1 ବାରି ଯାକୁବ, ଲାବନ ଆରି ମେଁନେ ଗଡ଼େଇଂ ବାଲିର୍‌ବାତା ଡିଙ୍ଗ୍‌କ୍ନେ ଅଁକେ । ମେଇଂ ବାସଙ୍ଗ୍‌ଆର୍‌କେ, "ଯାକୁବ ସାପା କିଚି ଦନ୍‌ସମ୍ପତି ରାଙ୍ଗ୍‌ଡବକେ, ମେଃନି ମେଇଂନେ ମାବାନେ ଲେଃଗେ । ନେ ଆବାନେ ବାନ୍‌ ସାପା ରାଙ୍ଗ୍‌ଡଚେ ମେଁ ସାକାର୍‌ ଡିଙ୍ଗ୍‌ଲେଃକେ ।" 2 ଏନ୍‌ ଇଡ଼ିଙ୍ଗ୍‌ ଯାକୁବ ମ୍ୟା ୟାକେ ଜେ ଲାବନ ସିସେ ରକମ୍‌ ମେଁ ଏତେ ବେବଆର୍‌ ଆଡିଙ୍ଗ୍‌କେ ଣ୍ଡୁ । 3 ମାପ୍‌ରୁ ଯାକୁବକେ ବାସଙ୍ଗ୍‌କେ, "ନାଁ ନିଜର୍‌ ଦେସ୍‌ନ୍ୟା ନ୍ତାଞ୍ଜାଇଂନେ ଡାଗ୍ରା ଆଣ୍ଡେ ୱିଗ୍‌ଲା । ନେଙ୍ଗ୍‌ ନା ଏତେ ନ୍‌ଲେଏ ।"

4 ତେସା ଯାକୁବ ପସୁ ମାନ୍ଦା ଡାଗ୍ରା ୱେଚେ ଆମେଇଂକେ ଅବାଚେ ଲେୟା ବାରି ରାହେଲକେ ବାଲିର୍‌କେ, 5 ଯାକୁବ ରାହେଲ ବାରି ଲେୟାକେ ବାସଙ୍ଗ୍‌କେ, "ନେଙ୍ଗ୍‌ କେଣ୍ଡିଙ୍ଗ୍‌ ଜେ, ପେମ୍ବା ଆନେଙ୍ଗ୍‌ ସିସେ ଡିରକମ୍‌ ବେବଆର୍‌ ଡିଙ୍ଗ୍‌ଡିଙ୍ଗ୍‌ଗେ, ଦେତ୍‌ରକମ୍‌ ଡିଙ୍ଗ୍‌ଆଡିଂକେ ଣ୍ଡୁ । ମାତର୍‌ ନେଙ୍ଗ୍‌ ଆବାନେ ପର୍‌ମେସର୍‌ ନେଙ୍ଗ୍‌ ଏତେ ଲେଃକେ । 6 ନେଙ୍ଗ୍‌ ନିଜର୍‌ନେ ସାପା ବପୁ ବିଚେ ପେଇଂନେ ଆବା ଡାଗ୍ରା ଚାକର୍‌ କାମ୍‌ ଡିଙ୍ଗ୍‌ମ୍ୱକେ, ଏନ୍‌ ପେ ମ୍ୟା ପେଲେଃଗେ । 7 ପେମ୍ବା ଆନେଙ୍ଗ୍‌ ନାଲେଚେ ଗୁଆ ତର୍‌ ବଦ୍‌ଲେ ବକେ । ମାତର୍‌ ମାପ୍‌ରୁ ଆନେଙ୍ଗ୍‌ ରକ୍ୟା ଡିଙ୍ଗ୍‌କେ । ମେଁ ଲାବନକେ ଆରି ଆନେଙ୍ଗ୍‌ ବିନାସ୍‌ ଆଃଡିଙ୍ଗ୍‌ନେ ଆବିକେ ଣ୍ଡୁ ।" 8 ଲାବନ ବାସଙ୍ଗ୍‌କେ, ନାଁ ସାପା ବାନା ବାନା ଲେଃକ୍ନେ ପସୁଇଂକେ ବ, ଆତେନ୍‌ ନାଁନେ ଦର୍ମା‌ ରକମ୍‌ ଡିଙ୍ଗ୍‌ଏ । ମେଁ ଏନ୍‌ ବାସଙ୍ଗ୍‌ ଆଡାକ୍ନେ ଇଡିଙ୍ଗ୍‌ ସାପା ପସୁଇଂ ବାନା ବାନା ଲେଃକ୍ନେ ଉଂଡେ ଜନମ୍‌ ଆଡିଙ୍ଗ୍‌କେ । ତେସା ଆତେନ୍‌ ସାପା ନେଙ୍ଗ୍‌ନେ ଡିଙ୍ଗ୍‌କେ । ମାତର୍‌ ଏନ୍‌ ଇଡ଼ିଙ୍ଗ୍‌ ଲାବନ ବାସଙ୍ଗ୍‌କେ, ବାନା ବାନା ଲେଃକ୍ନେ ପସୁଇଂ ନାଁନେ । ମେଁ ଏନ୍‌ ବାସଙ୍ଗ୍‌ ଆଡାକ୍ନେ ଇଡ଼ିଙ୍ଗ୍‌, ଆତେନ୍‌ ସାପା ନାଁନେ ଦର୍ମା‌ ଡିଙ୍ଗ୍‌ଏ । ସାପା ପସୁଇଂ ବାନା ବାନା ପସୁଇଂ ଜନମ୍‌ ବିଃଆର୍କେ । 9 ଦେକ୍‌ ରକମ୍‌ ପର୍‌ମେସର୍‌ ପେଇଂନେ ଆବାନେ ବାନ୍‌ ପସୁ ସମ୍ପତି ରାଙ୍ଗ୍‌ପାଙ୍ଗ୍‌ଚେ ଆନେଙ୍ଗ୍‌ ବିକେ ।

10 ଆତେନ୍‌ ବେଲା ନେଙ୍ଗ୍‌ ମୁଇଂ ମୁସୁଡ଼ିଙ୍ଗ୍‌ ଙ୍କେକେ, ମେଇଂ ଅରେଃ ଗିମିଃ ବେଲି ୱେଡିଂଆର୍‌କେ । ମେଇଂ ଗିରା ଡିଂଚେ ବାନା ବାନା ଡିଙ୍ଗ୍‌ଲେଃଆର୍‌ଗେ ବାରି ଟୁପା ଚିନ୍‌ ଡିଂଲେଃଆର୍‌ଗେ । 11 ଆତେନ୍‌ ବେଲା ପର୍‌ମେସର୍‌ନେ ଦୁତ୍‌ ମୁସୁଡ଼ିଙ୍ଗ୍‌ନ୍ୟା ଆନେଙ୍ଗ୍‌ ଯାକୁବ ଡାଗ୍‌ଚେ ୱାଲା, ନେଙ୍ଗ୍‌ ମ୍ୱାସଙ୍ଗ୍‌କେ, କେଲା, ନେଙ୍ଗ୍‌ ଆକ୍‌ଅରିଆ । 12 ପର୍‌ମେସର୍‌ନେ ଦୁତ୍‌ ବାସଙ୍ଗ୍‌କେ, "ଏବେ କେ କେଲା, ବେଲି ୱେଡିଙ୍ଗ୍‌କ୍ନେ ସାପା ଗିମିଃଇଂ ଗିରା ଡିଂକ୍ନେ, ବାନା ବାନା ଆରି ଚିନା ବାନା ଡିଙ୍ଗ୍‌ଲେ ଆର୍କେ । ନେଙ୍ଗ୍‌ ଏନ୍‌ ଡିଙ୍ଗ୍‌ନ୍‌ସା ବିଃମ୍ୱକେ, ଡାଗ୍ଲା ଲାବନ ନାଁ ଏତେ ଡିରକମ୍‌ ବେବଆର୍‌ ଡିଙ୍ଗ୍‌କେ, ନେଙ୍ଗ୍‌ କେନ୍‌ଲେକେ । 13 ନେଙ୍ଗ୍‌ ବୈଥେଲନେ ପର୍‌ମେସର୍‌ । ଆଣ୍ଡିଡାଗ୍ରା ନାଁ ମୁଇଂ କୁମ୍ବୁ ପବିତ୍ର ଆଃଡିଙ୍ଗ୍‌ନାବକେ ବାରି ନେଙ୍ଗ୍‌ ଡାଗ୍ରା ମୁଇଂ ପାର୍‌ମାନ୍‌ ଡିଙ୍ଗ୍‌ନାବକେ । ଏବେ ତଡ଼୍ୟା ବାରି ଆକାନ୍‌ ତୁବଃ ଆନ୍ତାର୍‌ଚେ ନିଜର୍‌ କୁଟୁମ୍‌ ଦେସ୍‌ନ୍ୟା ୱେଲା ।"

