Ezequiel 37

ವಾಳ್ಕ್ಯಾ ಹಡ್ಡಾಂಚೆ ಕೊಳ್ಳ್

1 ಮಿಯಾ ಸರ್ವೆಸ್ಪರಾಚ್ಯಾ ಮಹಿಮೆನ್ ಭರುನ್ ರ್‍ಹಾತಾನಾ, ತೆನಿ ಅಪ್ನಾಚ್ಯಾ ಆತ್ಮ್ಯಾ ವಯ್ನಾ ಮಾಕಾ ನ್ಹೆವ್ನ್, ಹಡ್ಡಾನಿ ಭರಲ್ಲ್ಯಾ ಎಕ್ ಕೊಳ್ಳಾತ್ ಉತರ್‍ಲ್ಯಾನ್. 2 ಅನಿ ಮಿಯಾ ತ್ಯಾ ಕೊಳ್ಳಾತ್ನಾ ಮದ್ನಾ ಹಡ್ಡಾತ್ನಿ ಚಲುನ್ ಯೆಯ್ ಸಾರ್ಕೆ ಕರ್ಲ್ಯಾನ್, ಅಬಕ್, ಕೊಳ್ಳಾತ್ ಸಗ್ಳ್ಯಾಕ್ಡೆ ಲೈ ವಾಳುನ್ ಗೆಲ್ಲಿ ಹಡ್ಡಾ ಮೆಜುಕ್ ಹೊಯ್ನಾ ತವ್ಡಿ ಪಡಲ್ಲಿ ಹೊತ್ತಿ. 3 ತೆನಿ ಮಾಕಾ, "ನರ್ ಮಾನ್ಸಾ, ಹ್ಯಾ ಹಡ್ಡಾಕ್ನಿ ಜಿವ್ ಯೆತಾ ಕಾಯ್"? ಮನುನ್ ಇಚಾರ್‍ತಾನಾ, ಮಿಯಾ ರಾಜಾ ಸರ್ವೆಸ್ಪರಾ, "ತುಕಾಚ್ ಗೊತ್ತ್", ಮನುನ್ ಜವಾಬ್ ದಿಲೊ. 4 ತನ್ನಾ ತೆನಿ ಮಾಕಾ ಅಸೆ ಹುಕುಮ್ ದಿಲ್ಯಾನ್, ತಿಯಾ ಹಡ್ಡಾಂಚ್ಯಾ ವರ್‍ತಿ ಪರ್‍ವಾದನ್ ಕರುನ್ ಅಸೆ ಸಾಂಗ್, ವಾಳ್ಕ್ಯಾ ಹಡ್ಡಾನೊ, ಸರ್ವೆಸ್ಪರಾಚೆ ಬೊಲ್ನೆ ಆಯ್ಕಾ. 5 ತುಮ್ಕಾ ಸರ್ವೆಸ್ಪರ್ ಅಸೊ ಮನ್ತಾ, ಅಬಕ್, ಮಿಯಾ ತುಮ್ಚ್ಯಾ ಭುತ್ತುರ್ ಶ್ವಾಸ್ ಭರಿಸಾರ್ಕೆ ಸಾರ್ಕೆ ಕರ್ತಾ, ತುಮಿ ಝಿತ್ತೆ ಹೊತ್ಯಾಸಿ. 6 ಮಿಯಾ ತುಮ್ಚ್ಯಾ ವರ್‍ತಿ ಸಿರಾ ಪಗ್ಳುನ್, ಮಾಂಸ್ ಯೆಯ್ ಸಾರ್ಕೆ, ಚಮ್ಡೆ ಯೆಯ್ ಸಾರ್ಕೆ, ತುಮ್ಕಾ ಉಸಿಲ್ ಭರ್ತಾ. ತನ್ನಾ ತುಮಿ ಝಿತ್ತೆ ಹೊವ್ನ್ ಮಿಯಾಚ್ ಸರ್ವೆಸ್ಪರ್ ಮನ್ತ್ಯಾಸಿ. 