1 ଇସ୍ରାଏଲ୍ ରାଜି ବୁଡାନାତ୍ ଇପ୍ରୟିମ୍‌ ଜାଜ୍‌ମାଲ୍‌ ବିତ୍ରେତାଂ ନେତା କାପ୍‌ଡ଼଼ାତ ପୁଇ ମୁକୁଟ୍ ଲାକେ ହାରୁ ଆତାତ୍‌ନା, ହେୱାର୍ତି ଗର୍ବିୟା କାପ୍‌ଡ଼଼ାଂ ହାର୍ଦିଗାନ୍ଦା ମତର୍ ହେବେ ହେୱାର୍ ପା ଆତାର୍ଣ୍ଣା । 2 ହୁଡ଼ାଟ୍‌ ମାପ୍ରୁତି ରୱାନ୍‌ ବାଡ଼୍‌କାସ୍‌ ଆରି ସାସ୍‌ନି ମାନାୟ୍‌ ମାନାନ୍‌; ହେୱାନ୍‌ ଆଞ୍ଜ୍‌ଗା ବାର୍‌ହା, ବୁଡାୟ୍‌କିନି ଡ଼଼ୁଇବାର୍ହାନି ନିୟାୟ୍, ଚାଣ୍ଡେଲ୍‌ ହନ୍‌ଚିୱାନି ବେସି ଏସ୍‌ନି ଦୁକାବାର୍ହା ଲାକେ, କେଇ ହୁଦାଂ ବୁଇଁତ ତୁହିନାନ୍‌ । 3 ଇପ୍ରୟିମ୍‌ତି ମଦୁୱା ମାନାୟାର୍‌ ଗାର୍ବି ବାର୍ତି ମୁକୁଟ୍‌ ପାନା ତାରେନ୍‌ ତଗ୍‌ୟାନାତ୍‌; 4 ଆରେ, ପାଡ଼୍‌ ଆସ୍ତି ଏସ୍‌କୁପ୍‌ଲିନି କାପ୍ଡାତ ମାନି ତା ହଲ୍‌ନାକା ଉସ୍‌ପାତାକା ୱାଚ୍‌ଚି ଲାକେ ପୁଇ, ଲାଣ୍ଡିମାସ୍ ଆଗେ ହେନ୍ତି ତଗା ପାଡ଼୍ ଲାକେ ଆନାତ୍‌; ଇନାକା ଇନେର୍ ହୁଡ୍‌ତି ଦାପ୍ରେ ଇଟ୍‌କାଡ଼୍ କିନାନ୍ ଆରି କେଇଦ ଆସ୍ତି ଦାପ୍ରେ ତିନାନ୍‌ । 5 ହେ ନାଞ୍ଜିଙ୍ଗ୍‌ ମେଲ୍ୟାଆଦିକାରି ନିତ୍ରେମାପ୍ରୁ ଜାର୍‌ ଲକୁରିଂ ଲଡ଼ାନି ବାକି କାଜିଂ ହଲ୍‌ନି ମୁକୁଟ୍‌ ଆରି ଜାଜ୍‌ମାଲ୍‌ନି ମୁକୁଟ୍ ଲାକେ ଆନାତ୍‌; 6 ଆରେ, ବିଚାର୍‌ କିନି କାଜିଂ କୁଚ୍‌ଚି ଲଗୁ କାଜିଂ ବିଚାର୍‌ନିକା ଜିବୁନ୍ ଆରି ଇମ୍‌ଣାକାର୍‌ ଗାଡ଼୍ ଦୁୱେର୍‌ତ ଜୁଜ୍‌ ମାସ୍‌ତି ତାହିୱାନାର୍‌, ହେୱାର୍‌ କାଜିଂ ବାଡ୍‌କାସ୍ ଲାକେ ଆନାନ୍‌ ।

7 ମାତର୍‌ ଇୱାରିଂ ନେ ଅଙ୍ଗୁର୍‌ରାସ୍‌ତ ବୁଲ୍‌କା ଆତାର୍‌ନା ଆରି କାଲିଂ ଉଣାକା ହୁଦାଂ ଆପଦ୍‌ତ ହାଚାର୍‌ନା; ମାପ୍ରୁହେବାକିନାକାନ୍‌ ଆରି ବେଣ୍‌ବାକ୍‌ଣାୟ୍‌କିନାକାନ୍‌ କାଲିଂଉଣି କାଜିଂ ବୁଲ୍‌କା ଆତାର୍‌ନା, ଅଙ୍ଗୁର୍‌ରାସ୍ ହେୱାରିଂ ଗୁସ୍ତାତ୍‌ନା, କାଲିଂଉଣି କାଜିଂ ହେୱାର୍‌ ବିନ୍‌ହାଜ଼଼ିତ ହାଚାର୍‌ନା; ହେୱାର୍‌ କ୍ଡେଞ୍ଜ୍‌କଣ୍‌ତ ବୁଲ୍‌କା ଆନାର୍‌, ବିଚାର୍‌ତ ଉଜ଼ନାର୍ । 