Gênesis 45

ଯୋଷେଫ ବୟାଁଇଂକେ ଆସ୍ନାମୁଆକେ

1 ଯୋଷେଫ ନିଜ୍‌କେ ଜାବର୍‌ ଦିନ୍‌ ବୁଃଡ଼ିଚେ ବ ଆୟାକେ ଣ୍ଡୁ । ଯୋଷେଫ ସାପା ରେମୁଆଁକେ ୱାଚେ ବାସଙ୍ଗ୍‌କେ, "ସାପାରେ ଆକ୍‌ବାନ୍‌ ୱେଲାପା ।" ତେସା ଜାଡିଗ୍‌ ଆଲେଃକ୍ନେ ବେଲା ଯୋଷେଫ ନିଜ୍‌କେ ବୟାଁଇଂନେ ସାମ୍‌ନେ ଆଃସାମୁଁଆଃକେ । 2 ମେଁ ଜାବର୍‌ ସାରଚେ ଦେକ୍‌ରକମ୍‌ ଅଃକେ ଜେ, ମିସର୍‌ଣ୍ଡ୍ରେଇଂ ବାରି ଫାରୋନେ ଡୁଆ ଲେଃକ୍ନେ ରେମୁଆଁଇଂ ଆତେନ୍‌ ଅଁଆର୍କେ । 3 ଯୋଷେଫ ମେଁନେ ବୟାଁଇଂକେ ବାସଙ୍ଗ୍‌କେ, "ନେଙ୍ଗ୍‌ ପେନେ ବୟାଁ ଯୋଷେଫ । ନେଙ୍ଗ୍‌ ଆବା କି ଏଃ ଜାକ ମ୍ବ୍ର ଲେଃକେ ?" ମାତର୍‌ ମେଁନେ ବୟାଁଇଂ ଉତର୍‌ ଆବିଆର୍କେ ଣ୍ଡୁ, ଡାଗ୍ଲା ମେଇଂ ବୁଟମେଗ୍‌ ଲେଃଆର୍‌ଗେ । 4 ଯୋଷେଫ ନିଜର୍‌ ବୟାଁଇଂକେ ବାସଙ୍ଗ୍‌କେ, "ଗୁଆରେ ଣ୍ଡିଂକେ, ନେଙ୍ଗ୍‌ ଡାଗ୍ରା ପାଙ୍ଗ୍‌ଲାପା । ଆତ୍‌ବା ମେଇଂ ଡାଗ୍ରା ୱେଆର୍‌ଲା, ମେଁ ବାସଙ୍ଗ୍‌କେ, ନେଙ୍ଗ୍‌ ପେଇଂନେ ବୟାଁ ଯୋଷେଫ, ଆଜାକେ ପେ ମିସର୍‌ ରେମୁଆଁଇଂକେ ସ ପେବଗେ । 5 ଏବେ ପେ ତେରେପେତେ ଆଡିଙ୍ଗ୍‌ଗ୍‌ପା । ଆନେଙ୍ଗ୍‌ ମୁଇଂ ଚାକର୍‌ ରକମ୍‌ ସ ପେବକେ ଡାଗ୍‌ଚେ ପେ ନିଜର୍‌ ଆଡ଼ାତ୍ରା ରିସା ଆଡିଙ୍ଗେପା । ପେ ସାମ୍‌ନେ ଜିବନ୍‌ ରକ୍ୟା ଡିଙ୍ଗ୍‌ ନ୍‌ସା ପର୍‌ମେସର୍‌ ଆନେଙ୍ଗ୍‌ ଆକ୍‌କେ ବେକେ । 6 କେଲାପା, ମାତର୍‌ ମ୍ୱାର୍‌ ମୁଆଁ ଡିଙ୍ଗ୍‌ଲେଃଗେ, ମୁର୍‌ଡି ଡିଙ୍ଗ୍‌ଚେ ବାରି ମାଲ୍‌ ମୁଆଁ ବାକି ଲେଃଗେ, ଆତେନ୍‌ ବିତ୍ରେ ଚାସ୍‌ ଲେଃ କିଆଉଁଆଃ ଆଡିଙ୍ଗ୍‌ ଣ୍ଡୁ । 7 ତେଲା ପର୍‌ମେସର୍‌ ଆନେଙ୍ଗ୍‌ ଆକ୍‌ଡାଗ୍ରା ବେବକେ, ଆପେକେ ସେନୁଗ୍‌ ରାଙ୍ଗ୍‌ୱେ ନ୍‌ସା । ତେସା ନେଙ୍ଗ୍‌ ଆକ୍‌ଡାଗ୍ରା ପେ ଦେସ୍‌ନେ ରେମୁଆଁଇଂକେ ରକ୍ୟା ଡିଙ୍ଗ୍ଇଁୟାଏ । 