14 ରାହେଲ ବାରି ଲେୟା ବାସଙ୍ଗ୍ଆର୍କେ, "ଆବାନେ ଡୁଆନ୍ନିଆ ନେନେ ବାରି ମେଃନେ ବାଟାନେ ଅଦିକାର୍‌ ଲେଃକେ ? 15 ନେ ମେଁନେ ମ୍ମୁଆଃନ୍ୟା ବିଦେସି ରକମ୍‌ । ମେଁ ମାତର୍‌ ଆନେକେ ନାଁ ଡାଗ୍ରା ସ ବିଃ ଆବକେ । ମେଁ ସାପା ଡାବୁ କର୍ଚ ଡିଙ୍ଗ୍‌ ବିବକେ, ଆଣ୍ଡିନେ ନେଇଂନେ ଡିଙ୍ଗ୍‌ନେ ଲେଃଗେ । 16 ଏନ୍‌ସା ପର୍‌ମେସର୍‌ ନେଇଂନେ ଆବାନେ ବାନ୍‌ ଆଣ୍ଡିନେ ସାପା ଦନ୍‌ ରାଙ୍ଗ୍‌ଡ ବକେ, ଆତେନ୍‌ ସାପା ନେନେ ବାରି ନେନେ ଗଡ଼େଇଂନେ । ଏନ୍‌ସା ପର୍‌ମେସର୍‌ ମେଃନି ବାସଙ୍ଗ୍‌କେ, ନାଁ ଆତେନ୍‌ ଡିଙ୍ଗ୍‌ ।"

17 ଆତ୍‌ବା ଯାକୁବ ତଡ଼୍ୟାଚେ ନିଜର୍‌ ଗଡ଼େଇଂକେ ବାରି ସେଲାମ୍ବୁଏଃଇଂକେ ଉଁଟ୍‌ ଆଡ଼ାତ୍ରା ଆଃକକେ । 18 ତେସା ମେଇଂ ମେଃନି ଆର୍ଜେ ବଆର୍‌କେ, ଡାଗ୍‌ଲା, ପଦ୍ଦନ ଅରାମନ୍ୟା ସାପା ଜିବନ୍‌କ୍ନେ ଜିନିସ୍‌ ବାରି ସମ୍ପତି ସାଃଚେ ଆଣ୍ଡେ ୱିଗ୍‌କେ । ମେଇଂ ୱିଗ୍‌ଆର୍କେ ଯାକୁବନେ ଆବା ଇସ୍‌ହାକନେ ଦେସ୍‌ କିଣାନୀୟ ପାକା । 19 ଏନ୍‌ ବେଲା ଲାବନ ମେଣ୍ଡା ମାନ୍ଦାବାନ୍‌ ଉଗ୍‌ବ ଗୁଆଃନ୍‌ସା ୱେଲାଏଃଗେ । ଉଡ଼ିବେଲା ମେଁ ୱେଲେଃଗେ, ରାହେଲ ନିଜର୍‌ ଆବାନେ ଡୁଆନେ ମାପ୍‌ରୁଇଂକେ ଡଙ୍ଗାକେ । 20 ବାରି ଯାକୁବ ମାବାସଙ୍ଗ୍‌ଚେ ସ୍ଲ ୱେନ୍‌ସା ଅରାମୀୟ ଲାବନକେ ଜଟେ ବିକେ । 21 ଯାକୁବ ମେଁନେ ପରିବାର୍‌ ବାରି ସାପା ସମ୍ପତି ସାଃଚେ ଦାପ୍ରେ ମେଁ ଆତେନ୍‌ ଜାଗା ଆନ୍ତାର୍‌କେ । ମେଁ ଫରାତ୍‌ ଲଣ୍ଡିଆ ପୁଆଚେ ଗିଲୀୟଦ କଣ୍ଡା ପାକା ୱେକେ ।

22 ଜିର୍‌ସି ୱେକ୍ନେ ଇଡ଼ିଙ୍ଗ୍‌, ଲାବନକେ ବାସଙ୍ଗ୍‌କେ, ଯାକୁବ ଲାଗ୍‌ଡଗେ । 23 ତେସା ଲାବନ ମେଁନେ ରେମୁଆଁଇଂକେ ମୁଇଂଡାଗ୍ରା ଆଡିଙ୍ଗ୍‌ଚେ ଯାକୁବକେ ସାଃନ୍‌ସା ମେଁ ପ୍ଲା ନୁଆଁକେ । ତ୍ମା ଦିନ୍‌ ଇଡ଼ିଙ୍ଗ୍‌ ଲାବନ ଯାକୁବକେ ଗିଲୀୟଦନେ କଣ୍ଡା ଡାଗ୍ରା ସାଃକେ । 