1 ନିତ୍ରେମାପ୍ରୁ ଇନାନ୍‌, "ଇମ୍‌ଣି ଗଣ୍ଡ୍‌ଗଲିୟାର୍‌ତି ମାଜ଼଼ିର୍ ଜଜନା କିନାର୍, ମତର୍ ମା ହୁଦାଂ ଆକାୟ୍; ଆରେ, ଇମ୍‌ଣାକାର୍‌ ପାପ୍‌ ଜପି ପାପ୍ କିନି କାଜିଂ ଡାବାଆତିତ ଡାବାୟ୍ କିନାର୍‌, ମତର୍ ମା ଜିବୁନ୍ତି ହୁଦାଂ ଆକାୟ୍, ହେୱାର୍ ଦୁକ୍‌ତି ଲଗୁ । 2 ହେୱାର୍‌ ମାଙ୍ଗେଙ୍ଗ୍‌ ୱେନ୍‌ବାଆଦ୍‌ୱାଦାଂ ପାରତି ବାଡ଼୍‌କାସ୍‌ତ ଜାର୍‌ତିଂ ବାଡ଼କାସ୍ କିଦେଂ ଆରି ମିସରନି ଡ଼ିଗାତ ଆହ୍‌ର ଅଦେଂ ମିସର୍‌ତ ହାନି କାଜିଂ ହାଜ଼଼ିଆହ୍‌ନାରା । 3 ଇଲାକେ ପାରତି ବାଡ଼୍‌କାସ୍‌ ମିଦାଂ ଲାଜାଆନାକା ଆନାତ୍‌ ଆରି ମିସର୍‌ତି ଡ଼ିଗାତ ଆହ୍‌ର ପାୟାଜ଼଼ି ମିଦାଂ ଅପ୍‌ମାନ୍‌ନିକା ଆନାତ୍‌ । 4 ଇନାକିଦେଂକି ତା ଆଦିକାରିର୍‌ ସୟନ୍‌ତ ମାନାର୍‌ ଆରି ତା ରାଜ୍‌ ଦୁତ୍‌ ହାନେସ୍‌ତ ୱାତାର୍‌ନା । 5 ଇମ୍‌ଣି କୁଟୁମ୍ ହେୱାର୍‌ତି ଆଦିକାର୍‌ କିଦେଂ ଆଡୁର୍‌, ହେୱାର୍‌ତି ବିସ୍ରେ ହେ ୱିଜ଼଼ାକାର୍‌ ଲାଜାଆନାର୍‌, ହେୱାର୍‌ କୁଟୁମ୍‌ ସାଇଜନିକାର୍‌ କି ଉପ୍‌କାର୍‌ନିକାର୍ ଆକାୟ୍‌, ମାତର୍‌ ଲାଜୁ ଆରି ତର୍‌ ଅପ୍‌ମାନ୍‌ ଲାକେ ଆନାତ୍‌ ।" 6 ଦିଗନି ପସୁଙ୍ଗ୍‌ ବିସ୍ରେନିକା ବେଣ୍‌ବାକ୍‌ଣାୟ୍‌କିନାକା । ଇମ୍‌ଣି ବାହାତାଂ ବେଣ୍ଡିୟା ଆରି ଦୁତି ସିୟଁ, କାଲାଟ୍‌ ରାଚ୍‌ ଆରି ଉମ୍‌ଜିହାନି ନାଣିବାର୍ତି ରାଚ୍‌ ୱାନିକ୍‌, ଇଲାକେ ଦୁକ୍ ଆରି କସ୍ଟନି ଦେସ୍‌ ହିଜ଼଼ି ଇମ୍‌ଣାକାର୍‌ ହୁଦାଂ ହେୱାର୍ତି ଉପ୍‌କାର୍ ଆଉତ୍, ଏଲେଂବାର୍ତି ର କୁଟୁମ୍‌ତିଂ, ହେୱାର୍ ବେଣ୍ଡ୍‌ୟା ଗଦଂ ନିପିତ ଜାର୍‌ତି ଦନ୍ ଆରି ଉଟ୍‌କୁ ନିପିନି କୁବ୍‌ଡ଼଼ା ଜପି ଜାର୍ତି ଦନ୍ ଲାଦିକିଜ଼଼ି ଅନାର୍‌ । 