Isaías 51

ଜିରୁସାଲମ୍‌ କାଜିଂ ଇସ୍ୱର୍‌ତି ଦୁକ୍‌ସାରାୟ୍‌ କିନାକା

1 ଏ ଦାର୍‌ମିତିଂ ହାନାକାଦେର୍‌, ଏ ନିତ୍ରେମାପ୍ରୁତି ଡେକ୍‌ନାକାଦେର୍‌, ଏପେଙ୍ଗ୍‌ ମା କାତା ୱେନାଟ୍‌; ଏପେଙ୍ଗ୍‌ ଇମ୍‌ଣି କାଲ୍‌ଦାଂ କାତ୍‌ୟାଜ଼଼ି କି କିୟାଜ଼଼ି ମାଚାଦେର୍‌ ଆରି ଇମ୍‌ଣି କ୍ଡଇଦାଂ କାର୍‌ଜ଼଼ି ମାଚାଦେର୍‌, ତା କାଜିଂ ହୁଡ଼ାଟ୍‌ । 2 ମି ଆବା ଅବ୍ରାହାମ୍‌ କାଜିଂ ଆରି ମି ଗାଟାଆତ୍‌ତି ସାରା କାଜିଂ ହୁଡ଼ାଟ୍‌; ଇନାକିଦେଂକି ହେଦେଲ୍‌ ରଞ୍ଜେଲ୍‌ ମାନିହିଂ ଆପ୍‌ ତାଂ କୁକ୍‌ତାପ୍‌ ଆରି ଆପ୍‌ ଆର୍ସିବାଦ୍‌ କିଜ଼ି ହେଦେଲିଂ ଗାଜା ଲାତ୍ରା କିତାପ୍‌ । 3 ଇନାକିଦେଂକି ନିତ୍ରେମାପ୍ରୁ ସିୟନ୍‌ତ ଦୁକ୍‌ସାରାୟ୍‌ କିତାନ୍‌ନା; ହେୱାନ୍‌ ତା ଉପ୍‌ଜାତି ବାହାସବୁତିଂ ଦୁକ୍‌ସାରାୟ୍‌ କିତାନ୍‌ନା; ହେୱାନ୍‌ ତା ବାଟାତିଂ ଏଦନ୍‌ ଲାକେ ଆରି ତା ବାଲିବାଟାତିଂ ନିତ୍ରେମାପ୍ରୁତି ବାଡ଼୍‌ ଲାକେ କିତାନ୍‌ନା; ସାରି ୱାରି ଆରି ସାର୍‌ଦା, ଦନ୍ୟବାଦ୍‌ ଆରି କେର୍‌ନି ଗାର୍‌ଜେନ୍‌ ହେବେନି ବିତ୍ରେ ଆନାତ୍‌ । 4 "ଏ ନା ମାନାୟାର୍‌, ନା ବଚନ୍‌ତ ମାନ୍‌ଦିୟାନ୍‌ କିୟାଟ୍‌; ଏ ନା ଦେସ୍‌ନି ଲକ୍‌, ନା କାତାତ କିତୁଲିଂ ହିଆଟ୍‌; ଇନାକିଦେଂକି ନାତାକେଣ୍ଡାଂ ର ବିଦି ହଜ଼଼ିୱାନାତ୍‌ ଆରି ଆପ୍‌ ଗସ୍ଟିନିକାପ୍‌ ଆଜଡ଼୍‌ କାଜିଂ ମା ବିଚାର୍‌ କିନାପ୍‌ । 5 ମା ଦାର୍ମି ଲାଗାଂ, ମା ମୁକ୍‌ଡ଼ାନାକା ହତାତ୍‌ନା ଆରି ମା ମାରା ଗସ୍ଟିନିକାରିଂ ବିଚାର୍‌ କିନାତ୍‌; ଏସ୍‌କୁପ୍‌ଲିଂ ମାଙ୍ଗ୍‌ କାସି ମାଞ୍ଜ୍‌ନିକ୍‌ ଆରି ମା ମାରାତ ଆହ୍‌ର ଇଟ୍‌ନାଦେର୍‌ । 