1 Mi Ɣaa sɔ,

pia ma kɔrɔ̃ i kayiri, pia wũ maturi kɔrɔ̃ i kayiri.

2 Ɖegu Yerusalem ika ku silɔ ɣɔa,

si aɣere wũ

sɔ ɔ̃ karabara teterea ɔɔba kawirikɔ̃,

sɔ maɔtã ɔ̃ akpi kuso,

sɔ ɔ̃ɔfɔ ɔbɔrɛgu i Bosate kɔrɔ̃ ame

ɔ̃ akpi kuso ikpɛ inyɔ.

3 Ɔwɛ̃ silɔ to sikpere sɔ:

"Miledza

ɔri mitã Bosate i fafuĩ ame.

Mibara ɔri tɔrɔrɔ i igbigbi ame

mibara ɔvurã siare mitã bo Ɣaa.

4 Maayira kagbolomi biara masakara kã,

mibɔ kube gu kabemi biara karɔ̃;

mibara karɔ̃ ga loikote biara ɖɛkpɛrɛɛ,

kakɔi nyanyariã biara aakpese katɛfɛkɔ̃.

5 Fiɛ Bosate ikpawaĩ aate,

maturi awune ɔɖuɖu aanya ne masakanya.

Alasɔ Bosate kanya loɣɛ."

6 Silɔ to siɣɛ sɔ, "Lakulu."

Ne loɣɛ sɔ, "Be si lolakulu loɣɛ?"

"Maturi ɔɖuɖu se lɛ sikua,

fiɛ ma kulɛ ɔɖuɖu se lɛ aɣɔ̃la i aputu ame.

7 Sikua sɛ siɣɔ ne aɣɔ̃la sɛ akpa,

alasɔ Bosate sɛ ɔwarã ifuri i sɛ̃ iso.

Gbaã ne, maturi ɖe sikua.

8 Sikua sɛ siɣɔ ne aɣɔ̃la sɛ akpa,

ɣɛɛ Ɣaa itɔ̃me ɣɛ kayi daaro."

9 Mi ma lobɔ itɔ̃me bielea Zion,

mikɛlɛ kube kɔlɛa iso.

Mi ma lobɔ itɔ̃me bielea Yerusalem,

mikɔlɛ silɔ kato ku ɔle milakulu,

mikɔlɛ silɔ kato midaanigã;

miɣere Yuda simagɛ̃ sɔ,

"Nya mi Ɣaa i ngbe!"

10 Minyɔ, Bosate Wɔ Nsiguso to ɔba ku ɔle,

fiɛ ɔ̃ kɔrɔ̃ to kuɖeiso kutã wũ.

Minyɔ, ɔ̃ kuso pia i ɔ̃ kɔrɛ,

fiɛ ɔ̃ karatã ga ɔba ɔtã ɔ̃ maturi siai wũ.

11 Ɔsɛ ɔnyɔ ɔ̃ masɛrɛ ikuri lɛ masɛrɛnyɔisose:

Ɔsɛ ɔsa ɔ̃ asɛrɛbi kanya i nrɔɔ̃ ame

ɔla ma ɔboregu ɔbo ɔ̃ ɔtu;

ɔsɛ ɔkɔ mma nsɛgu abi pɔkɔsɔɔ.

12 Nna loɔko ndu ala ɔ̃ karɔ̃tata,

ɣee ɔsu ɔ̃ kɔrɔ̃ ɔsusu ala kuɖokpo?

Nna loɔla karɔ̃ ɔsebu i kasɛsɛi ame

ɣee ɔkere abe i ikerera iso

gu kubemi i ikerera iso?

13 Nna nɣe Bosate adzuni,

ɣee nna nsɛ ɔte Bosate ara lɛ ɔ̃ adzunitãse?

14 Nna i Bosate ɔkarɛ sɔ ɔte wũ ara,

nna lote wũ ɔri sɛɛ?

Nna lote wũ inɔkpa

ɣee nna lote wũ karɔ̃inɔ ɔri?

