1 ତାନ୍‍ପେର୍କେ ପରମେଶ୍ୱର ନୋହଙ୍କ୍‍ ନୁ ତାନ୍‍ ମାର୍‍କିଡ଼୍‍କ୍‍ ଆଶିର୍ବାଦ୍‌ ମାଡ଼ି କେତ୍‍ତଣ୍ଡ୍‍, ମିଡ଼୍‍ ପ୍ରଜାନଡ଼୍‌ ନୁ ନାର୍ଗେପିଲୁଡ଼୍‍ ଆସ୍‍ ପୃତିବୀତିଙ୍କ୍‍ ନିଃମୁଟ୍‌। 2 ପୃତିବୀତେ ସାରେ ପଶୁ ନୁ ପାର୍‍ତାନ୍‍ ପିଟେ ନୁ ନେଲ୍‌ ମେୟାନାୱୁ ନୁ ମେଟେତ୍‌ ଜନ୍ତୁ ନୁ ସମୁଦ୍ରତେ କିକେ, ସାରେ ମିଆଗାଙ୍କ୍‍ ୱେର୍‍ଦ୍‍ତା ନୁ ଦାଦ୍‌ରେଲିତା; ଆ ସାରେ ମି କାଇଦାଗ୍‌ ସର୍ପା ଆଦ୍‌ତା। 3 ସାରେ ଉଡାନ୍‍ ପ୍ରାଣି ମି କାଦି ଆଦ୍‌ତା, ମାମ୍‌ମେ ଗାଡ୍‌ ତିନ୍ଦାନ୍‌ ଲେକାମ୍‍ ଇ ସାରେ ମିକିଙ୍କ୍‍ ଇତ୍‍ତମ୍‍। 4 ମାତର୍‌ ମିଡ଼୍‍ ନିଜର୍‌ ନେତୁର୍‌ ଇତ୍କେ ନିଜର୍‌ ନେତୁର୍‌ତେ ଆୱ୍‍ଙ୍ଗ୍‍ ତିନ୍‍ମାଟ୍‍। 5 ମେଣ୍ଡେ ମାମ୍‌ମେ ମି ଜିଉନ୍‍ତେ ନେତୁର୍‍ତେ ଦଣ୍ଡ ନିଜାମ୍‍ ଅଦ୍‍ତମ୍‍; ସାରେ ଜିୱାକ୍‌କିନାଗାଙ୍କ୍‍ ଆୟି କି ନାରୁଡ଼ାଗାଙ୍କ୍‍ ଆୟି, ଆୱିନ୍‍ ଦଣ୍ଡ ଅଦ୍‍ତମ୍‍; 6 ବେନ ମା ନାରୁଡ଼୍‍କ୍‌ ଆୱ୍‌କିତଣ୍ଡ୍‌, ନାରୁଡ଼୍‍ ତଡ଼୍‌ ଅଂକିଙ୍କ୍‌ ଆୱୁକ୍‌ ୱେୟ୍‍ତିତ୍‍; ବାତେଙ୍କ୍‍ଇତ୍କେ ପରମେଶ୍ୱର ନିଜର ମୁର୍ତ୍ତିତେ ନାରୁଙ୍କ୍‍ ତିଆର୍‍ ମାଡ଼ିମିନ୍ଦେଣ୍ଡ୍‍।

7 ମିଡ଼୍‍ ପ୍ରଜାନଡ଼୍‌ ନୁ ନାର୍ଗେପିଲୁଡ଼୍‍ ଆୟ୍‍ମୁଟ୍‍, ମେଣ୍ଡେ ପୃତିବୀତିଙ୍କ୍‍ ବର୍ତ୍ତି ମାଡ଼ି ଦିବେନ୍‌ ଆୟ୍‍ମୁଟ୍‍।

