ଆଦି 21

ଇସ୍‌ହାକ୍‌ନେ ଜନମ୍‌

1 ମାପ୍‌ରୁ ସାରାନେ ଡାଗ୍ରା ଡିଙ୍ଗ୍‌ବକ୍ନେ ପାର୍‌ମାନ୍‌ ରକ୍ୟା ଡିଙ୍ଗ୍‌କେ । ମେଁ ସାରାକେ ମେଃନେ ପାର୍‌ମାନ୍‌ ଡିଙ୍ଗ୍‌ବଗେ, ମେଁ ଆଡ଼ାତ୍ରା ଦେତ୍‌ରକମ୍‌ ଡିଙ୍ଗ୍‌କେ । 2 ଆତ୍‌ବାନ୍‌ ସାରା ଅବ୍ରହାମ୍‌ନେ ଡକ୍ରାକ୍ନେ ଅବସ୍ତାରେ ଗାଗ୍‌ଡ଼େଚେ ପର୍‌ମେସର୍‌ନେ ବାନ୍‌ ଆଃରେକ୍ନେ ସମାନ୍‌ ବେଲା ଗଡ଼େଅ ଜନମ୍‌ ଆଡିଙ୍ଗ୍‌କେ । 3 ଅବ୍ରହାମ୍‌ ସାରାନେ ସୁଲୁଏ ବାନ୍‌ ଜନମ୍‌ ଡିଙ୍ଗ୍‌କ୍ନେ ନିଜର୍‌ ଉଂଣ୍ଡେନେ ମ୍ନି ଇସ୍‌ହାକ୍‌ ବିକେ । 4 ବାରି ଅବ୍ରହାମ୍‌ ପର୍‌ମେସର୍‌ନେ ଆଦେସ୍‌ ଅନୁସାରେ ନିଜର୍‌ ଉଂଡେ ଇସ୍‌ହାକ୍‌କେ ତ୍ମା ଦିନା ସୁନ୍ନତ ଆଡିଙ୍ଗ୍‌କେ । 5 ଅବ୍ରହାମ୍‌ନେ ସଏ ମୁଆଁ‌ ବୟସ୍‌ରେ ମେଁନେ ଉଂଡେ ଇସ୍‌ହାକ୍‌ ଜନମ୍‌ ଡିଙ୍ଗ୍‌କେ । 6 ବାରି ସାରା ବାସଙ୍ଗ୍‌କେ, ପର୍‌ମେସର୍‌ ନିଂ ସାର୍ମୁଆନ୍ନିଆ ସାର୍ଦା ବିଃବକେ, ଏନ୍‌ ଅଁଚେ ସାପାରେ ନେଙ୍ଗ୍‌ ଏତେ ଲୁଆଃଆର୍‌ଏ । 7 ମେଁ ଆରି ବାସଙ୍ଗ୍‌କେ, ସାରା ଗଡ଼େଇଂକେ ତ୍ରାଡ଼୍ୟା ଆଃବୁଃଏ, ଏନ୍‌ ସାମୁଆଁ ଅବ୍ରହାମ୍‌କେ ଜାଣ୍ଡେ ବାସଙ୍ଗ୍‌ ପାୟାଆର୍‌ ? ଏଲେଡିଗ୍‌ ନେଙ୍ଗ୍‌ ଏବେ ମେଁନେ ଡକ୍ରା ଅବସ୍ତାରେ ମୁଇଂ ଗଡ଼େଅ ମ୍ୱିକେ ।

8 ବାରି ଗଡ଼େଅ ମ୍ନା ୱେଲା ମେଇଂ ଆମେକେ ତ୍ରାଡ଼୍ୟା ଉଗ୍‌ନେ ଆଆନ୍ତାର୍‌ ବିଃଆର୍କେ । ବାରି ଆଣ୍ଡିନେ ଦିନ୍‌ ଇସ୍‌ହାକ୍‌କେ ତ୍ରାଡ଼୍ୟା ଉଗ୍‌ନେ ଆଆନ୍ତାର୍‌ଆର୍କେ । ଆତେନ୍‌ ଦିନ୍‌ ଅବ୍ରହାମ୍‌ ମ୍ନାଃ ବଜି ଆର୍ମେକେ ।