7 ଇନାକିଦେଂକି ମିସର୍‌ ମିଚ୍‌ୱା ଆରି ପଲ୍ୟା ସାଇଜ କିନାତ୍‌; ଇଦାଂକାଜିଂ ଆପେଙ୍ଗ୍‌ କାମାୟ୍‌କିୱାଦାଂ କୁଚ୍‌ଚି ମାନି ରାହବ ଇଞ୍ଜି ତର୍‌ ହିତାପ୍‌ନା ।

8 ନଂ ହାଲାଟ୍‌, ହେୱାର୍‌ତି ମୁମ୍‌ଦ ର ପାଟାତ ହେଦାଂ ଲେକିକିୟାଟ୍‌ ଆରି ହେଦାଂ ଇନେସ୍‌କି ୱାନି କାଡ଼୍‌ କାଜିଂ, ୱିସ୍ତିକାଡ଼୍‌ ପାତେକ୍‌ ମାନ୍‌ଗାନାତ୍‌, ଇଦାଂକାଜିଂ ର ତଲ୍ ପତିତ ଲେକିକିଆଟ୍‌ । 9 ଇନାକିଦେଂକି ହେୱାର୍‌ ଗଣ୍ଡ୍‌ଗଲ୍‌ନି କୁଟୁମ୍, ମିଚ୍‌ୱାତି ମାଜ଼଼ିର୍‌, ହେୱାର୍‌ ନିତ୍ରେମାପ୍ରୁତି ବିଦି ୱେଞ୍ଜେଙ୍ଗ୍‌ ମାନ୍‌କିୱି ମାଜ଼଼ିର୍‌; 10 ହେୱାର୍‌ କ୍ଡେଞ୍ଜ୍‌ନାକାରିଂ ଇନାର୍‌, "ଏପେଙ୍ଗ୍‌ କ୍ଡେଞ୍ଜୁଦେରା" ଆରି ବେଣ୍‌ବାକ୍‌ଣାୟ୍‌କିନାକାରିଂ ଇନାର୍‌, "ଏପେଙ୍ଗ୍‌ ମା ତାକେ ହାତ୍‌ପା ବଚନ୍‌ ପ୍ରଚାର୍‌ କିମାଟ୍‌, ମାଙ୍ଗେଙ୍ଗ୍‌ କୱାଣ୍‌ କାତା ଇଞ୍ଜ୍‌ନାଦେର୍‌ ଆରି ବୁଲ୍‌କାନି ବଚନ୍‌ ପ୍ରଚାର୍‌ କିନାଦେର୍‌; 11 ଏପେଙ୍ଗ୍‌ ହାଜ଼ିତାଂ ହସି ହାଲାଟ୍‌, ହାଜ଼଼ି ପିହାଟ୍‌, ଇସ୍ରାଏଲ୍‌ନି ଦାର୍‌ମି ମା ମୁମ୍‌ଦାଂ ଦେହା କିୟାଟ୍‌ ।" 12 ଲାଗିଂ ଇସ୍ରାଏଲ୍‌ନି ପୁଇପୁୟା ଇସ୍ୱରତିଂ ଇ କାତା ଇନାନ୍‌, "ଏପେଙ୍ଗ୍‌ ଇ ବଚନ୍‌ତିଂ ଗ୍ଡାଇନାଦେରା, ଆରେ, କାରାପ୍ ହାଜ଼଼ିତ ହାନାକାର୍‌ ଆରି କାପ୍‌ଟିଆତ ପାର୍ତି କିଜ଼଼ି ତା ଆହ୍‌ର