ALEPH

1 Is beannaichte iadsan a tha neo-lochdach anns an t‑slighe, a dh’imicheas ann an lagh an Tighearna.

2 Is beannaichte iadsan a ghleidheas a theisteis, a dh’iarras e len uile chridhe.

3 Mar an ceudna cha dèan iad aingidheachd; na shlighean imichidh iad.

4 Dh’àithn thu d’òrdaighean a bhith air an coimhead gu dìcheallach.

5 O nach robh mo cheuman air an stiùradh a‑chum do reachdan a choimhead!

6 An sin cha ghabh mi nàire, nuair a bheir mi spèis dod àitheantan gu lèir.

7 Molaidh mi thu le treibhdhireas cridhe, nuair a dh’fhòghlamas mi breitheanais do cheartais,

8 Coimheadaidh mi do reachdan. O na trèig mi gu tur!

BETH

9 Ciod leis an glan an t‑òganach a shlighe? Trìd faicill, a rèir d’fhacail.

10 Lem uile chridhe dh’iarr mi thu; na leig dhomh dol air seachran o d’àitheantan.

11 Am chridhe dh’fhalaich mi d’fhacal, a‑chum nach peacaichinn ad aghaidh.

12 Is beannaichte thusa, a Thighearna; teagaisg dhomh do reachdan.

13 Lem bhilean chuir mi an cèill uile bhreitheanais do bheòil.

14 Ann an slighe do theisteis rinn mi gàirdeachas, mar os cionn gach uile shaoibhreis.

15 Air d’àitheantan beachd-smaoinichidh mi, agus dearcaidh mi air do cheuman.

16 Ann ad reachdan gabhaidh mi tlachd; cha dìochuimhnich mi do bhriathran.

GIMEL

17 Buin gu fial rid òglach, a‑chum gum bi mi beò, agus gun coimhead mi do bhriathran.

18 Fosgail mo shùilean, a‑chum gum faic mi nithean iongantach od lagh.

19 Is coigreach air thalamh mi; na ceil orm d’àitheantan.

20 Tha m’anam brùite, le dèidh air do bhreitheanais gach tràth.

21 Smachdaich thu na h‑uaibhrich; is mallaichte iadsan a thèid air seachran od àitheantan.

22 Tionndaidh uam masladh agus tàir, oir ghlèidh mi do theisteis.

23 Shuidh eadhon uachdarain, agus labhair iad am aghaidh; ach bheachd-smaoinich d’òglach air do reachdan.

24 Mar an ceudna is iad do theisteis mo thlachd, mo chomhairlichean.

DALETH

25 Tha m’anam a’ leantainn ris an ùir; beòthaich mi a rèir d’fhacail.

26 Chuir mi an cèill do shlighean, agus dh’èisd thu rium; teagaisg dhomh do reachdan.

27 Thoir orm slighe d’àitheantan a thuigsinn, agus labhraidh mi air d’obraichean iongantach.

28 Tha m’anam a’ leaghadh as le tùrsa; neartaich mi a rèir d’fhacail.

29 Cuir uam slighe nam breug, agus gu gràsmhor deònaich dhomh do lagh.

30 Roghnaich mi slighe na fìrinn; chuir mi do bhreitheanais fam chomhair.

31 Dhlùth-lean mi rid theisteis; a Thighearna, na cuir gu nàire mi.

32 Ann an slighe d’àitheantan ruithidh mi, nuair a chuireas tu mo chridhe ann am farsaingeachd.

HE

33 Teagaisg dhomh, a Thighearna, slighe do reachdan, agus gleidhidh mi i gu ruig a’ chrìoch.

34 Thoir tuigse dhomh, agus gleidhidh mi do lagh; seadh, coimheadaidh mi e lem uile chridhe.

35 Thoir orm triall ann an ceum d’àitheantan, oir annsan tha mo thlachd.

36 Lùb mo ghlùin gud theisteis, agus chan ann gu sannt.

37 Tionndaidh mo shùilean o amharc air dìomhanas; ann ad shlighean beòthaich mi.

38 Daingnich d’fhacal dod òglach, air a bheil d’eagal-sa.

