1 ଆଗ ବାଞ୍ଜ୍‌ଣି, ଜଲମ୍‌ଆୱିତି, ଏନ୍‌ କେରା, ଆଗ ଗରବନନିତ ମାନାକାୟ୍‌, ଏନ୍‌ ଗାଜାକାଟ୍‌ତାଂ କେର୍‌ଜି ୱାରି କିୟା, ଇନାକିଦେଂକି ନିତ୍ରେମାପ୍ରୁ ଇନାନ୍‌, ବିବାତି ଡକ୍ରିନି ହିମ୍‌ଣାଙ୍ଗ୍‌ ବାଟା ଆବାହିଲ୍‌ୱି ହିମ୍‌ଣାଙ୍ଗ୍‌ ଆଦିକ୍‌ । 2 ଏପ୍‌ ଜାର୍‌ ତୁମ୍‌ନି ବାହା ବାଡାୟ୍‌କିୟା ଆରି ହେୱାର୍‌ ମି ବାହାନି ପାର୍‌ଦା ସବୁ ଲାମାୟ୍‌ କିୟାଟ୍‌; ବାନ୍ୟା ଆହା କିମାଟ୍‌; ମି ଡରିଙ୍ଗ୍‌ ସବୁ ଲାମାୟ୍‌ କିୟାଟ୍‌ ଆରି କୁଟ୍ରୁ ସବୁ ଦେହା କିୟାଟ୍‌ । 3 ଇନାକିଦେଂକି ଏପ୍‌ ତିନାବାଗାଂ ଆରି ଡେବାବାଗାଂ ମେଙ୍ଗ୍‌ନାଦେର୍‌ ଆରି ମି ଲାତ୍ରା ବିନ୍‌ ଦେସ୍‌ନିକାରିଂ ଆଦିକ୍‌ କିନାନ୍‌ ଆରି ମାନାୟ୍‌ହିଲ୍‌ୱି ଗାଡ଼୍‌ଦ ସବୁ କୁଚ୍‌ନି ବାହା କିଇକିଦ୍‌ନାନ୍‌ । 4 ପାଣ୍ଡ୍ରା ଆମାଟ୍‌; ଇନାକିଦେଂକି ଏପ୍‌ ଲାଜା ଆଉଦେର୍‌ । କି ମୁମ୍‌ୱାଚି କିମାଟ୍‌; ଇନାକିଦେଂକି ମିଙ୍ଗେଙ୍ଗ୍‌ ଲାଜୁ କିୟାଆଦୁତ୍‌; ଏପ୍ ଜାର୍‌ ବେଣ୍ଡିୟା ୱେଡ଼ାଙ୍ଗ୍‌ନି ଲାଜୁ ବାଣାନାଦେର୍‌ ଆରି ଏପ୍ ଜାର୍‌ ରାଣ୍ଡିକ୍‌ନି ବାନ୍ୟାତର୍‌ ଆରେ ଏତ୍‌ କିଉଦେର୍‌ । 5 ଇନାକିଦେଂକି ମି ରଚ୍‌ଚାତାକାନ୍‌ ମି ଆଣ୍ଡ୍ରେନ୍‌ ଆନାନ୍‌; ମେଲ୍ୟାଆଦିକାର୍‌ନି ନିତ୍ରେମାପ୍ରୁ ତା ତର୍‌ ଆରି ଇସ୍ରାଏଲ୍‌ନି ଦାର୍‌ମି ମି ମୁକ୍‌ଡ଼ାୟ୍‌ କାରିୟା; ହେୱାନ୍‌ ସବୁ ପୁର୍ତିନି ପର୍‌ମେସ୍ୱର୍‌ ଇଞ୍ଜି ଡାକ୍‌ପୁଟା କିୟାନାତ୍‌ । 