8 ଇନାକିଦେଂକି, ପାଟା ସବୁ କାକ୍‌ତାକା ଆରି ମଲ୍‌ତ ପୁରା, ଇନାକାପା ଇଟ୍‌ନାକା ନିର୍‌ମଲ୍ ବାହା ହିଲୁତ୍‌ । 9 ହେୱାନ୍‌ ଇନେରିଂ ଗିଆନ୍‌ ହିକ୍ୟା ହିନାନ୍‌ ? ହେୱାନ୍‌ ଇନେରିଂ ନେକ୍ରିକାବୁର୍‌ ବୁଜାଇ କିନାନ୍‌ ? କି ପାଲ୍‌ହିଜ଼଼ି ଆରି ପାଲ୍‌ଉଟିକିନି ଦାଇତ୍‌ ହିମ୍‌ଣାକାଂ ? 10 ଇନାକିଦେଂକି, ଇଦାଂତି ବିଦି ଜପି ବିଦି; ଦାଡ଼ି ଜପି ଦାଡ଼ି, ଦାଡ଼ି ଜପି ଦାଡ଼ି; ଇବେ ଅଲପ୍‌, ହାବେ ଅଲପ୍‌ । 11 ତର୍‌, ମାତର୍‌ ହେୱାନ୍‌ ବିଦେସ୍‌ନି ଅଟିତ ଆରି ବିନ୍‌ବାସା କାଜିଂ ଇ ମାନାୟାର୍‌ତି କାତା ଇନାନ୍‌; 12 ହେୱାନ୍‌ ହେୱାରିଂ ଇଚିସ୍‌, "ଇଦାଂ ଜମ୍‌ନାକା, ଏପେଙ୍ଗ୍‌ ୱାସ୍ତି ମାନାୟ୍‌ତିଂ ଜମ୍‌ଦେଂ ହିୟାଟ୍‌, ଆରେ, ଇଦାଂତ ଆରମ୍‌," ମାତର୍‌ ହେୱାର୍‌ ୱେଞ୍ଜେଙ୍ଗ୍‌ ରାଜି କିୱାତାର୍‌ । 13 ଇଲାକେ ହେୱାର୍‌ ଇନେସ୍‌କି ସେସ୍‌ତ ହାଲ୍‌ଜି ପାଚେ ପଡ଼ାସି ବାଙ୍ଗାନାର୍‌, ଡ଼ୁକାତ ହେସ୍‌ନାର୍‌ ଆରି ଦେହା ଆନାର୍‌, ଇଦାଂକାଜିଂ ହେୱାର୍‌ କାଜିଂ ନିତ୍ରେମାପ୍ରୁତି ବଚନ୍‌ ବିଦି ଜପି ବିଦି, ବିଦି ଜପି ବିଦି; ଦାଡ଼ି ଜପି ଦାଡ଼ି, ଦାଡ଼ି ଜପି ଦାଡ଼ି; ଇବେ ଅଲପ୍‌, ହାବେ ଅଲପ୍‌ ଆନାର୍‌ ।

14 ଇଲାକେ ଏ ଜିରୁସାଲମ୍‌ ମାନାୟାର୍‌ତି ସାସନ୍‌କାରିୟା ନିଦାନିକାର୍‌, ଏପେଙ୍ଗ୍‌ ନିତ୍ରେମାପ୍ରୁତି ବଚନ୍‌ ୱେନାଟ୍‌; 15 ଏପେଙ୍ଗ୍‌ ଇନାଦେରା, ଆପେଙ୍ଗ୍‌ ହାକି ଲାହାଙ୍ଗ୍‌ ନିୟମ୍‌ କିନାପା ଆରି ପାତାଡ଼୍‌ ଲାହାଙ୍ଗ୍‌ ମାଦାଂ ହାନ୍ଦି ମାନାତ୍‌; ଇଲାକେ ଏସ୍‌ବାର୍‌ହା ଲାକେ କରଡା ମାଡ଼୍‌ ଏକା ୱାନିହିଂ ହେଦାଂ ମା ତାକେ ୱାଉତ୍‌; ଇନାକିଦେଂକି ଆପେଙ୍ଗ୍‌ ମିଚ୍‌ତିଂ ମିଙ୍ଗେଙ୍ଗ୍‌ ଆହା କିନାପା