1 ମ୍ୱାର୍ ମୁଆଁ ଇଡ଼ିଙ୍ଗ୍ ଫାରୋ ମୁଇଂ ମୁସୁଡ଼ିଙ୍ଗ୍‌ କେକେ । ମେଁ ମୁସୁଡ଼ିଙ୍ଗ୍‌ନ୍ୟା କେକେ ଜେ ନିଲ ଲଣ୍ଡିଆ ଆଡ଼ାଃ ତୁଆଁ ଲେଃକେ । 2 ଆତେନ୍‌ ମୁସୁଡ଼ିଙ୍ଗ୍‌ନ୍ୟା ତ୍ମାକ୍ଲିଗ୍‌ ଅରେଃ କେଣ୍ଡିଆ ବିତ୍ରେବାନ୍‌ ତାର୍‌ଆର୍କେ ବାରି ଆତ୍‌ଡାଗ୍ରା ଚେଃମୁଆଁ ଚଙ୍ଗ୍‌ନେ ମୁଲେଆର୍‌କେ । ମେଇଂ କେନ୍‌ସା ଜାବର୍‌ ଗାଗ୍‌ଡ଼େ ଲେଃଆର୍‌ଗେ ବାରି ସୁନ୍ଦର୍‌ ଲେଃଆର୍‌ଗେ । 3 ବାରି ତ୍ମାକ୍ଲିଗ୍‌ ରୁଗଚ୍ୟାକ୍ନେ ଆରି ରଗ୍‌ ସାଃକ୍ନେ ଅରେଃ କେଣ୍ଡିଆ ବିତ୍ରେବାନ୍‌ ତାର୍‌ଆର୍କେ । ବାରି କେଣ୍ଡିଆବାନ୍‌ ଆତେନ୍‌ ଗାଗ୍‌ଡ଼େକ୍ନେ ଅରେଃଇଂନେ ଏତେ ତୁଆଁଆର୍କେ । 4 ଆତେନ୍‌ ତ୍ମାକ୍ଲିଗ୍‌ ରୁଗଚ୍ୟା ବାରି ରଗ୍‌ ସାଃକ୍ନେ ଅରେଃଇଙ୍ଗ୍‌ ଆତେନ୍‌ ତ୍ମାକ୍ଲିଗ୍‌ ଗାଗ୍‌ଡ଼େକ୍ନେ ଅରେଃକେ ଚଙ୍ଗ୍‌ବିଃଆର୍କେ । ଆତେନ୍‌ ବେଲା ଫାରୋ ଲେମୁଁଆଃବାନ୍‌ ତଡ଼୍ୟାକେ । 5 ଫାରୋ ବାର୍‌ମୁଇଂତର୍‌ ଡୁଲେଗ୍‌ଚେ ବାରି ମୁସୁଡ଼ିଙ୍ଗ୍‌ କେକେ । ମୁଇଂ ଶଣ୍ଡାନ୍ୟା ତ୍ମାକ୍ଲିଗ୍‌ ଗାଗ୍‌ଡ଼େକ୍ନେ ବାରି ନିମାଣ୍ଡା କେଡ଼୍‌ ତାର୍‌କେ । 6 ମେଇଂନେ ଇଡ଼ିଙ୍ଗ୍‌, ତ୍ମାକ୍ଲିଗ୍‌ କିଆନେ ବାଃଆ ତାର୍‌କେ । ମାତର୍‌ ଏନ୍‌ ଦଦ୍ୟା ଲେଃଗେ ବାରି ପୁର୍ବ ୱେଡ଼୍ୟା ବାନ୍‌ ନ୍‌ସୁଆର୍‌ ୱେକ୍ନେ ରକମ୍‌ ତ୍ନା ଡିଂଗେ । 7 ବାରି ଆତେନ୍‌ ତ୍ମାକ୍ଲିଗ୍‌ ଗାଗ୍‌ଡ଼େକ୍ନେ କେଡ଼୍‌କେ ଏନ୍‌ ତ୍ମାକ୍ଲିଗ୍‌ ରୁଗଚ୍ୟା କେଡ଼୍‌କେ କ୍ଲୁଗ୍‌ ବିକେ । ଏନ୍‌ ବେଲା ଫାରୋନେ ଲେମୁଁଆଃବାନ୍‌ ତଡ଼୍ୟାଲା, ମୁସୁଡ଼ିଙ୍ଗ୍‌ ମାତର୍‌ ବୁଦି ଡିଙ୍ଗ୍‌କେ । 