Ezequiel 1

ದೆವಾಚೆ ಸಿಂವಾಸನ್

1 ಕೆಬಾರ್ ಮನ್ತಲ್ಯಾ ನ್ಹಯ್ಚ್ಯಾ ಜಗ್ಗೊಳ್ ಬಂಧಿಹೊವ್ನ್ ವಸ್ತಿ ರ್‍ಹಾತಲ್ಯಾ ಜುದೆವಾಂಚ್ಯಾ ಮದ್ದಿ ಮಿಯಾ ವಸ್ತಿ ರ್‍ಹಾತಾನಾ, ತಿಸಾವೆ ವರ್ಸಾಚ್ಯಾ ಚಾರ್ವ್ಯಾ ಮ್ಹಯ್ನ್ಯಾಚ್ಯಾ ಪಾಂಚ್ವ್ಯಾ ದಿಸಾತ್ ಮಳಬ್ ಉಗ್ಡುನ್, ಮಿಯಾ ದೆವಾಚಿ ದರ್ಶನಾ ಬಗಟ್ಲೊ. 2 ತನ್ನಾ ರಾಜಾ ಹೊಲ್ಲ್ಯಾ ಜೆಹೊಯಾಕಿನ್ ಬಂಧಿ ಹೊಲ್ಲ್ಯಾ ಮಾನಾ ಪಾಂಚ್ವ್ಯಾ ವರ್ಸಾಚ್ಯಾ ಚಾರ್ವ್ಯಾ ಮ್ಹಯ್ನ್ಯಾಚ್ಯಾ ಪಾಂಚ್ವ್ಯಾ ದಿಸಿ. 3 ಸರ್ವೆಸ್ಪರಾಚೆ ವಚನ್ ಕಸ್ದಿಯಾ ದೆಸಾತ್ ಕೆಬಾರ್ ಮನ್ತಲ್ಯಾ ನ್ಹಯ್ಚ್ಯಾ ಜಗ್ಗೊಳ್ ಹೊತ್ತ್ಯಾ ಬುಜಿ ಮನ್ತಲ್ಯಾಚೊ ಲೆಕ್ ಯಾಜಕ್ ಹೊಲ್ಲ್ಯಾ ಎಜ್ಕೆಲಾಕ್ ಚೊಕ್ಕ್ ಆಯ್ಕೊ ಯೆಲೆ, ಅನಿ ಥೈ ಸರ್ವೆಸ್ಪರಾಚಿ ಮಹಿಮಾ ತೆಜ್ಯಾ ವರ್‍ತಿ ಹೊತ್ತಿ.

