1 Wabeekkichchi Ermiyaasi booji’ende adhdhende lubboti hexxeexxe geedhe’a, qeesete, wabeekkoteenna Naabukedentsoori Iyyerusaalemii’ni Baabilooni’a booji’e adhdhemmake ardi duuchchi’a borreesse ergeexxe ergak hiyyichchi konnechinn butti’a hedheeken; 2 Tenne borronna borreesseek moyanji Ikkooniyaani, mootitte isixxi amanna isike mootomatike minik ja’laabuwwi, Yihudakinna Iyyerusaalemik akeekisanjuwwi, haqqetixxe ogekinna sibilo tumammak manni booji’eme Iyyerusaalemii’n adhdhemeechchi udumatemman.✝ 3 Isinna tenne borro Yihudak moyanji Sedeeqiyaasi Baabiloonika moyanjo Nabukedentsooriba’a ergeemmake erganjuwwa’n, Saafaanika belto Eli’aasa’ninna Hilqiyaaka belto Gemaariya’n erge; borrotinna hitaammaqic,

4 Lumok Duuchchi Woddik Gootti Isira’eelik Magen Iyyerusaaleminaa’n Baabilooni’a booji’emmaashsha assemmake duuchcha hiyya’neeqic, 5 «Mine ijaadhdhitine hedhdhe; hiddichchuwwakanna kaalsitine gummatanna itte; 6 Aaxxine labbaxxanna meyyaxxa oose i’le; labbaxxanna meyyaxxa ha’noxxa oose aadhisine heerunsisse; insa’nenna labbaxxa meyyaxxa oose i’linowwaal; laakkossi ha’nok ookkone boga’n birasa’o’o malee’e heeno’moqqe’e. 7 Booji’enidene ookko’a me’itino’a assennake qachchi’a nage’akanna dananumma halche; iikk qachchi danana’oole ha’nonna danane hexxinammaxxe’e, isixxee Duuchchi Woddike Goottiba’a soodatte» hiyye. 8 Eet, Lumok Duuchchi Woddiki Gootti Isira’eelik Magen «Ha’no giddo hexxeexxi wabeekkonna moralluwwi ha’noo dedhisoqqe’e; insa’ne ha’no’a oojjontaaxxa oojjonna caqassinnoqqe’e. 9 Insa’ne summa anken dharik raaga raanga’nee malee’e ani Duuchchi Woddiki Gootti insa’ne erge’ebe’non» hiyye. 10 Duuchchi Woddiki Gootti hiyya’neeqic, «Baabilooni hexxinaaxxi torbaane tomme woga muddeechchi uduma ani ha’noo uudannon ha’no’o konne boonchiba illeema hiissonna’a addachchiisenneka anka eloka hiyyichcho ha’no’a muuxannon.✝ 11 Ha’no’a afeenneka yaada anende age’nenen; kunni yaadinna hegere ha’no’a eldaashsha addachisaake yaada malee’e ha’no’o midhakebaan; 12 ha’nonna anee’e ye’exxinaan; shiqqinenna aniba’a soodattinaan; aninna soodachcho ha’noxxa laqannon. 13 Ha’no anee’e halsitinaan; mitte godobinni anee’e halsitinoole anee’e alfitinaan.✝ 14 Aninna ha’no’a afemanno, ani Duuchchi Woddik Gootti booji’otenaa’n ha’no hissanno; ha’noo xexeerennake bogiba’ninna booncho duuchchinaa’n ha’no’o hiissannon; booji’endine fuldinaashsha assennake bogiba’a ha’no’o hissannon, ani Duuchchi Woddik Gootti tenne haaso’ennen» hiyye. 15 Ha’no «Duuchchi Woddiki Gootti Baabiloon giddo wabeekko no’o’a uwwe’een» hitinaan. 16 Duuchchi Woddik Gootti kinni Daawwitixxe moote’n ofo’laake mowajixxeenna ha’no welti booje’emebaak gatemmake konne qachchi giddike ha’noke ardi duuchchixxee hiyyaannexxa laqqe. 17 Lumok Duuchchi Woddiki Gootti hiyya’neeqic: «Kunniseten ani insa’ne’n bagedo, solo’okanna bala ibisennexxi insa’ne’ee itatee’e eldabaaxxe elobaaxxe balasexxe gummashsha assannon. 