1 ହୁଡ଼ାଟ୍‌, ନିତ୍ରେମାପ୍ରୁ କେଇ ହାରୁ ଆଜ଼ି ହାଲ୍‌ୱାତାତ୍‌ନା ଜେ, ହେଦାଂ ମୁକ୍‌ଡ଼ାୟ୍‌ କିଦେଂ ଆଡୁନ୍‌, କି ତା କିତୁଲ୍‌ ବଜ୍‌ ଆୱାତାତ୍‌ନା, ଜେ ହେଦାଂ ୱେଞ୍ଜେଙ୍ଗ୍‌ ଆଡୁନ୍‌ । 2 ମତର୍‌ ମି ପାପ୍‌ସବୁ, ମିଦାଂ ଆରି ମି ପର୍‌ମେସ୍ୱର୍‌ ବିତ୍ରେ ବିନେ କିଦ୍‌ନାତା ଆରି ମି ପାପ୍‌ସବୁ ମିଙ୍ଗ୍‌ତାଂ ତା ମୁମ୍‌ ଡ଼ୁକ୍ତାନ୍‌ନା, ଇଦାଂ କାଜିଂ ହେୱାନ୍‌ ୱେନୁନ୍‌ । 3 ଇନେକିଦେଂକି ମି କେଇ ନେତେର୍‌ତ ଆରି ଏପେଙ୍ଗ୍‌ ମିଚ୍‌ ଇନାଦେରା, ଆରି ମିଦାଂ ୱେନ୍ଦୁଲ୍‌ ପାପ୍‌ କାତା ଇନାତ୍‌; 4 ଇନେର୍‌ ନିୟାୟ୍‌ତ ଗୱାରି ୱେନୁର୍‌ ଆରି ଇନେର୍‌ ପାର୍ତିତ ଉଲ୍‌ଟାବେରଣ୍‌ କିଉର୍‌; ହେୱାର୍‌ ଆହାର୍‌ତ ବେବାର୍‌ କିନାର୍‌ ଆରି ମିଚ୍‌ କାତା ଇନୁର୍‌; ହେୱାର୍‌ ବାନ୍ୟାତିଂ ଗରବ୍‌ତ ଇଟ୍‌ନାର୍‌ ଆରି ଦସି ଉବ୍‌ଜାୟ୍‌ କିନାର୍‌ । 5 ହେୱାର୍‌ କାଲାଟ୍‌ ରାଚ୍‌ନି ରଣ୍ଡା ପିପ୍‌ତିସ୍‌ ଆରି କନ୍ଦ୍ର ଜାଲ୍‌ ଡ଼ଚ୍‌ଚିସ୍‌; ଇନେର୍‌ ହେୱାଙ୍ଗ୍‌ ରଣ୍ଡାଂ ତିନାର୍‌, ହେୱାନ୍‌ ହାନାନ୍‌, ଆରେ ହେଦାଂ ପାଟ୍‌ତିସ୍‌ ହେବେତାଂ କାଲାଟିରାଚ୍‌ ହସି ହାନାତ୍‌ । 6 ହେୱାଙ୍ଗ୍‌ତି ଜାଲ୍‌ ହେନ୍ଦ୍ରା ଆଉତ୍‌, କି ହେୱାଙ୍ଗ୍‌ ଜାର୍‌ କାମାୟ୍‌ତ ପ୍ଡାକ୍‌ୟା ଆଉକ୍‌; ହେୱାଙ୍ଗ୍‌ତି କାମାୟ୍‌ ସବୁ ଅଦାର୍ମିନି କାମାୟ୍‌ ଆରି ହେୱାଙ୍ଗ୍‌ କେଇଦ ବାନ୍ୟା କାମାୟ୍‌ ମାନ୍‌ଗାନାତ୍‌ । 7 ହେୱାର୍‌ତି ମାନ୍‌ ବାନ୍ୟାକାମାୟ୍‌ ନିପ ହନାତ୍‌ ଆରି ହେୱାର୍‌ ଦସ୍‌ହିଲ୍‌ୱାକାରିଂ ଅସ୍ତେଙ୍ଗ୍‌ ଆଗେ ଆନାର୍‌; ହେୱାର୍‌ତି ଚିନ୍ତାସବୁ ଅଦାର୍ମିର୍‌ ଚିନ୍ତା; ହେୱାର୍‌ ହାଜ଼ିତ ଚିନ୍‌ବିନ୍ ଆତାକା ଆରି ନାସ୍‌ ମାନ୍‌ଗାନାତ୍‌ । 8 ସୁସ୍ତାନି ହାଜ଼ି ହେୱାର୍‌ ପୁନୁର୍‌ ଆରି ହେୱାର୍‌ ହାଜ଼ିତ ଇମ୍‌ଣାକାପା ବିଚାର୍‌ ହିଲୁତ୍‌; ହେୱାର୍‌ ଜାର୍‌ କାଜିଂ ବାନ୍ୟା ହାଜ଼ି କିତାର୍ଣ୍ଣା; ଇମ୍‌ଣାକାର୍‌ ହେଦିଲିଂ ହାନାର୍‌, ହେୱାନ୍‌ ସୁସ୍ତା ପୁନୁନ୍‌ ।

9 ଇଦାଂକାