Jeremias 15

Kawɔɔ Di Yuda Batii Suoto

1 Ni di SAATE nwu latɔkɔ mi alɛ: "Nse bia Mose ku Samuel nin-yɛ di anu nii yi, otu nii dilɔbakyi kuwa di batii ba mmle suoto. Tososa ma di anu nii! Faata ma basifi! 2 Nse bɛɛkaalɛ fɔ alɛ, ‘Ɔfɛ nfɛ buofe?’ Tɔkɔ ma falɛ, ‘Nnya ɔlaa wɔ di SAATE nwu kobuɛ ni alɛ:

" ‘Batii ba bɛɛyɔ bɛɛta ni kukpi yi, kukpi bɛɛta ma;

mba bɛɛyɔ bɛɛta ni kapamii yi, kapamii bɛɛta ma,

mba bɛɛyɔ bɛɛta ni kɔka olo yi, kɔka bɛɛta ma,

mba beeyɔ bɛɛta ni sɛlanle yi, sɛlanle bɛɛta ma.’

3 "Kamakyesee asaabawɔɔsatɛ akyuu ana ateate di suoto lɛma," SAATE nwu niebuɛ alɛ, "Kapamii kamalo ma, bawewee nnwududusa ma mansifiko, bakansiɛ di kɔfɛɛfɔ ku lepoo kamɛ babɔkɛɛ kafɔɔ mbɛbɛɛ, manwɔɔsa ma. 4 Kamabla ma lɛyɛkɛsaa nta kasɔ sɛkanlekɔ mmuu, ta lɛsaa le di Yuda ɔka Manase wɔ niale ni Hesekia obisuɔtɔbi labla ni di Yerusalem oso.

5 "Oo Yerusalem, owe nimanya fɔ nyaami?

Owe nimawi anta fɔ?

Owe nimayila ankaalɛ alɛ lɛ fate?

6 Fatoosĩ mi," SAATE nwu niebuɛ.

"Foonwini fankple nkpaamaa.

Nioso kamadiki nnɛɛ di suoto lɛfɔ ninwɔɔsa fɔ;

nɔmasinfuo fɔ nyaami ɔnya.

7 Kamafɛɛlɛ ma ku kɔfɛɛ

di kasɔ nwu okpoo kplɛ n-yoko kanya.

Kamayɔ kukpi ku kawɔɔ n-wako di batii nii suoto,

diekye badikyi di sisuku lɛma nwu suoto.

8 Kamata bakpisɔfɔ lɛma mpɔ kpinwu

manlenkee lekpo ɔtɛnsia.

Kamayɔ asaawɔɔsatɛ

n-wako di bakosopo lɛma baya suoto di kakũ kplamatãa;

kamayɔ ninyinyi ku difu

nfuasa ma.

9 Babi bakuɛnsĩ ɔya kamaloo ɔnyɛɛ

annwuna ninwuna nɔɔ yɛntɛle.

Kufĩ nɔɔ kamamɛɛ di obe wɔ di kale diiloo nii;

babakpee nwɔ sinunsɔ man-yoolee nwɔ.

kamalo batii ba niebu basi ni nkpa ku kapamii

di balo lɛma anu,"

SAATE nwu niebuɛ.

Yeremia Layɔ Ɔlaa Aatɛ Di SAATE Nwu Anu

10 Yaami, yɔɔsa kɔta suoto nii alɛ feelofo mi,

otii wɔ di kasɔ kamuu lɛtaka kayɛ ni di suoto bɔɔnwaaniko nwɔ nii!

Ninnfɛnsa lɛsaa di otii nfũ ee nfɛnsa lɛsaa nta otii kuonwii,

kafɔɔ otii biala kɔkpaani mi.

11 SAATE nwu labuɛ alɛ,

"Nwaako kamadiki fɔ nta disitikasaa biene lewo;

nwaako kamata balo lɛfɔ ntikiti fɔ lekoto

di ɔlaa kpile otũbee ku nimiina obe kamɛ.

12 "Otii kamafuo lɛbɔɔsaa wɛɛfɛɛ ofee-

lɛbɔɔsaa wɛɛfɛɛ- ee lɛbɔɔsaa sɛɛle le niekye ni katookasɔ?

13 Kamayɔ lɛsaawɛ lɛfɔ ku asaa lɛfɔ ya niefũ ni kɔya

nta fɛ kakpɛ kamɛ asaa, ninanle ni di kɔya kanya,

ta sikpile lɛfɔ simuu

di kasɔ lɛfɔ kamuu suoto oso.

14 Kamabla fɔ ɔlanle nta balo lɛfɔ

di kasɔ ka fanan-ye ni suoto,

diekye ɔblɔ nii kamakɛsɛɛsa ɔtɔ

wɔ nimafiɛ ni di suoto lɛfɔ."

15 Oo SAATE, faye lɛsaa biala;

nyuma mi faayɔ nwu ole di suoto nii.

Bla ɔbla okyisa fatɛɛ di batii ba nikomiɛ mi ni dikpile suoto.

Tan-wɛ otu faata ma- alɛ kafe n-wɛ kukpi;

bu nwu fanyu mmle lafe ni di sinunsɔ kamɛ ta afɔ oso.

16 Di obe wɔ faakakatɛ sɛlaa lɛfɔ faatɛɛ nii, lafũ sĩ lale;

suoto lɛyɔɔ nii ku otu nii lɛbɔmbɔsaa siale siatɛɛ,

diekye leyooto lɛfɔ man-lɛɛ mi,

Oo SAATE, Yaa wɔ Ninlenke ni.

17 Diidii ninwa kasɔ nsiɛ di batii ba ninnya ni suoto lɛyɔɔ dikudi kamɛ,

diidii nin-le nwee ku mma;

lete nii niasiɛ diekye kɔnɛɛ lɛfɔ latika mi di suoto

ni faata ɔblɔ layii mi kamɛ nɛ.

18 Obe oso di dibuo nii nnaa kase

di ɔkpɛ ko di kakɔ nii kɔkpɛ kankyakaa konookpi kafɔɔ?

Fabate fɛle kaklenyii ka ninkyɔnkyɔ ni batii fantɛɛ,

fante fɛle ntu be ninsɔɔ ni wla?

19 Nkpo oso nnya ɔlaa wɔ di SAATE nwu kobuɛ ni alɛ:

"Nse feekyisa nkpa yi, kamase fɔ lese

alɛ faasumu mi;

nse feebuɛ sɛlaa nwaa, ninanle sɛlaakuu yi,

ni fabale otii wɔ ninkakatɛ ni di disi nii.

Ta batii ba mmle bamunikĩi bawa ɔkyɛ lɛfɔ,

kafɔɔ afɔ tanmunikĩi faakyɛ ɔkyɛ lɛma.

20 Kamayɔ fɔ mbla kasiɛkɔ siene di batii ba mmle suoto,

fɛle oyoyiɛ wɔ nikpe ni osie fɛ lɛbɔɔsaa sɛɛle;

babakpɛko fɔ

kafɔɔ blɔbalenkee fɔ,

diekye nsiko fɔ

alɛ kadiki fɔ ninfũ fɔ nkpa,"

SAATE nwu niebuɛ.

21 "Kamadiki fɔ nkyeko amumu bablatɛ nnɛɛ

nindiki fɔ kafɔɔ nkyeko basiensietɛ sɛnɛɛfɔɔ kamɛ."