6 ଇନାକିଦେଂକି ନି ପର୍‌ମେସ୍ୱର୍‌ ଇନାନ୍‌, ପିହ୍ୟାଆତାକା ଆରି ମାନ୍ତଦୁକ୍‌ନି କଗ୍‌ଲେ ଇଚିସ୍‌ ବେଣ୍ଡିୟାୱେଡ଼ାଙ୍ଗ୍‌ନି ବୁଲ୍‌କିନି ଦେହାକିଜ଼଼ି କଗ୍‌ଲେଙ୍ଗ୍‌ ଲାକେ ନିତ୍ରେମାପ୍ରୁ ମିଙ୍ଗେଙ୍ଗ୍‌ କୁକ୍‌ତାନାନ୍‌ । 7 ଆପ୍‌ ଅଲପ୍‌ ଚାଣେକ୍ତିଂ କାଜିଂ ମିଙ୍ଗେଙ୍ଗ୍‌ ପିସ୍ତାତାପ୍‌ନା; ମାତର୍‌ ବେସି ଦୟାତ ମିଙ୍ଗେଙ୍ଗ୍‌ ରୁଣ୍ଡାୟ୍‌ କିଦ୍‌ନାପ୍‌ । 8 ଏଚେକ୍‌ କାକ୍ରିତ ଆପ୍ ର ହାଣ୍ଡେକ୍‌ ମାତର୍‌ ଜାର୍‌ ୱେୟ୍‌ ମିତାଂ ଡ଼ୁକ୍‌ତାତାପ୍‌; ମାତର୍‌ ୱିସ୍‌ୱିକାଡ଼୍‌ ପାତେକ୍‌ ଦୟାତ ଆପ୍‌ ମି କାଜିଂ ଜିଉନଦ୍‌ନାକା, ଇଦାଂ ମି ମୁକ୍‌ଡ଼ାୟ୍‌ କାରିୟା ନିତ୍ରେମାପ୍ରୁ ଇଞ୍ଜ୍‌ନାନ୍‌ । 9 "ଇନାକିଦେଂକି ଇଦାଂ ନା କାଜିଂ ନହ ସମୁନି ଏଜ଼ୁଙ୍ଗ୍‌ ଲାକେ ଆନାତ୍‌; ନହ ସମୁତ ଏଜ଼ୁଙ୍ଗ୍‌ ଆରେ ପୁର୍ତିତିଂ କ୍ଡୁକୁତ୍‌ ଇଞ୍ଜି ଆପ୍ ଇନେସ୍‌କି ପାର୍ମାଣ୍ କିତାପ୍‌ନା, ହେଲାକେ ଆପ୍‌ ମି କାଜିଂ କାକ୍ରି, କି ମିଙ୍ଗେଙ୍ଗ୍‌ କେତ୍‌ତୁପ୍‌ ଇଞ୍ଜି ପାର୍‌ମାଣ୍‌ କିତ୍‌ତାପ୍‌ନା । 10 ଇନେକିଦେଂକି ମି କାଜିଂ ସାନ୍ତି କିତ୍‌ତାନ୍‌ନା ଇମ୍‌ଣି ନିତ୍ରେମାପ୍ରୁ, ହେୱାନ୍‌ ଇନାନ୍‌, ମାଡ଼ିଂ ବିପ୍‌ତି ଆଜ଼଼ି ଗୁଚାନିକ୍‌ ଆରି ହାରୁମାଡ଼ିଂ ଜୁଦ୍‌ନିକ୍‌; ମାତର୍‌ ମା ଦୟା ମିତାକେଣ୍ଡାଂ ବିପ୍‌ତି ଆଉତ୍‌," କି ମା ସାକ୍ତିନି ନିୟମ୍‌ ସବୁୱାଡ଼଼ାଂ ମାନ୍‌ଗାନାତ୍‌ ।

11 ଆଗ ଦୁକ୍‌ତାକାୟ୍‌, ଡୁଇବାର୍‌ହାତ ବିପ୍‌ତିତ ଆରି ଦୁକ୍‌ଜାଣାୟ୍‌ କିତ୍‌ତାକା, ହୁଡ଼ା, ଆପେଙ୍ଗ୍‌ ବେସି ହଲ୍‌ନି କିତୁଲ୍‌ତ ମିଦାଙ୍ଗ୍‌ କାଲ୍‌ କୁଚିକିଦ୍‌ନାପ୍‌ ଆରି ନିଲ୍ୟା ମଣି କାଜିଂ ମିଦାଙ୍ଗ୍‌ ମୁଡ଼୍‌କୁନାଦି ରଚ୍‌ଚାନାପ୍‌ । 