Salmos 52

Don àrd-fhear-ciùil. Maschil le Daibhidh nuair a thàinig Doeg an t-Edomach agus a dh’innis e do Shaul agus a thubhairt e ris, Thàinig Daibhidh gu taigh Ahimeleich.

1 Carson a nì thu uaill as an olc, O ghaisgich? Mairidh maitheas Dhè a-ghnàth.

2 Dealbhaidh do theanga aimhleas, mar ealtainn ghèir, ag obrachadh ceilge.

3 Is annsa leat an t-olc na am math, a’ bhreug na briathran a’ cheartais. Selah.

4 Is ionmhainn leat gach facal millteach, a theanga chealgach.

5 Uime sin sgriosaidh Dia thu gu bràth; bheir e air falbh thu, agus tàirngidh e as do phàillean thu, agus spìonaidh e do fhreumhan à tìr nam beò. Selah.

6 Agus chì na fìreanan, agus bidh eagal orra, agus nì iad gàire uime, ag ràdh,

7 Feuch, seo am fear nach do rinn a neart de Dhia, ach a dh’earb à pailteas a bheartais, agus a neartaich e fhèin na aingidheachd.

8 Ach bidh mise mar chrann-ola uaine ann an taigh Dhè; earbaidh mi à tròcair Dhè gu saoghal nan saoghal.

9 Molaidh mise thu gu sìorraidh, a chionn gun do rinn thu e; agus feithidh mi air d’ainm-sa, oir tha e math an làthair do naomh.