1 Ɔwi wɔmɔ ame ne, maaka kuka gɔgbe i Yuda karɔ̃ iso:

Boba ɔmagɛ̃siare wɔ mba ɔle;

Ɣaa ɔsu iɖi

ɔbara ala ɔ̃ abere gu ata siare.

2 Busi kuyogodɔ̃

si kaɖe ga nse bɔlɔlɔ si kabo,

kaɖe ga lomɔɛ̃ ɔnukuare kato.

3 Nwɔ losu ɔ̃ iti ɔsia i fɔ iso ne,

asɛ atã wũ isobuɛ wodoroa

alasɔ ɔsu ɔ̃ iti ɔsia-ɔ iso ɔso.

4 Siaiti i Bosate iso kayi daaro,

alasɔ Bosate, aĩ Bosate ne, Itasiare nɛ loase ɔwi biara ɔɖe.

5 Mma nsi i kakɔlɛkɔ̃ ne, ɔsɛ ɔbɔ ma karɔ̃,

ɔsɛ ɔbɔ ɔmagɛ̃siare wɔ lokɔlɛ so karɔ̃,

ɔbibiɛ wũ ɖɛkpɛrɛɛ

ɔfere wũ i karɔ̃ ɔkpese ɔsebu.

6 Ngba aanene wũ iso -

mma mpia i inyɛwe ame ngba,

mawɛrɛba sikpatɔrɛ̃.

7 Maturi bɔlɔlɔa ɔri se ɖɛkpɛrɛɛ;

O, Ɔtɔrɔrɔa, asɛ abara maturi bɔlɔlɔa ɔri sɔlɔsɔlɔ.

8 Aĩ, Bosate bosɛ bosiai fɔ ɔri,

boto bonyɔ-ɔ ɔri;

fɔ iyere gu nwa boanyigi-ɔ ala,

nto bo situ ɔkã ne.

9 Ato akpɛ̃ wũ ɔkala ɔkã ku kasɛ̃;

kaya ne, wũ siwarã to sinyɔ-ɔ ɔri.

Ɔwi wɔ akpadzɛ̃ karɔ̃ kutsue ne,

kayiiso maturi sɛ masuã sibɔlɔlɔ.

10 Atoasɔ asɛ ate matilese nnyainyɔ ne,

maisɛ masuã sibɔlɔlɔ;

i maturi bɔlɔlɔa karɔ̃ iso kɔraa ne, matilese togu ara lalaa ibara,

maisɛ manyɔ Bosate wɔ mba kuwarɛ mapia i kuira ame.

11 O Bosate, fɔ kɔrɔ̃ ɔkɔlɛ kato,

ɣɛɛ maito manya kɔ̃.

Tã manya ɔmɛrɛ̃ wɔ aba i fɔ maturi iso si kunuarɛ si kukpɛ̃ ma;

tã ɔtɔ wɔ aledza asɛ fɔ matsirise si ɔtsuedza ma.

12 Bosate, asɛ isobuɛ atã bo;

irabiara nɛ bobara ne, fɔ lobara atã bo.

13 O Bosate, bo Ɣaa, i fɔ kama ne, makɔse mama ɔɔɖe bo iso,

ɣɛɛ fɔ iyere ɔnɔwɛ̃saã boto bowarɛ.

14 Kiniɔ ne, maɔkpi, masiina ngbã;

makpise mamɔ iisɛ mata.

Akpadzɛ̃ ma kutsue fiɛ awɔra ma;

anukutu irabiara nɛ maanyigi ma ala.

15 Ɔɔmɔdza kaɖe lo, Bosate;

ɔɔmɔdza kaɖe.

Ɔɔfɔ kuwarɛ atã so;

ɔɔbɛdza karɔ̃ ame ɔɖuɖu.

16 Bosate, maba fɔ kɔrɛ i ma imɔrɛ̃ ame;

ku ɔwi wɔ akpadzɛ̃ ma,

mawo kayi ɔkparama i siwɔwɔi ame.

17 Lɛ ɔrɔ̃go wɔ nto kayiri fiɛ ka ɔto ɔba ɔ̃aɣe

sɛ ɔnyɛdɛ̃ so ɔbiɛ i ibo ame ne,

ngbɔ bose i fɔ anɔmi ame ne lo, Bosate.

18 Bola kayiri, bonyɛdɛ̃ so i ibo ame,

ɣɛɛ boɣe ɔwiri.

Boibɔ iɖi botã karɔ̃;

iiɖe bo loɣe kayiiso maturi.

19 Ɣɛɛ mi makpise to maasɛ ngbã;

ma isosina to siata.

Mi ma nsi i ɔsebu ame,

mita si milakulu i isoɣɔ ame.

Ima nɛ nto ipɛ itã mi se lɛ kaya ima;

karɔ̃ to kaaɣe kã makpise.

20 Wũ maturi, mikɛlɛ miabo i mi ayo ame -

si misɛ̃ mi akui;

mikɔla so ɔwi kɛkɛĩ

gbɔgbɔɔgbɔ ɔ̃ sikpã aafe.

21 Nyɔ, Bosate ka ɔbɔrɛ i ɔ̃ kawekɔ̃ ɔba

sɔ ɔ̃akpadzɛ̃ karɔ̃ iso maturi kutsue ala ma akpi ɔso.

Karɔ̃ to kaaɖi ima nɛ mafere i kã iso kaɣɛ;

kaisibakɔla mma maɖoe i kã iso.