39 Cuir uam mo mhasladh as eagal leam, oir tha do bhreitheanais math.

40 Feuch, is miannach leam do reachdan; ad cheartas beòthaich mi.

VAU

41 Agus thigeadh do thròcair am ionnsaigh, a Thighearna, do shlàinte a rèir d’fhacail;

42 An sin bidh freagradh agam dhàsan a bheir masladh dhomh, gu bheil m’earbsa as d’fhacal-sa.

43 Agus na buin facal na fìrinn gu h‑iomlan as mo bheul, oir ann ad bhreitheanais chuir mi mo dhòchas.

44 Agus coimheadaidh mi do lagh a‑ghnàth, gu suthainn is gu sìor.

45 Agus gluaisidh mi ann am farsaingeachd, a chionn gun iarr mi do reachdan.

46 Agus labhraidh mi air do theisteis an làthair rìghrean, agus cha bhi nàire orm.

47 Agus gabhaidh mi tlachd ded àitheantan, don tug mi gràdh.

48 Agus togaidh mi mo làmhan rid àitheantan, don tug mi gràdh; agus beachd-smaoinichidh mi air do reachdan.

ZAIN

49 Cuimhnich am facal dod òglach, as an tug thu orm earbsa.

50 Is e seo mo chomhfhurtachd ann am àmhghar, oir bheòthaich d’fhacal mi.

51 Rinn na h‑uaibhrich fanaid orm gu mòr; gidheadh od lagh cha do chlaon mi.

52 Chuimhnich mi do bhreitheanais o chian, a Thighearna, agus fhuair mi comhfhurtachd.

53 Ghlac uamhann mi a‑thaobh nan daoine aingidh, a thrèigeas do lagh.

54 B’iad do reachdan mo cheòl ann an taigh mo chuairt.

55 Chuimhnich mi d’ainm, a Thighearna, anns an oidhche, agus ghlèidh mi do lagh.

56 Mar seo thachair e dhòmhsa, a chionn gun do ghlèidh mi do reachdan.

CHETH

57 Is tusa mo chuibhreann, a Thighearna; thubhairt mi gun coimheadainn d’fhacail.

58 Dh’aslaich mi do dheagh-ghean lem uile chridhe; dèan tròcair orm a rèir d’fhacail.

59 Chnuasaich mi do shlighean, agus thill mi mo chasan rid theisteis.

60 Rinn mi deifir, agus cha robh mi màirnealach a‑chum d’àitheantan a choimhead.

61 Chreach buidhnean dhroch dhaoine mi, ach cha do dhìochuimhnich mi do lagh.

62 Mu mheadhon-oidhche èiridh mi a‑chum buidheachas a thoirt dhut airson breitheanas do cheartais.

63 Is fear-comainn mi dhaibhsan uile air am bi d’eagal, agus dhaibhsan a ghleidheas do reachdan.

64 Ded thròcair, a Thighearna, tha an talamh làn; teagaisg dhomh do reachdan.

TETH

65 Rinn thu gu math rid òglach, a Thighearna, a rèir d’fhacail.

66 Teagaisg dhomh deagh thuigse agus eòlas, oir chreid mi d’àitheantan.

67 Mun robh mi ann an àmhghar, chaidh mi air seachran; ach a‑nis tha mi a’gleidheadh d’fhacail.

68 Is math thusa, agus nì thu math; teagaisg dhomh do reachdan.

69 Dhealbh na h‑uaibhrich breug am aghaidh, ach gleidhidh mise d’àitheantan lem uile chridhe.

70 Cho reamhar ri saill tha an cridhe-san; ach ann ad lagh tha mo thlachd-sa.

71 Is math dhòmhsa gu robh mi ann an àmhghar, a‑chum gum fòghlamainn do reachdan.

72 Is fheàrr dhòmhsa lagh do bheòil na mìltean de òr agus de airgead.

IOD

73 Rinn agus dhealbh do làmhan mi; thoir tuigse dhomh, a‑chum gum fòghlaim mi d’àitheantan.

74 Chì iadsan air am bi d’eagal mi, agus bidh iad ait, a chionn gun d’earb mi à d’fhacal.

