1 A Thighearna, na cronaich mi ann ad chorraich, agus na smachdaich mi ann an teas d’fheirge;

2 Oir shàthadh do shaighdean annam, agus tha do làmh trom orm.

3 Chan eil fallaineachd am fheòil airson d’fheirge; chan eil sìth am chnàmhan airson mo pheacaidh.

4 Oir chaidh m’euceartan thar mo chinn; mar èire thruim tha iad ro throm air mo shon.

5 Tha mo chreuchdan lobhte, breun airson m’amaideachd.

6 Tha mi cràiteach; chromadh sìos mi gu mòr; air feadh an là uile tha mi ag imeachd gu dubhach;

7 Oir tha mo leasraidh làn de ghalar grànda, agus chan eil fallaineachd am fheòil.

8 Tha mi lag agus ro‑bhrùite; tha mi a’ bùireadh trìd mì‑shuaimhneas mo chridhe.

9 A Thighearna, tha mo mhiann uile ad làthair, agus chan eil m’osnaich falaichte ort.

10 Tha mo chridhe a’ plosgartaich; thrèig mo neart mi; a‑thaobh fradharc mo shùl, sin mar an ceudna chan eil agam.

11 Tha luchd mo ghaoil agus mo chàirdean a’ seasamh fa chomhair mo leòin, agus tha mo dhìlsean a’ seasamh fada uam.

12 Agus tha luchd-iarraidh m’anama a’ cur ribeachan romham, agus luchd-iarraidh m’uilc a’ labhairt nithean aimhleasach, agus a’ smaoineachadh ceilge air feadh an là uile.

13 Ach mar dhuine bodhar, cha chluinn mise; agus tha mi mar dhuine balbh, nach fhosgail a bheul.

14 Tha mi eadhon mar fhear nach cluinn, agus aig nach eil achmhasain na bheul.

15 Oir annadsa, a Thighearna, chuir mi mo dhòchas; èisdidh tusa, a Thighearna mo Dhia.

16 Oir thubhairt mi, Air eagal gun dèan iad gàirdeachas am aghaidh; nuair a shleamhnaicheas mo chas, gun àrdaich iad iad fhèin nam aghaidh.

17 Oir tha mi ealamh gu tuisleachadh, agus tha mo dhoilgheas am fhianais a‑ghnàth.

18 Oir aidichidh mi m’euceart; bidh mi duilich airson mo pheacaidh.

19 Ach tha mo naimhdean beòthail, tha iad làidir; agus tha iadsan aig a bheil fuath dhomh gu h‑eucoireach air fàs lìonmhor.

20 Agus tha iadsan a dhìolas olc airson maith a’ cur am aghaidh, a chionn gu bheil mi a’ leantainn a’ mhaith.

21 Na trèig mi, a Thighearna mo Dhia; na bi‑sa fada uam.

22 Greas a‑chum mo chuideachaidh, a Thighearna, mo shlàinte.