24 ଆତେନ୍‌ ମିଡିଗ୍‌ ପର୍‌ମେସର୍‌ ଅରାମୀୟ ଲାବନକେ ମୁସୁଡ଼ିଙ୍ଗ୍‌ନ୍ୟା ବାସଙ୍ଗ୍‌କେ, "ତରକ୍‌ ଲାଲା, ଯାକୁବ ବାସଙ୍ଗ୍‌ବକ୍ନେ ସାପା ସାମୁଆଁ ନ୍‌ସା ତରକ୍‌ ଲାଲା ।"

25 ବାର୍‌ମୁଇଂ ଦିନା ଲାବନ ଯାକୁବକେ ସାଃକେ । ଯାକୁବ କଣ୍ଡା ଆଡ଼ାତ୍ରା ମେଁ କୁଡ଼ିଆ ଆଃରେକେ । ତେସା ଲାବନ ବାରି ମେଁନେ ସାପା ରେମୁଆଁଇଂ କଣ୍ଡା ଆଡ଼ାନେ ଦେସ୍‌ ଗିଲୀୟଦନ୍ୟା କୁଡ଼ିଆ ଆଃରେକେ ।

26 ଲାବନ ଯାକୁବକେ ବାସଙ୍ଗ୍‌କେ, "ନାଁ ମେଃନ୍‌ସା ଆନେଙ୍ଗ୍‌ ଜଟେ ନାବିକେ ? ନାଁ ମେଃନ୍‌ସା ନେଙ୍ଗ୍‌ନେ ସେଲାଇଂକେ କାଣ୍ଡା ଆଃପୁଏ ମ୍ୟାଃଲାଏଃକ୍ନେ ବନ୍ଦି ରେମୁଆଁଇଂ ରକମ୍‌ ଡୁଙ୍ଗ୍‌ପେୱେକେ ? 27 ଆନେଙ୍ଗ୍‌ ମାବାସଙ୍ଗ୍‌ଚେ ପେ ଲାଗ୍‌ପେଡକେ ମେଃନ୍‌ସା ? ଆନେଙ୍ଗ୍‌ ମାମ୍ୟାଚେ ପେପାଙ୍ଗ୍‌ଲା, ନେଙ୍ଗ୍‌ ଆପେକେ ଅସ୍‌ମାର୍‌ ସାର୍‌ଚେ ବାରି ବାଜା ବାଇଦ୍‌ ଏତେ ବେମ୍ପାବି । 28 ନାଁ ନେଙ୍ଗ୍‌ନେ ସେଲାମ୍ବଃଅ ଏଗ୍‌ଲେ ବାରି ସେଲାଇଂକେ ୱିଗ୍‌ନେ ବେଲା ବ‍ଏନ୍ତାନେ ଡିଗ୍‌ ନାବିକେ ଣ୍ଡୁ । ଦେକ୍‌ରକମ୍‌ ନା ଅଜ୍ଞାନ କାମ୍‌ ମେଃନ୍‌ସା ନାଡିଙ୍ଗ୍‌କେ । 29 ଆନାକେ ଇଂସା ଡିଂନ୍‌ସାଃ ନିଂନେ ନ୍ତି ରାଜି ପର୍‌ମାନ୍, ମାତର୍ ତୁଗୁଆ ମିଡିଗ୍ ପେମ୍ବାନେ ପର୍‌ମେସର୍ ଆନିଂ ବାସଙ୍ଗ୍‌କେ, ତରକ୍ ଲାଃଲା, ଯାକୁବକେ ବଲ୍ ମନ୍ଦ୍ ମେଃଡିଗ୍ ଆବାସଙ୍ଗ୍‌ଗେ । 30 ନେଙ୍ଗ୍‌ ମ୍ୟା ନ୍‌ଲେକେ ଜେ ପେ ନିଜର୍‌ ଡିଆ ୱିଗ୍‌ନେସା ଚାଏଁ ପେଡିଙ୍ଗ୍‌କେ । ଆଣ୍ଡିନ୍‌ସା ପେ ଆତେନ୍‌ ଜାଗା ପେଆନ୍ତାର୍‌କେ । ମାତର୍‌ ପେ ମେଃନ୍‌ସା ନେଙ୍ଗ୍‌ ମାପ୍‌ରୁକେ ଡଙ୍ଗା ରାଙ୍ଗ୍‌ପେପାଙ୍ଗ୍‌କେ ?"

