ଯୋଷେଫ୍ନେ ମୁସୁଡ଼ିଙ୍ଗ୍
1 ଯାକୁବ କିଣାନ ଦେସ୍ନ୍ୟା ବାସା ଲେଃଗେ । ଆଣ୍ଡିନେ ଜାଗାନ୍ୟା ମେଁନେ ଆବାଡ଼େ ବାସା ଲେଃଗେ । 2 ଏନ୍ ଡିଙ୍ଗ୍ଡିଂକେ ଯାକୁବ ପରିବାର୍ନେ ଇତିଆସ୍ । ଯୋଷେଫକେ ଉଡ଼ିବେଲା ସତ୍ର ମୁଆଁ ଡିଙ୍ଗ୍ଲେଃଗେ । ମେଁ ମେଣ୍ଡା ବାରି ଗ୍ମି ତୁର୍ତ୍ୟା ଡିଂଗେ । ଯୋଷେଫ ଏନ୍ କାମ୍ ମେଁନେ ବୟାଁଇଂ ଏତେ ଡିଂଡିଙ୍ଗ୍ଗେ । ମେଁ ମେଁନେ ଆବାଡ଼େନେ ସେଲାମ୍ବୁଏଃ ବିଲହା ବାରି ସିଲ୍ପାନେ ଉଂଣ୍ଡେଇଂନେ ସାଇଜ ଡିଙ୍ଗ୍ନେ ଲେଃଗେ । ଯୋଷେଫ ମେଁନେ ଆବାକେ ମେଁନେ ବୟାଁଇଂନେ କାରାପ୍ କାମ୍ ବିସଏରେ ସାପା ବାସଙ୍ଗ୍ଡିଂଗେ ।
3 ଆତେନ୍ ଯୋଷେଫ ଇସ୍ରାଏଲ୍ନେ ଡକ୍ରା ଅବସ୍ତାନେ ଗଡ଼େଅ ଡିଂଲାଏଃଗେସାଃ ଇସ୍ରାଏଲ୍ ସର୍ତେ ଗଡ଼େଅବାନ୍ ଆମେକେ ଜାବର୍ ଆଲାଦ୍ ଡିଂଆର୍କେ, ଆରି ଆମେକେ ବିନ୍ ବିନ୍ ବାନାନେ ମୁଇଂ ତଗ୍ରିୟାଃ ଆଃରେଚେଃ ବିଃବଗେ । 4 ମାତର୍ ଆବା ସାପା ଉଂଡେ ବାନ୍ ଯୋଷେଫକେ ଜାବର୍ ବଲ୍ ବାଡିଙ୍ଗ୍କ୍ନେ କେଚେ ମେଁନେ ବୟାଁଇଂ ଆମେକେ ଇଙ୍ଗ୍ଚେଃ ଆର୍କେ ବାରି ମେଁନେ ଏତେ ବଲ୍ ବାବ୍ରେ ବାଲିର୍ବାତା ଆଡିଙ୍ଗ୍ଆର୍କେ ଣ୍ଡୁ ।
5 ଆରି ଯୋଷେଫ ମୁଇଂ ମୁସୁଡ଼ିଙ୍ଗ୍ କେଚେ ନିଜର୍ ବୟାଁଇଂକେ ବାଲିର୍କେ । ଆତ୍ବା ମେଇଂ ଜାବର୍ ଇଙ୍ଗ୍ଚେଃ ଆର୍କେ । 6 ଯୋଷେଫ ଆମେଇଂକେ ବାଲିର୍କେ, ନେଙ୍ଗ୍ ଆଣ୍ଡିନେ ମୁସୁଡ଼ିଙ୍ଗ୍ କେନ୍ଲେଃଗେ, ଦୟା ଡିଙ୍ଗ୍ଚେ ଆତେନ୍ ଅଁପା । 7 ନେ ସାପାରେ ଲିଜନ୍ୟା ଗ୍ନାଗ୍ ଗାଗ୍ନେଡିଂଗେ । ଆତେନ୍ ନେଙ୍ଗ୍ ଙ୍କେକେ ନେଙ୍ଗ୍ନେ ଗ୍ନାଗ୍ ତଡ଼୍ୟାଚେ ତୁଆଁକେ । ପେନେ ଗ୍ନାଗ୍ ସାପା ନେଙ୍ଗ୍ ଗ୍ନାଗ୍କେ ପିତୁର୍ ପାକା ଗେରେଚେ ସାର୍ଲଆର୍କେ ।