8 ଏନ୍‌ ଇଡ଼ିଙ୍ଗ୍‌ ଞ୍ଜିର୍‌ନୁଗ୍‌ ମେଁନେ ମନ୍‌ ତେରେପେତେ ଡିଙ୍ଗ୍‌କେ । ତେସା ମେଁ ରେମୁଆଁ ବେଚେ ମିସର୍‌ ଦେସ୍‌ନେ ସାପା ଡିସାରି ବାରି ପଣ୍ଡିତ୍‌ରେକେ ୱାକେ । ମାତର୍‌ ଫାରୋ ମେଇଂନେ ଡାଗ୍ରା ନିଜର୍‌ ମୁସୁଡ଼ିଙ୍ଗ୍‌ ସାମୁଆଁ ବାସଙ୍ଗ୍‌ଲା, ମେଇଂନେ ବିତ୍ରେ ଜା ଡିଗ୍‌ ମୁସୁଡ଼ିଙ୍ଗ୍‌ନେ ଅରତ୍‌ ବାଲିର୍‌ ଆୟାଆର୍କେ ଣ୍ଡୁ ।

9 ଆତେନ୍‌ ବେଲା ମ୍ନା ଉଗ୍‌ନେ ମୁତା ଡୁଙ୍ଗ୍‌ଣ୍ଡ୍ରେ ଗୁଆରେକେ, ମେଁ ବାଲିର୍‌କେ, "ନେଙ୍ଗ୍‌ ଏଃକେ ମନେ ତ୍ଲାଗ୍‌ଣ୍ଡିଂ, ମୁଇଂ ପାପ୍‌ କାମ୍‌ ନେଙ୍ଗ୍‌ ଡିଙ୍ଗ୍‌ମ୍ୱକେ ।" 10 ନାଁ ନେଙ୍ଗ୍‌ ଆଡ଼ାତ୍ରା ବାରି ନାଁ ଚାକର୍‌ ମ୍ନାଃ ରାନ୍ଦାରି ଆଡ଼ାତ୍ରା ରିସା ଡିଙ୍ଗ୍‌ଚେ ଆନେକେ ଜେଲ୍‌ଡୁଆନ୍ୟା ବନ୍ଦି ଆଃଡିଂନାବକେ । 11 ଏନ୍‌ ଇଡ଼ିଙ୍ଗ୍‌ ଆତେନ୍‌ ମିଡିଗ୍‌ ନେ ମ୍ୱାୟା ମୁଇଂ ମୁଇଂ ମୁସୁଡ଼ିଙ୍ଗ୍‌ ନେକେକେ ବାରି ମ୍ୱାୟାନେ ମୁସୁଡ଼ିଙ୍ଗ୍‌ନେ ଅରତ୍‌ ମ୍ବାର୍‌ ରକମ୍‌ ଲେଃଗେ । 12 ଆତ୍‌ଡାଗ୍ରା ମୁଇଂ ଏବ୍ରୀୟ ରେମୁଆଁ ଜାଣ୍ଡେ କି ନେ ଏତେ ବନ୍ଦି ଡୁଆନ୍ୟା ଲେଃଗେ । ମେଁ ଡିଂଡିଙ୍ଗ୍‌କେ, ଉର୍‌ସାଙ୍ଗ୍‌ ସନ୍ୟଇଙ୍ଗ୍‌ନେ ଚାକର୍‌ । ନେ ନେନେ ମୁସୁଡ଼ିଙ୍ଗ୍ ବିସଏରେ ନେବାଲିର୍‌କେ । ବାରି ମେଁ ଆନେକେ ସାପା ବୁଜେ ବିଃକେ । ମେଁ ଆନେକେ ମ୍ୱାୟାନେ ମୁସୁଡ଼ିଙ୍ଗ୍‌ ବିସଏରେ ବୁଜେ ବିଃକେ । 13 ମେଁ ଆନେକେ ମେଃନି ସାପା ବାସଙ୍ଗ୍‌ବଗେ, ଆତେନ୍‌ ସାପା ସତ୍‌ ଡିଙ୍ଗ୍‌କେ । ମେଁ ବାସଙ୍ଗ୍‌ବଗେ, ନେଙ୍ଗ୍‌ ମୁକ୍ତି ଡିଙ୍ଗ୍‌ଚେ ନେଙ୍ଗ୍‌ନେ କାମ୍‌ନ୍ନିଆ କାମ୍‌ ଣ୍ଡିଙ୍ଗ୍‌ଏ । ବାରି ଦେତ୍‌ରକମ୍‌ ଡିଙ୍ଗ୍‌କେ । ମେଁ ବାସଙ୍ଗ୍‌ବଗେ, "ସୂପକାର ନାଗୁଏଃଏ; ମେଁ ଡିଗ୍‌ ଗୁଏଃକେ ।"