7 ಮಾಕಾ ಹುಕುಮ್ ದಿವ್ನ್ ಹೊಲ್ಲ್ಯಾ ಸಾರ್ಕೆ ತಿ ದೆವಾಚಿ ಗೊಸ್ಟ್ ಸಾಂಗಿತ್ ರ್‍ಹಾತಾನಾ, ಆವಾಜ್ ಆಯ್ಕೊ ಯೆಲೊ, ಅಬಕ್ ಟಕ್ ಟಕ್ ಮನುನ್ಗೆತ್ ಹಡ್ಡಾಕ್ನಿ ಹಡ್ಡಾ ಜೊಡ್ಸುನ್ ಹೊಲಿ. 8 ಮಿಯಾ ಬಗ್ತಾನಾ ಆಹಾ, ತೆಂಚ್ಯಾ ವರ್‍ತಿ ಸಿರಾ ಪಗಳ್ಲಿ, ಮಾಂಸ್ ಯೆಲೆ, ಚಮ್ಡೆ ಕಾಂಬ್ರಾನ್ ಹೊಲೆ, ಉಸಿಲ್ ಮಾತ್ರಾ ನತ್ತೊ. 9 ತನ್ನಾ ತೆನಿ ಮಾಕಾ, ನರ್ ಮಾನ್ಸಾ, ತಿಯಾ ಉಸಿಲಾಕ್ ಸಾಂಗ್, ಶ್ವಾಸಾ, ಸರ್ವೆಸ್ಪರ್ ಅಸೊ ಮನ್ತಾ, ತಿಯಾ ಚಾರಿ ದಿಕ್ಕಾನಿಕ್ನಾ ಮರಲ್ಲಿ ಆಂಗಾ ಝಿತ್ತಿ ಹೊಯ್ ಸಾರ್ಕೆ ತೆಂಚ್ಯಾ ವರ್‍ತಿ ಮಾರ್, ಮನುನ್ ಉಸಿಲಾಕ್ ಸಾಂಗ್, ಮನುನ್ ಹುಕುಮ್ ದಿತಾನಾ, ಮಿಯಾ ಹುಕುಮಾಚ್ಯಾ ಸಾರ್ಕೆ ಬೊಲ್ಲೊ.

10 ಮಿಯಾ ಹುಕುಮ್ ಕರ್ತಾನಾ, ಅಬಕ್ ತ್ಯಾತುರ್ ಉಸಿಲ್ ಯೆಲೊ, ಝಿತ್ತಿ ಹೊಲಿ, ಪಾಂಯಾ ಲಾವ್ನ್ ಇಬೆ ರಾಲಿ, ಲೈ ಮೊಟೊ ಸಯ್ನ್ ಹೊಲೊ. 11 ಮಾನಾ ತೆನಿ ಮಾಕಾ ಅಸೆ ಸಾಂಗ್ಲ್ಯಾನ್, ನರ್ ಮಾನ್ಸಾ, ಹಿ ಹಡ್ಡಾ ಇಜ್ರಾಯೆಲಾಂಚಿ ಫುರಾ ಪಿಳ್ಗಿ, ಅಬಕ್ ತ್ಯಾ ಪಿಳ್ಗಿಚೆ ಅಯ್ಯೊ, ಅಮ್ಚಿ ಹಡ್ಡಾ ವಾಳುನ್ ಗೆಲ್ಲಿ, ಅಮ್ಚೊ ಭರೊಸೊ ಹಾಳ್ ಹೊಲೊ, ಅಮಿ ಮುಳಾಕ್ನಾ ನಾಶ್ ಹೊಲ್ಯಾಂವ್, ಮನುನ್ಗೆತ್ ಹಾತ್. 12 ತಸೆ ಹೊವ್ನ್ ತಿಯಾ ಹಿ ದೆವಾಚಿ ಪ್ರವಾದನ್ ತೆಂಕಾ ಸಾಂಗ್, ಸರ್ವೆಸ್ಪರ್ ಅಸೊ ಮನ್ತಾ, ಮಾಜ್ಯಾ ಲೊಕಾನೊ ಬಗಾ, ಮಿಯಾ ತುಮ್ಚಿ ಸಮಾಧಿಯಾ ಉಗ್ಡುನ್, ತುಮ್ಕಾ ತ್ಯಾತುರ್ನಾ ಉಟ್ವುನ್ ಇಜ್ರಾಯೆಲ್ ಲೊಕಾಂಚ್ಯಾ ದೆಸಾಕ್ ಬಲ್ವುನ್ ಹಾನುನ್ ಮಿಳ್ವುತಾ. 