ଇଟ୍‌ନାଦେରା; 13 ଇଦାଂକାଜିଂ ଡେଙ୍ଗା କୁନାଦିତ ମୁଚ୍‌ଚିକାଲ୍‌ ଇମ୍‌ଣି ଗାର୍ ପାଡ଼଼ାତି କାଣା, ହାଚାଟ୍ରେ ରଞ୍ଜେମାଡ୍ ବାଡ଼ହା ଆନାତ୍, ହେଦାଂ ଲାକେ ଇ ଦସ୍‌ନିକା ମି କାଜିଂ ଆନାତ୍‌ ।" 14 ଆରେ, ଇନେସ୍‌କି କୁମ୍‌ରେନ୍ତି ଟାଙ୍ଗାଙ୍ଗ୍ ଡ୍ରିକ୍ୟାନାତ୍‌; ହେ ଲାକେ ହେୱାନ୍ ମୁଡ଼଼େ ଦୟା କିଦ୍‌ୱାଦାଂ ହେଦାଂ ଗୁଣ୍ଡା କିଜ଼଼ି ଡ୍ରିକ୍ଚି ତୁହିନାନ୍; ହେବେଣ୍ଡାଂ ହଲିତାଂ ନାଣି କିବା କୁଣ୍ଡିତାଂ ଏଜ଼଼ୁଙ୍ଗ୍ ଅନି ଲାକେ ର କାପ୍‌ରି ପା ହେବେଣ୍ଡାଂ ଗାଟା ଆଦୁତ୍‌ । 15 ଇନାକିଦେଂକି ମାପ୍ରୁ, ନିତ୍ରେମାପ୍ରୁ ଇସ୍ରାଏଲ୍‌ନି ଦାର୍‌ମିଲାକେ ଇଚାନ୍‌, "ମାନ୍‌ବାଦ୍‌ଲାୟ୍‌ କିତିସ୍‌ ଆରି ହୁଦାର୍ ଆତିସ୍‌ ଏପେଙ୍ଗ୍ ମୁକ୍ତି ପାୟାନାଦେର୍‌; ସୁସ୍ତାତ ଆରି ପାର୍ତିତ ମିଦାଂ ବାଡ୍‌କାସ୍‌ ଆନାତ୍‌, ଆରେ, ଏପେଙ୍ଗ୍‌ ରାଜି ଆଉଦେର୍‌ । 16 ମାତର୍‌ ଏପେଙ୍ଗ୍‌ ଇଚାଦେର୍‌, ଆକାୟ୍‌, ଆପେଙ୍ଗ୍‌ ଗଡ଼ାତ ହନ୍‌ନାପ୍‌; ଇଦାଂକାଜିଂ ଏପେଙ୍ଗ୍‌ ପାଲାରି ଆନାଦେର୍‌; ଆରେ ଇନାଦେର୍‌, ଆସେଙ୍ଗ୍‌ ଚାଣ୍ଡେହନ୍‌ନି ଗଡ଼଼ାତ ଦୁମ୍‌ନାସ୍‌; ଇଦାଂକାଜିଂ ମି ପାଚେତାଂ ପାଚେ ଡ଼କ୍ଚି ପେସ୍‌ଦିନି ମାନାୟାର୍‌ ଚାଣ୍ଡ୍ ଆନାର୍‌ । 17 ରୱାନ୍‌ ଦାକାକିତିତ ହାଜାର୍ ମାନାୟାର୍‌ ହନ୍‌ନାର୍‌; ପାଞ୍ଚ୍‌ ଜାଣ୍‌ ଦାକାତ ଏପେଙ୍ଗ୍‌ ୱିଜ଼଼ାଦେର୍‌ ହନ୍‌ନାଦେର୍‌; ତା ପାଚେ ଏପେଙ୍ଗ୍‌ ମାଡ଼ିନି ଗବାତ ର ଚିନ୍‌ ଲାକେ ଆରି ହାରୁ ମାଡ଼ିତ ବାଡ୍‌ଗେନି ପତ୍‌କା ଲାକେ ଆଜ଼଼ି ବାକି ମାନ୍‌ଗାନାଦେର୍‌ ।" 