4 ತನ್ನಾ ಮಿಯಾ ಬಗಿತ್ ರ್‍ಹಾತಾನಾಚ್, ಅಬಕ್, ಉತ್ತರ್ ದಿಕ್ಕಾಕ್ನಾ ವ್ಹಾರೊ ಉಟ್ಲೊ, ಮೊಟ್ಟೊ ಮೊಡ್ ದಿಸ್ಲೊ, ತೆಚ್ಯಾ ಭೊತ್ಯಾನಿ ಲಕ್ಲಕೊ ಹೊಳಾವ್ಲೊ. ತ್ಯಾತುರುಚ್ ತ್ಯಾ ಆಗಿಚ್ಯಾ ಮದ್ದಿ ಸೊನ್ಯಾ ಸರ್ಕೊ ಉಜ್ವೊಡ್ ದಿಸ್ಲೊ. 5 ತೆಚ್ಯಾ ಮದ್ನಾ ಜನಾವರಾಂಚ್ಯಾ ಸಾರ್ಕೆ ದಿಸ್ಲಿ, ತೆಂಚೊ ರುಪ್ ಮಾನ್ಸಾಚ್ಯಾ ರುಪಾ ಸಾರ್ಕೆ ಹೊತ್ತೆ. 6 ಎಕೆಕಾಕ್ ಚಾ ಚಾರ್ ತೊಂಡಾ, ಚಾ ಚಾರ್ ರಕುಟೆ ಹೊತ್ತೆ. 7 ಅನಿ ತೆಂಚಿ ಪಾಯಾ ನಿಟ್ಟ್ ಹೊವ್ನ್ ವಾಸ್ರಾಂಚ್ಯಾ ಗೆಳಾಂಚ್ಯಾ ಸಾರ್ಕೆ ಹೊತ್ತಿ, ಅನಿ ತಿ ಉಜಳಲ್ಲ್ಯಾ ಪಿತ್ಳಿಚ್ಯಾ ಸಾರ್ಕೆ ಹೊಳ್ವುನ್ಗೆತ್ ಹೊತ್ತಿ. 8 ಹರ್ ಎಕ್ ಜನಾವರಾಚ್ಯಾ ಚಾರಿ ಬಾಜುಚ್ಯಾ ರಕುಟ್ಯಾಂಚ್ಯಾ ಖಾಲ್ತಿ ಮಾನ್ಸಾಚ್ಯಾ ಹಾತಿಂಚ್ಯಾ ಸಾರ್ಕಿ ಹಾತಾ ಹೊತ್ತಿ; ತ್ಯಾ ಚಾರಿ ಜನಾವರಾಂಚಿ ತೊಂಡಾ ಅನಿ ರಕುಟೆ ಕಸೆ ಹೊತ್ತೆ ಮಟ್ಲ್ಯಾರ್, 9 ತೆ ರಕುಟೆ ಎಕಾಮೆಕಾಕ್ ಲಾಗಿತ್; ಅನಿ ತಿ ಜನಾವರಾ ಫಿಡೆ ಜಾತಾನಾ ಪರ್ತಿನಸ್ತಾನಾ ಎಕುಚ್ ನಿಸಾನ್ ನಿಟ್ಟ್ ಜಾಯ್ತ್.

10 ತೆಂಚಿ ತೊಂಡಾ ಕಸಿ ಹೊತ್ತಿ ಮಟ್ಲ್ಯಾರ್, ಎಕ್ಲ್ಯಾಚೆ ತೊಂಡ್ ಮಾನ್ಸಾಂಚ್ಯಾ ತೊಂಡಾಂಚ್ಯಾ ಗತಿನ್ ಹೊತ್ತೆ, ಉಜ್ವ್ಯಾ ಭಾಜುಚೆ ತೊಂಡ್ ಸಿಂವಾಚ್ಯಾ ತೊಂಡಾ ಸಾರ್ಕೆ ಹೊತ್ತೆ, ಧಾವ್ಯಾ ಭಾಜುಚೆ ತೊಂಡ್ ಬಯ್ಲಾಚ್ಯಾ ತೊಂಡಾ ಸಾರ್ಕೆ ಹೊತ್ತೆ, ಅನಿ ಫಾಟ್ಲೆ ತೊಂಡ್ ಗರುಡಾಚ್ಯಾ ತೊಂಡಾ ಸಾರ್ಕೆ ಹೊತ್ತೆ. 11 ತೆಂಚಿ ತೊಂಡಾ ಅಸಿ ಹೊತ್ತಿ. ರಕುಟೆ ವರ್‍ತಿ ಪಗಳಲ್ಲೆ ಹೊತ್ತೆ, ಅನಿ ತೆಂಚೆ ರಕುಟೆ ಎಗ್ಳೆ ಎಗ್ಳೆ ಹೊವ್ನ್, ಹರ್ ಎಕ್ ಜನಾವರಾಚೆ ದೊನಿ ರಕುಟೆ ತೆಂಚ್ಯಾ ಭಾಜುಚ್ಯಾ ಜನಾವರಾಂಚ್ಯಾ ರಕುಟ್ಯಾಕ್ನಿ ಲಾಗಿತ್. ಅನಿ ಹುರಲ್ಲ್ಯಾ ದೊನ್ ರಕುಟೆ ಅಪ್ನಾಚಿ ಆಂಗಾ ಧಾಪುನ್ ಘೆಟಲ್ಯಾನಿ. 12 ತಿ ಸಗ್ಳಿ ಜನಾವರಾ ದೆವಾಚ್ಯಾ ಆತ್ಮ್ಯಾನ್ ಚಾಲ್ವಲ್ಯಾ ವಾಟೆನ್, ಎಕುಚ್ ನಿಸಾನ್ ಫಾಟಿ ಪರ್‍ತುನ್ ಬಗಿ ನಸ್ತಾನಾ ಫಿಡೆ ಗೆಲಿ.

