1 Ni di Yaa latɔkɔ mi alɛ, "Otii obi, le lɛsaa le ninte fɔ ni di anu, wee kukũ ko mmle; faakyɛ falaakakatɛ fata Israel batii." 2 Nioso labɛ kanya nii, ni aatɛɛ kukũ nwu lawee nɛ.

3 Ninfɛ aatɔkɔ mi alɛ, "Otii obi, wee kukũ ko mmle kɔta fɔ ni, faayiisa kafutu lɛfɔ ku nkũ." Nioso lawee kũ, ni kuate mɛnɛmɛnɛ fɛ bablɔ di kanya nii kamɛ nɛ.

4 Ninfɛ aatɔkɔ mi alɛ: "Otii obi, tɔɔkyɛ Israel batii nfũ kanunua faalaabuɛ sɛlaa nii fata ma. 5 Diele batii ba lɛkakatɛ niɛkpɔkpɔtɔ ni di sele lɛma nkpe ni osie ɔkyɛ beekpee fɔ, kafɔɔ Israel batii nfũ- 6 diele batii kpinwu ba lɛkakatɛ niɛkpɔkpɔtɔ ni di sele lɛma kafɔɔ nkpe ni osie, mba sele fanamafuo ni kasɔ onu. Nwaako nse nkpee fɔ ɔkyɛ lɛma yi, batabakyɔɔ fɔ atoko. 7 Kafɔɔ Israel batii dilootuna alɛ bɔɔkyɔɔ fɔ atoko, diekye blootuna alɛ bɔɔkyɔɔ mi ni atoko, ta Israel batii bamuu nkpe ni atoole osie ku onunsie oso. 8 Kafɔɔ kamata fɔ fanwɛ kamakata ku letoole osie fɛ mmle bate nii. 9 Kamabla katũ lɛfɔ fɛ difuɔ le ninkpe osie dilenke nii, ninwɛ osie ninlenkee lɛklɛklɛfuɔ. Tanyɛkɛ ma ee baakpee fɔ difu, nu bale batokopĩtɛ."

10 Ni aatɔkɔ mi alɛ, "Otii obi, kyɔɔ atoko nwaa, faamufũ kafɔɔ sɛlaa nii simuu kamabuɛ ntɔkɔ fɔ ni fakpee di otu. 11 Tɔɔkyɛ okpoo lɛfɔ batii ba ninsi ni di sɛlanle kamɛ ɔkyɛ kanunua faalaakakatɛ fata ma. Tɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ,’ Bɛɛkyɔɔ atoko woo, beesĩ woo."

12 Ninfɛ di Ninwuna nwu latakatɛ mi katoo nɛ, ni lanu sɛlɔ dikpududuu osie kanya di sɛmaa nii- Baatansa SAATE nwu leklekle di kasiɛkɔ nɔɔ!- 13 asaa ya ninkpe ni nkpa afoko nwu niatɔɔlɔɔfɔ ni baawo sɛlɔ ku bakeke nkpaa be di ɔlɔɔkɔ lɛma sɛlɔ lakpududuu osie kanya. 14 Ninfɛ di Ninwuna nwu latakatɛsa mi katoo, ni aakpaa mi aasifiko nɛ. Ni lasifi di ninyinyii ku ninwuna nii ɔblɔ kamɛ, ku SAATE nwu kɔnɛɛ siene ko niatika mi ni di suoto nɛ. 15 Ni lawa balanle ba niasiɛ ni di Tel-Abib di Kebar Okle kotoko nfũ nɛ. Ni lawɛ ma kaamɛ ninfa, di lɛba le baasiɛ ni, ayi akuɛnsĩ- di nnɛɛ lefee kamɛ nɛ.

16 Di ayi akuɛnsĩ nwu kayɛntɛkɔ yi, SAATE nwu ɔlaa lawa kuatɛɛ alɛ: 17 "Otii obi, ntɔɔyɔ fɔ lɛbla nyuntɛ lɛta Israel batii; nioso nu ɔlaa wɔ kamabuɛ ni, faasĩ kafɔɔ ɔlaa fata ma ku ɔlaa wɔ niekye ni ɔkyɛ nii. 18 Nse lɛtɔkɔ kpiletɛ nlɛ, ‘Nwaako fabakpi,’ fanansĩ ɔlaa fatɔɔ ee fakakatɛ fatɔɔ fadiki nwɔ di sisuku kpile nɔɔ suoto alɛ aawɛ nkpa nɔɔ yi, kpiletɛ nwu kamakpi di okpile nɔɔ kamɛ, ni ami kamakaalɛ ntɔ nɔɔ nkyeko nnɛɛ lɛfɔ. 19 Kafɔɔ nse feesĩ ɔlaa fɛɛta kpiletɛ nwu, anankyi di akpilesaa nɔɔ suoto ee akyi di sisuku kpile nɔɔ suoto yi, abakpi di sikpile nɔɔ kamɛ; kafɔɔ fatoodiki nkpa lɛfɔ.

20 "Nkpo kafɔɔ, nse tininitɛ lekyi di ɔsaabla tinini nɔɔ suoto ɛɛbla okpile, lɛyɔ lewosoku lɛtɛ di anu nɔɔ eetuula yi, abakpi. Ta fanansĩ ɔlaa fatɔɔ ni oso yi, abakpi di sikpile nɔɔ ɔbla kamɛ. Blɔbanyuma sɛsaabla tinini se aabla nii, ni kamakaalɛ ntɔ nɔɔ nkyeko nnɛɛ lɛfɔ. 21 Kafɔɔ nse feesĩ ɔlaa fɛɛta tininitɛ nwu falɛ atambla okpile, anambla okpile kafɔɔ yi, ni nwaako abasiɛ nkpa, diekye aanu ɔlaa osĩ ɔta nwu, ni fabadiki nkpa lɛfɔ."

22 SAATE nwu kɔnɛɛ latika mi di suoto ninfa, ni aatɔkɔ mi alɛ, "Taka faadie fakyɛ kasɔ lakataa nwu, nfa kamakakatɛ nta fɔ nɛ." 23 Nioso lataka ladie lakyɛ kasɔ lakataa nwu. Ni di SAATE nwu leklekle layila ninfa fɛle leklekle le lanya ni di Kebar Okle kotoko, ni lafuusa anu kaasɔ nɛ.

24 Ninfɛ di Ninwuna nwu lababuo mi kaamɛ, ni aatakatɛ mi aase di nkpaa nii suoto nɛ. Aakakatɛ aatɛɛ, aatɔkɔ mi alɛ: "Tɔɔkyɛ, falaasɛɛ suoto lɛfɔ fakpee di leyo lɛfɔ kamɛ. 25 Ni afɔ, otii obi, babanii fɔ ku sikũ; babaninii fɔ alɛ flɔbafuo odie ɔkyɛ batii nwu kamɛ. 26 Kamata ɔkplalomii lɛfɔ nnu kunkaa di katoo lɛnyasi lɛfɔ alɛ faalo kanana fanamafuo ni ɔlaa osĩ ɔta ma, nu bale batokopĩtɛ. 27 Kafɔɔ nse lɛkakatɛ lɛta fɔ yi, kamatikiti fɔ kanya fantɔkɔ ma falɛ, ‘Nnya ɔlaa wɔ di SAATE Kplɛ nwu kobuɛ ni alɛ.’ Otii lele nimakyɔɔ atoko yi, tɔɔ akyɔɔ atoko, otii lele kafɔɔ nimasĩ atoko ɔkyɔɔ yi, tɔɔ asĩ atoko ɔkyɔɔ; diekye batokopĩtɛ bale.