Salm 110

Salm le Daibhidh.

1 Thubhairt an Tighearna rim Thighearna, Suidh aig mo dheaslàimh, gus an cuir mi do naimhdean nan stòl fod chasan.

2 Slat-shuaicheantais do chumhachd cuiridh an Tighearna a-mach à Sion; bi thusa ad uachdaran am meadhon do naimhdean.

3 Bidh do shluagh ro-thoileach ann an là do chumhachd; ann am maise na naomhachd, mar an drùchd o bholg na maidne, bidh d’òige agad.

4 Mhionnaich an Tighearna, agus cha ghabh e aithreachas, Is sagart thu gu bràth, a rèir òrdagh Mhelchisedeic.

5 Buailidh an Tighearna, a tha air do dheaslàimh, rìghrean ann an là a fheirge.

6 Bheir e breith am measg nan cinneach; lìonaidh gach àite le cuirp mharbha; lotaidh e an t-uachdaran os cionn iomadh tìr.

7 Den t-sruth air an t-slighe òlaidh e; uime sin togaidh e suas a cheann.