୍ଗ୍‌କେ, "ମେଁ ମୁଇଂ ସଏ ମୁଆଁ‌ନେ ରେମୁଆଁ ଆଣ୍ଡିନେ ସେଲାମ୍ବୁଏଃକେ ଗାଗ୍‌ଡ଼େ ଆଃଡିଂ ୟାଏ ? ନବେ ମୁଆଁ‌ନେ ସାରା ମେଁ ଉଂଡେ ଜନମ୍‌ ଆଡିଙ୍ଗ୍‌ ୟାଏ ।" 18 ଏନ୍‌ ଇଡ଼ିଙ୍ଗ୍‌ ଅବ୍ରହାମ୍‌ ପର୍‌ମେସର୍‌କେ ବାସଙ୍ଗ୍‌କେ, "ନେଙ୍ଗ୍‌ ଚାଏଁଣ୍ଡିଙ୍ଗ୍‌କେ ଜେ, ନାଁ ଇଶ୍ମାୟେଲକେ ଅନୁଗ୍ରହ ଡିଙ୍ଗ୍‌ ।"

19 ପର୍‌ମେସର୍‌ ବାସଙ୍ଗ୍‌କେ, ନାଁନେ ସେଲାମ୍ବୁଏଃ ସାରା ନାଁ ନ୍‌ସା ଡିଲାଡିଗ୍‌ ଉଂଡେ ଜନମ୍‌ ଆଡିଙ୍ଗ୍‌ଏ, ବାରି ନାଁ ମେଁନେ ମ୍ନି ଇସ୍‌ହାକ ନାବିଏ, ନେଙ୍ଗ୍‌ ମେଁନେ ଏତେ ନିଅମ୍‌ ଣ୍ଡିଙ୍ଗ୍‌ଏ । ଆତେନ୍‌ ନିଅମ୍‌ ନାଁନେ ବଂସକୁଲ୍‌ଇଂ ନ୍‌ସା କାଲାହା ଲେଃଏ । 20 ନେଙ୍ଗ୍‌ ଇଶ୍ମାୟେଲ ବିସଏରେ ନାଁନେ ପାର୍‌ତନା ଅଁ ନ୍‌ଲେଃଗେ । ନେଙ୍ଗ୍‌ ଆମେକେ ଆସିର୍ବାଦ୍‌ ଣ୍ଡିଙ୍ଗ୍‌ଏ । ମେଁନେ ଜାବର୍‌ ଉଂଡେ ଜନମ୍‌ ଡିଙ୍ଗ୍‌ଏ । ମେଁନେବାନ୍‌ ଗମ୍ୱାର୍‌କ୍ଲିଗ୍‌ ଇଃସାଙ୍ଗ୍‌ ଜନମ୍‌ ଡିଙ୍ଗ୍‌ଏ, ମେଁନେ ପରିବାର୍‌ ମୁଇଂ ମ୍ନା ଜାତି ଡିଙ୍ଗ୍ଏ । 21 ମାତର୍‌ ପାଙ୍ଗ୍‌ଡିଙ୍ଗ୍‌କ୍ନେ ବାରି ମୁଇଂ ମୁଆଁ‌ ସାରାନେ ସୁଲୁଏ ବାନ୍‌ ଆଣ୍ଡିନେ ଇସ୍‌ହାକ ଜନମ୍‌ ଡିଙ୍ଗ୍ଏ ମେଁନେ ଏତେ ନେ ନିଜର୍‌ ନିଅମ୍‌ ତିଆର୍‌ ନେଡିଙ୍ଗ୍‌ଏ । 22 ଦେକ୍‌ରକମ୍‌ ବାଲିର୍‌ବାତା ଆଡାଚେ ପର୍‌ମେସର୍‌ ଅବ୍ରହାମ୍‌ନେ ବାନ୍‌ କିତଂଇନି ଆଡ଼ାତ୍ରା ଲାଗ୍‌ଡକେ ।

23 ଏନ୍‌ ଇଡ଼ିଙ୍ଗ୍‌ ଅବ୍ରହାମ୍‌ ନିଜର୍‌ ଉଙ୍ଗ୍‌ ଇଶ୍ମାୟେଲ ଆରି ନିଜର୍ ଡୁଆ ଜନମ୍ ଡିଂକ୍ନେ ଆରି ଡାବୁ ବିଃଚେଃ ବିଆର୍‌କ୍ନେ ସାପାରେକେ, ଡାଗ୍‌ଲା ଅବ୍ରହାମ୍‌ନେ ଡୁଆ ଲାଏଃକ୍ନେ ସାପା ଙ୍ଗିର୍‌ବୁଏଃକେ ସାଃଚେଃ ପର୍‌ମେସର୍‌ନେ ଆଦେସ୍ ଅନୁସାରେ ଆତେନ୍ ଦିନା ସାପାରେକେ ସୁନ୍ନତ ଆଃଡିଂକେ । 24 ଅବ୍ରହାମ୍‌ ଅନେସ୍ୱତ ମୁଆଁ‌ ବ‍ଏସ୍‌ରେ ସୁନ୍ନତ ଡିଙ୍ଗ୍‌କେ । 25 ଇଶ୍ମାୟେଲକେ ଉଡ଼ିବେଲା ତେର ମୁଆଁ‌ ବ‍ଏସ୍‌ ଡିଙ୍ଗ୍‌ଲେଃଗେ ଆତେନ୍‌ ବେଲା ମେଁ ସୁନ୍ନତ ଡିଙ୍ଗ୍‌କେ । 26 ଅବ୍ରହାମ୍‌ ବାରି ମେଁନେ ଉଂଡେ ଇଶ୍ମାୟେଲ ମୁଇଂ ଦିନା ସୁନ୍ନତ ଡିଙ୍ଗ୍‌ଆର୍କେ । 27 ବାରି, ମେଁ ଡୁଆ ଜନମ୍ ଡିଂକ୍ନେ ଆରି ବିଦେସିଇଂନେ ଡାଗ୍ରାବାନ୍ ଡାବୁ ବିଃଚେଃ ବିଆର୍‌କ୍ନେ ମେଁ ଡୁଆ ଲାଏଃକ୍ନେ ସର୍‌ତେ ଙ୍ଗିର୍‌ବୁଏଃ ସୁନ୍ନତ ଡିଂଆର୍‌କେ ।