1 Mura biodh an Tighearna leinn, abradh Israel a‑nis;

2 Mura biodh an Tighearna leinn, nuair a dh’èirich daoine nar n‑aghaidh;

3 An sin shluigeadh iad beò sinn, nuair a las am fearg nar n‑aghaidh;

4 An sin thigeadh tuiltean uisgeachan tharainn, rachadh an sruth thar ar n‑anam;

5 An sin rachadh na h‑uisgeachan uaibhreach thar ar n‑anam.

6 Beannaichte gu robh an Tighearna, nach tug sinn mar chreich dam fiaclan.

7 Chaidh ar n‑anam as mar eun a ribe nan eunadair; bhriseadh an ribe, agus chaidh sinn as.

8 Tha ar cobhair ann an ainm an Tighearna, a rinn nèamh agus talamh.