13 ತ್ಯಾ ಜನಾವರಾಂಚ್ಯಾ ಮದ್ದಿ ಅಜಾಪಾಚೊ ಎಕ್ ಉಜ್ವೊಡ್ ಸಾರ್ಕೆ ಜಳ್ತಲೆ ಇಂಗ್ಳೆಕಿ, ಚುಡ್ಕಿ ಸಾರ್ಕೆ ದಿಸ್ಲೆ, ತೆ ಜನಾವರಾಚ್ಯಾ ಮದ್ದಿ ಫಿರುಲಾಗಲ್ಲೆ, ತಿ ಆಗ್ ಲೈ ಪೆಟುಲಾಗಲ್ಲಿ. ತೆಜ್ಯಾ ಭುತ್ತುರ್ನಾ ಲಕ್ಲಕೊ ಯೆಯ್. 14 ತಿ ಜನಾವರಾ ಲಕ್ಲಕ್ಯಾಚ್ಯಾ ಉಜ್ವೊಡಾ ಸಾರ್ಕೆ ಫಾಟಿ, ಫಿಡೆ ಸರ್ದುನ್ ಘೆತ್ ಹೊತ್ತಿ.

15 ಅಬಕ್, ಮಿಯಾ ತ್ಯಾ ಜನಾವರಾಕ್ನಿ ಬಗಿತ್ ರ್‍ಹಾತಾನಾ, ಹರ್ ಎಕ್ ಭಾಜುಕ್ಬಿ ಜನಾವರಾಂಚ್ಯಾ ಜಗ್ಗೊಳ್ ಜಿಮ್ನಿ ವರ್‍ತಿ ಎಕ್ ಚಕ್ಕರ್ ದಿಸ್ಲೆ. 16 ತ್ಯಾ ಚಕ್ರಾಂಚೊ ರಂಗ್ ಅನಿ ರಚನ್ ಕಸೆ ಹೊತ್ತೆ ಮಟ್ಲ್ಯಾರ್, ತೆಂಚೆ ರಂಗ್ ನಿತಳ್ ಗುಂಡ್ಯಾಚ್ಯಾ ಗತಿನ್ ಫಳ್ಪಳುಕ್ ಲಾಗಲ್ಲೆ, ಎಕ್ ಚಕ್ಕರಾತ್ ಅನಿ ಎಕ್ ಚಕ್ಕರ್ ಆಡ್ವೆ ಕರುನ್ ರಚಲ್ಲ್ಯಾ ಸಾರ್ಕೆ ಹೊತ್ತೆ, ತಿ ಚಾರಿ ಚಕ್ಕರಾಬಿ ಎಕುಚ್ ನಮುನಿ ಹೊತ್ತಿ. 17 ತಿ ಚಲಸ್ತಾನಾ ಚಾರ್ ಭಾಜುತ್ನಿ ಖಲ್ಯಾ ಭಾಜುಕ್ ಹೊಲ್ಯಾರ್ಬಿ ಫಿರಿತ್, ಖರೆ ವ್ಹಾಂಕ್ಡಿ ಫಿರಿ ನಸಿತ್. 18 ಚಕ್ಕರಾಂಚ್ಯಾ ಭೊತ್ಯಾನ್ ಸಗ್ಳಿ ಭಾಗಾ ಉಪ್ಪರ್ ಅನಿ ಭಯಾನಕ್ ಹೊವ್ನ್ ಹೊತ್ತಿ; ಹ್ಯಾ ಭಾಗಾಂಚ್ಯಾ ಸಗ್ಳ್ಯಾ ಕಡೆಕ್ಬಿ ಭರುನ್ ಡೊಳೆ ಹೊತ್ತೆ. 19 ಜನಾವರಾ ಫಿಡೆ ಜಾತಾನಾ ಸಗ್ಳಿ ಚಕ್ಕರಾ ತೆಚ್ಯಾ ಭಾಜುಕ್ನಾ ಫಿಡೆ ಜಾಯ್ತ್; ತಿ ಜನಾವರಾ ಜಿಮ್ನಿಕ್ನಾ ವರ್‍ತಿ ಉಟ್ತಾನಾ ಚಕ್ಕರಾಬಿ ವರ್‍ತಿ ಉಟಿತ್. 20 ದೆವಾಚ್ಯಾ ಆತ್ಮ್ಯಾನ್ ಚಲ್ವುತಲ್ಯಾಕ್ಡೆ ತಿ ಚಲ್ಲಿ, ತ್ಯಾ ಜನಾವರಾಂಚೊ ಆತ್ಮೊ ಚಕ್ಕರಾಂಚ್ಯಾ ಭುತ್ತುರ್ ಹೊತ್ತ್ಯಾ ಸಾಟ್ನಿ ಚಕ್ಕರಾಬಿ ತೆಂಚ್ಯಾ ಭಾಜುಕ್ನಾ ವಾಂಗ್ಡಾಚ್ ಉಟಿತ್. 21 ತಿ ಫಿಡೆ ಜಾತಾನಾ ಹಿಬಿ ಫಿಡೆ ಜಾಯ್ತ್, ತಿ ಇಬೆ ರ್‍ಹಾತಾನಾ ಹಿಬಿ ಇಬೆ ರಾಯ್ತ್, ತಿ ಜಿಮ್ನಿ ವಯ್ನಾ ಉಟ್ತಾನಾ, ಚಕ್ಕರಾಬಿ ತೆಂಚ್ಯಾ ವಾಂಗ್ಡಾ ಉಟಿತ್; ಕಶ್ಯಾಕ್ ಮಟ್ಲ್ಯಾರ್, ಜನಾವರಾಂಚೊ ಆತ್ಮೊ ಚಕ್ಕರ್‍ಹಾತ್ನಿಬಿ ಹೊತ್ತೊ.

22 ತ್ಯಾ ಜನಾವರಾಂಚ್ಯಾ ಟಕ್ಲ್ಯಾ ವರ್‍ತಿ ಲೈ ಭಯಾನಕ್ ಹೊಳಾವ್ತಲ್ಯಾ ಭರ್‍ಪಾಚ್ಯಾ ಗಡ್ಡ್ಯಾ ಗತಿನ್ ಮಳಬ್ ಸಾರ್ಕೆ ಪಗಳಲ್ಲೆ ಹೊತ್ತೆ. 23 ತೆಚ್ಯಾ ಖಾಲ್ತಿ ಜನಾವರಾಂಚೆ ರಕುಟೆ ನಿಟ್ಟ್ ಪಗ್ಳುನ್ ಎಕಾಮೆಕಾಕ್ ಲಾಗಿತ್; ತವ್ಡೆಚ್ ನಸ್ತಾನಾ ಹರ್ ಎಕ್ ಜನಾವರಾಕ್ ಆಂಗ್ ಧಾಪುನ್ ಘೆತಲೆ ದೊನ್ ರಕುಟೆ ಹೊತ್ತೆ. 24 ತೆ ಫಿಡೆ ಜಾತಾನಾ ತೆಂಚ್ಯಾ ರಕುಟ್ಯಾಂಚೊ ಆವಾಜ್ ಪಾನಿಯಾಚ್ಯಾ ಮೊಟ್ಟ್ಯಾ ಹಂವಾರ್ಯಾಚ್ಯಾ ಆವಾಜಾಚ್ಯಾ ಸಾರ್ಕೆ, ಅನಿ ಸಗ್ಳೆ ಕರುಕ್ ಶಕ್ತ್ ಹೊತ್ತ್ಯಾಚ್ಯಾ ಧನಾ ಸಾರ್ಕೆ, ಅನಿ ಆರ್ಬಾಟ್ ಕರ್‍ತಲ್ಯಾ ಸಯ್ನಿಕಾಂಚ್ಯಾ ಬೊಬೆ ಸಾರ್ಕೆ ಮಾಕಾ ಆಯ್ಕಲೆ, ಅನಿ ಇಬೆ ರ್‍ಹಾತಾನಾ ರಕುಟೆ ಮುದ್ದಾ ಕರುನ್ ಘೆಯ್ತ್. 25 ತೆಂಚ್ಯಾ ಟಕ್ಲ್ಯಾಂಚ್ಯಾ ವಯ್ಲ್ಯಾ ಮಳ್ಬಾಚ್ಯಾ ವಯ್ನಾ ಎಕ್ ಧನ್ ಮಾಜ್ಯಾ ಕಾನಾತ್ ಪಡ್ಲಿ, ಜನಾವರಾ ಇಬೆ ರ್‍ಹಾತಾನಾ ರಕುಟೆ ಮುದ್ದಾ ಕರುನ್ ಘೆಯ್ತ್.

