OL SAM 39

Man we i harem nogud tumas long bodi blong hem i talemaot sin blong hem

1,2 Taem trabol ya i kasem mi,

fastaem mi mi talem se,

"Naoia mi mi mas lukaot gud

blong mi no talem sam tok

we i no stret.

I nogud mi letem maot blong mi

i mekem mi mi sin.

Sipos ol man nogud oli stap klosap long mi,

i nogud mi tokbaot trabol ya blong mi."

Ale mi stap kwaet,

mi no talem wan tok.

Nating we i blong talem wan gudfala samting,

be mi no tok.

Be trabol blong mi i stap kam mowas,

mo mi mi harem nogud tumas.