8 ମେଁନେ ବୟାଁଇଂ ଆମେକେ ବାସଙ୍ଗ୍କେ, "ନାଁ ମେଃନେ ବାବେ ନାଡିଙ୍ଗ୍କେ, ଇଃସାଙ୍ଗ୍ ଡିଙ୍ଗ୍ଚେ ନେ ଆଡ଼ାତ୍ରା ସାସନ୍ ନାଡିଙ୍ଗ୍ଏ ?" ମେଁନେ ବୟାଁଇଂ ଏନ୍ ମୁସୁଡ଼ିଙ୍ଗ୍ନେ ସାମୁଆଁ ଅଁଚେ ଆମେକେ ଜାବର୍ ଇଙ୍ଗ୍ଚେଃ ଆର୍କେ ।
9 ଏନ୍ ଇଡ଼ିଙ୍ଗ୍ ଯୋଷେଫ ବିନ୍ ମୁଇଂ ମୁସୁଡ଼ିଙ୍ଗ୍ କେଚେ ମେଁନେ ବୟାଁଇଂକେ ଏନ୍ ମୁସୁଡ଼ିଙ୍ଗ୍ ବିସଏରେ ବାଲିର୍କେ, "ସ୍ନି ଆରି ଆର୍କେ ଆରି ଗୋମୁଇଙ୍ଗ୍କ୍ଲିଗ୍ ଚାଙ୍କୁଆ ଆନେଙ୍ଗ୍ ସାର୍ଲ ଆର୍କେ ।"
10 ଯୋଷେଫ ମୁସୁଡ଼ିଙ୍ଗ୍ ସାମୁଆଁ ମେଁ ବାଡ଼େକେ ବାରି ବୟାଁଇଂକେ ବାସଙ୍ଗ୍କେ, ମାତର୍ ମେଁନେ ଆବା ଆମେକେ ୱିଙ୍ଗ୍କେ । ମେଁନେ ଆବା ଆମେକେ ବାସଙ୍ଗ୍କେ, "ଏନ୍ ଡିରକମ୍ନେ ମୁସୁଡ଼ିଙ୍ଗ୍ ? ନାଁ ମେଃନେ ବାବେ ନାଡିଙ୍ଗ୍, ନେଙ୍ଗ୍ ବାରି ନାନେ ଇୟାଙ୍ଗ୍ ବାରି ନାନେ ବୟାଁଇଂ ଆନାକେ ସାର୍ଲ ନ୍ସା ନେପାଙ୍ଗ୍ଏ ?" 11 ଆତ୍ବା ମେଁନେ ବୟାଁଇଂ ଆମେକେ ଇଂସା ଆର୍କେ । ମାତର୍ ମେଁନେ ଆବା ଆତେନ୍ ସାମୁଆଁ ମନେ ବକେ ।
ଯୋଷେଫକେ ସନେ ଆରି ମିସର୍ ୱେନେ
12 ମେଃସୁଆ ଯୋଷେଫନେ ବୟାଁଇଂ ଶିଖିମନ୍ୟା ମେଁନେ ଆବାନେ ପସୁ ମାନ୍ଦା ତୁର୍ତ୍ୟା ନ୍ସା ୱେକେ । 13 ଇସ୍ରାଏଲ ଯୋଷେଫକେ ବାସଙ୍ଗ୍କେ, "ଶିଖିମନ୍ୟା ୱେଲା । ନାବୟାଁଇଂ ଆତ୍ଡାଗ୍ରା ମେଣ୍ଡା ବଆର୍ଡିଂକେ ।" ଯୋଷେଫ ଉତର୍ ବିକେ, "ନେଙ୍ଗ୍ ଆତ୍ଡାଗ୍ରା ଉଁୱେଏ ।" 14 ଯୋଷେଫନେ ଆବାଡ଼େ ବାଲିର୍କେ, "ୱେଚେ କେଲା ନାଁ ବୟାଁଇଂ ବାରି ପସୁ ମାନ୍ଦା ସାପା ଡିରକମ୍ ଲେଃଆର୍କେ ।" କେଚେ ଆଣ୍ଡେ ପାଙ୍ଗ୍ଲା ବାରି ଆନେଙ୍ଗ୍ ବାସଙ୍ଗ୍ । ତେସା ଯୋଷେଫନେ ଆବା ହିବ୍ରୋଣ ଶିଖିମ ଆଡ଼ାତ୍ରା ବେକେ । 15 ଶିଖିମନ୍ୟା ଯୋଷେଫ ଆକେ ଆତେ ଲିଜନ୍ୟା ଅଲେଙ୍ଗ୍ ଡିଙ୍ଗ୍କ୍ନେ ମୁଇଂ ରେମୁଆଁ କେକେ । ଆତେନ୍ ରେମୁଆଁ ସାଲ୍ୟାଃକୁକେ, "ନାଁ ଆକ୍ଡାଗ୍ରା ମେଃନି ତୁର୍ ନାଡିଙ୍ଗ୍କେ ?"