6 ଏପେଙ୍ଗ୍‌ ଆକାସିଂ କାଜିଂ ଜପିହୁଡ଼ାଟ୍‌ ଆରି ତାରେନ୍‌ନି ବୁମିଂ କାଜିଂ ହୁଡ଼଼ାଟ୍‌; ଇନାକିଦେଂକି ଆକାସିଂ କଦା ଲାକେ ମେହାନାତ୍‌ ଆରି ବୁମିଂ ହେନ୍ଦ୍ରା ଲାକେ ଜିରାନାତ୍‌, ଆରେ ହେବେ ବାହାକିତି ମାନାୟାର୍ ୱିଜ଼଼ାର୍‌ ଲାକେ ହାନାର୍‌; ମାତର୍‌ ମାଦାଂ ମୁକ୍‌ଡ଼ାନାକା ୱିଜ୍‌ୱି କାଡ଼୍‌ ପାତେକ୍‌ ଆନାତ୍‌ ଆରି ମା ଦାର୍‌ମି ଡ଼ୁଗୁତ୍‌ । 7 ଏ ଦାର୍‌ମିର୍‌ ମାନାୟ୍‌, ମି ଜିବୁନ୍‌ତ ମା ବିଦି ମାନାତ୍‌, ଏପେଙ୍ଗ୍‌ ମା କାତା ୱେନାଟ୍‌; ଏପେଙ୍ଗ୍‌ ମାନାୟ୍‌ତି ଅପ୍‌ମାନ୍ତ ପାଣ୍ଡ୍ରାମାଟ୍‌, ଇଚିସ୍‌ ହେୱାର୍‌ତି ନିଦାତ ବିଲ୍‌କି ଆମାଟ୍‌ । 8 ଇନାକିଦେଂକି ପ୍ଡିକୁ ହେୱାରିଂ ହେନ୍ଦ୍ରା ଲାକେ ତିନିକ୍‌ ଆରି ପ୍ଡିକୁ ହେୱାରିଂ ବୁରାଙ୍ଗ୍‌ ଲାକେ ତିନିକ୍‌: ମାତର୍‌ ମା ଦରମ୍‌ ୱିଜ୍‌ୱି କାଡ଼୍‌ ଆନାତ୍‌ ଆରି ମା ମୁକ୍‌ଡ଼ାନାକା ଜୁଗ୍ ଜୁଗ୍ ଲାତ୍ରାରିଂ ମାନାତ୍‌ ।" 9 ଏ ନିତ୍ରେମାପ୍ରୁ ମାରା, ଜାଗ୍ରତ୍‌, ଜାଗ୍ରତ୍‌, ହାର୍‌କିଜ଼ି ଉସ୍‌ପା, ଇମ୍‌ଣାକାର୍‌ ଆଗେ କାଡ଼୍‌ଦ, ପ୍ଡାନି କାଡ଼୍‌ନି ଲାତ୍ରାର୍‌ ସମୁତ, ହେଲାକେ କାଆଟ୍‌, ଜେ ହାମ୍‌ଦୁର୍‌ତ ମାନିଜାତ୍ ରାହବତିଂ ଗାଣ୍ଡ୍ରା ଗାଣ୍ଡ୍ରା କିଜ଼ି କାତ୍‌କାତାର୍‌, ଇନେର୍‌ ନାଗ୍‌ତିଂ ଅସ୍ତାନ୍, ହେୱାନ୍‌କି ଏନ୍‌ ଆକାୟ୍‌ ? 10 ଇନେନ୍‌ ହାମ୍‌ଦୁର୍‌ତିଂ, ଗାଜାହାମ୍‌ଦୁର୍‌ନି ଏଜ଼ୁକାଂ ୱାଚି କିତାନ୍‌, ଇନେନ୍‌ ମୁକ୍‌ଡ଼ାତି ମାନାୟ୍‌ତି ନାସିୱାନି କାଜିଂ ହାମ୍‌ଦୁର୍‌ନି ଡେଙ୍ଗା ବାହାତିଂ ହାଜ଼଼ିକିତାନ୍, ହେୱାନ୍‌ କି ମିୱାନ୍‌ ଆକାୟ୍‌ ? 11 ଆରେ, ନିତ୍ରେମାପ୍ରୁ ବାଚିକିତି ମାନାୟାର୍‌ ମାସ୍‌ଦି ୱାନାର୍‌ ଆରି ୱାରିତାଂ କେର୍‌ଜି ସିୟନ୍‌ତ ଏକାୱାନାର୍‌; ନିତ୍ରେମାନି ୱାରି ଆରି ସର୍‌ଦା ପାୟାନାର୍‌, ଆରେ, ଦୁକ୍‌ ଆରି ଆଡ଼୍‌ନାକା ଦେହା ହାନାତ୍‌ । 