13 ಮಾಜ್ಯಾ ಲೊಕಾನೊ, ಮಿಯಾ ತುಮ್ಚ್ಯಾ ಸಮಾಧಿಯಾಕ್ನಿ ಉಗ್ಡುನ್, ತ್ಯಾತುರ್ನಾ ತುಮ್ಕಾ ಉಟ್ವುತಾ. ತನ್ನಾ ಮಿಯಾಚ್ ಸರ್ವೆಸ್ಪರ್ ಮನ್ತಲೆ ತುಮ್ಕಾ ಖರೆಚ್ ಕಳ್ತಾ. 14 ಮಿಯಾ ಮಾಜೊ ಉಸಿಲ್ ತುಮ್ಕಾ ದಿವ್ನ್, ತುಮ್ಕಾ ಝಿತ್ತೆ ಕರುನ್ ತುಮ್ಚ್ಯಾ ದೆಸಾತ್ ವಸ್ತಿ ರಾಯ್ ಸಾರ್ಕೆ ಕರ್ತಾ. ತನ್ನಾ ಸರ್ವೆಸ್ಪರ್ ಮನ್ತಲೊ ಮಿಯಾಚ್ ಹೆ ಸಾಂಗ್ಲಾ ಮನುನ್ ಕಳ್ವುನ್ಗೆತ್ಯಾಸಿ, ಹಿ ಸರ್ವೆಸ್ಪರಾಚೆ ಬೊಲ್ನೆ.

ಇಜ್ರಾಯೆಲ್ ಅನಿ ಜುದಾ ಎಕುಚ್ ರಾಜ್ಯಾತ್

15 ಸರ್ವೆಸ್ಪರಾನ್ ಮಾಜ್ಯಾ ವಾಂಗ್ಡಾ ಬೊಲ್ಲ್ಯಾನ್. 16 ನರ್ ಮಾನ್ಸಾ, ತಿಯಾ ಎಕ್ ದಾಂಡೊ ಘೆವ್ನ್, ತೆಜ್ಯಾ ವರ್‍ತಿ ಜುದಾಚೆ, ಜುದಾಕ್ ಮಿಳಲ್ಲ್ಯಾ ಇಜ್ರಾಯೆಲಾಚೆ ಮನುನ್ ಬಲ್ವುನ್, ಅನಿ ಎಕ್ ದಾಂಡೊ ಕಾಡುನ್, ತ್ಯಾತುರ್ ಜೊಸೆಪಿಚೆ ಎಪ್ರಾಯಿಮಾಚ್ಯಾ ಜೊಸೆಪಿಕ್ ಮಿಳಲ್ಲ್ಯಾ ಸಗ್ಳ್ಯಾ ಇಜ್ರಾಯೆಲಾಂಚೆ ಮನುನ್ ಲಿವ್. 17 ತೆಜ್ಯಾ ಮಾನಾ ತೆ ತುಮ್ಚ್ಯಾ ಹಾತಿತ್ ಎಕ್ ಹೊಯ್ ಸಾರ್ಕೆ ತೆ ಎಕಾ ಮೆಕಾಕ್ ಲಾಂಬ್ ಕರುನ್ ಮಿಳ್ವುನ್ ಧರ್. 