16 ଯୋଷେଫ ଉତର୍ ବିକେ, "ନେଙ୍ଗ୍ ନେଙ୍ଗ୍ନେ ବୟାଁଇଂକେ ତୁର୍ ଣ୍ଡିଙ୍ଗ୍ । ଦୟା ଡିଙ୍ଗ୍ଚେ ନାବାସଙ୍ଗ୍ଏ କି ମେଇଂ ପସୁ ମାନ୍ଦା ଏତେ ଆଣ୍ଡିଡାଗ୍ରା ଲେଃଆର୍କେ ।"
17 ଆତେନ୍ ରେମୁଆଁ ବାସଙ୍ଗ୍କେ, ମେଇଂ ଆକ୍ବାନ୍ ୱିଗ୍ଲେଃଆର୍କେ । ଡାଗ୍ଲା ନେଙ୍ଗ୍ ଅଁ ନ୍ଲେଗେ, ମେଇଂ ଦୋଥନନ୍ୟା ନେୱେଏ ଡାଗ୍ଚେ ବାଲିର୍ ଡିଙ୍ଗ୍ଆର୍ଗେ । ଏନ୍ସା ଯୋଷେଫ ନିଜର୍ ବୟାଁଇଂ ପ୍ଲା ପ୍ଲା ୱେଚେ ଦୋଥନନ୍ୟା ମେଇଂ ଏତେ କୁଡ଼େଃକେ ।
18 ଯୋଷେଫନେ ବୟାଁଇଂ ସ୍ଲବାନ୍ କେଆର୍କେ ଜେ ମେଁ ପାଙ୍ଗ୍ଡିଙ୍ଗ୍କେ । ବାରି ମେଁ ୱେଚାନେ ସେନୁଗ୍ ମେଇଂ ଆମେକେ ବାଗୁଏ ବିନ୍ସା ବିଚାର୍ ଡିଙ୍ଗ୍ଆର୍କେ । 19 ବୟାଁଇଂ ନିଜର୍ ନିଜର୍ ବିତ୍ରେ ବାଲିର୍ବାତା ଡିଙ୍ଗ୍ଆର୍କେ, "ଗିତେ କେଲାପା, ମୁସୁଡ଼ିଙ୍ଗ୍ କିକେଣ୍ଡ୍ରେ ଯୋଷେଫ ପାଙ୍ଗ୍ଡିଙ୍ଗ୍କେ । 20 ଗେଲାପା, ଆମେକେ ବାଗୁଏ ବିଚେ ମୁଇଂ କୁରୁନ୍ୟା ତ୍ଲାଗ୍ ନେବିପା । ନେ ନେନେ ଆବାକେ ନେବାସଙ୍ଗ୍ପା ଜେ, ଆମେକେ ମୁଇଂ କଣ୍ଡା ଜନ୍ତୁ ଚଙ୍ଗ୍ ବିଃଗେ । ଏନ୍ ଇଡ଼ିଙ୍ଗ୍ ନେକେପା, ମେଁନେ ମୁସୁଡ଼ିଙ୍ଗ୍ନେ ମେଃନି ଡିଙ୍ଗ୍ଏ ।"
21 ମାତର୍ ରୁବେନ ଏନ୍ ଅଁଚେ ମେଁ ଯୋଷେଫକେ ମେଇଂନେବାନ୍ ରକ୍ୟା ଡିଙ୍ଗ୍ ନ୍ସା ଚାଏଁକେ । ରୁବେନ ବାଲିର୍କେ, "ଆମେକେ ଆବାଗୁଏଗ୍ପା । 22 ବାରି ରୁବେନ ମେଇଂନେ ନ୍ତି ବାନ୍ ଆମେକେ ରକ୍ୟା ଡିଙ୍ଗ୍ଚେ ଆବା ଡାଗ୍ରା ବେବିଃନେ ଚାଲାକିରେ ଆମେଇଂକେ ବାଲିର୍କେ । ପେ ମ୍ମ୍ୟାଁ ତାର୍କେ ରକମ୍ ଆବଗ୍ଗେପା ।" କଣ୍ଡା ବିତ୍ରେ ଆଣ୍ଡିନେ ଡିଗ୍ କୁରୁନ୍ୟା ଜଗ୍ତ୍ଲାଗ୍ ବିଃପା । ମାତର୍ ମେଁ ଆଡ଼ାତ୍ରା ନ୍ତି ଆରାଃତଡ଼୍ୟାଗ୍ପା । 23 ଯୋଷେଫ ମେଁନେ ବୟାଁଇଂ ଡାଗ୍ରା ପାଙ୍ଗ୍କେ । ଏନ୍ ଇଡ଼ିଙ୍ଗ୍ ମେଁନେ ବୟାଁଇଂ ସାଚେ ମେଁନେ ସୁନ୍ଦର୍ ବିନ୍ ବିନ୍ ବାନାକ୍ନେ ସକା ସେଗାର୍ ଜଗ୍ତ୍ଲିଗ୍ ଆର୍କେ । 24 ଏନ୍ ଇଡ଼ିଙ୍ଗ୍ ଆମେକେ ମୁଇଂ ନ୍ସୁଆର୍କ୍ନେ କୁରୁ ବିତ୍ରେ ଜଃଗା ବିଃଆର୍କେ । ଆତ୍ ଡାଗ୍ରା ଣ୍ଡିଆ ଆଲେଃଗେ ।
