OL SAM 18

Deved i prea blong presem Hae God from we hem i win long faet

1,2 Hae God. Mi mi lavem yu,

mo yu yu paoa blong mi.

(Tok i go long ol man.)

Hae God i God blong mi.

Hem i wan gudfala ples blong haed blong mi,

mo hem i stap lukaot gud long mi.

Hem i stap blokemgud mi,

mo i wan strong sefples blong mi.

Hem i olsem sil* we i stap blokem mi,

hem i sevem mi,

i holem mi mi stap gud.

3 Oltaem, taem mi singaot i go long hem

be hem i stap tekemaot mi

long han blong ol enemi blong mi,

i stap sevem mi.

Yumi evriwan i mas presem Hae God.