18 ଆରେ, ହେଦାଂ ନିତ୍ରେମାପ୍ରୁ ମି କାଜିଂ ଉପ୍‌କାର୍ କିନି କାଜିଂ କାତ୍‌ନାନ୍‌, ଆରେ ହେଦାଂ କାଜିଂ ମିଙ୍ଗେଙ୍ଗ୍‌ ଦୟା କିନି କାଜିଂ ହେୱାନ୍‌ ଉଚ୍‌ ଆନାନ୍‌; ଇନାକିଦେଂକି ନିତ୍ରେମାପ୍ରୁ ନିୟାଁୟ୍ ବିଚାର୍‌କାରିୟା ପର୍‌ମେସ୍ୱର୍‌ ଆନାନ୍‌; ଇମ୍‌ଣାକାର୍‌ ହେୱାନିଂ କାସି ମାନାର୍‌, ହେୱାର୍‌ ୱିଜ଼଼ାର୍‌ ଦନ୍ୟ ।

19 ଏ ଜିରୁସାଲମ୍‌ନିକାଦେର୍ ସିୟନ୍‌ନି ମାନାୟାର୍‌, ଏପ୍‌ ଆରେ ଆଡ଼୍‌ବୁଦେର୍‌; ମି ଆଡ଼୍‌ବିନି କାଟ୍‌ ହେୱାନ୍‌ ଆତିସ୍ପା ମିଙ୍ଗେଙ୍ଗ୍ ଉପ୍‌କାର୍‌ କିଦ୍‌ନାନ୍‌; ହେୱାନ୍‌ ୱେଚି ଦାପ୍ରେ ମିଙ୍ଗେଙ୍ଗ୍‌ ଉତର୍‌ ହିଦ୍‌ନାନ୍‌ । 20 ଆରେ, ଜଦି ମାପ୍ରୁ ମିଙ୍ଗେଙ୍ଗ୍‌ ଦୁକ୍‌ଲାଗ୍‌ଦି କାଦି ଆରି କସ୍ଟଲାଗ୍‌ଦି ଏଜ଼ୁଙ୍ଗ୍‌ ହିଦ୍‌ନାର୍‌, ଆତିସ୍‌ପା ମି ହିକ୍ୟାନିକାର୍‌ ଆରି ଡ଼ୁଗ୍‌ଜି ମାଞ୍ଜେଙ୍ଗ୍‌ ଆଡୁର୍‌, ମାତର୍‌ ମି କାଣ୍‌କୁ ମି ଗୁରୁରିଂ ହୁଡ଼୍‌ନିକ୍‌ । 21 ଆରେ, ଦିଗତ କି ଡେବାବାଗାଂ ମାସ୍‌ଦି ହାନିହିଂ ମି କିତୁଲିଂ ମି ଜେଣ୍‌ପାଡ଼କା ଇ କାତା ୱେନାଦେର୍‌, "ହାଜ଼ି ଇଦାଂ, ଇବେତାଂ ନେ ଏପେଙ୍ଗ୍‌ ହାଲାଟ୍‌ ।" 22 ଆରେ, ଏପେଙ୍ଗ୍‌ ଜାର୍‌ତି ରୁପା ପୁତ୍‌ଡ଼଼ାଂତି ପ୍ରାଜ଼଼ି ଆରି ଚାଚ୍‌ତାକେ ହନା ପୁତ୍‌ଡ଼଼ାଂ ତୁଜ଼଼ୁନାକା ବିଟାଡ଼୍‌ କିନାଦେର୍, ଏପେଙ୍ଗ୍‌ ହେ ସବୁ ବିଟାଡ଼୍‌ ଆଡ଼ମାଡ଼ ଲାକେ ତୁହିନାଦେର୍‌; ଏପେଙ୍ଗ୍‌ ଇନାଦେର୍‌, "ଇବେତାଂ ହଜ଼଼ି ହାଲା ।" 