18 Ani insa’ne’e bagedik solo’ikinna balati shorrannon; buttatixxe mootumma duudchchi edo manjo jibbisiinsaake assannon; giddi’a xexxeerannoke arduwwi duuchchi edo badineme’eke, majani hinaaxxi yaane insa’ne’n geltaake, osso’lemeekenna gaccifatemaake assannon. 19 Insa’ne’e ani erganjuwwa anxe wabeekko darree’n higgeggeen ergenneka anka hiyyichcho laqa ginbemmaxxee tinni insa’ne’n gelte’een» hiyya’neen Duuchchi Woddik Gootti, «Ha’no boji’endineek manninna ani hiyyennexxa laqinebaan,» hiyya’ne Duuchchi Woddik Gootti. 20 Tennexxee koo Iyyerusaaleminaa’n Baabilooni’a booji’enedinaashsha assenneke manna Duuchchi Woddike Goottika hiyyichcho laqqe. 21 Dada Duuchcha ajajaaki Duuchchi Woddik Gootti Isira’eelik Magen anik summinni dharik raaga raanga’neeke, Aki’aabika belto Qolayaxxeenna Ma’iseyaaka belto Sedeeqiyaasixxee hiyya’nee qici, «Ani insa’ne’e Naabukadanatsoori’i Baabiloonike moyanjiinxe anga’n s’aisse uwwannon; isinna ille ha’noxxi uudda’naa’n insa’nee shiyaan. 22 Insa’ne’n gelteexxe yaanenaa’n kexxeexxa Baabiloon booji’eme hedheek Yihudak manni duuchchi weli yowwaa wodda, ‹Duuchchi Woddiki Gootti, atee’e Baabiloonik moyanji giirate’n gubemmake Sedeeqiyaasishanna Aki’aabishsha atee gubo’o› hiyyaan. 23 Insa’ne’e wele mannixxe arenn welti yabaabulatinna ani haaso’ebe’noxxa anke summinni dhara haaso’iyyoti Isira’eeli giddo salphitte yaane assine’een; Tennee ege’neennen; ani dhugaa kulannoken» hiyye Duuchchi Woddik Gootti.

24 Nehelaamike bogike manjo’n, Shemaya’n hite kuldattoqic, 25 «Dada Duuchcha ajajaaki Duuchchi Woddik Gootti Isira’eelik Magen Iyyerusaalemi hedheeke arda duuchcha’n, qeesichcho Ma’iseyaake belto Sofooniyaasi’ninna wele qeesole duuchcha’n atike summi borruwwa ergiteettexxi Sofoniyaasi’i hite’eteqic, 26 ‹Duuchchi Woddike Goottike mine’ni sooressa kaddotta’a Duuchchi Woddik Gootti qeesichcho Yoodaahexxe bakka’n atee’e qeesichchoke asse hariire’dheen; ani wabeekkichchoken hiyya’n wabeeekkumma haaso’a’neeka, mitte mitte maraateeka manna lekka jirmake’n, goobakanna haachchabik ati usuriyyo hassissaan. 27 Mayeeta wabeekkichchinsha haaso’a’neeka Anaattotike bogika manjo, Ermiyaasi’i xixa gophphette? 28 Kunni manji, Ha’noxxi booji’otixxi yaane qeerraxxe kaddemmaxxee mine ijaadhdhitine ofo’le; hiddichuwakanna kaalsitine’e gumma itte hiyyeexxi Baabilooni’a erga no’o’n erge’een› » hite’etten. 29 Qeesichchi Sofooniyaasinna tenne borro anne’e, Ermiyaasi’a haasesse. 30 Ookkonechchi uduma Duuchchi Woddike Goottik hiyyichchi ane’n dageexxi hiyyee qici, 31 «Tenne erga booji’eme hedheeke duuchcha’n hite ergitatto qic, ‹Nehelaamixxe’e, Shemayaxxe’e, ani Duuchchi Woddik Gootti ergebe’nong Shemaaya wabeekkumma ha’no’n haaso’eexxi dhara addattinaashsha assemmaxxee, 32 ani Duuchchi Woddiki Gootti Nehelaamichcho Shemayanna horte isixxa xixannon; isi ardi ane’n jallo haaso’aashsha assemmaxxee manji isik konne ardi giddo lubbo gateexxi ani anke ardi’a assannoxxa eloxxa yaane uudaaki mittikinna hedhabaan Ani Duuchchi Woddik Gootti tenne’e haaso’ennen› » hiyye.