12 ଆପ୍‌ ପଦ୍ମରାଗ ମଣିତ ମି ଗବା ଆରି ୱେଡ଼ାବାର୍ତି ମଣିତ ମି ଗାଡ଼୍‌ନି ଦୁୱେର୍‌ସବୁ ଆରି ମାନ୍‌ଜାଲ୍‌ନି କାଲ୍‌ଦ ମିଦାଂ ୱିଜ଼଼ାର୍‌ ହାନ୍ଦି ତିର୍‌କିନାସ୍‌ । 13 ମି ହିମ୍‌ଣାଙ୍ଗ୍‌ ୱିଜ଼଼ାର୍‌ ନିତ୍ରେମାପ୍ରୁତି କାଜିଂ ହିକିତ୍‌ ଆନାର୍‌ ଆରି ମି ହିମ୍‌ଣାଙ୍ଗ୍‌ତି ଗାଜା ସାନ୍ତି ଆନାତ୍‌ । 14 ଏପ୍‌ ଦାର୍‌ମି କାତାତ ତିର୍‌ ଆନାଦେର୍‌; ଏପ୍‌ କୁର୍‌ଲିୟାର୍‌ତାଂ ଦେହା ମାନାଦେର୍‌, ଇନାକିଦେଂକି ଏପ୍‌ ପାଣ୍ଡ୍ରା ଆଉଦେର୍‌; ଆରେ ପାଣ୍ଡ୍ରୁକିଦ୍‌ନାକାର୍‌ତାଂ ଦେହା ମାନାଦେର୍‌, ଇନାକିଦେଂକି ହେଦାଂ ମି ଲାଗାଂ ୱାଉତ୍‌ । 15 ହୁଡ଼ାଟ୍‌, ମାନାୟାର୍‌ ମିଂ ବେରୁକିଦ୍‌ନାର୍‌, ମାତର୍‌ ମା କାଜିଂ ଆକାୟ୍‌; ଇନେସ୍‌କି ମି ବିରୁତାଂ ଏକ୍‌ଜୁଟ୍‌ ଆନାର୍‌, ହେୱାର୍‌ ମି କାଜିଂ ମୁଚ୍ୟାନାର୍‌ । 16 ହୁଡ଼ାଟ୍‌, ଇମ୍‌ଣି କାମ୍‌ରେନ୍‌ ରିକାଂତି ନାଣି ଆହିକିଜ଼ି ଲୱା କେତ୍‌ତାତ୍‌ଚି ତା କାମାୟ୍‌ କାଜିଂ ଅସ୍ତର୍‌ ରଚ୍‌ନାନ୍‌, ଆପ୍‌ ତାଙ୍ଗେଙ୍ଗ୍‌ ହୁଡ଼୍‌ନାପା ଆରି ବୁଡାନାକା ବୁଡାନାକାଦିଂପା ଆପ୍‌ ଉବ୍‌ଜାଣ୍‌କିତାପ୍‌ନା । 17 ଇନେସ୍‌ବାର୍ତି ଅସ୍ତର୍‌ ମି ବିରୁତ୍ ରଚ୍ୟାନାତ୍‌, ହେଦାଂ ପୁରା ଆଉତ୍‌ ଆରି ଇମ୍‌ଣି ଜାଣ୍‌କେ ୱେନ୍ଦୁଲ୍‌ ବିଚାର୍‌ତ ମି ବିରୁଦ୍‌ତ ନିଙ୍ଗ୍‌ନାତ୍‌, ଏପ୍‌ ତାଙ୍ଗେଙ୍ଗ୍‌ ଦସି କିନାକା ନିତ୍ରେମାପ୍ରୁ ଆଡ଼ିୟାର୍‌ତି ଆଦିକାର୍‌ ଆରି ମା ହିଆତାକା ହେୱାର୍‌ତି ଦାର୍‌ମିନିକା ଇଦାଂ, ଇଦାଂ ନିତ୍ରେମାପ୍ରୁ ଇନ୍‌ଚାନ୍‌ନା ।