1 ଇସ୍‌ହାକ୍ ଯାକୁବକେ ୱାଚେ ଆସିର୍ବାଦ୍‌ ବିକେ । ଏନ୍‌ ଆଦେସ୍‌ ବିଚେ ବାସଙ୍ଗ୍‌କେ, "ନାଁ କିଣାନ ଦେସ୍‌ନେ ଆଣ୍ଡିନେଡିଗ୍‌ ସେଲାକେ ବିବା ଆଡିଙ୍ଗ୍‌ଗେ । 2 ତେସା ନାଁ ଆକାନ୍‌ ଜାଗା ଆନ୍ତାର୍‌ଚେ ପଦ୍ଦନ ଅରାମନ୍ୟା ୱେଲା । ନିଜର୍‌ ଇୟାଙ୍ଗ୍‌ନେ ପରିବାର୍‌ ବଥୂୟେଲନେ ଡୁଆ ୱେଚେ ଆତ୍‌ଡାଗ୍ରା ନିଜର୍‌ ମାମା ଲାବନନେ ଆଣ୍ଡିନେଡିଗ୍‌ ମୁଇଂ ସେଲାକେ ବିବା ଡିଙ୍ଗ୍‌ । 3 ସାପାଟୁ ବପୁନେ ପର୍‌ମେସର୍‌ ଆସିର୍ବାଦ୍‌ ଡିଙ୍ଗ୍‌ଚେ ଆନାକେ ଜାବର୍‌ ମାନ୍ଦା ଡିଙ୍ଗ୍‌ ନ୍‌ସା ଜାବର୍‌ ବଂସକୁଲ୍‌ ଆଡିଙ୍ଗ୍‌ଲେ । 4 ପର୍‌ମେସର୍‌ ଅବ୍ରହାମକେ ଆସିର୍ବାଦ୍‌ ଡିଙ୍ଗ୍‌କେ ରକମ୍‌ ନାଡାଗ୍ରା ବାରି ନାଁ ବଂସକେ ଆସିର୍ବାଦ୍‌ ଡିଙ୍ଗ୍‌ଲେ । ଆତ୍‌ବା ପର୍‌ମେସର୍‌ ନାଁ ବାସାକ୍ନେ ଜାଗା ଆଣ୍ଡିଡାଗ୍ରା ନାଁ ବାସା ନାଡିଙ୍ଗ୍‌କେ, ଏବେ ଆତେନ୍‌ ପର୍‌ମେସର୍‌ ଅବ୍ରହାମ୍‌କେ ବିବକେ ।" 5 ଏନ୍‌ ଇଡ଼ିଙ୍ଗ୍‌ ଇସ୍‌ହାକ୍‌ ଯାକୁବକେ ବେବିକେ, ମେଁ ପଦ୍ଦନ ଅରାମନ୍ୟା ଲାବନକେ ବଥୂୟେଲନେ ଉଂଡେ ଅରାମୀୟ, ଡାଗ୍‌ଲା, ଯାକୁବ ବାରି ଏଷୌନେ ଇୟାଙ୍ଗ୍‌ ରିବିକାନେ ବୟାଁ ଡାଗ୍ରା ୱେକେ ।

6 ଇସ୍‌ହାକ୍‌ ଯାକୁବକେ ଆସିର୍ବାଦ୍‌ ଡିଙ୍ଗ୍‌ଚେ ପଦ୍ଦନ ଅରାମନ୍ୟା ୱେନ୍‌ସା ବାସଙ୍ଗ୍‌କେ, ବାରି ଆସିର୍ବାଦ୍‌ ଡିଙ୍ଗ୍‌ନେ ବେଲା ଆମେକେ ଆଦେସ୍‌ ବିଚେ ବାଲିର୍‌କେ, ନାଁ କିଣାନ୍‌ ଦେସ୍‌ନେ ଆଣ୍ଡିନେଡିଗ୍‌ ସେଲା ବିବା ଆଡିଙ୍ଗ୍‌ଗେ । 7 ବାରି ଯାକୁବ ନିଜର୍‌ ଆବା ଇୟାଙ୍ଗ୍‌ନେ ଆଦେସ୍‌ ମାନେଚେ ପଦ୍ଦନ ଅରାମନ୍ୟା ୱେକେ, 8 ଏନ୍‌ କେଚେ ଏଷୌ ନିଜର୍‌ ଆବା ଇସ୍‌ହାକ୍‌ନେ କିଣାନ ଦେସ୍‌ନେ ସେଲାଇଙ୍ଗ୍‌ନେ ଆଡ଼ାତ୍ରା ଇକ୍‌ଚା ଣ୍ଡୁନେ ମ୍ୟାକେ । 