23 ଆରେ, ବୁଇଁତ ୱିତ୍‌ନି କାଜିଂ ହେୱାନ୍‌ ମି ବିୟାନ୍‌ କାଜିଂ ବାର୍ହା ହିଦ୍‌ନାନ୍‌; ବୁମିତାଂ ଉପ୍‌ଜା ଆତାକା ତିନାକା କାଦି ହିଦ୍‌ନାନ୍‌ ଆରି ବେସି ଆନାତ୍; ହେ ଦିନ୍ତ ମି ପସୁରାହି ଅହାର୍ ବାହାତ ହାରାଆନିକ୍‌ । 24 ମାଦିନି ବୁଇଁ ଚାସ୍‌ କାମାୟ୍‌ ବାଡ଼୍‌ଦୁ, ବେଣ୍ଡିୟା ଗଦଂ ହାଣେଲ୍‌ ଆରି ହେଚିତ ଜେଚ୍‌ଚାକା ମେହାତି କାଦି ତିନିକ୍‌ । 25 ଆରେ, ଇମ୍‌ଣି ବେସି*30:25 ଅସ୍ପାନିଦିନ୍‌ ନାସ୍‌କିନି ଦିନ୍ତ ପାନ୍ତି ମାଚା ମୁନ୍‌ଞ୍ଜି ହାନିକ୍‌, ହେ ଦିନ୍‌ତ ସବୁନି ପାନ୍ତି ମାଡ଼ିତ, ସବୁ ପାନ୍ତି ଚିରାତ ନାଗୁଡ଼୍‌ ଆରି ଏସ୍‌ବଡ଼଼ା ଆନାତ୍‌ । 26 ଆରେ, ଇମ୍‌ଣି ଦିନା ନିତ୍ରେମାପ୍ରୁ ଜାର୍‌ ମାନାୟାର୍‌ତି ମାଟ୍‌କିୟାତି ବାହାତ ଗାଚ୍‌ନାନ୍‌ ଆରି କର୍‌ଡା ହପ୍‌ଚି ହେୱାର୍‌ ଗାୱ୍‌ ଉଜ୍‌ କିନାନ୍‌, ହେ ଦିନ୍ତ ଲେଞ୍ଜ୍‌ନି ଅଜଡ଼୍‌ ୱେଡ଼ାନି ଅଜଡ଼୍‌ ଲାକେ ଆନାତ୍‌, ଆରେ ୱେଡ଼ାନି ଅଜଡ଼୍‌ ସାତ୍‌ ଦିନ୍ତି ଅଜଡ଼୍‌ ଲାକେ ସାତ୍‌ ଗୁଣ୍‌ ଆନାତ୍‌ ।

27 ହୁଡ଼ାଟ୍‌, ନିତ୍ରେମାପ୍ରୁତି ତର୍‌ ତାଂ କାକ୍ରିତ କାଚାଜ଼଼ି ଆରି ମେହାତି କଦା ଆଜ଼଼ି ଦେହାତାଂ ୱାନାତା; ତା ୱେଇଅଟି କାକ୍ରିତ ବାର୍ତି ଆରି ତା ୱେନ୍ଦୁଲ୍‌ ୱିଜ଼଼ୁଗୁହ୍‌ନାକା ନାଣି ଲାକେ; 28 ଆରେ, ତା ନେଞ୍ଜ୍‌ନି ଦୁକା ବଡ଼଼ାନିଏଜ଼଼ୁଙ୍ଗ୍ ଲାକେ, ସବୁଦେସ୍‌ନି ମାନାୟାରିଂ ଅହାର୍‌ତାଂ ହାଣେଲ୍‌ତ ଚାଲାୟ୍‌ କିନି କାଜିଂ ହେଦାଂ କନା ପାତେକ୍‌ ନିଙ୍ଗ୍‌ନାତା; ଆରେ, ସବୁ କୁଟୁମ୍‌ନି ମୁମ୍‌ଦ ବୁଲ୍‌କାନାକା ବାକାର ହିଆନାତ୍‌ । 