ଗଶନ୍ ଦେସ୍ ନିଆ ଯାକୁବ୍ ଡୁଆଣ୍ଡ୍ରେ ବାର୍ମୁଇଂତର୍ ବାସାନେ
1 ଯୋଷେଫ ଫାରୋନେ ଡାଗ୍ରା ୱେଚେ ବାସଙ୍ଗ୍କେ, "ନେଙ୍ଗ୍ନେ ଆବା, ବୟାଁଇଂ ବାରି ମେଇଂନେ ସାପା ପରିବାର୍ ଏବେ ମେଇଂ କିଣାନ ଦେସ୍ବାନ୍ ପାଙ୍ଗ୍ଚେ ମେଇଂନେ ସାପା ଅରେଃ ଗିମିଃ ଏତେ ମେଇଂ ଆକ୍ଡାଗ୍ରା ପାଙ୍ଗ୍ଲେଃଆର୍କେ । ମେଇଂ ଏବେ ଗୋଶନ ପ୍ରଦେସ୍ନ୍ୟା ଲେଃଆର୍କେ ।" 2 ବାରି ଯୋଷେଫ ନିଜର୍ ବୟାଁଇଂନେ ବିତ୍ରେ ମାଲ୍ଡାକେ ରାଙ୍ଗ୍ୱେଚେ ଫାରୋନେ ଏତେ ଆଃମିସୁକେ । 3 ଆତ୍ବା ଫାରୋ ଯୋଷେଫନେ ବୟାଁଇଂକେ ସାଲିଆକୁକେ, "ପେନେ ମେଃନି ବେପାର୍ ?" ମେଇଂ ଫାରୋକେ ବାଲିର୍ଆର୍କେ, "ନାନେ ଏନ୍ ଚାକର୍ଇଂ ନ୍ତା ଞ୍ଜାଇଂନେବାନ୍ ପସୁ ବିଚଙ୍ଗ୍ ଡିଂକେ ।"
4 ମେଇଂ ଫାରୋକେ ବାରି ବାଲିର୍ଆର୍କେ, ନେ ଏନ୍ ଦେସ୍ନ୍ୟା ବାସା ନ୍ସା ପାଙ୍ଗ୍ନେଲେଃକେ । ତେସା ନାଁ ଏନ୍ ଚାକର୍ଇଂକେ ପସୁ ମାନ୍ଦା ନ୍ସା ମେଃଡିଗ୍ ଚଙ୍ଗ୍ନେ ଣ୍ଡୁ । କିଣାନ ଦେସ୍ନ୍ୟା ଜାବର୍ ମୁର୍ଡି ଡିଙ୍ଗ୍ଲେଃଗେ । ଏନ୍ସା କୁସାମୁତି ଡିଙ୍ଗ୍ନେଡିଙ୍ଗ୍କେ । ନାଁ ଏନ୍ ଚାକର୍ଇଂକେ ଗୋଶନ ପ୍ରଦେସ୍ନ୍ୟା ବାସା ନ୍ସା ବିଲା । 5 ଏନ୍ଇଡ଼ିଙ୍ଗ୍ ଫାରୋ ଯୋଷେଫକେ ଆଦେସ୍ ବିକେ, "ନା ଆବା ବାରି ନାନେ ବୟାଁଇଂ ନା ଡାଗ୍ରା ପାଙ୍ଗ୍ଲେଃଆର୍କେ । 6 ମିସର୍ ଦେସ୍ ନାଁ ସାମ୍ନେ ଲେଃଗେ । ଦେସ୍ନେ ସାପାବାନ୍ ନିମାଣ୍ଡା ଜାଗାନ୍ୟା ନିଜର୍ ଆବା ବାରି ବୟାଁଇଂକେ ଆଃବାସା । ଗୋଶନ ପ୍ରଦେସ୍ନ୍ୟା ମେଇଂ ବାସା ଆର୍ଲେଃ । ବାରି ମେଇଂନେ ବିତ୍ରେ ଆଜା ଆଜାକେ ବପୁ ରେମୁଆଁ ଡାଗ୍ଚେ ମ୍ୟାଃନାଡିଙ୍ଗ୍କେ, ଆମେଇଂକେ ନେଙ୍ଗ୍ନେ ପସୁଇଂନେ ନେତା ବାବ୍ରେ ଦାଇତ୍ ବିଃ ।"
7 ଏନ୍ଇଡ଼ିଙ୍ଗ୍ ଯୋଷେଫ ମେଁନେ ଆବା ଯାକୁବକେ ଫାରୋନେ ଏତେ ଆଃମିସୁଃକେ । ଯାକୁବ ଫାରୋକେ ଆସିର୍ବାଦ୍ ଡିଙ୍ଗ୍କେ । 8 ବାରି ଫାରୋ ଆମେକେ ସାଲ୍ୟାଃକୁକେ, "ନାନେ ବଏସ୍ ଉଃଡ଼ି ?"