31 ତେନ୍‌ଇଡ଼ିଂ ଯାକୁବ ଲାବନକେ ଉତର୍‌ ବିକେ, "ନେଙ୍ଗ୍‌ ଆନାକେ ମାବାସଙ୍ଗ୍‌ କୁଟା ଲାଗ୍‌ଣ୍ଡକେ, ଡାଗ୍ଲା ନେଙ୍ଗ୍‌ ଆନାକେ ବୁଟମେଗ୍‌ ଣ୍ଡିଙ୍ଗ୍‌କେ । ନେଙ୍ଗ୍‌ ମ୍ୱାବେକେ, ନାଁ ନାଁନେ ସେଲାଇଂକେ ନେଙ୍ଗ୍‌ବାନ୍‌ ଆଆନ୍ତାର୍‌ ନାବିଏ । 32 ମାତର୍‌ ନେଙ୍ଗ୍‌ ନାଁନେ ମାପ୍‌ରୁକେ ଡଙ୍ଗା ଡୁଂନ୍ନାପାଙ୍ଗ୍‌କେ ଣ୍ଡୁ । ମାତର୍‌ ନାଁ ଜାଣ୍ଡେ ଡାଗ୍ରା ଆତେନ୍‌ ନାଅବାଏ, ଆମେକେ ବାଗୁଏ ମ୍ୱିଏ । ନାନେ ରେମୁଆଁଇଂ ସାକି ଲେଃଆର୍କେ । ନାନେ ଆକ୍‌ଡାଗ୍ରା ମେଃନେ ଲେଃଗେ, ନାଁ ନାନେ ମାପ୍‌ରୁକେ ତୁର୍‌ ନାୟାଏ । ନାଁନେ ମେଃନି ଲେଃଗେ, ନାଁ ଡୁଙ୍ଗ୍‌ୱିଗ୍‌ ନାୟାଏ ।" ରାହେଲ ଆତେନ୍‌ ଡଙ୍ଗା ବକେ ଡାଗ୍‌ଚେ, ଯାକୁବ ଆମ୍ୟାକେ ଣ୍ଡୁ ।

33 ଏନ୍‌ସା ଲାବନ ଯାକୁବନେ କୁଡ଼ିଆ ତୁର୍‌କେ । ଏନ୍‌ ଇଡ଼ିଙ୍ଗ୍‌ ମେଁ ଲେୟାନେ କୁଡ଼ିଆନ୍ୟା ତୁର୍‌କେ । ଏନ୍‌ ଇଡ଼ିଙ୍ଗ୍‌ ମେଁ ପାଙ୍ଗ୍‌ଚେ ମେଁନେ ମ୍ୱାକ୍ଲିଗ୍‌ ଚାକର୍‌ବୁଏଃନେ କୁଡ଼ିଆନ୍ୟା ତୁର୍‌କେ । ମାତର୍‌ ଆତ୍‌ଡାଗ୍ରା ଡିଗ୍‌ ଆଅବାକେ ଣ୍ଡୁ । ଏନ୍‌ ଇଡ଼ିଙ୍ଗ୍‌ ଲାବନ ରାହେଲନେ କୁଡ଼ିଆନ୍ୟା ୱେକେ । 34 ମାତର୍‌ ରାହେଲ ଆତେନ୍‌ ମାପ୍‌ରୁଇଂକେ ରାଙ୍ଗ୍‌ୱେଚେ ଉଁଟ୍‌ନେ ହାଉଦା ବିତ୍ରେ ବଚେ ଆତେନ୍‌ ଆଡ଼ାତ୍ରା କଲେଃଗେ । ଆତ୍‌ବା ଲାବନ ମେଁନେ କୁଡ଼ିଆ ଡୁଆନେ ସାପା ଜାଗା ତୁର୍‌କେ ଆତେନ୍‌ ଆବାକେ ଣ୍ଡୁ । 35 ରାହେଲ ମେଁନେ ଆବାକେ ବାସଙ୍ଗ୍‌କେ, "ନେଙ୍ଗ୍‌ ଆଡ଼ାତ୍ରା ରିସା ଆଡିଂଗେ । ନେଙ୍ଗ୍‌ ନାଁ ଡାଗ୍ରା ତୁଆଁ ନ୍‌ସା ଜଗ୍ୟ ଣ୍ଡୁ, ଡାଗ୍ଲା ନେଙ୍ଗ୍‌ ଆବୁଲେ ଡିଙ୍ଗ୍‌ନ୍‌ଲେକେ ।" ମାତର୍‌ ଲାବନ ସାପା ପାକା ତୁର୍‌କେ ଆଣ୍ଡିଡାଗ୍ରା ଡିଗ୍‌ ମେଁନେ ମାପ୍‌ରୁକେ ଆଅବାକେ ଣ୍ଡୁ ।