14 ଆତେନ୍‌ ବେଲା ଫାରୋ ଯୋଷେଫକେ ୱାଉଙ୍ଗ୍‌ ବେକେ । ରେମୁଆଁଇଂ ଜେଲ୍‌ ଡୁଆବାନ୍‌ ଆମେକେ ଦାପ୍ରେ ରାଙ୍ଗ୍‌ପାଙ୍ଗ୍‌ଆର୍କେ । ମେଁ କ୍ଷୌର କାମ୍‌ ଡିଙ୍ଗ୍‌ଚେ ବାରି ନିମାଣ୍ଡା ସକା ସଃଚେ ଫାରୋନେ ଡାଗ୍ରା ପାଙ୍ଗ୍‌କେ । 15 ଆତ୍‌ବା ଫାରୋ ଯୋଷେଫକେ ବାସଙ୍ଗ୍‌କେ, ନେଙ୍ଗ୍‌ ମୁଇଂ ମୁସୁଡ଼ିଙ୍ଗ୍‌ କେନ୍‌ଲେଃକେ । ଜାଣ୍ଡେ ଆତେନ୍‌ ଅରତ୍‌ ବାଲିର୍‌ ଆୟାଆର୍କେ ଣ୍ଡୁ । ମାତର୍‌ ନେଙ୍ଗ୍‌ ନାଁ ବିସଏରେ ଦ୍ରିଗ୍‌ ନ୍‌ଲେଃଗେ । ନାଁ ମୁସୁଡ଼ିଙ୍ଗ୍‌ ନାଅଁଲା, ଆତେନ୍‌ ଅରତ୍‌ ବାସଙ୍ଗ୍‌ ନାୟାଏ । 16 ଯୋଷେଫ ଉତର୍‌ ବିକେ, "ନେଙ୍ଗ୍‌ ନ୍ନାୟା ଣ୍ଡୁ । ମାତର୍‌ ପର୍‌ମେସର୍‌ ଫାରୋକେ ଏନ୍‌ ଅରତ୍‌ ନିମାଣ୍ଡାଃ ବିଃଏ ।"

17 ଏନ୍‌ ଇଡ଼ିଙ୍ଗ୍‌ ଫାରୋ ଯୋଷେଫକେ ବାସଙ୍ଗ୍‌କେ, "ନେଙ୍ଗ୍‌ ମୁସୁଡ଼ିଙ୍ଗ୍‌ ଙ୍କେକେ, କେଣ୍ଡିଆ ଆଡ଼ାଃ ତୁଆଁ ନ୍‌ଲେଃଗେ । 18 ଆତ୍‌ବା ତ୍ମାକ୍ଲିଗ୍‌ ଅରେଃ କେଣ୍ଡିଆ ବିତ୍ରେବାନ୍‌ ତାର୍‌ଆର୍କେ ବାରି ଚେଃମୁଆଁ ଚଙ୍ଗ୍‌ଆର୍କେ । ମେଇଂ କେନ୍‌ସା ମଟାସଟା ବାରି ସୁନ୍ଦର୍‌ ଲେଃଆର୍‌ଗେ । 19 ଏନ୍‌ ଇଡ଼ିଙ୍ଗ୍‌ ନେଙ୍ଗ୍‌ ଙ୍କେକେ ବାରି ତ୍ମାକ୍ଲିଗ୍‌ ରୁଗଚ୍ୟା, ରଗ୍‌ ସାଃକ୍ନେ ବାରି ଣ୍ଡ୍ରେଂଗା ତ୍ନାଡିଙ୍ଗ୍‌କ୍ନେ ଅରେଃଇଙ୍ଗ୍‌ କେଣ୍ଡିଆ ବିତ୍ରେବାନ୍‌ ତାର୍‌ଆର୍କେ, ଆଣ୍ଡି ଆଣ୍ଡିନେ ରୁଗଚ୍ୟା ବାରି ରଗ୍‌ ସାଃକ୍ନେ ରକମ୍‌ ତ୍ନା ଡିଙ୍ଗ୍‌ଆର୍‌ଗେ । ମେଇଂନେ ରକମ୍‌ ଣ୍ଡ୍ରେଂଗା ଅରେଃ ନେଙ୍ଗ୍‌ ମିସର୍‌ନ୍ୟା ଅଃନା ନେଙ୍ଗ୍‌ ନ୍ନାକେକେ ଣ୍ଡୁ । 