Prea blong man we i trastem God
1,2 God, yu yu hae we yu hae. Plis yu sore long mi,
from we ol man we oli stap kam mekem faet long mi
oli plante we plante.
Evri dei nomo oli stap ronem mi,
mo oli stap faet long mi,
i stat long moning
gogo kasem long sapa.
Hae God, yu yu gat olgeta paoa.
3 Taem mi mi fraet,
mi putum tingting blong mi i stap long yu.
(Tok i go long ol man.)
4 Mi mi trastem Hae God
nao mi no moa fraet.
Mi mi presem hem
from ol promes blong hem.
I no gat man i save mekem wan samting long mi.
(Tok i go long Hae God.)
8 Yu yu savegud ol trabol blong mi,
mo olgeta taem ya we mi stap krae,
yu yu makemdaon olgeta finis
long buk blong yu.
11 Mi mi trastem Hae God,
nao bambae mi no save fraet.
I no gat man i save mekem wan samting long mi.
(Tok i go long God.)