36 ଏନ୍‌ ଇଡ଼ିଙ୍ଗ୍‌ ଯାକୁବ ରିସା ଡିଙ୍ଗ୍‌ଚେ ଲାବନକେ ଅପମାନ୍ ଡିଂକେ, "ନେଙ୍ଗ୍‌ନେ ମେଃନେ ଦସ୍‌ ବାରି ମେଃନେ ପାପ୍‌ ଡିଂଗେ ଜେ, ନାଁ ଆନେଙ୍ଗ୍‌ ନୁଆଁ ରାଙ୍ଗ୍‌ପାଙ୍ଗ୍‌ଚେ ନାରାଃତୁଆଁକେ ? 37 ନେଙ୍ଗ୍‌ନେ ସାପା ଜିନିସ୍‌ ନାଁ ନାତୁର୍‌କେ, ମାତର୍‌ ନାନେ ମାପ୍‌ରୁକେ ନାଁଅବାକେ ଣ୍ଡୁ । ଜଦି ନାଁ ଆତେନ୍‌ ଅବା ନାଲେକେ; ତେଲା ନାଁ ଆତେନ୍‌ ଆଃସୁଏ, ନେନେ ସାପା ରେମୁଆଁ ଆତେନ୍‌ କେଆର୍‌ଏ । ଆଣ୍ଡିଡାଗ୍ରା ଟିକ୍‌ ଆତେନ୍‌ ରେମୁଆଁଇଂକେ ବିଚାର୍‌ ଡିଙ୍ଗ୍‌ନେ ବିଃ । 38 ନେଙ୍ଗ୍‌ ନାଁ ନ୍‌ସା କଡ଼େ ମୁଆଁ‌ ଜାବର୍‌ କସ୍ଟ ଣ୍ଡିଙ୍ଗ୍‌କେ । ଆତେନ୍‌ ବେଲା ନାନେ ଡିଆ ମେଣ୍ଡା ବାରି ଗିମିଃଇଂନେ ଗର୍ବ ନସ୍ଟ ଆଡିଙ୍ଗ୍‌କେ ଣ୍ଡୁ, ବାରି ନେଙ୍ଗ୍‌ ଆତେନ୍‌ଇଂକେ ନ୍ନାଚଙ୍ଗ୍‌କେ ଣ୍ଡୁ । 39 ଉଡ଼ିବେଲା ନାନେ ମେଣ୍ଡା ବାରି ଗ୍ମି କଣ୍ଡା ଜନ୍ତୁଇଂ ବାନ୍‌ ଚିନାବାନା ଡିଙ୍ଗ୍‌ଆର୍କେ, ନେଙ୍ଗ୍‌ ନାନେ ନସ୍ଟ ଆଡିଙ୍ଗ୍‌ଚେ ଆନ୍ତାର୍‌ ନ୍ନାବିଃକେ ଣ୍ଡୁ । ମାତର୍‌ ନେଙ୍ଗ୍‌ନେ ନିଜର୍‌ ମେଣ୍ଡା ବାରି ଗ୍ମି ଆତେନ୍‌ ଜାଗାନ୍ୟା ମ୍ୱକେ । ଜଦି ମେଃଡିଗ୍‌ ମିଡିଗ୍‌ ଡଙ୍ଗା ୱେଲେଃ କି ସ୍ମି ଡଙ୍ଗା ୱେଲେଃ, ନେଙ୍ଗ୍‌ ନିଜର୍‌ନେ ପସୁ ଆତେନ୍‌ ଜାଗାନ୍ୟା ମ୍ୱଏ । 40 ସ୍ମି ନ୍ନାସେଙ୍ଗ୍‌, ମିଡିଗ୍‌ ରାସଃ, ନେଙ୍ଗ୍‌ ଗାଗ୍‌ଡ଼େ ବାକେ, ନେଙ୍ଗ୍‌ ମ୍ମୁଆଃନେ ଲେମୁଆଃ ଲାଗ୍‌ଡକେ, ଦେକ୍‌ରକମ୍‌ ନେଙ୍ଗ୍‌ ନ୍‌ଲେଗେ । 41 ନେଙ୍ଗ୍‌ କଡ଼େ ମୁଆଁ‌ ନାଁ ଡୁଆ ନ୍‌ଲେଗେ । ନାନେ ମ୍ୱାକ୍ଲିଗ୍‌ ସେଲା ନ୍‌ସା ଚଉଦ ମୁଆଁ‌ ବାରି ପସୁଇଂ ନ୍‌ସା ତୁର୍‌ ମୁଆଁ‌ ଚାକର୍‌ କାମ୍‌ ଣ୍ଡିଙ୍ଗ୍‌କେ । ଏନ୍‌ ବିତ୍ରେ ନାଁ ଗୁଆ ତର୍‌ ନେଙ୍ଗ୍‌ନେ ଦର୍ମା‌ ଆଃବଦ୍‌ଲେ ନାବକେ । 