75 Tha fhios agam, a Thighearna, gu bheil do bhreitheanais ceart, agus gur ann am fìrinn a chlaoidh thu mi.

76 Bidh a‑nis do thròcair chaomh a‑chum comhfhurtachd dhomh, a rèir d’fhacail rid òglach.

77 Thigeadh do chaomh-thròcairean am ionnsaigh, a‑chum gum bi mi beò, oir is e do lagh mo thlachd.

78 Biodh nàire air luchd an àrdain, oir gun adhbhar bhuin iad gu fiar rium; ach beachd-smaoinichidh mise air d’àitheantan.

79 Tilleadh iadsan air a bheil d’eagal rium, agus iadsan a tha eòlach air do theisteis.

80 Biodh mo chridhe treibhdhireach ann ad reachdan, a‑chum nach nàraichear mi.

CAPH

81 Tha m’anam air a chlaoidh le dèidh air do shlàinte; ann ad fhacal chuir mi mo dhòchas.

82 Tha mo shùilean air an caitheamh le feitheamh rid fhacal, nuair a tha mi ag ràdh, Cuin a nì thu furtachd orm?

83 Oir tha mi mar shearraig ann an deataich; gidheadh cha do dhìochuimhnich mi do reachdan.

84 Cia lìon iad làithean d’òglaich? Cuin a chuireas tu breitheanas an gnìomh orrasan a tha an tòir orm?

85 Chladhaich na h‑uaibhrich sluic dhomh, nach eil a rèir do lagha.

86 Is fìrinn d’àitheantan-sa gu lèir; gu fealltach tha iad an tòir orm; cuidich thusa leam.

87 Is beag nach do chuir iad as dhomh air thalamh; ach cha do thrèig mise do reachdan.

88 A rèir do chaomh-thròcair beòthaich thusa mi, agus gleidhidh mi teisteas do bheòil.

LAMED

89 Gu bràth, a Thighearna, tha d’fhacal seasmhach anns na nèamhan.

90 O linn gu linn tha d’fhìrinn; dhaingnich thu an talamh, agus seasaidh e.

91 A rèir d’òrdaighean tha iad buan gus an‑diugh, oir is iad na h‑uile do sheirbhisich.

92 Mura biodh gum b’e do lagh mo thlachd, an sin gheibhinn bàs ann am àmhghar.

93 Gu bràth cha dìochuimhnich mi do reachdan, oir leòsan bheòthaich thu mi.

94 Is leat mise; saor mi; oir dh’iarr mi do reachdan.

95 Dh’fheith na h‑aingidh orm a‑chum mo sgrios; ach beachd-smaoinichidh mi air do theisteis.

96 Chunnaic mi crìoch gach iomlanachd; ach tha d’àithne-sa ro‑fharsaing.

MEM

97 O cia ionmhainn leam do lagh-sa! Gach là is e mo chùis-smaoineachaidh.

98 Led àithne rinn thu mi nas glice na m’eascairdean, oir tha i a‑ghnàth maille rium.

99 Os cionn mo luchd-teagaisg uile tha mi a’ tuigsinn, oir is iad do theisteis mo chùis-smaoineachaidh.

100 Os cionn nan seanairean tha mi crìonna, a chionn gu bheil mi a’ gleidheadh do reachdan.

101 O gach droch shlighe chùm mi mo chasan, a‑chum gun coimheadainn d’fhacal.

102 Od bhreitheanais cha do chlaon mi, oir theagaisg thusa mi.

103 Cia milis lem bhlas do bhriathran! Nas mìlse tha iad na mil dom bheul.

104 Trìd do reachdan fhuair mi tuigse; uime sin is fuathach leam gach slighe bhreugach.

NUN

105 Is lòchran d’fhacal dom chois agus solas dom cheum.

106 Mhionnaich mi, agus coileanaidh mi e, gun coimhead mi breitheanais do cheartais.

107 Tha mi ann an àmhghar ro‑mhòr; ath-bheothaich mi, a Thighearna, a rèir d’fhacail.

108 Gabh uam gu taitneach, guidheam ort, a Thighearna, saor-thabhartasan mo bheòil, agus teagaisg dhomh do bhreitheanais.