20 ଏନ୍‌ ଇଡ଼ିଙ୍ଗ୍‌ ଆତେନ୍‌ ରୁଗଚ୍ୟା ଣ୍ଡ୍ରେଂଗା ଅରେଃଇଙ୍ଗ୍‌ ଆତେନ୍‌ ମଟାସଟା ଅରେଃଇଙ୍ଗ୍‌କେ ଚଙ୍ଗ୍‌ ବିଃଆର୍କେ । 21 ମାତର୍‌ ମେଇଂ ଦେତ୍‌ରକମ୍‌ ରୁଗଚ୍ୟା ବାରି ଣ୍ଡ୍ରେଂଗା ତ୍ନା ଡିଂଆର୍‌ଗେ । ମେଇଂ ଚଙ୍ଗ୍‌ ଆଃଡାକ୍ନେ ଇଡ଼ିଙ୍ଗ୍ ଆଚଙ୍ଗ୍‌କେ ରକମ୍‌ ତ୍ନା ଡିଙ୍ଗ୍‌ଆର୍‌ଗେ । ଏନ୍‌ବେଲା ନେଙ୍ଗ୍‌ନେ ଲେମୁଁଆଃ ବାଙ୍ଗେ ୱେକେ । 22 ବାର୍‌ମୁଇଂତର୍‌ ନେଙ୍ଗ୍‌ ମୁସୁଡ଼ିଙ୍ଗ୍‌ ଙ୍କେକେ, ମୁଇଂ ଶଣ୍ଡାନ୍ୟା ତ୍ମାକ୍ଲିଗ୍‌ ବାରି ନିମାଣ୍ଡା କେଡ଼୍‌ ତାର୍‌କେ । 23 ଏନ୍‌ ଇଡ଼ିଙ୍ଗ୍‌ ତ୍ମାକ୍ଲିଗ୍‌ ବାଆଃ ତାର୍‌ଚେ କେଡ଼୍‌ ତିଆର୍‌ ଡିଙ୍ଗ୍‌କେ । ମାତର୍‌ ଆତେନ୍‌ଇଂ ଦଦ୍ୟା ରକମ୍‌ ୱେଡ଼୍ୟାନ୍ୟା ନ୍‌ସୁଆର୍‌ ୱେକେ ରକମ୍‌ ତ୍ନାଡିଂଗେ । 24 ବାରି ଆତେନ୍‌ ଦଦ୍ୟା କେଡ଼୍‌ଇଙ୍ଗ୍‌ ନିମାଣ୍ଡା ତ୍ମାକ୍ଲିଗ୍‌ କେଡ଼୍‌କେ କ୍ଲୁଗ୍‌ ବିକେ । ଏନ୍‌ ମୁସୁଡ଼ିଙ୍ଗ୍‌ ନେଙ୍ଗ୍‌ ନେଙ୍ଗ୍‌ନେ ଡିସାରିକେ ମ୍ୱାସଙ୍ଗ୍‌କେ, ଜାଡିଗ୍‌ ଏନ୍‌ ଅରତ୍‌ ଆନିଂକେ ବାସଙ୍ଗ୍‌ ଆୟାକେ ଣ୍ଡୁ ।"

25 ତେଲା ଯୋଷେଫ ଫାରୋକେ ବାସଙ୍ଗ୍‌କେ, "ଆତେନ୍‌ ମ୍ୱାକ୍ଲିଗ୍‌ ମୁସୁଡ଼ିଙ୍ଗ୍‌ ମୁଇଂ ରକମ୍‌ । ମେଃନି ଦାପ୍ରେ ଗଟେନେ ୱେଡିଙ୍ଗ୍‌କେ, ଆତେନ୍‌ ପର୍‌ମେସର୍‌ ଆନାକେ ବାସଙ୍ଗ୍‌ଡିଂକେ । 26 ଆତେନ୍‌ ତ୍ମାକ୍ଲିଗ୍‌ ନିମାଣ୍ଡା ଅରେଃ ଗୁ ମୁଆଁ ରକମ୍‌, ବାରି ଆତେନ୍‌ ତ୍ମାକ୍ଲିଗ୍‌ ନିମାଣ୍ଡା କେଡ଼୍‌ ଡିଗ୍‌ ଗୁ ମୁଆଁ ରକମ୍‌, ମ୍ୱାକ୍ଲିଗ୍‌ ମୁସୁଡ଼ିଙ୍ଗ୍‌ ମୁଇଂ ରକମ୍‌ । 