42 ନେଙ୍ଗ୍‌ନେ ନ୍ତା ଞ୍ଜାଇଂନେ ପର୍‌ମେସର୍‌ ଅବ୍ରହାମନେ ପର୍‌ମେସର୍‌ ବାରି ଇସ୍‌ହାକନେ ବୁଟମେଗ୍‌ ଜାଗା ପର୍‌ମେସର୍‌ ଅଃନା ନେଙ୍ଗ୍‌ ଏତେ ଆଲେଲା, ତେଲା ଡିଲାଡିଗ୍‌ ଏବେ ଆନେଙ୍ଗ୍‌ ନାଁ ସରାଃ ନ୍ତି ବେ ନାପାବି । ପର୍‌ମେସର୍‌ ନେଙ୍ଗ୍‌ନେ ଦୁକ୍‌ ବାରି କସ୍ଟ ଡିଙ୍ଗ୍‌କ୍ନେ କେଲେଃକେ । ଏନ୍‌ସା ତୁଗୁଆ ମିଡିଗ୍‌ ଆନାକେ ଦମ୍‌କେ ବକେ ।"

43 ଲାବନ ଯାକୁବକେ ବାଲିର୍‌କେ, ଏନ୍‌ ସେଲାଇଂ ନେଙ୍ଗ୍‌ନେ ସେଲା ବାରି ଏନ୍‌ ଗଡ଼େଇଂ ନେଙ୍ଗ୍‌ନେ ଗଡ଼େଇଂ ବାରି ଏନ୍‌ ପସୁଇଂ ନେଙ୍ଗ୍‌ନେ ପସୁଇଂ, ବାରି ମେଃ ମେଃନି କେନାଡିଙ୍ଗ୍‌କେ, ଆତେନ୍‌ ସାପା ନେଙ୍ଗ୍‌ନେ, ଏନ୍‌ସା ନେଙ୍ଗ୍‌ନେ ଏନ୍‌ ସେଲାଇଂକେ ବାରି କ୍ମେଇଂ ଜନମ୍‌ ଆଡିଙ୍ଗ୍‌କ୍ନେ ଗଡ଼େଇଂକେ ନେଙ୍ଗ୍‌ ମେଃନି ଣ୍ଡିଙ୍ଗ୍‌ଏ ? 44 ତେସା ନେ ମ୍ୱାୟା ନିଅମ୍‌ ତିଆର୍‌ ନେଡିଙ୍ଗ୍‌, "ଆତେନ୍‌ ନେ ସାକି ଡିଙ୍ଗ୍‌ଏ ।"

45 ଆତେନ୍‌ ବେଲା ଯାକୁବ ମୁଇଂ ବ୍ରି ସାଃଚେ କୁଟ୍‌ ରକମ୍‌ ତିଆର୍‌ ଡିଙ୍ଗ୍‌କେ । 46 ବାରି ଯାକୁବ ନିଜର୍‌ ରେମୁଆଁକେ ବାଲିର୍‌କେ, ପେଇଂ ମୁଇଂ ମୁଇଂ ବ୍ରି ଜଗ୍‌ପା । ଆତ୍‌ବା ମେଇଂ ବ୍ରି ଡୁଙ୍ଗ୍‌ପାଙ୍ଗ୍‌ଚେ ମୁଇଂନ୍ୟା ରାସିଙ୍ଗ୍‌ ଆର୍କେ, ଆତେନ୍‌ ଜାଗାନ୍ୟା ଆତେନ୍‌ ବ୍ରି ଗାଦି ଆଡ଼ାତ୍ରା ଚଙ୍ଗ୍‌ ଆର୍କେ । 47 ଲାବନ ଆତେନ୍‌ ଜାଗାନେ ମ୍ନି ବିଃକେ ଯିଗର-ସାହଦୂଥା, ମାତର୍‌ ଯାକୁବ ଆତେନ୍‌ ମ୍ନି ବିଃକେ ଗଲୟଦ୍‌ ବକେ । 48 ଲାବନ ଯାକୁବକେ ବାସଙ୍ଗ୍‌କେ, "ଏନ୍‌ ଗାଦି ଏଃକେ ନାଁ ନେଙ୍ଗ୍‌ନେ ସାକି ଡିଙ୍ଗ୍‌ଚେ ଲେଃଗେ ।" 49 ଆତେନ୍‌ସା ମେଁନେ ମ୍ନି ଗଲୟଦ୍‌ ବାରି ମିସ୍‌ପା ବକେ । ମେଃଡାଗ୍‌ଲା ମେଁ ବାସଙ୍ଗ୍‌କେ, ନେ ନିଜର୍‌ ନିଜର୍‌ ବିତ୍ରେ ଅଲ୍‌ଗା ଅଲ୍‌ଗା ଡିଂଲା, ମାପ୍‌ରୁ ଆନେଙ୍ଗ୍‌କେ ଆରି ଆନାକେ ସାପାବେଲା ଉର୍‌ଚେ ଲେଃଏ । 