25 ଉଡ଼ିବେଲା ଯୋଷେଫ କୁରୁ ବିତ୍ରେ ଲେଃଗେ । ମେଁନେ ବୟାଁଇଂ ଚଙ୍ଗ୍ ନ୍ସା କଆର୍କେ । ଏନ୍ ଇଡ଼ିଙ୍ଗ୍ ମେଇଂ କେଆର୍କେ ଜେ ମୁଇଂ ବେପାରି ମାନ୍ଦା ଗିଲୀୟଦବାନ୍ ଇଶ୍ମାୟେଲନେ ଅଲେଙ୍ଗ୍ଣ୍ଡ୍ରେ ଉଁଟ୍ ଆଡ଼ାତ୍ରା ନିମାଣ୍ଡା ବାସ୍ନା ଜିନିସ୍ ବାରି ଗୁଗ୍ଗୁଳ ବାରି ବାସ୍ନା ରସ୍ ସାଚେ ମିସର୍ ଦେସ୍ ପାକା ୱେଆର୍ଡିଂଗେ । 26 ତେସା ଯିହୁଦା ମେଁନେ ବୟାଁଇଂକେ ବାଲିର୍କେ, "ଜଦି ନେ ନେନେ ବୟାଁକେ ବାଗୁଏଚେ ବାରି ମେଁ ଗୁଏକ୍ନେକେ ସାମୁଆଁ ବୁଃଡ଼ିଲା ଆନେକେ ଲାବ୍ ମେଃନି ? 27 ପାଙ୍ଗ୍ଲାପା, ଆକାନ୍ ସାପା ଇଶ୍ମାୟେଲନେ ରେମୁଆଁଇଂକେ ନେଃ ସନେଃବିପା । ଡିଲାଡିଗ୍ ମେଁ ନେନେ ବୟାଁ, ନେଃ ମେଁନେ ଚିଲି ରକମ୍ ।" ମେଁନେ ବୟାଁଇଂ ଏଃତର୍ ରାଜି ଡିଙ୍ଗ୍ଆର୍କେ । 28 ଉଡ଼ିବେଲା ମିଦିୟନୀୟ ବେପାରିଇଂ ମେଇଂନେ ଡାଗ୍ରା ପାଙ୍ଗ୍ଆର୍କେ, ବୟାଁଣ୍ଡେଇଂ ଯୋଷେଫକେ କୁରୁ ବିତ୍ରେ ବାନ୍ ଜଗ୍ ଆତାର୍ ଆର୍କେ ବାରି ମୁଇଂକୁଡ଼ି ରୁପା ଡାବୁ ନ୍ସା ସବିଆର୍କେ । ଆତେନ୍ ଇଶ୍ମାୟେଲ୍ନେ ରେମୁଆଁଇଂ ଯୋଷେଫକେ ମିସର୍ ଦେସ୍ନ୍ୟା ରାଙ୍ଗ୍ଡଆର୍କେ ।
29 ରୁବେନ ମେଁନେ ବୟାଁଇଂ ଏତେ ଆଲେଃଗେ, ଉଡ଼ିବେଲା ମେଇଂ ଯୋଷେଫକେ ବେପାରି ଡାଗ୍ରା ସବିଆର୍କେ । ଆତେନ୍ ବେଲା ରୁବେନ ପାଙ୍ଗ୍ଚେ କେକେ ଜେ, ମେଁନେ ବୟାଁ ଯୋଷେଫ ଆତେନ୍ କୁରୁନ୍ୟା ଆଲେଃଗେ । ମେଁ ଅକେନ୍ ତେରେପେତେ ଡିଙ୍ଗ୍କେ ଜେ, ମେଁ ନିଜର୍ ସକା ସାପା ସେଗାର୍ ଜଗ୍ତ୍ଲାଗ୍କେ । 30 ରୁବେନ ମେଁନେ ବୟାଁଇଂ ଡାଗ୍ରା ୱେଚେ ବାଲିର୍କେ, "ଯୋଷେଫ ବାରି କୁରୁ ବିତ୍ରେ ଣ୍ଡୁ । ନେଙ୍ଗ୍ ମେଃନି ଣ୍ଡିଙ୍ଗ୍ଏ ?"