9 ତେସାଃ ଏଷୌ ନିଜର୍‌ ସେଲାମ୍ବୁଏଃ ଲେଃଲା ଡିଗ୍‌ ଇଶ୍ମାଏଲ ଡାଗ୍ରା ୱେଚେ ଅବ୍ରହାମନେ ଏଗ୍‌ଲେ ଇଶ୍ମାୟେଲନେ ସେଲା ନବାୟୋତନେ ତନା ମହଲତ୍‌ ମ୍ନିକ୍ନେ ସେଲାକେ ବିବା ଡିଙ୍ଗ୍‌କେ ।

10 ଏନ୍‌ଇଡ଼ିଂ ଯାକୁବ ବେରଶେବା ଆନ୍ତାର୍‌ଚେ ହାରୋଣ ପାକା ୱେକେ । 11 ଯାକୁବ ୱେନେ ବେଲା ସ୍ନି ଲଗ୍‌ ୱେକେ । ତେସା ଯାକୁବ ମିଡିଗ୍‌ବ ଡୁଲେଗ୍‌ ନ୍‌ସା ମୁଇଂ ଜାଗାନ୍ୟା ୱେକେ । ମେଁ ମୁଇଂ ବ୍ରି ଅବାକେ, ଆତେନ୍‌ ଜାଗାନ୍ୟା ବ୍ରି ଆଡ଼ାତ୍ରା ନିଗ୍‌ବଡ଼ିଙ୍ଗ୍‌ଚେ ମେଁ ଡୁଲେଗ୍‌ ବିକେ । 12 ମେଁ ମୁଇଂ ମୁସୁଡ଼ିଙ୍ଗ୍‌ କେକେ । ମେଁ ମୁସୁଡ଼ିଙ୍ଗ୍‌ନ୍ୟା କେକେ ଜେ ମୁଇଂ ବ୍ନଃ ତୁବଃ ବାନ୍‌ କିତଂଇନି ଲାଗେ ଲେଃଗେ । ପର୍‌ମେସର୍‌ନେ ଦୁତ୍‌ଇଂ ଆତେନ୍‌ ବ୍ନଃ ବିଚେ ଡେଃଡିଂଆର୍‌କେ ଆରି ଜାର୍‌ ଡିଂଆର୍‌କେ । 13 ମାପ୍‌ରୁ ଆତେନ୍‌ ଆଡ଼ାତ୍ରା ତୁଆଁଚେ ବାସଙ୍ଗ୍‌ଡିଂକେ । ନେ ମାପ୍‌ରୁ ନାଁନେ ନ୍ତା ଞ୍ଜା ଅବ୍ରହାମନେ ପର୍‌ମେସର୍ ବାରି ଇସ୍‌ହାକ୍‌ନେ ପର୍‌ମେସର୍‌ । ନାଁ ଡୁଲେଗ୍‌ ନାଲେକ୍ନେ ତୁବଃ, ଆତାନ୍ ନେ ଆନାକେ ବାରି ନାଁ ବଂସକୁଲ୍‌କେ ନେବିଏ । 14 ନାଁନେ ବଁସ୍‌କୁଲ୍‌ ମଚ୍‌ପୁର୍‌ନେ ଦୁଲି ରକମ୍‌ ଡିଙ୍ଗ୍‌ଆର୍‌ଏ, ବାରି ନାଁ ପୁର୍ବ, ପଶ୍ଚିମ୍, ଉତ୍ତର ବାରି ଦକିନ୍‌ ସାପା ପାକା ଡିଙ୍ଗ୍‌ଆର୍‌ଏ, ବାରି ନାଁ ବାନ୍‌ ବାରି ନାଁନେ ବଁସ୍‌କୁଲ୍‌ ବାନ୍‌ ମଚ୍‌ପୁର୍‌ନେ ସାପା ଜାତି ଆସିର୍ବାଦ୍‌ ବାଆର୍‌ଏ । 15 ନେ ଆନାକେ ସାଇଜ ନେଡିଙ୍ଗ୍‌ଏ, ବାରି ନାଁ ଆଣ୍ଡି ଆଣ୍ଡି ଜାଗା ନାୱେଏ, ଆତେନ୍‌ ଆତେନ୍‌ ଜାଗାନ୍ୟା ଆନାକେ ରକ୍ୟା ନେଡିଙ୍ଗ୍‌ଏ ବାରି ଆର୍‌ମୁଇଂତର୍‌ ଆନାକେ ଏନ୍‌ ଦେସ୍‌ନ୍ୟା ରାଙ୍ଗ୍‌ନେପାଙ୍ଗ୍‌ଏ । ଡାଗ୍ଲା ନେ ଆନାକେ ମେଃନି ବାସଙ୍ଗ୍‌ନେବକେ, ଆତେନ୍‌ ପୁରନ୍‌ ଆଡିଙ୍ଗ୍‌ ଜାକ ଆନାକେ ଆନ୍ତାର୍‌ ନେବି ଣ୍ଡୁ ।