8 ନେଙ୍ଗ୍‌ ଆକ୍‌ଡାଗ୍ରା ପେନେ ଦସ୍‌ ନ୍‌ସା ନ୍ନାପାଙ୍ଗ୍‌କେ ଣ୍ଡୁ । ଏନ୍‌ ପର୍‌ମେସର୍‌ନେ ଇକ୍‌ଚା । ପର୍‌ମେସର୍‌ ଆନେଙ୍ଗ୍‌ ଫାରୋନେ ଆବା ବାରି ମେଁନେ ସାକାର୍‌ ଆଃଡିଙ୍ଗ୍‌ବକେ; ବାରି ସାପା ମିସର୍‌ ଦେସ୍‌ ଆଡ଼ାତ୍ରା ସାକାର୍‌ ଆଃଡିଙ୍ଗ୍‌ବକେ ।"

9 ଯୋଷେଫ ବାସଙ୍ଗ୍‌କେ, "ଦାପ୍ରେ ନେଙ୍ଗ୍‌ନେ ଆବା ଡାଗ୍ରା ୱେଲାପା । ନାନେ ଉଂ ଯୋଷେଫ ଏନ୍‌ ସାମୁଆଁ ବାସଙ୍ଗ୍‌ବକେ ।" ପର୍‌ମେସର୍‌ ଆନେଙ୍ଗ୍‌ ମିସର୍‌ ଦେସ୍‌ନେ ସାକାର୍‌ ଆଃଡିଙ୍ଗ୍‌ବକେ; ନା ତେସା ନେଙ୍ଗ୍‌ ଡାଗ୍ରା ପାଙ୍ଗ୍‌ଲା, ଆରାଃତଙ୍ଗାର୍‌ଗେ । 10 ନାଁ ଉଂ ସେଲାମ୍ବୁଏଃଅ ବାରି ଅରେଃ, ଗିମିଃ ସାପା ଏତେ ଗୋଶନ ଦେସ୍‌ନ୍ୟା ବାସାଚେ ନେଙ୍ଗ୍‌ନେ ଡାଗ୍ରା ପେଡିଙ୍ଗ୍‌ଏ । 11 ନେଙ୍ଗ୍‌ ପେଇଂନେ ବାରି ମାଲ୍‌ ମୁଆଁ ନ୍‌ସା ଜତନ୍‌ ଣ୍ଡିଙ୍ଗ୍‌ଏ । ଣ୍ଡୁଲା ପେନେ ଆରି ପେ ପରିବାର୍‌ନେ ଦରିଦ୍ର ଅବସ୍ତା ଗଟେଏ । 12 କେଲା, ନିଂନେ ତୁମୁଁଆଃ ଆପେକେ ଆକେନ୍‌ ସାମୁଆଁ ବାସଙ୍ଗ୍‌ଡିଂକେ, ଆକେନ୍‌ ପେନେ ମ୍‌ମୁଁଆଃ ଆରି ନିଂନେ ସାଙ୍ଗାଡ଼ି ବିନ୍ୟାମୀନନେ ମ୍‌ମୁଁଆଃ କିକେଡିଂକେ । 13 ଯୋଷେଫ ମେଁନେ ବୟାଁଇଂକେ ଏନ୍‌ ସାମୁଆଁ ବାସଙ୍ଗ୍‌କେ, "ନେଙ୍ଗ୍‌ ଯୋଷେଫ ଡାଗ୍‌ଚେ, ପେ ସତେଆ ମ୍ୟାଃପେଲେଃଏ । ଦେକ୍‌ରକମ୍‌ କି ନେଙ୍ଗ୍‌ନେ ବୟାଁ ବିନ୍ୟାମୀନ୍ ମ୍ୟାଲେଃ ଜେ, ନେଙ୍ଗ୍‌ ଯୋଷେଫ ନାବୟାଁ ବାସଙ୍ଗ୍‌କେ, ଏନ୍‌ସାଃ ପେ ଆକେନ୍ ମିସର୍ ଦେସ୍‌ଅରିଆ ନେଙ୍ଗ୍‌ନେ ଗୁଲୁଏ କାବା କାମ୍‌ ମେଃ ମେଃନି କିକେପେଡିଂକେ, ଆକାନ୍‌ ସାପା ନେଙ୍ଗ୍‌ନେ ଆବାକେ ବାସଙ୍ଗ୍‌ଚେ ଆମେକେ ଦାପ୍ରେ ଆକ୍‌ଅରିଆ ରାଙ୍ଗ୍‌ପାଙ୍ଗ୍‌ଲାପା ।" 