ହାଗାର ଆରି ଇଶ୍ମାୟଲ୍‌ ୱେଆର୍‌କେ

9 ଆରି ମିସର୍ ଦେସ୍‌ନେ ହାଗାର ଅବ୍ରହାମ୍‌ନେ ବାନ୍‌ ଆଣ୍ଡିନେ ଗଡ଼େଅ ଜନମ୍‌ ଡିଙ୍ଗ୍‌ଲେଃଗେ, ଆତେନ୍‌ ଗଡ଼େଅ ଇସ୍‌ହାକ୍‌କେ ଇଙ୍ଗ୍‌ଚେନେ ସାରା କେକେ । 10 ଏନ୍‌ସା ସାରା ଅବ୍ରହାମ୍‌କେ ବାସଙ୍ଗ୍‌କେ, ନାଁ ଏନ୍‌ ଦାସିକେ ବାରି କ୍ମେନେ ଗଡ଼େଅକେ ସ୍ଲ ଆଡିଙ୍ଗ୍‌ବି । ଡାଗ୍ଲା ଏନ୍‌ ଚାକର୍‌ବୁଏଃନେ ଗଡ଼େଅ ନେଙ୍ଗ୍‌ନେ ଗଡ଼େଅ ଇସ୍‌ହାକ୍‌ ଏଃତେ ଅଦିକାରି ଆଡିଙ୍ଗ୍‌ ଣ୍ଡୁ । 11 ଏନ୍‌ ସାମୁଆଁ ଅଁଚେ ଅବ୍ରହାମ୍‌ ଜାବର୍‌ ଦୁକ୍‌ ଡିଙ୍ଗ୍‌କେ, ମେଃଡାଗ୍‌ଲା ଇଶ୍ମାଏଲ୍‌ ଡିଗ୍‌ ମେଁନେ ଉଙ୍ଗ୍‌ଡେ ଲେଃଗେ । 12 ଅଃତେନ୍‌ବେଲା ପର୍‌ମେସର୍‌ ଅବ୍ରହାମ୍‌କେ ବାସଙ୍ଗ୍‌କେ, ନାଁନେ ଏନ୍‌ ଗଡ଼େଅ ବାରି ଚାକର୍‌ବୁଏଃ ନ୍‌ସା ଦୁକ୍‌ ଆଡିଙ୍ଗ୍‌ଗେ । ସାରା ଆନାକେ ମେଃନି ବାସଙ୍ଗ୍‌ଡିଙ୍ଗ୍‌କେ । ମେଁନେ ଆତେନ୍‌ ସାମୁଆଁରେ ମନ୍‌ଦ୍ୟାନ୍‌ ବିଃ । ଇସ୍‌ହାକ୍‌ ବାନ୍‌ ନାଁନେ ବଂସକୁଲ୍‌ ମ୍ନାଏ । 13 ବାରି ଏନ୍‌ ଚାକର୍‌ବୁଏଃନେ ଗଡ଼େଅ ନାଁନେ ବଂସ, ଏନ୍‌ସା ନେ ମେଁନେବାନ୍‌ ମୁଇଂ ଜାତି ତିଆର୍‌ ଣ୍ଡିଙ୍ଗ୍‌ଏ ।