27 ବାରି ଆତେନ୍‌ ତ୍ମାକ୍ଲିଗ୍‌ ରୁଗଚ୍ୟା ଅରେଃ ବାରି ଆତେନ୍‌ ଅରେଃ ଗୁ ମୁଆଁ ରକମ୍‌ । ବାରି ୱେଡ଼୍ୟାନ୍ୟା ନ୍‌ସୁଆର୍‌କ୍ନେ ତ୍ମାକ୍ଲିଗ୍‌ କେଡ଼୍‌ ଡିଗ୍‌ ମୁର୍‌ଡି ଡିଂନେ ଗୁ ମୁଆଁ ରକମ୍‌ । 28 ପର୍‌ମେସର୍‌ ମେଃନି ଡିଙ୍ଗ୍‌ନ୍‌ସା ଚାଏଁ ଡିଙ୍ଗ୍‌କେ, ଆତେନ୍‌ ଫାରୋକେ ଆଃସୁଏ ବକେ । 29 କେଲାପା, ସାପା ମିସର୍‌ ଦେସ୍‌ନ୍ୟା ଗୁ ମୁଆଁ ନିମାଣ୍ଡା ଦିନ୍‌ ପାଙ୍ଗ୍‌ଡିଙ୍ଗ୍‌କେ । 30 ମାତର୍‌ ଏନ୍‌ ଇଡ଼ିଙ୍ଗ୍‌ ଗୁ ମୁଆଁ ମୁର୍‌ଡି ଡିଙ୍ଗ୍‌ଏ । ଆକେନ୍‌ ସାପା ନିମାଣ୍ଡା ଦିନ୍‌ ମିସର୍‌ ଦେସ୍‌ବାନ୍‌ ଲପ୍‌ ଡିଂୱେଏ । ମୁର୍‌ଡି ଡିଂଚେ ଦେସ୍‌କେ ଦଂସ ଆଃଡିବିଏ । 31 ରେମୁଆଁଇଂ ଆବଃ ବିଆର୍‌ଏ, ମେଃନି ଏନ୍‌ ସେନୁଗ୍‌ ମିସର୍‌ନ୍ୟା ଜାବର୍‌ ବିକ୍ୟା ଲେଃଗେ । ଜାବର୍‌ ବାବ୍‌ରେ କାଦି ମିଲେ ଡିଂକେ ଡାଗ୍‌ଚେ । 32 ଫାରୋ ନାଁ ମୁଇଂ ରକମ୍‌ ମ୍ୱାକ୍ଲିଗ୍‌ ମୁସୁଡ଼ିଙ୍ଗ୍‌ କେନେ କାରନ୍‌ ମେଁ ମ୍ୟାଃ ଆଲେଃଗେ ? ପର୍‌ମେସର୍‌ ଆଃସୁଏ ନ୍‌ସା ଚାଏଁଡିଙ୍ଗ୍‌କେ ଜେ, ଆତେନ୍‌ ଦାପ୍ରେ ଗଟେନ୍‌ସା ୱେଡିଙ୍ଗ୍‌କେ । 33 ଆତେନ୍‌ ନ୍‌ସା ଫାରୋ ମୁଇଂ ବୁଦିମାନ୍‌ ଜ୍ଞାନି ରେମୁଆଁକେ ମିସର୍‌ନେ ଦାଇତ୍‌ ବିଃନ୍‌ସା ମନ୍‌ ଡିଙ୍ଗ୍‌ଲେଃଗେ । 34 ଫାରୋ ଏନ୍‌ ଡିଙ୍ଗ୍‌ଲେ, ବାରି ଦେସ୍‌ନ୍ୟା ନିମାଣ୍ଡା ରେମୁଆଁକେ ସ୍ରିଚେ ଗୁ ମୁଆଁ ଜାବର୍‌ ବିକ୍ୟା ବେଲା ମିସର୍‌ ଦେସ୍‌ନ୍ୟା କାଦି ମାଲ୍‌ ବାଗ୍‌ ରାଃସିଂବଲେଃ । 35 ଡାଗ୍‌ଲା, ମେଇଂ ଆତେନ୍ ଇଡ଼ିଂଡେ ନିମାଣ୍ଡାଃ ମୁଆଁନେ ସାପା କାଦି ରାଃସିଙ୍ଗ୍‌ଆର୍‌ଲେଃ, ବାରି ସାପା ଇନିଅରିଆ କାଦି ନ୍‌ସାଃ ଫାରୋନେ ନ୍ତିଅରିଆ କିଆଉଁଆଃ ରାଃସିଙ୍ଗ୍‌ଚେଃ ରକ୍ୟା ଡିଂଆର୍‌ଲେଃ । 36 ମୁର୍‌ଡି ଡିଂନେ ଗୁ ମୁଆଁ ବେଲା ସାପା ମିସର୍‌ନ୍ୟା ପେ ବଲେ ବିଃପେୟାଏ । ତେସା ମିସର୍‌ ଦେସ୍‌ ମୁର୍‌ଡି ଡିଂକ୍ନେ ବାନ୍‌ ଦଂଶ ଆଡିଙ୍ଗ୍‌ ଣ୍ଡୁ ।"