9 ଯାକୁବ ଫାରୋକେ ବାସଙ୍ଗ୍କେ, "ନେଙ୍ଗ୍ନେ ବାସାନେ କାଲ୍ନେ ଦିନ୍ ସଏ ତିରିସ୍ ମୁଆଁ, ନେଙ୍ଗ୍ନେ ଆୟୁସ୍ ଦିନ୍ ଗଣ୍ଡା ବାରି ବିପଦ୍ ରକମ୍ । ବାରି ନେଙ୍ଗ୍ନେ ନ୍ତା ଞ୍ଜାଇଂନେ ବାସାନେ କାଲ୍ନେ ଆୟୁସ୍ ଦିନ୍ ସମାନ୍ ଣ୍ଡୁ ।" 10 ଏନ୍ଇଡ଼ିଙ୍ଗ୍ ଯାକୁବ ଫାରୋକେ ଆସିର୍ବାଦ୍ ଡିଙ୍ଗ୍ଚେ ମେଁନେ ଡାଗ୍ରାବାନ୍ ଆଣ୍ଡେକେ । 11 ଫାରୋ ଯୋଷେଫକେ ଡିରକମ୍ ଆଦେସ୍ ବିକେ, ଦେତ୍ରକମ୍ ଡିଙ୍ଗ୍କେ, ବାରି ବୟାଁଇଂକେ ତୁବଃ ବିକେ । ଆତେନ୍ ଲିଜ ମିସର୍ନ୍ୟା ସାପାବାନ୍ ନିମାଣ୍ଡା ଲିଜ ଲେଃଗେ । ରାମିଷେଷ୍ ଏରିଆ ମେଇଂନେ ଅଦିକାର୍ରେ ବିକେ । 12 ଯୋଷେଫ ମେଁନେ ଆବା ଆରି ବୟାଁଇଂକେ ବାରି ମେଇଂନେ ଡୁଆଣ୍ଡ୍ରେକେ ଦର୍କାର୍ ଲେଃକ୍ନେ ଅଃତେନ୍ କାଦି ବିକେ ।
ମୁର୍ଡି
13 ଆତେନ୍ ବେଲା ଜାବର୍ ମୁର୍ଡି ଡିଙ୍ଗ୍ଲା, ସାପା ଦେସ୍ନ୍ୟା କାଦି ଅବାବ୍ ଡିଙ୍ଗ୍କେ । ଆତ୍ବା ମିସର୍ ଦେସ୍ ବାରି କିଣାନ ଦେସ୍ନେ ରେମୁଆଁଇଂକେ ମୁର୍ଡି ନ୍ସା ସାପାରେ ମୁର୍ଚା ଡିଙ୍ଗ୍ନେ ଲାଗେଆର୍କେ । 14 ବାରି ମିସର୍ ଦେସ୍ନ୍ୟା ବାରି କିଣାନ ଦେସ୍ନ୍ୟା ଉଡ଼ି ରୁପା ଲେଃଗେ । ରେମୁଆଁଇଂ ଆତେନ୍ ବିଚେ କିଆଉଁଆଃ ବିଆର୍ ନ୍ସା ଯୋଷେଫ ଆତେନ୍ ସାପା ରୁପା ରାସିଙ୍ଗ୍ଚେ ଫାରୋନେ ଡୁଆ ରାଙ୍ଗ୍ପାଙ୍ଗ୍କେ । 15 ଏନ୍ଇଡ଼ିଙ୍ଗ୍ ମିସର୍ ଦେସ୍ନ୍ୟା ବାରି କିଣାନ ଦେସ୍ନ୍ୟା ରୁପା ଅବାବ୍ ଡିଙ୍ଗ୍ଲା, ମିସର୍ନେ ରେମୁଆଁ ସାପାରେ ଯୋଷେଫନେ ଡାଗ୍ରା ପାଙ୍ଗ୍ଆର୍କେ ବାରି ବାସଙ୍ଗ୍ଆର୍କେ, "ଆନେକେ କାଦି ଚଙ୍ଗ୍ନେ ବିଲା । ନେ ମେଃନ୍ସା ନାଁ ସାମ୍ନେ ନେଗୁଏଃଏ । ଡାଗ୍ଲା ନେନ୍ୟା ବାରି ଜାବର୍ ରୁପା ଣ୍ଡୁ ।"