14 ଆରି ଅବ୍ରହାମ୍‌ ଞ୍ଜିର୍‌ନୁଗ୍‌ ତଡ଼୍ୟାଚେ ରୁଟି ବାରି ଣ୍ଡିଆ ଲେଃକ୍ନେ ଙ୍କୁଇ ଡୁଙ୍ଗ୍‌ପାଙ୍ଗ୍‌କେ । ଅବ୍ରହାମ୍‌ ଆତେନ୍‌ ହାଗାରକେ ବିକେ । ଅବ୍ରହାମ୍‌ ହାଗାର ବାରି ମେଁନେ ଉଂଣ୍ଡେକେ ଆତେନ୍‌ ଜିନିସ୍‌ ଏତେ ବେବିକେ । ହାଗାର ଆତେନ୍‌ ଜାଗା ଆନ୍ତାର୍‌ଚେ ବେରଶେବା କଣ୍ଡା ପାକା ୱେକେ । 15 ବାରି ସାପା ଣ୍ଡିଆ ଡାୱେଗେ, ହାଗାର ମେଁନେ ଉଂଣ୍ଡେକେ ମୁଇଂ ସ୍ଲାଃ ବୁନ୍ଦେ ଆନ୍ତାର୍‌ ବିକେ । 16 ହାଗାର ଆତ୍‌ବାନ୍‌ ଇତୁଡ଼ା ସ୍ଲ ୱେକେ, ଅଃତେନ୍‌ ସ୍ଲ ଉଡ଼ି ସ୍ଲ ମୁଇଂ ଆଁୟାଃ ଏତେ ଙ୍ଗାଁ ଟୁଇଙ୍ଗ୍‌ଲା ୱେଏ; ଆତ୍‌ଅରିଆ ମେଁ ୱେଚେ କକେ । ହାଗାର ମେଁନେ ଉଂଣ୍ଡେନେ ଗୁଏଃଡିଙ୍ଗ୍‌କ୍ନେ କେଆୟାକେ ଣ୍ଡୁ । ତେସା ମେଁ ଆତ୍‌ଡାଗ୍ରା ଅଃକେ ।

17 ପର୍‌ମେସର୍‌ ଆତେନ୍‌ ଗଡ଼େଅ ଅଃନେ ଅଁକେ ବାରି ପର୍‌ମେସର୍‌ନେ ଦୁତ୍‌ କିତଂବାନ୍‌ ହାଗାରକେ ବାସଙ୍ଗ୍‌କେ, "ମେଃ ଡିଂଗେ ହାଗାର ? ଆବ୍‌ଟଗେ । ମାପ୍‌ରୁ ଆତେନ୍‌ ଜାଗାବାନ୍‌ ଆତେନ୍‌ ଗଡ଼େଅ ଅଃନେ ଦ୍ରିଗ୍‌ଡିଙ୍ଗ୍‌କେ । 18 ନାଁ ତୁଆଁଚେ ଗଡ଼େଅକେ ଆତଡ଼୍ୟାଚେ ନ୍ତିଅରିଆ ସାଃ, ନେ ମେଁ ବାନ୍‌ ମୁଇଂ ମ୍ନା ଜାତି ତିଆର୍‌ ନେଡିଙ୍ଗ୍‌ଏ । 19 ଏନ୍‌ ଇଡ଼ିଙ୍ଗ୍‌ ପର୍‌ମେସର୍‌ ହାଗାରକେ ମୁଇଂ କୁଇଁସାଲ୍‌ ଆଃସୁଏଃକେ । ତେଲା ହାଗାର ଆତେନ୍‌ କୁଇଁସାଲ୍‌ ଡାଗ୍ରା ୱେଚେ ମେଁନେ ଙ୍କୁଇନ୍ୟା ଣ୍ଡିଆ ବର୍ତି ଆଡିଙ୍ଗ୍‌କେ । ଏନ୍‌ ଇଡ଼ିଙ୍ଗ୍‌ ମେଁନେ ଉଂଣ୍ଡେକେ ଣ୍ଡିଆ ଉଗ୍‌ ନ୍‌ସା ବିକେ । 20 ଆରି ପର୍‌ମେସର୍‌ ଗଡ଼େଅକେ ସାଇଜ ଡିଙ୍ଗ୍‌ଲା ମେଁ ମ୍ନାକେ, ବାରି ଫାରଣ୍‌ କଣ୍ଡା‍ଅରିଆ ଲେଃଚେ ଆଁୟାଃ ସାଃନେ ବିଦ୍ୟା ସିକେକେ । 21 ମେଁ ଫାରଣ୍‌ ମ୍ନିକ୍ନେ ବାଲିଲନ୍ୟା ବାସାକେ, ଏନ୍‌ ଇଡ଼ିଙ୍ଗ୍‌ ମେଁନେ ଇୟାଙ୍ଗ୍‌ଡ଼େ ମୁଇଂ ମିସର୍‌ ଦେସ୍‌ନେ ସେଲା ଏତେ ବିହେ ଆଡିଙ୍ଗ୍‌କେ ।