ଆରି ସତ୍‌ହିଲ୍‌ୱି ତାରେନ୍‌ ଆପେଙ୍ଗ୍‌ ଜାର୍‌ତିଂ ଡ଼ୁକ୍‌ତାତାପ୍‌ନା; 16 ଇଦାଂକାଜିଂ ନିତ୍ରେମାପ୍ରୁ ଇ କାତା ଇନାନ୍‌, "ହୁଡ଼ାଟ୍‌, ଆପେଙ୍ଗ୍‌ କୁନାଦି କାଜିଂ ସିୟନ୍‌ତ ର କାଲ୍‌, ପରିକ୍ୟାନି କାଲ୍‌, ଡାଟ୍ କୁନାଦି ଲାକେ ବେସିଦାମ୍‌ନି କନାନିକାଲ୍‌ ରଚ୍‌ଚାପ୍‌ନା; ଇନେର୍‌ ପାର୍ତି କିନାର୍‌, ହେୱାନ୍‌ ଲାଜା ଆଉନ୍‌ । 17 ଆରେ, ଆପେଙ୍ଗ୍‌ ନିୟାୟ୍‌ ବିଚାର୍‌ତ ସମାନ୍‌ ଡରି ଆରି ଦାର୍‌ମି ଲଗାଂ ଓଲମ୍‌ କିନାପ୍‌ ।" ଆରି, ଆଞ୍ଜ୍‌ଗା ବାର୍‌ହା ମିଚ୍‌ଲାକେ ଆହାନାକାନିଂ ବୁଡାୟ୍‌ କିନାତ୍‌ ଆରି ଏସ୍‌ରାସି ଡ଼ୁଗ୍‌ନି ଆହ୍‌ର ବାହାତ ଡ୍ରିକ୍‌ଚି ତୁହିନାତ୍‌ । 18 ଆରେ, ହାକି ଲାହାଙ୍ଗ୍‌ ମିବେନି କିତି ନିୟମ୍‌ ଦେହା କିୟାନାତ୍‌ ଆରି ପାତାଡ଼୍‌ ଲାହାଙ୍ଗ୍‌ ମି ହାନ୍ଦି ତିର୍‌ ଆଜ଼଼ି ମାନୁତ୍‌; ବାର୍‌ହାଲାକେ କର୍‌ଡା ଏକାୱାତିହିଂ ଏପେଙ୍ଗ୍‌ ହେଦାଂ ହୁଦାଂ କ୍ଡୁବ୍‌ନାସ୍‌ ଆନାଦେର୍‌ । 19 ହେଦାଂ ଏଚେକାଡ଼୍‌ଦ ଏକାୱାନାତ୍‌, ହେପଦ୍‌ନା ମିଙ୍ଗେଙ୍ଗ୍‌ ଆସ୍ତାନାତ୍‌; ଇନାକିଦେଂକି ନାଡ଼ିସିଂ ନାଣାଙ୍ଗେ, ୱେଡ଼ା ଆରି ନାଣା ହେଦାଂ ଏକାୱାନାତ୍‌; ଆରି, ହେ ନେକ୍ରିକାବୁର୍‌ ବୁଜାନାକା କେବଲ୍‌ ତର୍‌ଲାକେ ବିପ୍ତି ଆନାତ୍‌ । 20 ଇନାକିଦେଂକି, ଜାର୍‌ତିଂ ଲାମାୟ୍‌କିନି କାଜିଂ ମାନାୟାର୍‌ ଟାଟି ହିରୁ ଆରି ଜାର୍‌ତିଂ ପର୍‌ନି କାଜିଂ ହେନ୍ଦ୍ରା ଅହାର୍ 21 ଇନେସ୍‌କି ନିତ୍ରେମାପ୍ରୁ, ଇନେସ୍‌କି ପରାସିମ୍‌ ମାଡ଼ିତ, ହେଲାକେ ନିଙ୍ଗ୍‌ନାର୍‌, ଇନେସ୍‌କି ଗିବିୟନିୟନି ତାରେନ୍‌ ବୁଇଁତ, ହେଲାକେ ହେୱାନ୍‌ କାକ୍ରି ଆନାନ୍‌; ତାପାଚେ ହେୱାନ୍‌ ଜାର୍‌ତି କାମାୟ୍‌, ଜାର୍‌ତି କାବାଆନି କାମାୟ୍‌ ପୁରା କିନାନ୍‌ ଆରି ଜାର୍‌ତି ବେପାର୍‌ ଆରି ଜାର୍‌ତି କାବାଆନି ବିନ୍‌ଦେସ୍‌ନି ବେପାର୍‌ ପୁରାକିନାନ୍‌ । 