Ezequiel 47

ಗುಡಿಕ್ನಾ ಹಂವ್ತಲೊ ಝರು

1 ಮಾನಾ ತೆನಿ ಅನಿ ಪರ್‍ತುನ್ ಮಾಕಾ ಗುಡಿಚ್ಯಾ ದಾರಾಕ್ಡೆ ಬಲ್ವುನ್ ಹಾನ್ಲ್ಯಾನ್, ಆಹಾ, ಗುಡಿಚ್ಯಾ ಪಯ್ರಿಯಾಂಚ್ಯಾ ಮುಳಾತ್ನಾ ಪಾನಿ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಹೊಂವ್ಕ್ ಲಾಗಲ್ಲೆ. ತೆ ಪಾನಿ ಗುಡಿಚ್ಯಾ ಉಜ್ವ್ಯಾಕ್ ಖಾಲ್ತಿ ಜಾವ್ನ್ ಬಲಿಚ್ಯಾ ಅಲ್ತಾರಿಚ್ಯಾ ದಕ್ಷಿನ್ ದಿಕ್ಕಾಕ್ ಹೊಂವ್ಕ್ ಲಾಗಲ್ಲೆ. 2 ತನ್ನಾ ತೆನಿ ಮಾಕಾ ದಕ್ಷಿನ್ ದಿಕ್ಕಾಚ್ಯಾ ಮುಖ್ಯ್ ದಾರಾಕ್ನಾ ಗುಡಿಚ್ಯಾ ಭಾಯ್ಲ್ಯಾ ವಾಟೆನ್ ಫಿರ್ವುನ್ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಮುಖ್ಯ್ ದಾರಾಕ್ಡೆ ಬಲ್ವುನ್ ಹಾನ್ಲ್ಯಾನ್, ಥೈ ಬಗ್ತಾನಾ ತೆಜ್ಯಾ ಉಜ್ವ್ಯಾಭಾಜುಕ್ ಸಾವ್ಕಾ ಸಾವ್ಕಾಸ್ ಹೊಂವ್ತಲೆ ಪಾನಿ ದಿಸ್ಲೆ. 3 ತ್ಯಾ ಘವ್ಮಾನ್ಸಾನ್ ಹಾತಿತ್ ಎಕ್ ದೊರಿ ಧರುನ್ಗೆವ್ನ್, ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಜಾವ್ನ್ ಗೆತ್ ಪಾಸ್ಸೆ ಹಾತ್ ಮೆಜುನ್ ಮಾಕಾ ಪಾನಿಯಾಚ್ಯಾ ತಿಕ್ಡಿನ್ ದಾಟ್ವುಲ್ಯಾನ್, ಥೈ ಪಾಂಯಾ ಬುಡಿ ಸಾರ್ಕೆ ತವ್ಡೆ ಪಾನಿ ಹೊತ್ತೆ. 4 ತೆನಿ ಪರ್‍ತುನ್ ಪಾಸ್ಸೆ ಹಾತ್ ಮೆಜುನ್ ಮಾಕಾ ಪಾನಿಯಾಚ್ಯಾ ತಿಕ್ಡಿನ್ ದಾಟ್ವುತಾನಾ, ತೆ ಪಾನಿ ಡೊಗ್ಲಾ ಪತರ್ ಹೊತ್ತೆ, ತೆನಿ ಪರ್‍ತುನ್ ಪಾಸ್ಸೆ ಹಾತ್ ಮೆಜುನ್ ಮಾಕಾ ದಾಟ್ವುತಾನಾ, ತೆ ಪಾನಿ ಕಂಬ್ರೆಕ್ ಪಾವಲ್ಲೆ ಹೊತ್ತೆ. 5 ತೆನಿ ಅನಿಬಿ ಪರ್‍ತುನ್ ಪಾಸ್ಸೆ ಹಾತ್ ಮೆಜ್ಲ್ಯಾನ್, ತೆ ಮಾಜೆಕ್ನಾ ದಾಟುಕ್ ಹೊವ್ನಸಲೊ ನ್ಹಯ್ ಹೊಲ್ಲೊ. 6 ತನ್ನಾ ತೆನಿ ಮಾಕಾ, "ನರ್ ಮಾನ್ಸಾ ಹೆ ಬಗಟ್ಲೆಯ್ ಕಾಯ್"? ಮನುನ್ ಸಾಂಗುನ್ ಮಾಕಾ ಕೊಡ್ಲಾಚ್ಯಾ ದಂಡೆಕ್ ಚಡ್ವುನ್ ಫಾಟಿ ಪರ್‍ತುನ್ ಹಾನ್ಲ್ಯಾನ್.