14 ଏନ୍‌ ଇଡ଼ିଙ୍ଗ୍‌ ଯୋଷେଫ ବିନ୍ୟାମୀନକେ କଣ୍ଡଚେ ଅଃକେ । ବାରି ବିନ୍ୟାମୀନ୍‌ ଡିଗ୍‌ ଆମେକେ କଣ୍ଡଚେ ଅଃକେ । 15 ବାରି ଯୋଷେଫ ମେଁନେ ବିନ୍‌ ସାପା ବୟାଁଇଂକେ ବଏନ୍ତାକେ ବାରି ଆମେଇଂକେ ସାଚେ ଅଃକେ । ଏନ୍‌ ଇଡ଼ିଙ୍ଗ୍‌ ମେଁନେ ବୟାଁଇଂ ମେଁ ଏତେ ବାଲିର୍‌ବାତା ଆର୍କେ । 16 ଯୋଷେଫନେ ବୟାଁଇଂ ପାଙ୍ଗ୍‌ଲେଃକେ, ଏନ୍‌ ସାମୁଆଁ ଫାରୋନେ ଡୁଆଅରିଆ ଦ୍ରିଗ୍‌ଲା, ଆତ୍‌ଅରିଆ ଫାରୋ ବାରି ମେଁନେ ଚାକର୍‌ ସାପାରେ ସାର୍ଦା ଡିଙ୍ଗ୍‌ଆର୍କେ । 17 ଫାରୋ ଯୋଷେଫକେ ବାସଙ୍ଗ୍‌କେ, "ନାବୟାଁଇଂକେ ବାସଙ୍ଗ୍‌, ମେଇଂନେ ପସୁଇଂକେ କିଆଉଁଆଃ ଲାଦେଚେ କିଣାନ୍‌ ଦେସ୍‌ ୱେଲାପା । 18 ଆମେଇଂକେ ବାସଙ୍ଗ୍‌ପା, ନାଁ ଆବା ବାରି ମେଁନେ ପରିବାର୍ ସାଃଚେ ଆକ୍‌କେ ପାଙ୍ଗ୍‌ଆର୍‌ଲେଃ । ନେଙ୍ଗ୍‌ ଆମେଇଂକେ ମିସର୍‌ନେ ସାପାବାନ୍‌ ନିମାଣ୍ଡା ଜାଗା ମ୍ୱିଏ, ବାରି ମେଇଂ ଆକ୍‌କେ ଲେଃଆର୍‌ଏ, ନେନେ କାଦି ଚଙ୍ଗ୍‌ଆର୍‌ଏ । 19 ଏବେ ନେଙ୍ଗ୍‌ନେ ଆଦେସ୍‌ ଅନୁସାରେ ଏନ୍‌ କାମ୍‌ ଡିଙ୍ଗ୍‌ପା । ପେ ନିଜର୍‌ ନିଜର୍‌ ଗଡ଼େଇଂକେ ଆରି ସେଲାମ୍ବୁଏଃଇଂ ନ୍‌ସା ମିସର୍‌ ଦେସ୍‌ବାନ୍‌ ଶଗଡ଼୍‌ ରାଙ୍ଗ୍‌ୱିଗ୍‌ଲା । ବାରି ପେନେ ଆବାକେ ୱା ରାଙ୍ଗ୍‌ପାଙ୍ଗ୍‌ଲା । 20 ମେଃଡାଗ୍‌ଲା ସାପା ମିସର୍‌ ଦେସ୍‌ନେ ଜିନିସ୍‌ ପେନେ । ପେନେ ସମ୍ପତିକେ ପେନେ ଜନମ୍‌ ତୁବନ୍ୟା ଆନ୍ତାର୍‌ନ୍‌ସା ଦୁକ୍‌ ଆଡିଙ୍ଗେପା ।" 21 ତେଲା ଇସ୍ରାଏଲ୍‌ନେ ଗଡ଼େଇଂ ଦେତ୍‌ରକମ୍‌ ଡିଙ୍ଗ୍ଆର୍କେ; ଫାରୋ ବାସଙ୍ଗ୍‌ନେ ଅନୁସାରେ ଯୋଷେଫ ଆମେଇଂକେ ନିମାଣ୍ଡା ଶଗଡ଼୍‌ ଆରି ଡୁଏଚଙ୍ଗ୍‌ନେ ଜିନିସ୍‌ ବିକେ । ମେଇଂ ୱିଗ୍‌ ନ୍‌ସା ଦର୍‌କାର୍‌ ଲେଃକ୍ନେ ଜିନିସ୍‌ଇଂ ଡିଗ୍‌ ବିକେ । 