22 ଇଲାକେ ନଂ ଏପେଦେର୍‌ ନିଦାକିୟା ଆମାଟ୍‌, ପାଚେ ମିଦାଂ ଗାଚ୍‌ୟାତାକା ଦେହା ଆନାତ୍‌; ଇନାକିଦେଂକି ମାପ୍ରୁ, ମେଲ୍ୟାଆଦିକାରି ନିତ୍ରେମାପ୍ରୁତି ଆପେଙ୍ଗ୍‌ ସବୁନି ପୁର୍ତି ଜପି ନାସ୍‌ କାତା ୱେଚାପ୍‌ନା ।

23 ଏପେଙ୍ଗ୍‌ କିତୁଲ୍‌ ହିସି ମା ୱେଇ ୱେନାଟ୍‌; ମାନ୍‌ଦିୟାନ୍‌ କିଜ଼ି ମା ବଚନ୍‌ ୱେନାଟ୍‌ । 24 ତାସ୍‌କିନାକାନ୍‌ ବିୟାନ୍‌ ୱିତ୍‌ନି କାଜିଂ ଇନାକା ଆଡ଼୍‌ ବୁଲାୟ୍ କିନାନ୍‌ ? ହେୱାନ୍‌ ଇନାକା ସବୁଦିନ୍ ସାର୍ କିଜ଼଼ି ବୁଲାଜ଼଼ି ତା ବୁଇଁତ ଟେଲାଙ୍ଗ୍‌ ପାଟ୍‌ନାନ୍‌ ? 25 ହେୱାନ୍‌ ଇନାକା ବୁଇଁନି ଜପ୍‌ଣି ବାଗ୍‌ ସମାନ୍‌ କିତି ପାଚେ କିତି କାର୍‌ହାତିଜିରା ୱିଦ୍‌ଦି ଅଉନ୍‌ ଆରି ଜିରା ୱିତୁନ୍‌ ଆରି ଦାଡ଼ି ଦାଡ଼ି କିଜ଼ି ଗଅଁ, ହେ ବାହାତ ଦନ୍ଦଣା ଆରି ଜମି କାଟାତିଂ ଇନାକା ଜନା ୱିତୁନ୍‌ ? 26 ଇନାକିଦେଂକି, ତା ପର୍‌ମେସ୍ୱର୍‌ ତାଙ୍ଗେଙ୍ଗ୍‌ ଜଚେସ୍ଟ ହିକ୍ୟାହିନାନ୍‌ ଆରି ହେୱାନ୍‌ ତାଂ ହିକାୟ୍‌ କିନାନ୍‌ । 27 ଇନେସ୍‌କି କାର୍‌ହାତିଜିରା ଇମ୍‌ଣି ଦାରା ଆତିୟାର୍‌ତ ରାସ୍‌ତିସ୍‌ ଡରି ନାଡୁତ୍‌, କି ଜିରା ଜପି ଗୁର୍‌ବାଟୁଣି ମାଣ୍ଡଣା ବୁଲାୟ୍‌ କିୟା ଆଉତ୍‌; ମାତର୍‌ କାର୍‌ହାତିଜିରା ବାଡ୍‌ଗେତାଂ ଆରି ଜିରା ଦଲ୍‌ତ ଟ୍ରାକ୍ୟା ଆନାତ୍‌ । 28 ରୁଟିନି ତାସ୍‌ କୁଦ୍ରି କିୟାନାତ୍‌; ଇନାକିଦେଂକି ହେୱାନ୍‌ ଆଗେ କାଡ଼୍‌ଦାଂ ହେଦାଂ କସ୍ଟ ୱେୟ୍‌ନିକା କିଉନ୍‌; ଆରେ, ଜଦିପା ତା ହାଗାଡ଼୍‌ ଚକ୍ ଆରି ତା ପର୍‌ଲିଂ ହେଦାଂ ବିନ୍‌ବିନ୍‌ କିଜ଼ି ତୁହିନିକ୍‌, ଜଦିପା ହେୱାନ୍‌ ତା ହେଦାଂ ବିରାୟ୍‌କିଉନ୍‌ । 29 ଇଦାଂ ନେ ଆଦିକାରି ନିତ୍ରେମାପ୍ରୁତି ତାକେ ଆନାତ୍‌, ହେୱାନ୍‌ କୁଟ୍‌ତ କାବାନିକାନ୍‌ ଆରି ଗିଆନ୍‌ତ ଗାଜାକାନ୍‌ ।