37 ଆତେନ୍‌ ବେଲା ଇଃସାଙ୍ଗ୍‌ ଫାରୋ ବାରି ମେଁନେ ଚାକର୍‌ଇଂନେ ମ୍ମୁଆଃନ୍ୟା ଏନ୍‌ ନିମାଣ୍ଡା ତ୍ନାକେ । 38 ଆତ୍‌ବା ଫାରୋ ନିଜର୍‌ ଚାକର୍‌ଇଂକେ ବାଲିର୍‌କେ, "ନେ ଆରି ଦେକ୍‌ରକମ୍‌ ରେମୁଆଁ ବା ନେୟା ଣ୍ଡୁ ? କ୍ମେ ଡାଗ୍ରା ପର୍‌ମେସର୍‌ନେ ଆତ୍ମା ଲେଃକେ ।" 39 ଆତ୍‌ବା ଫାରୋ ଯୋଷେଫକେ ବାସଙ୍ଗ୍‌କେ, "ପର୍‌ମେସର୍‌ ଆନାକେ ଏନ୍‌ସାପା ବାସଙ୍ଗ୍‌ବକେ, ଏନ୍‌ସା ନାଁ ରକମ୍‌ ବୁଦି ରେମୁଆଁ ଆରି ଗିଆନ୍ ରେମୁଆଁ ରକମ୍‌ ଜାଡିଗ୍‌ ଣ୍ଡୁ । 40 ନେଙ୍ଗ୍‌ ନେଙ୍ଗ୍‌ନେ ଦେସ୍‌ନେ ଦାଇତ୍‌ ଆନାକେ ମ୍ୱିଏ, ବାରି ସାପା ରେମୁଆଁ ନାଁନେ ଆଦେସ୍‌ ମାନେଆର୍‌ଏ । ମାତର୍‌ ସିଂଆଁସନ୍‌ବାନ୍‌ ନେ ନାଁବାନ୍‌ ମ୍ନା ଡିଂଚେ ନ୍ଲେଏ ।" 41 ଫାରୋ ଯୋଷେଫକେ ବାସଙ୍ଗ୍‌କେ, "ନେଙ୍ଗ୍‌ ଆନାକେ ସାପା ମିସର୍‌ ଦେସ୍‌ ଆଡ଼ାତ୍ରା ସାସନ୍‌ ଡିଂନ୍‌ସା ନେବାଚେକେ ।" 42 ଏନ୍‌ଇଡ଼ିଙ୍ଗ୍‌ ଆମେକେ ମୁଇଂ ୱାର୍‌ତି ବିକେ । ଆମେକେ ତୁଲୁଏ ସୁତାନେ ପାଟାଇ ଆଃସକେ, ମେଁନେ ଲୁଗଃନ୍ୟା ସୁନାନେ ସର୍‌ସ୍ୟା ଆଃତଗକେ । 43 ଫାରୋ ଯୋଷେଫକେ ନିଜର୍‌ ଦୁତିୟ ରତ୍‌ନ୍ୟା ଆଃକକେ । ବାରି ରେମୁଆଁଇଂ ମେଁନେ ସେନୁଗ୍‌ ସେନୁଗ୍‌, "ଯୋଷେଫକେ ସାର୍‌ଲପା" ଡାଗ୍‌ଚେ ଫାରୋ ରେମୁଆଁଇଂକେ ବାସଙ୍ଗ୍‌କେ । ତେସା ଯୋଷେଫ ସାପା ମିସର୍‌ ଦେସ୍‌ନ୍ୟା ମ୍ନା ବାବ୍‌ରେ ଦାଇତ୍‌ ବାକେ । 44 ଫାରୋ ଯୋଷେଫକେ ବାସଙ୍ଗ୍‌କେ, "ନେଙ୍ଗ୍‌ ଫାରୋ ମାତର୍‌ ନାଁ ଆଦେସ୍‌ ନାଡିଙ୍ଗ୍‌ଲା, ମିସର୍‌ନ୍ୟା ଜାଣ୍ଡେ ମେଃଡିଗ୍‌ ଡିଙ୍ଗ୍‌ ଆୟାଆର୍‌ ଣ୍ଡୁ ।"