7 ಮಿಯಾ ಫಾಟಿ ಪರ್‍ತುನ್ ಬಗ್ತಾನಾ ಆಹಾ, ನ್ಹಯಚ್ಯಾ ದೊನಿ ದಂಡೆ ವಯ್ನಿಬಿ ಲೈ ಝಾಡಾ ದಿಸ್ಲಿ. 8 ತನ್ನಾ ತೆನಿ ಮಾಕಾ ಅಸೆ ಮಟ್ಲ್ಯಾನ್, ಹ್ಯೊ ಹಂವಾರೊ ದಿಸ್ ಉಗಾವ್ತಲ್ಯಾ ದಿಕ್ಕಾಚ್ಯಾ ಪ್ರಾಂತ್ಯಾಕ್ನಾ ಸುಟುನ್ ಅರಬಾ ಖಡ್ಡ್ಯಾತ್ ಉತ್ರುನ್ ಮರ್ನಾಚ್ಯಾ ಸಮುಂದರಾಕ್ಡೆ ಹೊಂವ್ತಾ, ಗುಡಿಕ್ನಾ ಜಾವ್ಕ್ ಲಾಗಲ್ಲೊ ಹಂವಾರೊ ಲವನ್ ಸಮುಂದರಾಕ್ ಪಾವಲ್ಲ್ಯಾ ತನ್ನಾ ತೆಚೆ ಪಾನಿ ಗೊಡ್ ಹೊತಾ. 9 ಹ್ಯೊ ನ್ಹಯ್ ಹೊಂವ್ತಲ್ಯಾ ಸಗ್ಳ್ಯಾ ಜಾಗ್ಯಾ ವಯ್ನಿಬಿ ಸಗ್ಳ್ಯಾ ನಮುನ್ಯಾಚಿ ಫಿರುನ್ ಖೆಳ್ತಲಿ ಪಾನಿಯಾತ್ಲಿ ಜನಾವರಾ ತಾಂಡೆ ತಾಂಡೆ ಹೊವ್ನ್ ವಸ್ತಿ ರ್‍ಹಾತ್ಯಾತ್, ಅನಿ ಮಾಸೊಳಿಯಾಬಿ ತಾಂಡೆ ತಾಂಡೆ ಹೊವ್ನ್ ರ್‍ಹಾತ್ಯಾತ್. ಹೆ ಪಾನಿ ಸಮುಂದರಾತ್ ಪಡ್ತಾನಾ ತೆ ಪಾನಿ ಗೊಡ್ ಹೊತಾ, ಹ್ಯೊ ನ್ಹಯ್ ಹಂವ್ತಲ್ಯಾ ಸಗ್ಳ್ಯಾಕ್ಡೆಬಿ ಥೈ ಜಿವಿ ರ್‍ಹಾತಾ. 10 ತನ್ನಾ ಮ್ರತ್ಯು ಸಮುಂದರಾಚ್ಯಾ ದಂಡೆ ವರ್‍ತಿ ಭೊಂಯಿ ಇಬೆ ರ್‍ಹಾತ್ಯಾತ್, ಅನಿ ಎನ್ ಗೆದಿಕ್ನಾ ಎನ್ ಎಗ್ಲ್ಯಿಮಿನ್ ಪತರ್ ಫುರಾ ದಂಡೆ ವರ್‍ತಿ ಜಾಳಿ ಹಾತರ್ತಲೊ ಜಾಗೊ ಹೊತಾ, ನಾನಾ ನಮುನ್ಯಾಚಿ ಮಾಸೊಳ್ಯಾ ಮೆಡಿಟರೆನಿನ್ ಸಮುಂದರಾಚ್ಯಾ ಮಾಸೊಳಿಯಾಂಚ್ಯಾ ಸಾರ್ಕೆ ತೆಂಕಾ ತಾಂಡೆ ತಾಂಡೆ ಹೊವ್ನ್ ಗಾವ್ಲಿ. 11 ಖರೆ ತೆಜ್ಯಾ ಭೊತ್ಯಾನಿ ಹೊತ್ತ್ಯಾ ಜವ್ಳ್ ಜಿಮಿನ್ ಅನಿ ಸವ್ಳ್ ಪಾನಿಯಾಚಿ ಫೊಂಡಾ ಗೊಡ್ ಹೊಯ್ನಾತ್, ತೆ ಮಿಟ್ಟಾಚೊ ಖಳೆ ಹೊತಾ. 12 ನ್ಹಯಚ್ಯಾ ದೊನಿ ಭಾಜುಚ್ಯಾ ದಂಡೆಕ್ನಿಬಿ ಸಗ್ಳ್ಯಾ ನಮುನ್ಯಾಚಿ ಹನ್ನಾಚಿ ಝಾಡಾ ಉಗಾವ್ತಾತ್, ತೆಂಚಿ ಪಾನಾ ಬಾಡಿ ನಾತ್, ಫಳಾಬಿ ಸರಿನ್ಯಾತ್, ಕೊಡ್ಲಾಚೆ ಪಾನಿ ಪವಿತ್ರ್ ಗುಡಿಕ್ನಾ ಹೊಂವ್ನ್ ಯೆತಲ್ಯಾ ಸಾಟ್ನಿ, ಹರ್ ಎಕ್ ಮ್ಹಯ್ನ್ಯಾಕ್ಬಿ ತಿ ಝಾಡಾ ನ್ಹವೆ ಫಳ್ ದಿತಾತ್, ತೆಂಚೆ ಫಳ್ ಖಾವ್ಕ್ ಅನಿ ಪಾಲೊ ವಕ್ತಾಕ್ ಅನ್ಕುಲ್ ಹೊತಾ.