12 ଇନେର୍‌ ମିଙ୍ଗ୍‌ ଦୁକ୍‌ସାରାୟ୍‌ କିଦ୍‌ନାର୍‌, ହେୱାନ୍‌ ଆନ୍‌, ଆନ୍‌ ନେ ଆନାଙ୍ଗ୍‌; ହାନି ତାରେନ୍ ମାନାୟ୍‌ତିଂ ଆରି ଇନେନ୍‌ କାଚ୍ରା ଲାକେ କିୟାନାନ୍‌, ଇଲାକେ ମାନାୟ୍‌ନି ମାଜ଼଼ିତିଂ ପାଣ୍ଡ୍ରା ଆନାଦେରା, 13 ଆରେ, ଆକାସିଂ ମେଙ୍ଗ୍‌ଗ୍ୟାଆତାକା ଆରି ପୁର୍ତିନି କୁନାଦି କୁଚିକିତାକାନ୍‌ ମି ରଚ୍‌ଚାକାନ୍‌ ନିତ୍ରେମାପ୍ରୁତିଂ ବାଣାତାଦେର୍‌ନା ଆରି ବାନ୍ୟା ଲଗୁ ବୁଡାୟ୍‌ କିଦେଂ ଜାଗ୍‌ରତ୍‌ ଆନିହିଂ ତା କାକ୍ରି କାଜିଂ ସବୁଦିନା ନିଜେ ପାଣ୍ଡ୍ରାନାଦେରା ଜେ ଏପ୍‌, ଏନ୍ ତ ଇମ୍‌ଣାକାୟ୍‌ ? ଆରେ, ହେ ବାନ୍ୟାହାଜ଼଼ିତି କାକ୍ରି ଇମେତ୍‌ ? 14 ପେଜ୍ୟାଆତି ବନ୍ଦି ବେଗି ମୁକ୍‌ଡ଼଼ାନାନ୍‌; ଆରେ, ହେୱାନ୍‌ ହାଜ଼଼ି କ୍ଡଇଦ ହାଲୁତ୍‌, ଇଚିସ୍‌ ତା କାଦି ଅକେଟ୍‌ ଆଉତ୍‌ । 15 ଇନାକିଦେଂକି ଲଡ଼଼ିନି ଗାର୍‌ଜେନ୍‌ କିନି କାଜିଂ ଇନେର୍‌ ହାମ୍‌ଦୁର୍‌ତିଂ ତାନ୍ଦ୍ରା କିନାର୍‌, ଆପ୍ ହେ ନିତ୍ରେମାପ୍ରୁ ମି ପର୍‌ମେସ୍ୱର୍‌ ଆନାପ୍‌; ତା ତର୍‌ ମେଲ୍ୟାଆଦିକାର୍‌ନି ନିତ୍ରେମାପ୍ରୁ । 16 ଆରେ, ଆକାସିଂ ରୁସ୍ତାକା, ପୁର୍ତିନି ମୁଡ଼୍‌କୁନାଦି ରଚ୍‌ନାକା ଆରି ଏପ୍‌ ମା ଲକ୍‌, ଇଦାଂ ସିୟନ୍‌ତ ଇନିକାଜିଂ ଆପ୍‌ ମି ୱେଇଦ ଜାର୍‌ ବଚନ୍‌ ଇଡ଼୍‌ଦାତାପ୍‌ନା ଆରି ଜାର୍‌ କେଇଦି ହିତ୍‌ଡ଼ିତ ମିଙ୍ଗେଙ୍ଗ୍‌ ଡାବାୟ୍‌ କିତ୍‌ତାପ୍‌ନା ।

ଜିରୁସାଲମ୍‌ନି ଦୁକ୍ କସ୍ଟନି ଜୁଗ୍‌