31 ମେଁନେ ବୟାଁଇଂ ମୁଇଂ ଗିମିଃ ବାଗୁଏଚେ ମେଁନେ ମ୍ମ୍ୟାଁନ୍ୟା ଯୋଷେଫନେ ସକାକେ ଜଣ୍ଡ୍ୟା ବିଃଆର୍କେ । 32 ଏନ୍ ଇଡ଼ିଙ୍ଗ୍ ମେଇଂ ଆତେନ୍ ସକାକେ ମେଇଂନେ ଆବା ଡାଗ୍ରା ଏନ୍ ସାମୁଆଁ ବାଲିର୍ ବେଆର୍କେ, "ନେ ଏନ୍ ସକା ନେବାକେ । ଏନ୍ ମେଃନି ଯୋଷେଫନେ ସକା ?"
33 ମେଇଂନେ ଆବା ଆତେନ୍ ସକା କେଚେ ଆତେନ୍ ଯୋଷେଫନେ ଡାଗ୍ଚେ ମ୍ୟାକେ । ମେଇଂନେ ଆବା ବାସଙ୍ଗ୍କେ, "ଅଃଅଁ, ଏନ୍ ଯୋଷେଫନେ ସକା । ମାତର୍ କଣ୍ଡାନେ ମୁଇଂ ଜନ୍ତୁ ଆମେକେ ଚଙ୍ଗ୍ ବିଃବକେ ।" 34 ଆତ୍ବା ଯାକୁବ ନିଜର୍ ପାଟାଇ ସେଗାର୍ଚେ ନିଜର୍ ଗାଗ୍ଡ଼େ ବାସ୍ତା ସଚେ ଉଂଡେ ନ୍ସା ଗୁଲୁଏ ଦିନ୍ ଜାକ ଅଃକେ । 35 ଯାକୁବନେ ଉଂଡେ ବାରି ସେଲାଇଂ ଆମେକେ ଚିନ୍ତା ମାଡିଙ୍ଗ୍ ନ୍ସା ବାସଙ୍ଗ୍ଆର୍କେ । ମାତର୍ ଯାକୁବ ଚିନ୍ତା ଡିଙ୍ଗ୍କେ । ଯାକୁବ ବାସଙ୍ଗ୍କେ, "ନେଙ୍ଗ୍ ଗୁଏ ଜାକ ନେଙ୍ଗ୍ ଉଂ ନ୍ସା ଚିନ୍ତା ଣ୍ଡିଙ୍ଗ୍ଏ ।" ତେସା ଯାକୁବନେ ଚିନ୍ତା ଲାଗେ ଲେଃଗେ ।
36 ମିଦିୟନୀୟ ବେପାରିଇଂ ଯୋଷେଫକେ ମିସର୍ନ୍ୟା ସବିଆର୍କେ । ମେଇଂ ଆମେକେ ପୋଟିଫର ମ୍ନିକ୍ନେ ଫାରୋକେ ରକ୍ୟା ଡିଙ୍ଗ୍ଣ୍ଡ୍ରେ ସେନାପତିନେ ଡାଗ୍ରା ଯୋଷେଫକେ ସବିଆର୍କେ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)