1 A Dhè an dìoghaltais, a Thighearna Dhè an dìoghaltais, dealraich a‑mach.

2 Ardaich thu fhèin, a Bhritheamh na talmhainn; ìoc luigheachd do na h‑uaibhrich.

3 Cia fhad a nì na h‑aingidh, a Thighearna, cia fhad a nì na h‑aingidh caithreim?

4 Cia fhad a bhrùchdas iad briathran, a labhras iad nithean cruaidhe, a bhios uile luchd-dèanamh an uilc ri ràiteachas;

5 A bhruthas iad do shluagh, a Thighearna, agus a chlaoidheas iad d’oighreachd;

6 A mharbhas iad a’ bhantrach agus an coigreach, agus a mhortas iad na dìlleachdain;

7 Agus a their iad, Chan fhaic an Tighearna, agus cha toir Dia Iàcoib fa‑near e?

8 Tuigibh, sibhse amhlairean am measg an t‑sluaigh; agus amadana, cuin a bhios sibh glic?

9 An tì a shuidhich a’ chluas, nach cluinn e? An tì a dhealbh an t‑sùil, nach faic e?

10 An tì a smachdaicheas na fineachan, nach cronaich e? An tì a theagaisgeas eòlas don duine, nach eil eòlas aige?

11 Is fiosrach an Tighearna air smuaintean dhaoine, gur dìomhanas iad.

12 Is beannaichte an duine a smachdaicheas tusa, a Thighearna, agus a theagaisgeas tu as do lagh;

13 A‑chum fois a thabhairt dha o làithean an uilc, gus an cladhaichear sloc don aingidh.

14 Oir cha tilg Dia dheth a shluagh, agus cha trèig e a oighreachd fhèin;

15 Ach tillidh breitheanas ri ceartas, agus leanaidh iadsan uile a tha ionraic nan cridhe e.

16 Cò a dh’èireas leam an aghaidh luchd-dèanamh an uilc? Cò a sheasas air mo shon an aghaidh luchd-dèanamh na h‑aingidheachd?

17 Mura biodh an Tighearna gam chuideachadh, is beag nach robh m’anam na thàmh gu tosdach.

18 Nuair a thubhairt mi, Tha mo chas air sleamhnachadh uam, chùm do thròcair, a Thighearna, suas mi.

19 Ann an lìonmhorachd mo smuaintean an taobh a‑staigh dhìom, thug do chomhfhurtachd sòlas dom anam.

20 Am bi comann riutsa aig rìgh-chathair na h‑euceirt, a dhealbhas aimhleas le reachd?

21 Cruinnichidh iad le chèile an aghaidh anam an fhìrein, agus dìtidh iad fuil neochiontach.

22 Ach is e an Tighearna mo dhaingneach, agus is e mo Dhia carraig mo dhòchais.

23 Agus dìolaidh e orra fhèin an euceart, agus nan aingidheachd fhèin gearraidh e as iad; gearraidh an Tighearna ar Dia as iad.