29 ପୁଇପୁୟା ପାର୍ବୁତ ପାଲି କିନି ନାଣାଲିଂ ଇନେସ୍‌କି, ହେଲାକେ ଏପେଙ୍ଗ୍‌ କେର୍‌ନାଦେର୍‌; ଆରେ, ମାନାୟାର୍‌ ଇନେସ୍‌କି ନିତ୍ରେମାପ୍ରୁତି ମାଡ଼଼ିତ, ଇସ୍ରାଏଲ୍‌ କାଟ୍‌ ଲାଗାଂ ହାନି କାଜିଂ ହୁର୍‌ଡ଼ି ତୁବ୍‌ଜି ହାନାର୍‌, ହେଲାକେ ମି ମାନ୍ ୱାରି ଆନାତ୍‌ । 30 ଆରେ, ନିତ୍ରେମାପ୍ରୁ ଜାର୍‌ କାକ୍ରିତାଂ ବେସି ଆରି ସବୁଗୁସ୍ତିଅନି ନାଣିଦୁଦ୍‌ୱା, ଡ଼଼ୁଇବାର୍ହା, ଦୁକାବାର୍ହା ଆରି ଆଞ୍ଜ୍‌ଗା ବାର୍ହା ହୁଦାଂ ଜାର୍‌ତି ସାକ୍ତିନି ଗାର୍‌ଜେନ୍‌ ୱେନିକିନାନ୍‌ ଆରି ଜାର୍‌ କେଇନି ଗାଚ୍ୟାତାକା ଚଚ୍‌ନାନ୍‌ । 31 ଇନାକିଦେଂକି ନିତ୍ରେମାପ୍ରୁତି ଗାର୍‌ଜେନ୍‌ ଆସୁର୍‌ ଗାଣ୍ଡ୍ରା ଗାଣ୍ଡ୍ରା ଆଜ଼ି ଡ୍ରିଙ୍ଗ୍‌ଜି ହାନାତ୍‌, ହେୱାନ୍‌ ତାଙ୍ଗେଙ୍ଗ୍‌ କାଣ୍ଡାତାଂ ଇଡ଼଼ିନାନ୍‌ । 32 ଆରେ, ଇମ୍‌ଣି ରଚ୍‌ଚି ବାଡ଼୍‌ଗା ନିତ୍ରେମାପ୍ରୁ ତା ଜପି ଇଟ୍‌ନାନ୍‌, ହେବେନି ସବୁ ମାଟ୍‌ ସମୁତାଂ ଡଲ୍‌କି ଆରି ମରି ଆଡ଼୍‌ନାତ୍‌ ଆରି ହେୱାନ୍‌ ହେୱାର୍‌ ଲାହାଂ ଗାଜାଜୁଜ୍‌ କିନାନ୍‌ । 33 ଇନାକିଦେଂକି କେତ୍‌ତି ନାଣିକୁଣ୍ଡ୍‌ ଆଗେତାଂ ରଚ୍ୟାତାତ୍‌ନା ଆରି ହେଦାଂ ରାଜାର୍‌ କାଜିଂ ଜାଲ୍‌ଦି ଆତାତ୍‌ନା; ହେୱାନ୍‌ ହେଦାଂ ଡେଙ୍ଗା ଆରି ଅହାର୍‌ କିତାନ୍‌ନା, ହେବେନି ମୁଣ୍ଡା ନାଣି ଆରି ଗାଜାଟି ମାର୍‌ଲାକେ; ଆରେ ନିତ୍ରେମାପ୍ରୁତି କାଚାନାକା ରିକାଙ୍ଗ୍ ହାରାବାନାକା ହେଦାଂ କାଚା ଆନାତ୍‌ ।