22 ଯୋଷେଫ ମେଁନେ ସାପା ବୟାଁଇଂକେ ମୁଇଂ ଲାକା ଜଡ଼ି ନିମାଣ୍ଡା ସକା ବିକେ । ମାତର୍‌ ବିନ୍ୟାମୀନକେ ଞ୍ଜିସ ରୁପା ଡାବୁ ବାରି ମାଲ୍‌ ଜଡ଼ି ସକା ବିକେ । 23 ବାରି ଆବା ନ୍‌ସା ମିସର୍‌ ଦେସ୍‌ନେ ନିମାଣ୍ଡା ନିମାଣ୍ଡା ନଦା, ଗୁଆକ୍ଲିଗ୍‌ ଗଦ ବାରି ଆବାନେ ଡୁଏଚଙ୍ଗ୍‌ ନ୍‌ସା କିଆଉଁଆଃ ବାରି ରୁଟି ସାପା କାଦି ଜିନିସ୍‌ଅରିଆ ନଦା, ଗୁଆକ୍ଲିଗ୍‌ ଡିଆ ଗଦ ବେବିକେ । 24 ଏନ୍‌ ଇଡ଼ିଙ୍ଗ୍‌ ଯୋଷେଫ ମେଁନେ ବୟାଁଇଂକେ ବାସଙ୍ଗ୍‌କେ, ମେଇଂନେ ଡୁଆ ୱିଗ୍‌ ନ୍‌ସା ବାରି ଆମେଇଂକେ ତରକ୍‌ ଆଡିଙ୍ଗ୍‌ଚେ ବାସଙ୍ଗ୍‌କେ, "ଡୁଆ ପେୱିଗ୍‌ଏ, ଗାଲିବଃ ଆୱିଙ୍ଗ୍‌ଆଃଗ୍‌ପା ।" 25 ଦେକ୍‌ ରକମ୍‌ ବାବ୍‌ରେ ଯୋଷେଫନେ ବୟାଁଇଂ ମିସର୍‌ ଆନ୍ତାର୍‌ଚେ କିଣାନ ଦେସ୍‌ ୱିଗ୍‌ଆର୍କେ । ଇଡ଼ିଙ୍ଗ୍‌ ମେଇଂ ମେଇଂନେ ଆବା ଯାକୁବନେ ଡାଗ୍ରା ପିଙ୍ଗ୍‌ଚାଆର୍କେ । 26 ବୟାଁଇଂ ମେଇଂନେ ଆବାକେ ବାଲିର୍‌ଆର୍କେ, "ଆବା, ଯୋଷେଫ ଏବେ ଡିଗ୍‌ ମ୍ୱ୍ର ଲେଃକେ । ବାରି ମେଁ ସାପା ମିସର୍‌ ଦେସ୍‌ନେ ସାକାର୍‌ ଡିଙ୍ଗ୍‌ଲେଃକେ ।" ମେଁନେ ଆବା ମେଃଡିଗ୍‌ ବାବେ ଆୟାକେ ଣ୍ଡୁ । ସେନୁଗ୍‌ ମେଁ ଆମେଇଂକେ ବିସ୍‌ବାସ୍‌ ଆଡିଙ୍ଗ୍‌କେ ଣ୍ଡୁ । 27 ଏନ୍‌ଇଡ଼ିଙ୍ଗ୍‌ ଯୋଷେଫନେ ସାପା ସାମୁଆଁ ମେଇଂ ଆବାକେ ବାଲିର୍‌ଆର୍କେ, ବାରି ଯାକୁବ ମେଇଂ ନ୍‌ସା ବେବକ୍ନେ ଶଗଡ଼୍‌ ସାପା କେକେ । ଅଃତେନ୍‌ବେଲା ଜାକୁବ ଜାବର୍‌ ସାର୍ଦା ଡିଙ୍ଗ୍‌କେ । 28 ଆତେନ୍‌ସା ଇସ୍ରାଏଲ୍‌ ବାସଙ୍ଗ୍‌କେ, "ଡିଂଏ ନେଙ୍ଗ୍‌ନେ ନେଉଂ ଯୋଷେଫ୍‌ ଏଃ ଜାକ ମ୍ବ୍ରଲେଃକେ । ନେଙ୍ଗ୍‌ ଉଁୱେଏ, ଗୁଗୁଏଃନେ ସେନୁଗ୍‌ ନେଙ୍ଗ୍‌ ଆମେକେ ଙ୍କେଏ ।"