Salmos 119

9 Hae God.

Mi mi yangfala nomo.

?Bambae mi save mekem

laef blong mi i klin olsem wanem?

Mi mi mas obei long ol tok blong yu.*119.9: Narafala rod blong tanem tok ya biaen long "Hae God" i olsem. ?Bambae yang man i save mekem laef blong hem i klin olsem wanem? Hem i mas obei long ol tok blong yu.

10 Mi mi stap traehad

long olgeta tingting blong mi,

blong mekem wok blong yu.

Plis yu halpem mi,

blong mi no lego

ol tok we yu yu putum.

11 Oltaem mi stap holem ol tok blong yu

long tingting blong mi,

blong bambae mi no save mekem sin agens long yu.

12 Hae God, mi mi presem yu.

Plis yu tijim mi long ol rod blong yu.

13 Bambae mi stap talemaot bakegen

ol tingting blong yu we yu yu talem.

14 Mi mi glad blong folem ol rul

we yu yu mekem,

i winim we mi mi glad

from we mi rijman.

15 Oltaem mi stap tingting long ol loa blong yu,

mo mi stap tingbaot ol fasin blong yu.

16 Oltaem mi mi glad tumas

long ol tijing blong yu,

mi no save fogetem ol tok blong yu.

Prea blong man we i obei long Loa blong Hae God

(Tok i go long Hae God.)