1 O thugaibh buidheachas don Tighearna, oir tha e math, oir gu bràth mairidh a thròcair.

2 Mar seo abradh iadsan a shaoradh leis an Tighearna, a shaor e o làimh an nàmhaid;

3 Agus a chruinnich e as na tìrean, on àird an ear agus on àird an iar, on àird a tuath agus on àird a deas.

4 Chaidh iad air seachran anns an fhàsach, ann an ionad uaigneach; slighe gu baile tàimh cha d’fhuair iad.

5 Acrach agus tartmhor, dh’fhàilnich an anam annta.

6 An sin ghlaodh iad ris an Tighearna nan airc, agus as an teanntachdan shaor e iad;

7 Agus threòraich e iad air slighe cheirt, a‑chum gun rachadh iad gu baile tàimh.

8 O gum moladh daoine Dia airson a mhaitheis, agus airson a bheartan iongantach do chloinn nan daoine!

9 Oir shàsaich e an t‑anam cìocrach, agus lìon e an t‑anam acrach le math.

10 Iadsan a shuidh ann an dorchadas agus ann an sgàil a’ bhàis, ceangailte ann an truaighe agus ann an iarann,

11 A chionn gun do rinn iad ceannairc an aghaidh briathran Dhè, agus gun do rinn iad tàir air comhairle an Tì as àirde,

12 Aig an do leagadh sìos an cridhe le anshocair; thuit iad, agus cha robh fear-cuideachaidh ann.

13 An sin ghlaodh iad ris an Tighearna nan airc, agus as an teanntachdan shaor e iad.

14 Thug e iad à dorchadas, agus à sgàil a’ bhàis, agus bhris e o chèile an cuibhreach.

15 O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

16 Oir bhris e na geatachan umha, agus gheàrr e sìos na croinn iarainn.

17 Bha amadain, airson an easaontais agus airson an euceartan, fo àmhghar.

18 De gach biadh ghabh an anam gràin, agus thàinig iad dlùth do gheatachan bàis.

19 An sin ghlaodh iad ris an Tighearna nan airc, agus as an teanntachdan shaor e iad.

20 Chuir e a fhacal uaithe, agus shlànaich e iad; agus shaor e iad o sgrios.

21 O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

22 Agus gun ìobradh iad ìobairtean buidheachais, agus gun cuireadh iad an cèill a ghnìomharan le luathghaire!

23 Iadsan a thèid sìos don fhairge air longan, a nì obair air uisgeachan mòra,

24 Chì iadsan gnìomharan an Tighearna, agus a bheartan iongantach anns an doimhne;

25 Oir labhraidh e, agus dùisgidh e a’ ghaoth dhoineannach, agus togaidh i a tonnan.

26 Thèid iad suas do na nèamhan, thèid iad sìos do na doimhneachdan; le àmhghar leaghaidh an anam.

27 Thèid iad thuige agus uaithe, agus tuislichidh iad mar dhuine air mhisg; agus thèid as dan cèill uile.

28 An sin glaodhaidh iad ris an Tighearna nan airc, agus as an teanntachdan bheir e iad.

29 Cuiridh e an doineann gu fèith, agus bidh a tonnan nan tàmh.

30 An sin bidh iad ait, a chionn gum bi iad sàmhach; agus bheir e iad don chaladh as miannach leo.

31 O gum moladh daoine an Tighearna airson a mhaitheis, agus airson a bheartan iongantach do chloinn nan daoine!

32 Agus gun àrdaicheadh iad e ann an coitheanal an t‑sluaigh, agus ann a àite-suidhe nan seanairean gum moladh iad e!

33 Nì e aibhnichean nam fàsach, agus tobraichean uisge nan talamh tartmhor.

34 Fearann beartach nì e fàs airson aingidheachd a luchd-àiteachaidh.

35 Nì e fàsach na linne uisge, agus fearann tioram na thobraichean uisge.

36 Agus an sin bheir e air na h‑acraich còmhnaidh a ghabhail, agus deasaichidh iad baile tàimh;

37 Agus sìol-chuiridh iad achaidhean, agus suidhichidh iad fìonliosan, agus bheir iad toradh pailt uapa.

38 Agus beannaichidh e iad, agus fàsaidh iad ro‑lìonmhor; agus cha lùghdaich e an sprèidh.

39 Ach ma pheacaicheas iad, lùghdaichear agus leigear sìos iad le fòirneart, olc agus doilgheas.

40 Dòirtidh e tarcais air àrd-uaislean, agus cuiridh e air seachran iad ann am fàsach as eugmhais slighe.

41 Agus togaidh e suas am bochd o thruaighe, agus nì e teaghlaichean dha mar threud.

42 Chì na fìreanan seo, agus bidh iad ait, agus druididh gach euceart a beul.

43 Cò a tha glic, agus a bheir fa‑near na nithean sin? Tuigidh esan coibhneas gràdhach an Tighearna.