109 Tha m’anam a‑ghnàth am làimh; gidheadh cha do dhìochuimhnich mi do lagh.

110 Chuir droch dhaoine ribe romham, ach od reachdan cha deachaidh mise air seachran.

111 Ghabh mi do theisteis mar oighreachd gu bràth, oir is iad aoibhneas mo chridhe.

112 Dh’aom mi mo chridhe a‑chum do reachdan a chur an gnìomh a‑ghnàth, gu ruig a’ chrìoch.

SAMECH

113 Is fuath leam smuaintean faoine, ach is toigh leam do lagh.

114 Is tusa m’ionad-falaich agus mo sgiath; as d’fhacal-sa tha m’earbsa.

115 Imichibh uam, a luchd-dèanaimh an uilc, oir gleidhidh mise àitheantan mo Dhè.

116 Cùm suas mi a rèir d’fhacail, agus mairidh mi beò; agus na leig fo nàire mi a‑thaobh mo dhòchais.

117 Daingnich mi, agus bidh mi tèarainte, agus bidh tlachd agam ann ad reachdan a‑ghnàth.

118 Shaltair thu orrasan uile a chaidh air seachran od reachdan, oir is breug an cealg.

119 Mar shal tilgidh tu uat uile dhroch dhaoine na talmhainn; uime sin is toigh leam do theisteis.

120 Chriothnaich m’fheòil le uamhann romhad, agus bha eagal orm rod bhreitheanais.

AIN

121 Rinn mi breitheanas agus ceartas; na fàg mi dom luchd-fòirneart.

122 Bi‑sa an urras air d’òglach a‑chum maith; na dèanadh na h‑uaibhrich fòirneart orm.

123 Tha mo shùilean air an caitheamh le bhith a’ sealltainn airson do shlàinte agus airson facal d’fhìreantachd.

124 Buin rid òglach a rèir do thròcair, agus teagaisg dhomh do reachdan.

125 Is mi d’òglach; thoir tuigse dhomh, a‑chum gum bi eòlas agam air do theisteis.

126 Is mithich dhut, a Thighearna, a bhith a’ dèanamh; bhris iad do lagh.

127 Uime sin is annsa leamsa d’àitheantan na an t‑òr, seadh na an t‑òr fìorghlan.

128 Uime sin measaidh mi do reachdan uile a‑thaobh gach nì a bhith ceart; is fuathach leam gach slighe bhreugach.

PE

129 Is iongantach do theisteis; air an adhbhar sin gleidhidh m’anam iad.

130 Bheir fosgladh do bhriathran solas, a’ teagasg nan daoine aon-fhillte.

131 Dh’fhosgail mi mo bheul, a’ plosgartaich, oir bha mi an geall air d’àitheantan.

132 Amhairc orm, agus dèan tròcair orm, mar as gnàth leat a dhèanamh dhaibhsan len ionmhainn d’ainm.

133 Stiùir mo cheuman a rèir d’fhacail, agus na biodh aig euceart sam bith uachdaranachd orm.

134 Teasairg mi o fhòirneart dhaoine, agus coimheadaidh mi d’òrdaighean.

135 Thoir air do ghnùis dealrachadh air d’òglach, agus teagaisg dhomh do reachdan.

136 Ruith sruthan dheur sìos om shùilean, a chionn nach do choimhead iad do lagh.

TSADDI

137 Is cothromach thusa, a Thighearna, agus is ceart do bhreitheanas.

138 Dh’àithn thu do theisteis mar cheartas agus mar fhìrinn mhòir.

139 Chlaoidh m’eud mi, a chionn gun do dhìochuimhnich mo naimhdean do bhriathran.

140 Ro‑ghlan tha d’fhacal-sa, agus is ionmhainn led òglach e.

141 Tha mi beag agus suarach; gidheadh cha dìochuimhnich mi do reachdan.

142 Is ceartas sìorraidh do cheartas-sa, agus is fìrinn do lagh.

