Salmos 20

Tok blong blesem king blong i go long faet

(Sing ya, Deved i wokem.)

(Pris i blesem king.)

1,2 King.

Hae God i God blong Jekob,*

mo hem i God blong yu.

Hem i stap long ples blong hem

long tabu hil* ya Saeon.*

Prea blong mi

se sipos yu stap long trabol,

hem bambae i harem krae blong yu,

hem bambae i lukaot gud long yu, i sevem yu,

mo bambae i givhan long yu, i kam halpem yu.

3 Prea blong mi

we hem bambae i no fogetem olgeta presen ya

we yu yu givim long hem,

hem bambae i glad long ol sakrefaes ya

we yu bonem blong mekem wosip long hem.

4 Prea blong mi

we hem bambae i givim olgeta samting long yu

we yu yu wantem,

mo hem bambae i mekem yu yu win

long olgeta plan blong yu.

5 Nao bambae mifala i stap singaot bigwan

from we mifala i glad we yu yu win.

Bambae mifala i mekem lafet from samting ya,

bambae mifala i stap presem God blong yumi from.

Prea blong mi

we Hae God bambae i mekem olgeta samting ya

we yu yu stap askem long hem.

(Tok i go long ol man.)

6 Hae God i jusumaot king blong yumi,

mo hem i putumap hem,

mo naoia mi mi save

we hem bambae i givhan long hem,

i mekem hem i win.

Hae God i stap long tabu ples blong hem long heven,

mo bambae hem i harem prea blong king ya,

i givhan long hem.

Long paoa blong hem,

hem bambae i stap mekem hem i win bigwan.

7 Sam man oli stap trastem

ol kat blong faet blong olgeta,

mo sam oli stap trastem

ol hos blong olgeta,

be yumi,

Hae God i God blong yumi

mo yumi trastem paoa blong hem.

8 Ol narafala man ya,

bambae oli stambol,

oli foldaon,

be yumi,

bambae yumi stanap strong

we yumi no save muf.

(Tok i go long Hae God.)

9 Hae God.

Plis yu givhan long king ya,

yu mekem hem i win.

Taem mifala i singaot i kam long yu,

plis yu harem mifala.*20.9: Tok long las haf blong vas ya i folem olfala translesen blong Oltesteman long lanwis blong ol man Gris bifo, we i kamaot long olfala Oltesteman long lanwis ya Hibru, be long Oltesteman long Hibru we i stap tede, tok ya i olsem. Taem mifala i singaot i go long hem, hem bambae i harem mifala.