50 ନାଁ ଅଃନା ନେଙ୍ଗ୍‌ ସେଲାଇଂକେ ଦୁକ୍‌ ନାବିଏ, ନେଙ୍ଗ୍‌ନେ ସେଲାଇଂ ଲେଃଲେଚେ ବିନ୍‌ ସେଲାମ୍ବୁଏଃକେ ବିବା ନାଡିଙ୍ଗ୍‌ଏ, ତେଲା ଆତେନ୍‌ ବେଲା ଜାଣ୍ଡେ ଡିଗ୍‌ ରେମୁଆଁ ନେଇଂନେ ଡାଗ୍ରା ଆଲେଃଆର୍‌ ସାକି, ମାତର୍‌ ପର୍‌ମେସର୍‌ ନେଙ୍ଗ୍‌ ବାରି ନାଁ ଡାଗ୍ରା ସାକି ଡିଙ୍ଗ୍‌ଏ । 51 ବାରି ଲାବନ ଯାକୁବକେ ବାସଙ୍ଗ୍‌କେ, "ଆକାନ୍‌ ମାନ୍ଦା କେଲା, ବାରି ନେ ମ୍ୱାୟାନେ ମଜେ ଲେଃକ୍ନେ ନେଙ୍ଗ୍‌ ତିଆର୍‌ ଣ୍ଡିଙ୍ଗ୍‌କ୍ନେ ଏନ୍‌ କୁଟ୍‌ କେଲା । 52 ନେଙ୍ଗ୍‌ ଅହିତ ଡିଙ୍ଗ୍‌ନ୍‌ସା ଏନ୍‌ ମାନ୍ଦା ଗାଲେଗ୍‌ଚେ ନାଁ ଡାଗ୍ରା ନାପାଙ୍ଗ୍‌ ଣ୍ଡୁ, ନାଁ ଡିଗ୍‌ ଏନ୍‌ ମାନ୍ଦା ବାରି ଏନ୍‌ କୁଟ୍‌ ଗାଲେଗ୍‌ଚେ ନେଙ୍ଗ୍‌ ଡାଗ୍ରା ନାପାଙ୍ଗ୍‌ ଣ୍ଡୁ । ଆକ୍‌ନେ ସାକି ଏନ୍‌ ମାନ୍ଦା ଆରି ଆକ୍‌ନେ ସାକି ଏନ୍‌ କୁଟ୍‌ । 53 ଅବ୍ରହାମନେ ପର୍‌ମେସର୍‌, ନାହୋରନେ ପର୍‌ମେସର୍‌, ବାରି ମେଇଂନେ ନ୍ତା ଞ୍ଜାଇଂନେ ପର୍‌ମେସର୍‌ ନେଙ୍ଗ୍‌ନେ ବାରି ନାଁନେ ବିତ୍ରେ ବିଚାର୍‌ ଡିଙ୍ଗ୍‌ଏ ।" ଆତେନ୍‌ ବେଲା ଯାକୁବ ପର୍‌ମେସର୍‌ନେ ଡାଗ୍ରା ପାର୍‌ମାନ୍‌ ଡିଙ୍ଗ୍‌ଏ, ମେଃନି ଆତେନ୍‌ ଆବା ଇସ୍‌ହାକନେ "ବୁଟମେଗ୍‌ ଜାଗାନେ ଡାଗ୍‌ଚେ ପାର୍‌ମାନ୍‌ ଡିଙ୍ଗ୍‌କେ ।" 54 ଏନ୍‌ଇଡ଼ିଙ୍ଗ୍‌ ମେଁ ଆତେନ୍‌ କଣ୍ଡାଅରିଆ ପୁଜା ଆଡାଚେ ଚଙ୍ଗ୍‌ ନ୍‌ସା ନିଜର୍‌ ରେମୁଆଁଇଂକେ ୱାକେ । ଆତ୍‌ଡାଗ୍ରା ମେଇଂ ଚଙ୍ଗ୍‌ଉଗ୍‌ଚେ କଣ୍ଡାଅରିଆ ଆତେନ୍‌ ମିଡିଗ୍‌ ଲେଃଆର୍‌ଗେ । 55 ଏନ୍‌ଇଡ଼ିଙ୍ଗ୍‌ ଲାବନ ଞ୍ଜିର୍‌ନୁଗ୍‌ ତଡ଼୍ୟାଚେ ନିଜର୍‌ ସେଲାମ୍ବୁଏଃଇଂକେ ବାରି ଗଡ଼େଇଂକେ ବଏନ୍ତାଚେ ଆସିର୍ବାଦ୍‌ ଡିଙ୍ଗ୍‌କେ । ଲାବନ ନିଜର୍‌ ଜାଗାନ୍ୟା ଆଣ୍ଡେ ୱିଗ୍‌କେ ।