16 ମାତର୍ ଯୋଷେଫ ଉତର୍ ବିକେ, "ପେନେ ଡାବୁ ସାପା ଡାୱେଲା, ପେନେ ପସୁ ଆନେଙ୍ଗ୍ ବିଲାପା; ବାରି ନେଙ୍ଗ୍ ଆପେକେ କାଦି ମ୍ୱିଏ ।" 17 ଆତ୍ବା ମେଇଂ ଯୋଷେଫନେ ଡାଗ୍ରା ନିଜର୍ ନିଜର୍ ପସୁ ରାଙ୍ଗ୍ପାଙ୍ଗ୍ଆର୍କେ । ଆତ୍ବା ଯୋଷେଫ ଗଡ଼ା, ଗିମିଃ, ଅରେଃ, ଗଦ ସାପା ଗ୍ଲେଃ ରାଙ୍ଗ୍ୱେଚେ ଆମେଇଂକେ କାଦି ବିକେ । ଦେକ୍ରକମ୍ ଯୋଷେଫ ପସୁ ବାଦୁଲ୍ରେ ଆମେଇଂକେ କାଦି ବିଚେ ଆତେନ୍ ମୁଆଁ ଚଲେ ବିକେ ।
18 ବାରି ଆତେନ୍ ମୁଆଁ ଡାୱେଲା । ଦୁତିୟ ମୁଆଁ ମେଇଂ ଯୋଷେଫନେ ଡାଗ୍ରା ପାଙ୍ଗ୍ଚେ ବାଲିର୍ଆର୍କେ, "ନେନେ ସାପା ରୁପା ଡାଲାଏଃକେ । ଆତେନ୍ ମାପ୍ରୁନେ ଡାଗ୍ରା ବୁଃଡ଼ିନେ ଣ୍ଡୁ । ବାରି ନେ ସାପା ପସୁ, ଦନ୍ସମ୍ପତି ଡିଗ୍ ମାପ୍ରୁନେ ଡିଙ୍ଗ୍ୱେଲେଃକେ । ଏବେ ମାପ୍ରୁନେ ସାମ୍ନେ ନେନେ ଗାଗ୍ଡ଼େ ବାରି ଲିଜ ଆନ୍ତାର୍ଚେ ଆରି ମେଃଡିଗ୍ ଣ୍ଡୁ । 19 ନେ ନାଁ ସାମ୍ନେ ଡିଲାଡିଗ୍ ନେଗୁଏଃଏ । ଜଦି ନାଁ ଆନେକେ କାଦି ନାବିଏ, ତେଲା ନେ ନେନେ ଲିଜ ଫାରୋକେ ନେବିଏ । ବାରି ନେ ମେଁନେ ଚାକର୍ ନେଡିଙ୍ଗ୍ଏ । ଆନେକେ ଉଃଡ଼ି ଚ୍ମୁ ଡିଗ୍ ପେପାବିଃ । ତେଲା ଆକ୍ଅରିଆ ନେ ମାଗୁଏଃଚେ ନେମ୍ୱ୍ରଏ । ବାରି ଲିଜ ଡିଗ୍ ନେ ନ୍ସା କାଦି ଆର୍ମେ ବିଏ ।"