ଅବିମେଲକ ଏତେ ଅବ୍ରହାମନେ ନିଅମ୍‌

22 ଏନ୍‌ ବେଲା ଅବିମେଲକ ବାରି ଫୀଖୋଲ ମ୍ନିକ୍ନେ ମେଁନେ ସେନାପତି ଅବ୍ରହାମ୍‌କେ ବାସଙ୍ଗ୍‌କେ, ପର୍‌ମେସର୍‌ ନାଁନେ ସାପା କାମ୍‌ନ୍ନିଆ ସାଇଜ ଡିଙ୍ଗ୍‌ଡିଂକେ । 23 ଏନ୍‌ସା ନାଁ ନେ ଆଡ଼ାତ୍ରା ବାରି ନେଁନେ ଗଡ଼େଅଇଂ ଆଡ଼ାତ୍ରା ବିସ୍‌ବାସ୍‌ଅରିଆ ବିସ୍‌ ନାବିଃ ଣ୍ଡୁ । ବାରି ନେ ନାଁନେ ଆଡ଼ାତ୍ରା ଡିରକମ୍‌ ଦୟା ଡିଙ୍ଗ୍‌ନେବକେ, ଦେତ୍‌ରକମ୍‌ ନାଁ ନେ ଆଡ଼ାତ୍ରା ବାରି ନାଁ ନାବାସାକ୍ନେ ଜାଗା ଏନ୍‌ ଦେସ୍‌ ଆଡ଼ାତ୍ରା ଦୟା ନାଡିଙ୍ଗ୍‌ଏ । ନେନେ ସେନୁଗ୍‌ ପର୍‌ମେସର୍‌କେ ପାର୍‌ମାନ୍‌ ଡିଙ୍ଗ୍‌ଚେ ଏନ୍‌ ସାମୁଆଁ ବାସଙ୍ଗ୍‌ ।

24 ଆତ୍‌ବାନ୍‌ ଅବ୍ରହାମ ବାସଙ୍ଗ୍‌କେ, ନେଙ୍ଗ୍‌ ପାର୍‌ମାନ୍‌ ଣ୍ଡିଙ୍ଗ୍‌କେ ।

25 ଏନ୍‌ ଇଡ଼ିଙ୍ଗ୍‌ ଅବ୍ରହାମ ଅବିମେଲକ ଡାଗ୍ରା କୁଇଁସାଲ୍‌ ସାଲ୍ୟାଃକେ । ଡାଗ୍ଲା ଅବିମେଲକନେ ଚାକର୍‌ଇଂ ମୁଇଂ କୁଇଁସାଲ୍‌କେ ବାଃଟଚେ ଆଃଆନ୍ତାର୍‌ ରାଙ୍ଗ୍‌ଡବଆର୍‌କେ । 26 ଆତ୍‌ବାନ୍‌ ଅବିମେଲକ ବାସଙ୍ଗ୍‌କେ, ଏନ୍‌ କାମ୍‌ ଜାଣ୍ଡେ ଡିଙ୍ଗ୍‌କେ, ଆତେନ୍‌ ନେଙ୍ଗ୍‌ ନାମ୍ୟାକେ ଣ୍ଡୁ । ନାଁ ସେନୁଗ୍‌ ଆନେଙ୍ଗ୍‌ ଏନ୍‌ ବିସଏରେ ମେଃଡିଗ୍‌ ନ୍ନାବାସଙ୍ଗ୍‌କେ ଣ୍ଡୁ । ନେଙ୍ଗ୍‌ ଏଃକେ ଏନ୍‌ ବିସଏରେ ଅଁ ଣ୍ଡିଙ୍ଗ୍‌ ।" 27 ଆରି ଅବ୍ରହାମ ମେଣ୍ଡା ବାରି ଅରେଃ ଡୁଙ୍ଗ୍‌ ପାଙ୍ଗ୍‌ଚେ ଅବିମେଲକକେ ବିକେ । ବାରି ମ୍ୱାୟା ମୁଇଂ ନିଅମ୍‌ ତିଆର୍‌ ଡିଙ୍ଗ୍‌ଆର୍କେ । 28 ଅବ୍ରହାମ ମେଣ୍ଡା ରାସିବାନ୍‌ ଗୁକ୍ଲିଗ୍‌ ଉଂ ମେଣ୍ଡା ଅଲ୍‌ଗା ଆଡିଙ୍ଗ୍‌ଚେ ବକେ । 29 ଅବିମେଲକ ଅବ୍ରହାମକେ ସାଲ୍ୟାଃକୁକେ, "ମେଁ ନ୍‌ସା ନାଁ ଏନ୍‌ ଗୁକ୍ଲିଗ୍‌ ଉଂ ମେଣ୍ଡାକେ ଅଲ୍‌ଗା ନାରାଃଡିଙ୍ଗ୍‌କେ ?"