15 Gbaã ne, nɖebi se lɛ itui i itupiebui ame;

mase lɛ ɔsebu i ikerera iso;

ɔsɛ ɔkere ndukilɔnrɔ̃ lɛ ɔsebu kere ɔɖe.

16 Lebanon adziri iisi atã isɔrɛkasege iso ɔtɔ,

ɣee ɔ̃ mabɔi iisi matã araifɛ̃ asɔrɛ.

17 Nɖebi ɔɖuɖu iire kuira i ɔ̃ katɔ̃;

mana kusia i ɔ̃ katɔ̃

fiɛ maibo kuira.

18 Ne ɔso nna aasu Ɣaa akateragu?

Mme kumiamia aasu wũ akateragu?

19 Kumiamia ne, kusɛ̃ ɔturi kere lopɔ kɔ̃

fiɛ sikãrɛtɛa kusɛ̃ɖidze ɔfere kɔ̃ sikãrɛtɛa iso

fiɛ ɔbara sikãfudza ngɔsɔngɔsɔn ɔtã kɔ̃.

20 Nwɔ nɖe wɛrɛba fiɛ ɔna asɔrɛ wagbe ɔ̃atã ne,

ɔsɛ ɔbie kudziri gɔ loibaburi.

Ɔ̃abie nwɔ mba kusɛ̃

si ɔɣedza kumiamia gɔ loibaturi.

21 Miiɣe?

Miinɔ?

Maiɣere mi ita i karɔ̃kasɛkɔ̃?

Miinɔ karɔ̃ ita i ɔwi wɔ i kayi ɔsɛ karɔ̃?

22 Ɔ̃ nsi i kayi ɔgba iti,

fiɛ kã maturi se lɛ mafiɛ.

Ɔka kuɖokpo lɛ ikatigbɔdɔ,

fiɛ ɔwarɛ ne lɛ ikpayo nɛ ame masɛ masɛ.

23 Ɔsɛ ɔtã maturi nyaa ɔkpese kuturipɛ̃mi

ɔkpesera kayi gagbe atakere kuturisasoi.

24 Si maato ma,

si maapɛ ma

si ma siɖu aabo karɔ̃,

ɔsɛ ɔfuri ma ɔwiri maɣɔ,

kagbadadururu ɔfuri ma karuigu lɛ sirɔ̃.

25 "Nna miasu me mikategu?"

Ɔsekelea sɔ, "Nna nɖe wũ isɛ?"

26 Kɔlɛ anɔ si anyɔ kuɖokpo:

Nna lobara nwagbe ɔɖuɖu?

Ɔsɛ ɔɖi awãmi ɔbɔ iwɛ̃ iwɛ̃,

ɔsɛ ɔkpere ibiara ne iyere.

Ɔ̃ kuwarɛ siare gu ɔle siare ɔso ne,

wã kuiwɛ̃ iiyu.

27 O Yakob, be ɔso ato aɣɛ,

fiɛ O Israel, be ɔso ato aɖe aka sɔ,

Bosate iiɣe wũ ɔri;

Ɣaa iisɛ ɔnyɔ wũ atɔ̃me kukaakɔ"?

28 Miiɣe?

Miinɔ?

Bosate nɖe Ɣaa ɔwi daaro,

nwɔ lobara kayiiso kawirikɔ̃.

Iisɛ iɖa wũ fiɛ nrɔɔ̃ iisɛ mifɛ̃ wũ,

fiɛ kuwɛ̃ iibanɔ wũ karɔ̃.

29 Ɔsɛ ɔpia mma loɔfɛ̃ ɔle

ɔtã mma nse nyɔkɔtɔ̃ ɔle ɔsi ɔbua.

30 Ɔle sɛ ɔro ta makoso mafɛ̃

fiɛ maporoporoi sɛ matura marɔ̃

31 ɣɛɛ mma nsɛ manyɔ Bosate ɔri

aapia so ɔle ɣɛtɛ

maawarɛ abue mafɛrɛrɛ dzoroo lɛ finikpo;

maatere iibaɖa ma,

maasɛ, ɔle iibaro ma.