20 ତେସା ଯୋଷେଫ ଫାରୋ ନ୍ସା ସାପା ଲିଜ ମିସର୍ନ୍ୟା ବିଆର୍କେ । ମିସର୍ନ୍ୟା ସାପା ରେମୁଆଁ ମେଇଂନେ ସାପା ଲିଜ ସ ବିଃଆର୍କେ । ମେଇଂ କିଡ଼େସଃ ଲେଃଆର୍ଗେସା ଦେକ୍ରକମ୍ ଡିଙ୍ଗ୍ଆର୍କେ । 21 ବାରି ଦେକ୍ରକମ୍ ବାବ୍ରେ ମିସର୍ ଇନିନେ ସାପା ରେମୁଆଁ ଫାରୋନେ ଚାକର୍ ଡିଙ୍ଗ୍ଆର୍କେ । 22 ମେଁ ମାତର୍ ପୁଜାରିଇଂନେ ଲିଜ ଆବିଆର୍କେ ଣ୍ଡୁ । ଡାଗ୍ଲା ପୁଜାରିଇଂ ଫାରୋନେ ଡାଗ୍ରା ଇନାମ୍ ବାଲେଃଆର୍ଗେ । ଏନ୍ସା ଫାରୋନେ ବାନ୍ ବିବକ୍ନେ ଇନାମ୍ବାନ୍ ମେଇଂ ମ୍ୱ୍ରଆର୍କେ । ମେଇଂ ନିଜର୍ ଲିଜ ଆସ ଆର୍କେ ଣ୍ଡୁ । 23 ଏନ୍ଇଡ଼ିଙ୍ଗ୍ ଯୋଷେଫ ରେମୁଆଁଇଂକେ ବାସଙ୍ଗ୍କେ, "ଏଃ ଜାକ ନେଙ୍ଗ୍ ଫାରୋ ନ୍ସା ଆପେକେ ବାରି ପେନେ ଲିଜ ସାପା ମ୍ୱିଆର୍କେ । ଏବେ ଏନ୍ ଚ୍ମୁ ରାଙ୍ଗ୍ୱେଚେ ଲିଜନ୍ୟା ବିଗ୍ପା । 24 ଆତ୍ବା ମେଃନି ଚୁଏ । ଆତେନ୍ବାନ୍ ମାଲ୍ ଗୁନ୍ ଫାରୋକେ ବିଃପା । ବାରି ବିନ୍ ଅଁ ବାଗ୍ ଲିଜନେ ଚ୍ମୁ ନ୍ସା ବାରି ପେ ପେନେ ପରିବାର୍ ବାରି ପେନେ ଗଡ଼େଅ ନ୍ସା କିଆଉଁଆଃ ପେବଏ ।"
25 ରେମୁଆଁଇଂ ବାଲିର୍ଆର୍କେ, "ନାଁ ନେ ଜିବନ୍ ରକ୍ୟା ନାଡିଙ୍ଗ୍କେ । ନାନେ ଦୟା ଡିଙ୍ଗ୍ଲା, ନେ ଫାରୋନେ ଚାକର୍ ନେଡିଙ୍ଗ୍ଏ ।" 26 ମାଲ୍ ବାଗ୍ ଫାରୋ ବାଏ । ମିସର୍ନ୍ୟା ସାପା ଲିଜ ବିସଏରେ ଯୋଷେଫନେ ତିଆର୍ ଡିଙ୍ଗ୍କ୍ନେ ଏନ୍ ନିଅମ୍ ଏଃ ଜାକ ଚାଲେଡିଂକେ । ମାତର୍ ପୁଜାରିଇଂନେ ଲିଜ ଫାରୋନେ ଆଡିଙ୍ଗ୍କେ ଣ୍ଡୁ । 