18 ತುಜಿ ಲೊಕಾ, ಹೆ ಕಾಯ್? ಅಮ್ಕಾ ಸಾಂಗಿ ನ್ಯಾಸಿ ಕಾಯ್ ಮನುನ್ ತುಕಾ ಇಚಾರ್‍ತಾನಾ ತಿಯಾ ತೆಂಕಾ, 19 ಸರ್ವೆಸ್ಪರ್ ಅಸೊ ಮನ್ತಾ, ಅಬಕ್, ಎಪ್ರಾಯಿಮಾನ್ ಧರಲ್ಲೊ ದಾಂಡೊ ಮಟ್ಲ್ಯಾರ್ ಜೊಸೆಪಿಚ್ಯಾ ಅನಿ ಜೊಸೆಪಿಕ್ ಮಿಳಲ್ಲ್ಯಾ ಕುಳಿಯಾಂಚೊ ದಾಂಡೊ ಮಿಯಾ ಕಾಡುನ್, ಜುದಾಂಚ್ಯಾ ದಾಂಡ್ಯಾಕ್ ಲಾಂಬಿ ಹೊವ್ನ್ ಮಿಳ್ವುನ್, ತೆ ದೊನಿಬಿ ಮಾಜ್ಯಾ ಹಾತಿತ್ ಎಕುಚ್ ದಾಂಡೊ ಕರುನ್ ಧರುನ್ಗೆತಾ, ಮನುನ್ ಸಾಂಗ್. 20 ತಸೆ ಸಾಂಗ್ತಾನಾ, ತಿಯಾ ನಾಂವಾ ಲಿವಲ್ಲೆ ದಾಂಡೆ ತೆಂಚ್ಯಾ ಡೊಳ್ಯಾಂಚ್ಯಾ ಇದ್ರಾಕ್ ತುಜ್ಯಾ ಹಾತಿತ್ ರಾಂವ್ದಿತ್. 21 ತೆಂಕಾ ಅಸೆ ಸಾಂಗ್, ಸರ್ವೆಸ್ಪರ್ ಅಸೊ ಮನ್ತಾ, ಅಬಕ್, ಇಜ್ರಾಯೆಲಾಚಿ ಲೊಕಾ, ಧರುನ್ ನ್ಹೆವ್ನ್ ಹೊಲ್ಲ್ಯಾ ಲೊಕಾಂತ್ನಾ ಮಿಯಾ ತೆಂಕಾ ಉದ್ದಾರ್ ಕರುನ್, ಸಗ್ಳ್ಯಾ ಭಾಜುಕ್ನಾ ಮಿಳ್ವುನ್ ಸ್ವತ್ಯಾಚ್ಯಾ ದೆಶ್ಯಾಕ್ ಬಲ್ವುನ್ ಹಾನ್ತಾ. 22 ಥೈ ಇಜ್ರಾಯೆಲಾಂಚ್ಯಾ ಮಡ್ಡಿಯಾಂಚ್ಯಾ ವರ್‍ತಿ, ಎಕುಚ್ ಕುಳಿಚಿ ಲೊಕಾ ಕರ್ತಾ, ತೆಂಕಾ ಸಗ್ಳ್ಯಾಕ್ನಿ ಎಕ್ಲೊಚ್ ರಾಜಾ ರ್‍ಹಾತಾ, ತೆನಿ ಅನಿ ಕನ್ನಾಬಿ ಎಗ್ಳೆ ಹೊವ್ನ್ ರಾಯ್ನಸ್ತಾನಾ ಎಕುಚ್ ಹೊವ್ನ್ ರ್‍ಹಾತ್ಯಾಸಿ. 23 ಅಪ್ನಾಚ್ಯಾ ಮುರ್ತಿಯಾನಿ ಹೊಂವ್ದಿತ್, ಬುರ್ಸ್ಯಾ ವಸ್ತಾನಿ ಹೊಂವ್ದಿತ್, ಅನಿ ಕಸ್ಲ್ಯಾಬಿ ಬುರ್ಸ್ಯಾ ಕಾಮಾನಿ ಹೊಂವ್ದಿತ್, ಅಪ್ನಾಕ್ನಿ ಹೆಜ್ಯಾನ್ ಫಿಡೆ ಬುರ್ಸೆ ಕರುನ್ಗೆಯ್ನಾತ್, ತೆನಿ ಪಾಪ್ ಕರುನ್, ಚುಕೆತ್ ಗಾವ್ನ್ ಪಡಲ್ಲ್ಯಾ ತನ್ನಾ ಮಿಯಾ ತೆಂಕಾ ಚುಕ್ವುನ್ ನಿತಳ್ ಕರ್ತಾ. ತೆನಿ ಮಾಜಿ ಲೊಕಾ ಹೊವ್ನ್ ರ್‍ಹಾತ್ಯಾತ್. ಅನಿ ಮಿಯಾ ತೆಂಕಾ ದೆವ್ ಹೊವ್ನ್ ರ್‍ಹಾತಾ. 