8 ଅନନ୍ତର ପରମେଶ୍ୱର ନୋହଙ୍କ୍‍ ନୁ ତାନ୍‍ ତଡ଼୍‌ଦେ ମାର୍‍କିଡ଼୍‍କ୍‍ କେତ୍‍ତଣ୍ଡ୍‍, 9 ଉଡ଼ାଟ୍‍, ମି ତଡ଼୍‍ ନୁ ମି ମୁନେତ୍‌ ପିଲୁଡ଼୍‌ତେ ନିୟମ୍‌, 10 ନୁ ମି ତଡ଼୍‌ଦେନଡ଼କ୍‌ ସାରେ ଜିୱାକ୍‌କିନ୍‌ତଡ଼୍‌ ଇତ୍କେ, ଜାହାଜ୍‍ତାଗାଙ୍କ୍‍ ପେୟ୍‌ତେ ନାର୍ଦେ ନୁ ମେଟେତ୍‍ପଶୁ ନୁ ପିଟେ ଲେକାମ୍‌ ପୃତିବୀତେ ସାରେ ଜିୱାକିନ୍‌ ତଡ଼୍‍ ମାମ୍‌ମେ ମା ନିୟମ ତିଆର୍‌ ମାଡ଼ିମିନ୍ଦେମ୍। 11 ମାମ୍‌ମେ ମି ତଡ଼୍‍ ଇ ନିୟମ୍‌ ମାଡ଼ିତମ୍‍, ସାରେ ଜିୱାକିଙ୍କ୍‌ ଏର୍‌ ମୁହୁଃତାନାଦିନ୍‌ ତଡ଼୍‌ ମେଣ୍ଡେ ଦଂସ ଆୟ; ମେଣ୍ଡେ ପୃତିବୀତିଙ୍କ୍‍ ନଷ୍ଟ ମାଡ଼ାନ୍‍ ମାଇଦିଙ୍କ୍‍ ମେଣ୍ଡେ ଏର୍‌ ମୁହୁଃତାନାଦ୍‌ ଆୟ। 12 ମେଣ୍ଡନ୍‍ଦାମ୍‍, ପରମେଶ୍ୱର କେତ୍‍ତଣ୍ଡ୍‍, ମାମ୍‌ମେ ମି ତଡ଼୍‍ ନୁ ମି ତଡ଼୍‌ଦେ ସାରେ ଜିୱାକିନ୍‌ ତଡ଼୍‍ ପିଲୁଡ଼୍‌ତେ ପିଲୁଡ଼୍‌ ଅନନ୍ତକାଲ ଯାକ ବେନ୍‍ ନିୟମ୍‌ ମାଡ଼୍‍ତମ୍‍, ଆଦିନ୍‌ ଚିହ୍ନେ ଇଦ୍‍; 13 ମାମେ ମାବ୍‍ତାଗ୍‌ ମାୟାଦ୍‍ ୱିଲ୍‍ ତିଆର୍‍ ମାଡ଼୍‍ତମ୍‍, ଆଦ୍‌ ପୃତିବୀ ତଡ଼୍‍ ମା ନିୟମ୍‌ତେ ଚିହ୍ନେ ଆଦ୍‌ତେ । 14 ବେସୁଙ୍କ୍‍ ମାମ୍‌ମେ ପୃତିବୀ ପର ମାବ୍‍ ହେକାମ୍‍ ମାଡ଼ିତମ୍‍, ଆସୁଟ୍‍ ଆ ବିମାନ୍‌ୱିଲ୍‍ ମାବ୍‍ତାଗ୍‍ ତନ୍ଦ୍‍ଦିତ୍‍; 15 ଆସୁଟ୍ ମିଇ ତଡ଼୍‍ ନୁ ଆୱ୍‍ଙ୍ଗିନ୍‍ ଲେକାମ୍‌ ସାରେ ଜିୱାକିନ୍‌ ତଡ଼୍‍ ମାୟାଦ୍‍ ବେନ ନିୟମ୍‌ ମିନ୍ଦେ, ଆଦ୍‌ ମାକିଙ୍କ୍‍ ହେର୍କେ ଆଦ୍‌ତା, ଆସୁଟ୍‍ ସାରେ ଜିୱାକିନ୍‌ ନଷ୍ଟ ଆତ୍‌ତାଙ୍କ୍‌ ଏର୍‌ ମୁହୁଃତାନାଦ୍‌ ମେଣ୍ଡେ ଆୟ। 16 ମେଣ୍ଡେ ମାବ୍‍ତେ ୱିଲ୍‍ ଆତ୍କେ, ମାମ୍‌ମେ ଆକେ ଉଡ଼୍‍ତମ୍‍, ଆସୁଟ୍‍ ପୃତିବୀତେ ଆୱ୍‍ଙ୍ଗିନ୍‍ପୁଟୁଙ୍କ୍‍ ସାରେ ଜିୱାକିନ୍‍ ତଡ଼୍‍ ପରମେଶ୍ୱରତେ ବେନ୍‍ ତେର୍‍ୱେକାଲତେ ନିୟମ୍‌ ମିନ୍ଦେ, ଆଦିଙ୍କ୍‌ ମାମ୍‌ମେ ହେର୍କେ ମାଡ଼ିକାଡ଼୍‌। 17 ପରମେଶ୍ୱର ନୋହଙ୍କ୍‍ କେତ୍‍ତଣ୍ଡ୍‍, ପୃତିବୀତେ ସାରେ ଜିୱାକିନ୍‍ ତଡ଼୍‍ ମାମ୍‌ମେ ବେନ୍‍ ନିୟମ୍‌ ମାଡ଼ିମିନ୍ଦେମ୍‍, ଆୱିନ୍‍ ଇଦ୍‍ ଚିହ୍ନେ ଆଦ୍‌ତେ ।

18 ନୋହନ୍‍ ମାର୍‍କିଡ଼୍‍ ଜାହାଜ୍‍ତାଗାଙ୍କ୍‍ ପେୟ୍‍ତଡ଼୍‍, ଅଡ଼୍‍ ପେଦେର୍ ଶେମ ନୁ ହାମ ନୁ ଯେପତ୍‌; ହାମ କିଣାନ୍‍ତେ ବାବାଲ୍‍। 19 ଇ ମୁୱୁଡ଼୍‍ ନୋହନ୍‍ ମାର୍‍କ୍‍; ଇଡ଼୍‍ ପିଲୁଡ଼୍‍ ସାରେ ପୃତିବୀତେ ହେକାମ୍‌ ଆତ୍‌ତା ।