27 ଆତେନ୍ ବେଲା ଇସ୍ରାଏଲ ମିସର୍ନେ ଗୋଶନ ପ୍ରଦେସନ୍ୟା ବାସାକେ । ବାରି ଆତ୍ଡାଗ୍ରା ମେଇଂ ଅଦିକାର୍ ବାଚେ ଜାବର୍ ରେମୁଆଁ ବାରି ଜାବର୍ ବଂସ ଡିଙ୍ଗ୍ଆର୍କେ । 28 ଯାକୁବ ମିସର୍ ଦେସ୍ନ୍ୟା ସତର ମୁଆଁ ବାସାକେ, ମେଁନେ ବଏସ୍ ସଏ ସତ୍ଚାଲିସ୍ ମୁଆଁ ଲେଃଗେ । 29 ଇସ୍ରାଏଲ ଗୁଏନେ ଦିନ୍ ଡାଗ୍ରା ପିଙ୍ଗ୍ଚାଲା, ମେଁ ନିଜର୍ ଉଂ ଯୋଷେଫକେ ୱାଚେ ବାସଙ୍ଗ୍କେ, "ନେଙ୍ଗ୍ ଅଃନା ନାଁ ସାମ୍ନେ ଅନୁଗ୍ରହ ମ୍ୱାକେ, ତେସା ଗୁଆରେ ଣ୍ଡିଙ୍ଗ୍କେ, ନାଁ ନେଙ୍ଗ୍ ବୁଲୁନ୍ୟା ନ୍ତି ବିଃ । ବାରି ନେଙ୍ଗ୍ ଆଡ଼ାତ୍ରା ଦୟା ବାରି ସତ୍ ବେବଆର୍ ଡିଙ୍ଗ୍ଚେ ଆନେଙ୍ଗ୍ ଏନ୍ ମିସର୍ ଦେସ୍ନ୍ୟା ଆତି ଆବିଗେ । 30 ମାତର୍ ନେଙ୍ଗ୍ ନିଜର୍ ନ୍ତା ଞ୍ଜାଇଂନେ ଏତେ ଣ୍ଡୁଲେଗ୍ଲା, ନାଁ ଆନେଙ୍ଗ୍ ଏନ୍ ମିସର୍ ଦେସ୍ବାନ୍ ରାଙ୍ଗ୍ୱେଚେ ଆମେଇଂକେ ଆତି ବକ୍ନେ ଡାଗ୍ରା ଆନେଙ୍ଗ୍ ଆତି ବିଲା ।" ଯୋଷେଫ ବାସଙ୍ଗ୍କେ, "ନେଙ୍ଗ୍ ପାର୍ମାନ୍ ଡିଙ୍ଗ୍ ଣ୍ଡିଙ୍ଗ୍, ନାନେ ଇକ୍ଚା ଅନୁସାରେ ଣ୍ଡିଙ୍ଗ୍ଏ ।"
31 ଆତ୍ବା ଯାକୁବ ଯୋଷେଫକେ ପାର୍ମାନ୍ ଡିଙ୍ଗ୍ ନ୍ସା ବାସଙ୍ଗ୍କେ, ମେଁ ମେଁନେ ଡାଗ୍ରା ପାର୍ମାନ୍ ଡିଙ୍ଗ୍କେ । ଆତେନ୍ ବେଲା ଇସ୍ରାଏଲ ଡୁଲେଗ୍ଲେକ୍ନେ ବାଆଃ ପାକା ସାର୍ଲକେ ।
/images/a/a0208299-6f37-40a0-66e1-2576b9435f00)
/images/a/Tcg2NiV7ce24OT6kCIQGR)