1 Gun èisdeadh an Tighearna riut ann an là teanntachd! Gun cumadh ainm Dia Iàcoib suas thu!

2 Gun cuireadh e cobhair thugad as a ionad naomh, agus à Sion gun neartaicheadh e thu!

3 Gun cuimhnicheadh e do thabhartasan uile, agus gun gabhadh e gu taitneach uat d’ìobairt-loisgte! Selah.

4 Gun tugadh e dhut a rèir do chridhe fhèin, agus gun coileanadh e do chomhairle uile!

5 Nì sinne aoibhneas ann ad shlàinte, agus ann an ainm ar Dè‑ne togaidh sinn suas ar bratach. Gun coileanadh Dia d’iarrtasan uile!

6 A‑nis tha fhios agam gun saor an Tighearna a aon ungte fhèin; èisdidh e ris o nèamhan a naomhachd, le neart-saoraidh a dheaslàimh.

7 Earbaidh cuid à carbadan, agus cuid à eich, ach cuimhnichidh sinne ainm an Tighearna ar Dia.

8 Dh’ìslicheadh iadsan, agus thuit iad; ach dh’èirich sinne, agus sheas sinn.

9 Saor an rìgh, a Thighearna, agus èisd rinn anns an là anns an gairm sinn.