1 Ikɔ nɛ i Igara Uziya ɔkpi ne, lonya Bosate wɔ nsi i Sigaraiyara kɔlɛa siare iso. Ɔ̃ awu kutsueti ɔyi isɔrɛyo. 2 Ma Serafi ma ɔbiara ku abue akuɔ akuɔ ɔya wũ i sitikpe. Masu abue anyɔ mafu so i katɔ̃, wã anyɔ ana masu mafu so i ngba, fiɛ masu wã anyɔ ana mato mafɛrɛrɛ ala. 3 Mato malakulu maɣere so sɔ;

"Sekelee, sekelee, sekelee nɖe Bosate Ɔlesate

Karɔ̃ ɔɖuɖu ɔyigu ɔ̃ ikpawaĩ."

4 Ma silɔ kulu ɔtã sɔ mafaramuti gu kayogodɔ̃ ɔti, fiɛ kuyɔ ɔyi isɔrɛyo.

5 Ne lofã teteree sɔ, "Ndzo mitã me lo! Lowɔ lo! Alasɔ wũ sinyako iisekele, mma ndɛ̃ lopia ana sinyako iisekele, fiɛ wũ anɔ ɔɔnya Igara wɔ nɖe Bosate Ɔlesate."

6 Kere ne Serafi ɔwɛ̃ ɔfɛrɛrɛ ɔba i wũ kɔrɛ, ɔɖi ikaĩ nɛ mba ɔtɔ ala kadzomaĩ i isɔrɛkasege iso ɔto. 7 Ɔsu ne ɔpɛgu me kanya ɔɣɛ sɔ, "Nyɔ, nnɛgbe ɔɔpɛgu-ɔ sinyako, ne ɔso maɔfore fɔ ikpi maɖi-ɔ iso, maɔtã fɔ akpi kuso."

8 Kere ne lonɔ Bosate silɔ ɔto ɔkarɛ sɔ, "Nna loapia katɔ̃me fiɛ nna loasɛ katɔ̃me ɔtã bo?"

Ne loɣɛ sɔ, "Nya mme i ngbe, pia me!"

9 Ne ɔɣere me sɔ, "Kɛlɛ aaɣere kaɖe gagbe sɔ,

" 'Mila miɔnɔ ɣɛɛ midaanɔkarɔ̃,

mila miɔnya, ɣɛɛ midaanya miɖiite.'

10 Bara mmagbe situ gbogboroo

si abara ma atsue si awe ɔle,

si abiɛ ma anɔmi.

Si iiɖe ngbɔ maanya ara ala ma anɔ,

manɔ ara ala atsue

fiɛ ma situ aanɔ ara karɔ̃

fiɛ maapɛ mafiriki maba i wũ kɔrɛ mana isosarɛ."

11 Kere ne lokarɛ sɔ, "Bosate, isɛ iabo ku mme ɔwi?"

Ne ɔtã me mmuai sɔ:

"Gbɔgbɔɔgbɔ simagɛ̃siare dzɛgbe ɔbibiɛ

sɔ kuwɛ̃ siina i sɛ̃ ame,

gbɔgbɔɔgbɔ mabɔrɛ manyua ma ayo masɛ

ma kukpɛkɔ̃ ɔkpese aputuku,

12 gbɔgbɔɔgbɔ Bosate ɔsa ma ɔɖuɖu ɔsese dzoroo

manyua karɔ̃ masɛ kakunu.

13 Si maturi ɔɖuɖu ikaweova pɛ lokuti i karɔ̃ iso kɔraa ne,

karɔ̃ to kaase kakunu ana.

Ɣɛɛ lɛ kumɛgɔ si maɖaɛ ɔɖum ɣee ipundu

fiɛ manyua idzirikui maɣedza ne,

ngbɔ i maturi sekelea aase lɛ adzirikui i karɔ̃ ame ne."