45 ଫାରୋ ଯୋଷେଫକେ ମୁଇଂ ବିନ୍‌ନେ ମ୍ନିରେ ମ୍ନି ୱାକେ, "ସାଫନତ୍‌-ପାନେହ ।" ଫାରୋ ଯୋଷେଫକେ ଓନ୍‌ ଇନି ବାସାକ୍ନେ ପୋଟୀଫେର ମ୍ନିକ୍ନେ ପୁଜାରିନେ ଆସନତ୍‌ ମ୍ନିକ୍ନେ ସେଲା ଏତେ ବିହେ ଆଃଡିଙ୍ଗ୍‌କେ । ଆରି ଯୋଷେଫ ସାପା ମିସର୍‌ ଦେସ୍‌ଅରିଆ ଅଲେଙ୍ଗ୍‌ନେ ମୁଲେକେ । 46 ଯୋଷେଫ ତିରିସ୍‌ ମୁଆଁ‌ ବଏସ୍‌ରେ ମିସର୍‌ନେ ଇଃସାଙ୍ଗ୍‌ ଫାରୋନେ ଡାଗ୍ରା ତୁଆଁ ଲେଃଗେ । ଏନ୍‌ ଇଡ଼ିଙ୍ଗ୍‌ ଯୋଷେଫ ଫାରୋନେ ଡାଗ୍ରାବାନ୍‌ ତାର୍‌ଚେ ମିସର୍‌ ଦେସ୍‌ନେ ସାପାପାକା ଅଲେଙ୍ଗ୍ ଅଲେଙ୍ଗ୍‌ଚେ କେକେ । 47 ଆତେନ୍‌ ଜାବର୍‌ ବିକ୍ୟା ଗୁ ମୁଆଁ ତୁବଃନ୍ୟା ଜାବର୍‌ ବାବ୍‌ରେ କିଆ ବ୍ଲେକେ । 48 ଯୋଷେଫ ଆତେନ୍‌ ଗୁ ମୁଆଁ ମିସର୍‌ ଦେସ୍‌ନ୍ୟା ବ୍ଲେକ୍ନେ କିଆ ରାସିଙ୍ଗ୍‌ଚେ ସାପା ଇନିନ୍ୟା ସାଲ୍ୟାଃକେ । ବାରି ଆଣ୍ଡି ଆଣ୍ଡି ଇନିନେ ପିତୁର୍‌ ପାକା ତୁବନ୍ୟା କିଆ ବ୍ଲେକେ, ଆତେନ୍‌ ସାପା ଆତେନ୍‌ ଆତେନ୍‌ ଇନିନ୍ୟା ରାଃସିଙ୍ଗ୍‌କେ । 49 ଦେକ୍‌ରକମ୍‌ ଯୋଷେଫ କେଣ୍ଡିଆନେ ବାଲି ରକମ୍‌ ଅଃକେନ୍‌ ଜାବର୍‌ କିଆ ରାସିଙ୍ଗ୍‌କେ ଜେ ଆତେନ୍‌ ବାରି ଆମାପେଆର୍‌କେ ଣ୍ଡୁ । ଡାଗ୍ଲା ଆତେନ୍‌ ଜାବର୍‌ ଲେଃଗେ ।

50 ଯୋଷେଫନେ ସେଲାମ୍ବୁଏଃ ଆସନତ୍‌ । ମେଁ ଓନ୍‌ ଇନି ବାସାକ୍ନେ ପୋଟୀଫେର ପୁଜାରିନେ ସେଲାମ୍ବୁଏଃ ଅଁ ଲେଃଗେ । ମୁର୍‌ଡି ପାଙ୍ଗ୍‌ନେ ସେନୁଗ୍‌ ଯୋଷେଫ ବାରି ଆସନତ୍‌ ମ୍ୱାକ୍ଲିଗ୍‌ ଉଂଡେ ଜନମ୍‌ ଆଃଡିଙ୍ଗ୍‌ବଆର୍‌ଗେ । 