ಇಜ್ರಾಯೆಲ್ ದೆಶಾಚಿ ಹದ್ದ್

13 ಸರ್ವೆಸ್ಪರ್ ಅಸೊ ಮನ್ತಾ, ಇಜ್ರಾಯೆಲಾಚ್ಯಾ ಬಾರಾ ಕುಳಿಯಾಕ್ನಿ ದೆಶ್ ವಾಟೆ ಕರುನ್ ದಿತಾನಾ, ಫಿಡೆ ಸಾಂಗಲ್ಲಿ ನೆಮಾ ವಾಪ್ರುಚೆ, ಯೊಸೆಪಿಕ್ ದೊನ್ ವಾಟೆ ಮಟ್ಲ್ಯಾರ್, ಮನಸ್ಸೆ ಅನಿ ಎಪ್ರಾಯಿಮಾಚ್ಯಾ ಕುಳಿಯಾಕ್ನಿ ಎಕೆಕ್ ಭಾಗ್ ಗಾವ್ಚೆ. 14 ಮಿಯಾ ತುಮ್ಚ್ಯಾ ಪುರ್ವಜಾಕ್ನಿ ಆನ್ ಘಾಲುನ್ ಗೊಸ್ಟ್ ದಿಲ್ಲೊ ಹ್ಯೊ ದೆಶ್ ತುಮಿ ಸಗ್ಳ್ಯಾನಿ ಸಮಾಚ್ ವಾಟುನ್ ಘೆತ್ಯಾಸಿ, ಹೆ ತುಮ್ಚಿಚ್ ಆಸ್ತಿ ಹೊವ್ನ್ ರ್‍ಹಾತಾ. 15 ತುಮ್ಚ್ಯಾ ದೆಶಾಚಿ ಹದ್ದಾ ಅಸಿ ರ್‍ಹಾವ್ಚಿ, ದಕ್ಷಿನ್ ದಿಕ್ಕಾಚಿ ಹದ್ದ್ ಮೊಟ್ಟ್ಯಾ ಸಮುಂದರಾಕ್ನಾ ಶುರು ಹೊವ್ನ್ ಚೆದಾದಿಚ್ಯಾ ವಾಟೆ ವಯ್ಲ್ಯಾ ಹೆತ್ಲೊನಿಚ್ಯಾ ವಾಟೆನ್ ಎತಾ. 16 ಅನಿ ಹಮಾತ್, ಬೆರೊತ್, ದಮಸ್ಕಾಚ್ಯಾ ಘಡಿಕ್ ಅನಿ ಹಾಮಾತಿಚ್ಯಾ ಘಡಿಕ್ ಮದ್ದಿ ಹೊತ್ತ್ಯಾ ಸಿಬ್ರಯಿಮ್ ಮನ್ತಲ್ಯಾ ಗಾಂವಾಂಚ್ಯಾಕ್ನಾ ಹವ್ರಾನಿಚ್ಯಾ ಹದ್ದಿಚ್ಯಾ ಜಗ್ಗೊಳ್ಲ್ಯಾ ಹೆಚೆರ್ ಹತ್ತಿಕೊನಿಚ್ಯಾ ಜಗ್ಗೊಳ್ ಸರುಚಿ. 17 ಅಸಿ ಉತ್ತರ್ ದಿಕ್ಕಾಚಿ ಘಡ್ ಸಮುಂದರಾಕ್ನಾ ದಮಸ್ಕಾಚ್ಯಾ ಘಡಿಕ್ಡೆ ಹೊತ್ತ್ಯಾ ಹಚರ್ ಆಯ್ನೊವಿಚ್ಯಾ ಪತರ್ ವಾಡ್ತಾ, ತೆಜ್ಯಾ ಉತ್ತರ್ ದಿಕ್ಕಾಕ್ ಹಮಾತಿಚೆ ಪ್ರಾಂತ್ಯಾ ರ್‍ಹಾತಾ. 