1 ଇଦାଂପାଚେ ଜିସୟନି ଗାଣ୍ଡିତାଂ ର କୱାଣ୍ ଡାଡ଼ ହତ୍‌ନାତ୍‌ ଆରି ତା ଦଲ୍‌ତାଂ ର କେନ୍ଦା ଉବ୍‌ଜାଜ଼ି ପାଡ଼୍‌ ଆହ୍‌ନାତ୍‌; 2 ଆରେ, ନିତ୍ରେମାପ୍ରୁତି ଜିବୁନ୍‌, ଗିଆନ୍‌ ଆରି ଚିନ୍ତାସାକ୍ତିନି ଜିବୁନ୍‌, କୁଟ୍ ଆରି ସାକ୍ତିନି ଜିବୁନ୍‌, ବୁଦି ଆରି ନିତ୍ରେମାପ୍ରୁ ବିସ୍ରେନି ପାଣ୍ଡ୍ରୁନି ଜିବୁନ୍‌ ତା ତାକେ ବାହା କିନାତ୍‌; 3 ନିତ୍ରେମାପ୍ରୁ ବିସ୍ରେନି ପାଣ୍ଡ୍ରୁତାଂ ତାଦି ୱାରି ଆନାତ୍‌; ଆରେ, ହେୱାନ୍ ଜାର୍‌ କାଣ୍‌କୁ ହୁଡ଼୍‌ନି ଇସାବ୍ରେ ବିଚାର୍‌ କିଉନ୍‌, କିବା ଜାର୍‌ କିତୁଲ୍‌ ଟିପ୍‌ନି ୱେନି ଇସାବ୍ରେ କେତୁନ୍‌, 4 ମତର୍‌ ହେୱାନ୍‌ ଦାର୍ମିତ ଅର୍କିତ୍‌ରିଂ ବିଚାର୍‌ କିନାନ୍‌ ଆରି ପୁର୍ତିନି ହୁଦାର୍‌ ମାନାୟାର୍‌ କାଜିଂ ନିୟାୟ୍‌ତ କେତ୍‌ନାନ୍‌; ଆରେ, ହେୱାନ୍‌ ଜାର୍‌ ୱେଇ ଡଣ୍ଡ୍‌ ହୁଦାଂ ପୁର୍ତିତିଂ ଗାୱ କିନାକା ଆରି ଜାର୍‌ ଅଟି ହୁଦାଂ ନେଞ୍ଜ୍‌ନାକା ହୁକେ ବାନ୍ୟା ଲଗାଂ ନାସ୍‌ କିନାର୍‌ । 5 ଦାର୍ମିନିକା ଆରି ପାର୍ତି ହେୱାନ୍ତି ମ୍ଡେଙ୍ଗାତ ଗାଚ୍ୟାତାକା ଆନାତ୍‌ । 6 ଆରେ, ହୁଣ୍ଡାର୍‌ବୁର୍କା ମେଣ୍ଡାହିମ୍‌ଣା ଲାହାଂ ବାହା କିନିକ୍‌ ଆରି ଚିତା ବୁର୍କା ଅଡାହିମ୍‌ଣା ଲାହାଂ ହୁଞ୍ଜ୍‌ନାତ୍‌; ବାଚି, ବେଣ୍ଡିଆ ସିୟଁ ଆରି ଦୁମା ପସୁକୁ ରବେ ବାହା କିନିକ୍‌; ଆରେ, ର ହିରୁ ହିମ୍‌ଣା ହେୱାକାଂ ରୁଣ୍ଡାୟ୍‌ କିନାନ୍‌ । 7 ଆରେ, କଡି ଆରି ତେୟାବାଲୁ ହାରାନିକ୍‌; ହେୱାଙ୍ଗ୍‌ନି ହିମ୍‌ଣାଂ ସବୁ ରଚେ ହୁଞ୍ଜ୍‌ନିକ୍‌; ଆରେ, ସିୟଁ ବଇଲା ଲାକେ ହିଡ଼଼ି ତିନାତ୍‌ । 8 ଆରେ, ମାୟ୍ ଉଣି ହିମ୍‌ଣା କାଲାଟ୍‌ ରାଚ୍‌ କ୍ଡୟି ଜପି କ୍ରାଜ଼ନାନ୍‌ ଆରି ୱାସ୍ତିମାୟ୍‌ଉଣି ହିମ୍‌ଣା କାର୍ହାତି ରାଚ୍ କ୍ଡଇ ଜପି କେଇ ଇଟ୍‌ନାନ୍‌ । 9 ହେୱାର୍‌ ମା ପୁଇପୁୟା ମାଡ଼ିନି ଇମ୍‌ଣାକାପା ବାହାତ ଡାରା କି ବୁଡାୟ୍‌ କିଉତ୍‌; ଇନାକିଦେଂକି ହାମ୍‌ଦୁର୍‌ ଇନେସ୍‌କି ଏଜ଼ୁଙ୍ଗ୍ ବାର୍ତିଜ଼଼ି ମାନିକ୍‌, ପୁର୍ତି ହେ ଲାକେ ନିତ୍ରେମାପ୍ରୁ ବିସ୍ରେ ଗିଆନ୍‌ତ ପୁରା ଆନାନ୍‌ ।