143 Ghlac teinn agus àmhghar mi, ach is iad d’àitheantan mo thlachd.

144 Mairidh ceartas do theisteis gu bràth; thoir-sa tuigse dhomh, agus bidh mi beò.

KOPH

145 Ghlaodh mi lem uile chridhe; èisd rium, a Thighearna; gleidhidh mi do reachdan.

146 Ghlaodh mi riut; saor mi, agus coimheadaidh mi do theisteis.

147 Thàinig mi ron sgarthanaich, agus dh’èigh mi; as d’fhacal dh’earb mi.

148 Ghabh mo shùilean ro fhairean na h‑oidhche, a‑chum gum beachd-smaoinichinn air d’fhacal.

149 Eisd rim ghuth a rèir do choibhneis gràidh; a Thighearna, a rèir do bhreitheanais beòthaich mi.

150 Thàinig luchd-leanmhainn droch-bheairt am fagas, ach fada bha iad od lagh.

151 Am fagas tha thusa, a Thighearna, agus is fìrinn d’àitheantan uile.

152 O thoiseach b’fhiosrach mi a‑thaobh do theisteas gun do shuidhich thu iad gu bràth.

RESH

153 Amhairc air m’àmhghar, agus teasairg mi, oir cha do dhìochuimhnich mi do lagh.

154 Tagair mo chùis, agus saor mi; a rèir d’fhacail beòthaich mi.

155 Is fada slàinte o dhroch dhaoine, oir chan iarr iad do reachdan.

156 Is lìonmhor do chaomh-thròcairean, a Thighearna; a rèir do bhreitheanas beòthaich mi.

157 Is lìonmhor mo luchd-tòrachd agus m’eascairdean; gidheadh, od theisteis cha do chlaon mise.

158 Chunnaic mi luchd-easaontais, agus bha doilgheas orm, a chionn nach do choimhead iad d’fhacal.

159 Feuch, is ionmhainn leam do reachdan; a Thighearna, a rèir do choibhneis gràidh beòthaich thusa mi.

160 O thoiseach is fìrinn d’fhacal-sa, agus gu bràth mairidh uile bhreitheanais do cheartais.

SCHIN

161 Bha uachdarain an tòir orm gun adhbhar, ach rod fhacal-sa tha eagal air mo chridhe.

162 Tha aiteas orm rid fhacal-sa, mar neach a fhuair creach mhòr.

163 Is fuath leam agus is oillteil leam breug, ach is toigh leam do lagh-sa.

164 Seachd uairean anns an là bheir mi moladh dhut airson breitheanais do cheartais.

165 Is mòr sìth na muinntir a tha a’ toirt gràidh dod lagh, agus chan èirich adhbhar tuislidh dhaibh.

166 Dh’fheith mi rid shlàinte, a Thighearna, agus choilean mi d’àitheantan.

167 Choimhead m’anam do theisteis, agus is ro‑ionmhainn leam iad.

168 Choimhead mi do reachdan agus do theisteis, oir tha mo shlighean uile fad chomhair.

TAU

169 Thigeadh mo ghlaodh am fagas ad làthair, a Thighearna; a rèir do bhriathran thoir tuigse dhomh.

170 Thigeadh m’aslachadh ad làthair; a rèir d’fhacail teasairg mi.

171 Cuiridh mo bhilean an cèill do chliù, nuair a theagaisgeas tu dhomh do reachdan.

172 Aithrisidh mo theanga d’fhacal, oir is ceartas d’àitheantan uile.

173 Cuidichidh do làmh leam, oir roghnaich mi do reachdan.

174 Bha mi an geall air do shlàinte, a Thighearna, agus is e do lagh mo thlachd.

175 Biodh m’anam beò, agus molaidh e thu, agus cuidichidh do bhreitheanais leam.

176 Chaidh mi air seachran mar chaora chaillte; iarr d’òglach, oir cha do dhìochuimhnich mi d’àitheantan.