18 ಹಿಚ್ ದಿಸ್ ಉಗಾವ್ತಲ್ಯಾ ದಿಕ್ಕಾಚಿ ಘಡ್ ಹೊವ್ನ್ ಹಾಯ್. ಹವ್ರಾನ್, ದಮಸ್ಕ್, ಗಿಲಾದ್ ಹೆಂಚ್ಯಾ ಅನಿ ಇಜ್ರಾಯೆಲ್ ದೆಶಾಚ್ಯಾ ಮದ್ದಿ ಹೊತ್ತ್ಯಾ ಜೊರ್ದಾನ್ ನ್ಹಯ್ ಹದ್ದ್ ಹೊವ್ನ್ ಹಾಯ್. 19 ದಕ್ಷಿನಾ ದಿಕ್ಕಾಚಿ ಘಡ್ ತಾಮಾರಿಕ್ನಾ ಜಾವ್ನ್ ಮೆರಿಬೊತ್ ಕಾದೆಶಿಚ್ಯಾ ನ್ಹಯಿಕ್ನಾ ಇಜಿಪ್ತಾಚ್ಯಾ ಪಿಡ್ಲ್ಯಾ ನ್ಹಯಚ್ಯಾ ವಾಟೆನ್, ಮುಖ್ಯ್ ಸಮುಂದರಾಕ್ ಪಾವ್ಚಿ, ಹಿಚ್ ದಕ್ಷಿನ್ ದಿಕ್ಕಾಚಿ ಹದ್ದ್ ಹೊವ್ನ್ ಹಾಯ್. 20 ದಿಸ್ ಬುಡ್ತಲ್ಯಾ ದಿಕ್ಕಾಚಿ ಘಡ್ ಉತ್ತರ್ ದಿಕ್ಕಾಚ್ಯಾ ಘಡಿಕ್ನಾ ಹಾಮಾತಿಚ್ಯಾ ವಾಟೆಚ್ಯಾ ಇದ್ರಾಕ್ ಹೊತ್ತ್ಯಾ ಸಮುಂದರಾಚ್ಯಾ ದಂಡೆ ಪತರ್ ಮೊಟೆ ಸಮುಂದರ್ ಘಡ್ ಹೊವ್ನ್ ರ್‍ಹಾತಾ, ದಿಸ್ ಬುಡ್ತಲ್ಯಾ ದಿಕ್ಕಾಚಿ ಘಡ್ ಹಿಚ್ ಹೊವ್ನ್ ಹಾಯ್. 21 ಹ್ಯೊ ದೆಶ್ ತುಮಿ ಇಜ್ರಾಯೆಲಾಚ್ಯಾ ಹರ್ ಎಕ್ ಕುಳಿಕ್ ವಾಟುನ್ ಘೆವ್ಚೆ.

22 ತುಮ್ಚ್ಯಾ ಮದ್ದಿ ಪರ್ವಾಸಾಕ್ ಪೊರಾ ಹೊತ್ತ್ಯಾ ದುಸ್ರ್ಯಾ ದೆಶಾಚ್ಯಾಕ್ನಿಬಿ ದೆಶ್ ವಾಟೆ ಕರುನ್ ದಿವ್ಚೆ, ತೆನಿ ಇಜ್ರಾಯೆಲಾಂಚ್ಯಾ ಮದ್ದಿ ತುಮ್ಕಾ ಸ್ವತ್ಯಾಚ್ಯಾ ದೆಶಾಚೆ ಸಾರ್ಕೆಚ್ ಹೊವ್ನ್ ರ್‍ಹಾವ್ಚೆ, ಇಜ್ರಾಯೆಲಾಂಚ್ಯಾ ಕುಳಿಚ್ಯಾ ವಾಂಗ್ಡಾ ತುಮ್ಚ್ಯಾ ಸಾರ್ಕೆಚ್ ತೆಂಕಾಬಿ ಆಸ್ತಿ ರ್‍ಹಾವ್ಚಿ. 23 ಖಲ್ಯಾ ಕುಳಿತ್ ದುಸ್ರ್ಯಾ ದೆಶಾಚೊ ರ್‍ಹಾತಾ, ತೆಕಾ ಥೈ ಆಸ್ತಿ ರ್‍ಹಾವ್ಚಿ, ಹೆ ಸರ್ವೆಸ್ಪರ್ ದೆವಾಚೆ ಬೊಲ್ನೆ ಹೊವ್ನ್ ಹಾಯ್.