20 ତାନ୍‍ ପେର୍କେ ନୋହ ଚାଷ୍‍ ପାଡ଼୍‍ୟିଦାଗ୍‍ ଲାଗେମ୍‍ଆଶ୍‍ ଅଙ୍ଗୁର୍‌ୱାୟେ ମାଡ଼୍‍ତଣ୍ଡ୍। 21 ଆସୁଟ୍‍ ଅଣ୍ଡ୍ ଦ୍ରାକ୍ଷାରସ୍‍ ଉଞ୍ଜ୍‍ ମେଣ୍ଡେ ଅସି ଗୁଡ଼ୁସେତ୍‌ ଲୋପେ ସକାସିଲେ ଇଲ୍‍ୱେ ଲେକାମ୍‍ ରାଲ୍‌ତଣ୍ଡ୍‌। 22 ଇସତ୍‍ ସମୟ୍‍ତେ କିଣାନ୍‍ତେ ବାବାଲ୍‍ ହାମ ନିଜର୍ ବାବାଲ୍‌ ବାଣ୍ଡା ମାନ୍ଦାନାଦ୍‌ ଉଡ଼ି ବାୟ୍‍ଦେ ନିଜର୍‍ ଦାଦାଲଡ଼୍‍କ୍‍ କାବୁର୍‍ ଇତ୍‍ତଣ୍ଡ୍‍। 23 ଆସୁଟ୍‍ ଶେମ ନୁ ଯେପତ୍‌ ଆଟେତାଗ୍‌ ଚିଲେ ପୟ୍‍ସ୍‍ ପେର୍‍ଗେଃସ୍‍ ତାମ୍‍ ବାବାଙ୍କ୍‍ ବାଣ୍ଡା ମାନ୍ଦାନାଦିଙ୍କ୍‌ ମୁଚ୍‌ସିତ୍‌ତଡ଼୍‌; ଅଡ଼୍‍ ପେର୍‍ପାକେ ମକମ୍‍ ମାଡ଼୍‍ତାଙ୍କ୍‍ ବାବାଲ୍‌ ବାଣ୍ଡାଲ୍‌ ମାନ୍ଦାନାଦ୍‌ ଉଡ଼ଣ୍ଡ୍‍। 24 ତାନ୍‍ପେର୍କେ ନୋହ ଅଙ୍ଗୁର୍‌କାଲ୍‌ତେ ଉସ୍‍କାଡ଼୍‍ କଞ୍ଚ୍‍ ତେଦି ନିଜର୍‍ ସୁଦୁନଣ୍ଡ୍‍ ମାର୍‍ ଅନ୍‌ ପର ବାତେ ମାଡ଼ି ମିନ୍ଦେଣ୍ଡ୍‌ ଆଦ୍‌ ଉଡ଼ି ଅଣ୍ଡ୍‌ ପୁତ୍‌ତଣ୍ଡ୍‌। 25 ମେଣ୍ଡେ ଅଣ୍ଡ୍‍ କେତ୍‍ତଣ୍ଡ୍‍, କିଣାନ୍‍ ଅବିଶାପ୍‍ ଆୟି; ଅଣ୍ଡ୍‍ ନିଜର୍‍ ଦାଦାନଡ଼୍‍ ଦାସନ୍‌ ଦାସ ଆଦ୍‌ତଣ୍ଡ୍‌ । 26 ମେଣ୍ଡେ ଅଣ୍ଡ୍‍ କେତ୍‍ତଣ୍ଡ୍‍, ଶେମତେ ପରମେଶ୍ୱର ସଦାପ୍ରବୁ ଦନ୍ୟ ଆୟିଣ୍ଡ୍‍; କିଣାନ୍‍ ଶେମତେ ଦାସ ଆୟିଣ୍ଡ୍। 27 ପରମେଶ୍ୱର ଯେପତତିଙ୍କ୍‍ ପେର୍‌ସ୍ପିଣ୍ଡ୍‌; ମେଣ୍ଡେ ଅଣ୍ଡ୍ ଶେମନ୍‍ ଗୁଡ଼ୁସାତାଗ୍‍ ବାସ ମାଡ଼ିଣ୍ଡ୍‍; ମେଣ୍ଡେ କିଣାନ ଅଣ୍ଡ୍‍ ଦାସ୍‍ ଆୟିଣ୍ଡ୍‍।

28 ଏର୍‌ ମୁହୁଃତାନାଦ୍‌ ପେର୍କେ ନୋହ ମେଣ୍ଡେ ତିନିଶହ ପଚାଶ ବର୍ଷ ବାଦ୍‍କ୍‍ତଣ୍ଡ୍‍। 29 ମେଣ୍ଡେ ନୋହନ୍‍ ବାଦ୍‌କ୍‌ତେ ବୟସ୍‍ ନହଶହ ପଚାଶ ବର୍ଷ ମାତ୍‍ତଣ୍ଡ୍‍; ଆସୁଟ୍‍ ଅଣ୍ଡ୍ ଡଲ୍‍ତଣ୍ଡ୍।