16 ଏନ୍‌ଇଡ଼ିଙ୍ଗ୍‌ ଯାକୁବ ଡୁଲେଗ୍‌କ୍ନେ ଜାଗାବାନ୍‌ ତଡ଼୍ୟାଚେ ବାସଙ୍ଗ୍‌କେ, "ଡିଲାଡିଗ୍‌ ମାପ୍‌ରୁ ଆକ୍‌ଡାଗ୍ରା ଲେଃକେ । ମାତର୍‌ ନେଙ୍ଗ୍‌ ଆତେନ୍‌ ମ୍ୟାଃ ନ୍ନାଲେଃଗେ ।" 17 ଯାକୁବ ବୁଟମେଗ୍‌ଚେ ବାରି ବାଲିର୍‌କେ, "ଏନ୍‌ ଜାଗା ବୁଟମେଗ୍‌ ଡଡିଂକେ । ଏନ୍‌ ପର୍‌ମେସର୍‌ନେ ଡୁଆ । ଏନ୍‌ ଜାଗା ଡିଙ୍ଗ୍‌ଡିଂକେ କିତଂନେ ଗାଲି ।"

18 ଯାକୁବ ଞ୍ଜିର୍‌ନୁଗ୍‌ ତଡ଼୍ୟାଚେ ଆଣ୍ଡିନେ ବ୍ରିଅରିଆ ନିଗ୍‌ବଡ଼ିଙ୍ଗ୍‌ଚେ ଡୁଲେଗ୍‌ ଲେଃଗେ । ଆତେନ୍‌ ରାଙ୍ଗ୍‌ୱେଚେ କୁଟ୍‌ ରକମ୍‌ ତିଆର୍‌ ଡିଙ୍ଗ୍‌ଚେ ଆତେନ୍‌ ଆଡ଼ାତ୍ରା ଞ୍ଚୁ କିଗ୍‌କେ । 19 ଆତେନ୍‌ ଇନିନେ ମ୍ନି ଲେଃଗେ "ଲୁସ୍‌" ମାତର୍‌ ଯାକୁବ ଆତେନ୍‌ ଜାଗାନେ ମ୍ନି ବିକେ ବୈଥେଲ । 20 ଯାକୁବ ପାର୍‌ମାନ୍‌ ଡିଙ୍ଗ୍‌ଚେ ବାସଙ୍ଗ୍‌କେ, "ଅଃନା ପର୍‌ମେସର୍‌ ଆନେଙ୍ଗ୍‌ ସାଇଜ ଡିଙ୍ଗ୍‌ଏ ବାରି ନେଙ୍ଗ୍‌ ୱେନେ ଗାଲି ଆନେଙ୍ଗ୍‌ ରକ୍ୟା ଡିଙ୍ଗ୍‌ଏ । ବାରି ଚଙ୍ଗ୍‌ ନ୍‌ସା କାଦି ଆରି ସଃ ନ୍‌ସା ସକାପାଟାଇ ବିଏ, 21 ବାରି ଅଃନା ନେଙ୍ଗ୍‌ ସୁକ୍‌ ସାନ୍ତିରେ ଆବାନେ ଡୁଆ ବାର୍‌ମୁଇଂତର୍‌ ମ୍ପାଙ୍ଗ୍‌ଏ । ତେଲା ମାପ୍‌ରୁ ନେଙ୍ଗ୍‌ନେ ପର୍‌ମେସର୍‌ ଡିଙ୍ଗ୍‌ଏ । 22 ନେଙ୍ଗ୍‌ ଏନ୍‌ ବ୍ରି କୁଟ୍‌ ରକମ୍‌ ତିଆର୍‌ ଡିଙ୍ଗ୍‌ମ୍ୱକେ, ଆତେନ୍‌ ପର୍‌ମେସର୍‌ନେ ଡୁଆ ଡିଙ୍ଗ୍‌ଏ । ବାରି ନାଁ ଆନେଙ୍ଗ୍‌ ମେଃନି ସାପା ନାବିଏ, ଆତ୍‌ବାନ୍‌ ଗୁଆ ବାଗ୍‌ବାନ୍‌ ମୁଇଂ ବାଗ୍‌ ଆନାକେ ମ୍ୱିଏ ।"