26 ತೆಂಚ್ಯಾ ಟಕ್ಲ್ಯಾಚ್ಯಾ ವಯ್ಲ್ಯಾ ಮಳ್ಬಾಚ್ಯಾ ವರ್‍ತಿ ನಿಳೆ ಕಿಮ್ತಿಚ್ಯಾ ಫೊಡ್ಯಾಚ್ಯಾ ಸಾರ್ಕೆ ಹೊಳ್ವುತಲ್ಯಾ ಸಿಂವಾಸನಾಚೊ ಆಕಾರ್ ದಿಸ್ಲೊ, ತೆಚ್ಯಾ ವರ್‍ತಿ ಮಾನ್ಸಾಚ್ಯಾ ರುಪಾಚೊ ಎಕ್ಲೊ ಬಸಲ್ಲೊ ಹೊತ್ತೊ. 27 ಕಂಬರ್ ಗತಿನ್ ದಿಸ್ತಲ್ಯಾ ತೆಜ್ಯಾ ಮದ್ಲ್ಯಾ ಭಾಗಾಕ್ನಾ ವರ್‍ತಿ ಸೊನೆ ಫಳ್ಪಳ್ತಾಕಿ, ತ್ಯಾ ಸಗ್ಳ್ಯಾ ರುಪಾತ್ ಪೆಟ್ತಲ್ಯಾ ಆಗಿ ಸಾರ್ಕೆ ಆಜಾಪಾಚಿ ಹೊಳ್ವಾಪ್ ಬಗಟ್ಲೊ, ಕಂಬರ್ ಗತಿನ್ ದಿಸ್ತಲ್ಯಾ ತೆಜ್ಯಾ ಮದ್ಲ್ಯಾ ಭಾಗಾಚ್ಯಾ ಖಾಲ್ತಿ ಆಗ್ ಪೆಟುಲ್ಲಾ ಕಾಯ್ಕಿ ಮನಿ ಸಾರ್ಕೆ ಮೊಟೆ ಉಜ್ವೊಡ್ ಬಗಟ್ಲೊ, ಅನಿ ತೆಜ್ಯಾ ಭೊತ್ಯಾನಿ ಉಜ್ವೊಡ್ ಹೊತ್ತೊ. 28 ಪಾವ್ಸಾಳಾತ್ ಮಳ್ಬಾತ್ ಕಾಮನ್ ಬಿಲ್ಲ್ ಹೊಳಾವಲ್ಲ್ಯಾ ಗತಿನ್ ತೆಜ್ಯಾ ಭೊತ್ಯಾನಿ ಉಜ್ವೊಡ್ ಹೊಳ್ವುಲಾಗಲ್ಲೊ, ಅಸೆ ಸರ್ವೆಸ್ಪರಾಚ್ಯಾ ಮಹಿಮಾಚೊ ಅನಿ ಅಜಾಪಾಚೊ ದರ್ಶನ್ ಮಾಕಾ ದಿಸ್ಲೊ.

ಎಜ್ಕೆಲಾಕ್ ದೆವಾನ್ ಪರ್ವಾದಿ ಹೊವ್ಕ್ ಬಲ್ವಲ್ಲೆ

ಮಿಯಾ ಹೆ ಬಗಟಲ್ಲ್ಯಾ ತನ್ನಾ ಡಬ್ಬ್ ಪಡುನ್ ಎಕ್ಲೊ ಬೊಲ್ತಲೊ ಧನ್ ಆಯಿಕ್ಲೊ.