24 ಮಾಜೊ ಸೆವಕ್ ದಾವಿದ್ ತೆಂಕಾ ರಾಜಾ ಹೊವ್ನ್ ರ್‍ಹಾತಾ, ತೆಂಕಾ ಸಗ್ಳ್ಯಾಕ್ನಿ ಎಕ್ಲೊಚ್ ಕುರ್ಬುರ್ ಹೊವ್ನ್ ರ್‍ಹಾತಾ, ತೆನಿ ಮಾಜಿ ನೆಮಾ ಪಾಳುನ್ ಮಾಜಿ ಕಾಮಾ ಕರುನ್ಗೆವ್ನ್ ರ್‍ಹಾತ್ಯಾತ್. 25 ಮಾಜೊ ಸೆವಕ್ ಜಾಕೊಬಾಕ್ ಮಿಯಾ ದಿಲ್ಲ್ಯಾ ದೆಸಾತ್, ತೆನಿ ವಸ್ತಿ ರ್‍ಹಾತ್ಯಾತ್, ಹೊಯ್ ತುಮ್ಚಿ ಪುರ್ವಜಾ ವಸ್ತಿ ಹೊತ್ತ್ಯಾ ದೆಸಾತ್ ತೆನಿ ವಸ್ತಿ ರ್‍ಹಾತ್ಯಾತ್, ಮಾಜೊ ಸೆವಕ್ ದಾವಿದ್ ತೆಂಕಾ ಕನ್ನಾಬಿ ರಾಜಾ ಹೊವ್ನ್ ರ್‍ಹಾತಾ. 26 ಅನಿ ಮಿಯಾ ತೆಂಚ್ಯಾಕ್ನಾ, ಸಮಾಧಾನಾಚೊ ಕರಾರ್ ಕರುನ್ಗೆತಾ, ತೊ ಕನ್ನಾಬಿ ರ್‍ಹಾತಾ. ಮಿಯಾ ತೆಂಚ್ಯಾಕ್ಡೆ ವಸ್ತಿ ರ್‍ಹಾವ್ನ್ ವಾಡ್ವಳ್ಕಿ ಕರುನ್ ತೆಂಚ್ಯಾ ಮದ್ದಿ ಮಾಜಿ ನಿತಳ್ ಗುಡಿ ಕನ್ನಾಬಿ ರಾಯ್ ಸಾರ್ಕಿ ಕರುನ್ ಭಾಂದ್ತಾ. 27 ಹೊಯ್ ಮಿಯಾ ವಸ್ತಿ ರಾತಲೊ ಜಾಗೊ ತೆಂಚ್ಯಾ ಮದ್ದಿ ರ್‍ಹಾತಾ, ಮಿಯಾ ತೆಂಕಾ ದೆವ್ ಹೊವ್ನ್ ರ್‍ಹಾತಾ, ಅನಿ ತೆನಿ ಮಾಜಿ ಲೊಕಾ ಹೊವ್ನ್ ರ್‍ಹಾತ್ಯಾತ್. 28 ಮಾಜಿ ನಿತಳ್ ಗುಡಿ ತೆಂಚ್ಯಾ ಮದ್ದಿ ಶಾಶ್ವತಾಕ್ ರ್‍ಹಾತಾನಾ, ಇಜ್ರಾಯೆಲಾಕ್ನಿ ಎಚುನ್ಗೆಟಲ್ಲೊ ಸರ್ವೆಸ್ಪರ್ ಮಿಯಾಚ್ ಮನುನ್ ಲೊಕಾಕ್ನಿ ಗೊತ್ತ್ ಕಳ್ತಾ.