30 ଅବ୍ରହାମ ବାସଙ୍ଗ୍‌କେ, "ନେଙ୍ଗ୍‌ ଜେ ଏନ୍‌ କୁଇଁସାଲ୍‌ ଗଃମ୍ୱକେ, ଆତେନ୍‌ ଆଃସୁଏ ନ୍‌ସା ନେଙ୍ଗ୍‌ବାନ୍‌ ଏନ୍‌ ଗୁକ୍ଲିଗ୍‌ ମେଣ୍ଡାଇଂ ରାଙ୍ଗ୍‌ଡନେ ପଡ଼େଏ ।" 31 ଏନ୍‌ସା ଆତେନ୍‌ ଜାଗାନେ ମ୍ନି ବେରଶେବା ଡିଙ୍ଗ୍‌କେ, ମେଁ ଏନ୍‌ କୁଇଁସାଲ୍‌ନେ ମ୍ନି ଦେକ୍‌ ରକମ୍‌ ବିକେ, ଡାଗ୍ଲା ଆତେନ୍‌ ଜାଗାନ୍ୟା ମ୍ୱାୟା ପାର୍‌ମାନ୍‌ ଡିଙ୍ଗ୍‌ଆର୍କେ ।

32 ତେସା ଅବ୍ରହାମ ବାରି ଅବିମେଲକ ବେରଶେବା ଡାଗ୍ରା ମୁଇଂ ନିଅମ୍‌ ତିଆର୍‌ ଡିଙ୍ଗ୍‌ଆର୍‌କେ । ଏନ୍‌ ଇଡ଼ିଙ୍ଗ୍‌ ଅବିମେଲକ ବାରି ମେଁନେ ସେନାପତି ଫୀଖୋଲ ପଲେଷ୍ଟୀୟ ଦେସ୍‌ନ୍ୟା ଆଣ୍ଡେଆର୍କେ । 33 ଆରି ଅବ୍ରହାମ ଆତେନ୍‌ ବେରଶେବା ଡାଗ୍ରା ମୁଇଂ ବୁଚୁଏଃ ସ୍ଲାଃ ଉଙ୍ଗ୍‌ଚେ ଆତେନ୍‌ ଜାଗାନ୍ୟା ମୁଲେବାନ୍‌ ମାଡା ଜୁଗ୍ ଜାକ ଲେଃନେ ପର୍‌ମେସର୍‌ ମାପ୍‌ରୁନେ ମ୍ନିରେ ପାର୍‌ତନା ଡିଙ୍ଗ୍‌କେ । 34 ବାରି ଅବ୍ରହାମ ପଲେଷ୍ଟୀୟଇଂନେ ଦେସ୍‌ନ୍ୟା ଜାବର୍‌ ଦିନ୍‌ ଜାକ ବାସା ଲେଃଗେ ।