51 ପର୍‌ତୁମ୍‌ ଉଂଣ୍ଡେନେ ମ୍ନି ବିଃକେ ମନଃଶି । ଯୋଷେଫ ମେଁନେ ମ୍ନି ଦେକ୍‌ରକମ୍‌ ବିଃକେ, ଡାଗ୍ଲା ଯୋଷେଫ ବାସଙ୍ଗ୍‌କେ, "ପର୍‌ମେସର୍‌ ନେଙ୍ଗ୍‌ନେ ସାପା କସ୍ଟନେ ବାରି ନିଜର୍‌ ଆବା ଡୁଆନେ ମଙ୍ଗଲ୍‌ ଆଡିଙ୍ଗ୍‌ବକେ ।" 52 ଯୋଷେଫ ମେଁନେ ଦୁତିୟ ଉଂଣ୍ଡେନେ ମ୍ନି ବିଃକେ ଇଫ୍ରୟିମ, ଡାଗ୍ଲା ମେଁ ବାସଙ୍ଗ୍‌କେ, "ନେଙ୍ଗ୍‌ନେ ଦୁକ୍‌ କସ୍ଟନେ ଦେସ୍‌ନ୍ୟା ପର୍‌ମେସର୍‌ ଆନେଙ୍ଗ୍‌ ଚୁଚୁ ରକମ୍‌ ଦାନ୍‌ ଡିଙ୍ଗ୍‌ବକେ ।"

53 ମିସର୍‌ନ୍ୟା ଗୁ ମୁଆଁ ମୁର୍‌ଡି ଡାୱେକେ । 54 ବାରି ଯୋଷେଫନେ ସାମୁଆଁ ଅନୁସାରେ ମୁର୍‌ଡି ଗୁ ମୁଆଁ ଡିଙ୍ଗ୍‌କେ । ଆତ୍‌ବା ବିନ୍‌ନେ ସାପା ଦେସ୍‌ନ୍ୟା କାଦି ଆମିଲେକେ, ମାତର୍‌ ସାପା ମିସର୍‌ ଦେସ୍‌ନ୍ୟା କାଦି ଲେଃଗେ । 55 ବାରି ସାପା ମିସର୍‌ ଦେସ୍‌ନ୍ୟା ମୁର୍‌ଡି ଡିଙ୍ଗ୍‌ଲା, ରେମୁଆଁଇଂ କାଦି ନ୍‌ସା ଫାରୋକେ ସାଲ୍ୟାଃଆର୍କେ । ଆତ୍‌ବା ଫାରୋ ସାପା ମିସର୍‌ ଦେସ୍‌ନେ ରେମୁଆଁଇଂକେ ବାସଙ୍ଗ୍‌କେ, ପେଇଂ ଯୋଷେଫ ଡାଗ୍ରା ୱେଲାପା । ମେଁ ମେଃନି ବାଲିର୍‌ଏ, ଆତେନ୍‌ ଡିଙ୍ଗ୍‌ପା । 56 ସାପା ପାକା ମୁର୍‌ଡି ଡିଙ୍ଗ୍‌କେ । ତେସା ଯୋଷେଫ ସାପା ଜାଗାନେ ରେମୁଆଁଇଂକେ ଆଃତାପୁଏଚେ ମିସର୍‌ନେ ରେମୁଆଁଇଂକେ କିଆଉଁଆଃ ସନେ ମୁଲେକେ । ମେଃଡାଗ୍‌ଲା ମିସର୍‌ନ୍ୟା ମୁର୍‌ଡି ଜାବର୍‌ ଡିଙ୍ଗ୍‌କେ । 57 ବାରି ସାପା ଦେସ୍‌ନେ ରେମୁଆଁଇଂ ମିସର୍‌ ଦେସ୍‌ନ୍ୟା କିଆଉଁଆଃ ବିଆର୍‌ ନ୍‌ସା ଯୋଷେଫ ଡାଗ୍ରା ପାଙ୍ଗ୍‌ଆର୍କେ । ମେଃଡାଗ୍‌ଲା ସାପା ଦେସ୍‌ନ୍ୟା ମୁର୍‌ଡି ଜାବର୍‌ ଡିଙ୍ଗ୍‌କେ ।