10 ଜିସୟତି ଦଲ୍‌ନି ପତ୍‌କା ଲାକେ ଆନାତ୍, ବିନ୍ ଦେସ୍‌ନି ଲକୁ ଡେକ୍‌ନାର୍, ହେୱାନ୍ତି ହୁଞ୍ଜ୍‌ନି ବାହା ଗାଜା ଜାଜ୍‌ମାଲ୍‌ତ ବାର୍ତି ଆନାତ୍‌ । 11 ଆରେ, ହେ ଦିନା ମାପ୍ରୁ ବାକି ମାନାୟାର୍‌ତି ଲଡ଼ାନି ଆସୁର୍‌ତ, ମିସର୍‌ତ ଆରି ପତ୍ରସ୍‌ତ, କୁସ୍‌ତ, ଏଲମ୍‌ତ, ସିନିୟତ, ଆରି ହମାତ୍‌ତ ଆରି ହାମୁଦୁର୍‌ନି ଏସ୍‌କୁପ୍‌ଲିତ ମୁକ୍‌ଡ଼ାୟ୍‌ କିଜ଼ି ତାହି ୱାନି କାଜିଂ ଆରେରଗ ରିହା ତା କେୟ୍‌ ଲାମାୟ୍‌ କିନାନ୍‌ । 12 ଆରି କୁଟୁମ୍‌ କାଜିଙ୍ଗ୍ ର ପତ୍‌କା ଉପ୍‌ନାର୍ ଆରେ ପୁର୍ତିତିଂ ଚାରିବେଣ୍‌ତାଂ ଇସ୍ରାଏଲ୍‌ ପେସ୍ତି ଲକ୍‌ତିଂ ରବେ କିନାନ୍‌ ଆରି ଜିହୁଦାନି ଜେଡ଼଼େକେତେ ମାନାୟ୍‌ତିଂ ରୁଣ୍ଡାୟ୍ କିନାନ୍‌ । 13 ଆରେ, ଇପ୍ରୟିମ୍‌ନି ଡାରା ଆନାକା ହାନାତ୍‌ ଆରି ଜିହୁଦାତିଂ କସ୍ଟ ହିନି ମାନାୟାର୍‌ ହନାର୍‌ ଆନାର୍‌; ଇପ୍ରୟିମ୍‌ ଜିହୁଦାତିଂ ଡାରା ଆଉତ୍‌ ଆରି ଜିହୁଦା ଇପ୍ରୟିମ୍‌ତିଂ କସ୍ଟହିଉନ୍‌ । 14 ଆରେ, ହେୱାର୍‌ ୱେଡ଼ାହାନି ଦିଗ୍‌ତ ପଲେସ୍ଟିୟାର୍ତି ନିପି ଜପି ମାଡିବହା ଆନାନ୍; ହେୱାର୍‌ ରବେ ଆଜ଼଼ି ୱେଡ଼଼ାହନିଦେସ୍‌ନି ହିମ୍‌ଣାକାଙ୍ଗ୍‌ତି ଜିନିସ୍‌ ଚର୍‌କିଜ଼ି ଅନାର୍‌; ହେୱାର୍‌ ଇଦମ୍‌ ଆରି ମୟାବ ଜପି କେଇ କିନାର୍‌ ଆରି ଅମନିୟ ହିମ୍‌ଣାଙ୍ଗ୍‌ ହେୱାର୍‌ତି ବଲ୍‌ ମାନି କିନାର୍‌ । 15 ଆରେ, ନିତ୍ରେମାପ୍ରୁ ମିସର୍‌ ହାମ୍‌ଦୁର୍‌ନି ୱେନ୍ଦୁଲ୍ ପୁରା ନାସ୍‌ କିନାର୍‌ ଆରି ଜାର୍‌ କେଦ୍‌ତି ଡ଼଼ୁଇ ହୁଦାଂ ଜଡ଼଼ି ଜପି ଜାର୍‌ କେଇ ଜଲାୟ୍‌କିନାନ୍‌, ଆରେ ତାଙ୍ଗେଙ୍ଗ୍‌ ଇଡ଼୍‌ଜି ସାତ୍‌ଗଟା ନାଗୁଡ଼ କିନାନ୍‌ ଆରି ମାନାୟାରିଂ ୱାଚ୍‌ଚି ବାଟାତ ହିଜ଼଼ି ତାଙ୍ଗିକିନାନ୍‌ । 16 ଆରେ, ଇସ୍ରାଏଲ୍‌ ମିସର୍‌ ଦେସ୍‌ତ ହସି ୱାନି ୱେଡ଼ାଙ୍ଗ୍‌ ଇନେସ୍‌ ତା କାଜିଂ ଆଜ଼଼ି ମାଚାତ୍ ହେ ଲାକେ ତା ମାନାୟାର୍‌ତି ବାକି କାଜିଂ, ଇଚିସ୍‌, ଆସୁର୍‌ ଦେସ୍‌ତାଂ ବାକି ମାନାୟାର୍‌ କାଜିଂ ର ଅହାର୍ ହାଜ଼଼ି ଆନାତ୍‌ ।