17 ଏ ଜିରୁସାଲମ୍‌, ଜାଗ୍ରତ, ଜାଗ୍ରତ୍‌, ନିଲାଟ୍‌, ଏପ୍‌ ନିତ୍ରେମାପ୍ରୁତି କେଇଦାଂ ତା କାକ୍ରିତିଂ ଉଣି ବାହା ଅଜ଼଼ି ଉଣାଦେରା; ଏପେଙ୍ଗ୍‌ ବେସି ହଚ୍‌ନି ବାହାତାଂ ଉଣ୍‌ଜି ହେୱାଙ୍ଗ୍‌ ୱିସ୍ତାଦେର୍‌ନା । 18 ହେୱାନ୍‌ ଇମ୍‌ଣି ହିମ୍‌ଣାକାଂ ଗାଟାଆତାନ୍‌ନା, ହେୱାନ୍‌ ୱିଜ଼଼ାର୍‌ ବିତ୍ରେ ତାଙ୍ଗେଙ୍ଗ୍‌ ବାଡାୟ୍‌ କିଦେଂ ଇନେର୍‌ ହିଲୁର୍‌; କି ହେୱାନ୍‌ ଇମ୍‌ଣି ମାଜ଼଼ିରିଂ ପହାପାଲି କିନାନା, ହେୱାନ୍‌ ୱିଜ଼଼ାର୍‌ ବିତ୍ରେ ତା କେଇ ଆସ୍ତି ଅନି କାଜିଂ ଇନେର୍‌ ହିଲୁର୍‌ । 19 ଇ ରି ବିସ୍ରେ ମି କାଜିଂ ଗିଟାଆତାତ୍‌ନା; ମି କାଜିଂ ଇନେର୍‌ ଆଡ଼୍‌ବାନାର୍‌ ? ୱାରାକା ଆରି ବୁଡାନାକା, ଆରି କାତାର୍‌ ଆରି କାଣ୍ଡା; ଆପ୍‌ ଇନେସ୍‌କିଜ଼ି ମିଙ୍ଗେଙ୍ଗ୍‌ ଦୁକ୍‌ସାରାୟ୍‌ କିଦ୍‌ନାପ୍‌ ? 20 ଜାଲ୍‌ତ ଅହ୍‌ୟାତି ମାଙ୍ଗେସ୍‌ନି ଲାକେ ମି ମାଜ଼଼ିର୍‌ ଆପ୍ରାଂ ଆତାର୍‌ନା, ହେୱାର୍‌ ଜାଣ୍‌କେ ହାଡ଼଼ାକ୍‌ନି ଜପି ଆର୍‌ତାର୍‌ନା; ହେୱାର୍‌ ନିତ୍ରେମାପ୍ରୁତି କାକ୍ରିତ, ମି ପର୍‌ମେସ୍ୱର୍‌ତି ଦାକାତ ବାର୍ତିଆତାତ୍‌ । 21 ଲାଗିଂ ଏ ଦୁକ୍‌ନିକାୟ୍‌ ଆରି ମାନ୍‌ୱି ଅଙ୍ଗୁର୍‌ରାସ୍‌ତ ହଚ୍‌ଚାୟ୍‌ନା ଜେ ଏନ୍, ନଙ୍ଗ୍‌ ଇଦାଂ ୱେନା; 22 ମି ମାପ୍ରୁ, ନିତ୍ରେମାପ୍ରୁ ଆରି ଜାର୍‌ ମାନାୟାର୍‌ତି ପାକ୍ୟାନିକାନ୍‌ ମି ପର୍‌ମେସ୍ୱର୍‌ ଇ କାତା ଇନାନା, "ହୁଡ଼ାଟ୍‌, ଆପ୍‌ ମାତ୍‌ଲିର୍‌ ଉଣିବାହା, ଇଚିସ୍‌, ମା କାକ୍ରିଲାକେ ବେସିଗାଜା ଉଣିବାହା ମି କେଇଦାଂ ଉନ୍‌ନ୍ଦି ଅତାପ୍‌ନା; ଏପ୍‌ ଆରେ ହେଦାଂ ଉଣୁଦେର୍‌; 23 ଆରେ, ଇମ୍‌ଣାକାର୍‌ ମିଙ୍ଗେଙ୍ଗ୍‌ କସ୍ଟ ହିଦ୍‌ନାର୍‌, ହେୱାର୍‌ତି କେଇଦ ଆପ୍‌ ହେଦାଂ ହିନାପ୍‌; ହେୱାର୍‌ ମି ପାରାଣ୍‌ତିଂ ଇଞ୍ଚାନ୍‌ନା, ଟଡା, ଆପେଙ୍ଗ୍‌ ମି ଜପିତିଂ ହିଜ଼଼ି ହାନାସ୍‌; ଆରେ, ଏପ୍‌ ବୁଇଁ ଆରି ହାଡାକ୍‌ ଲାକେ ହାନାକାରିଂ କାଜିଂ ଜାର୍‌ ଗାଗାଡ଼୍‌ ଆନ୍‌ଞ୍ଜି ହିତାୟ୍‌ନା ।"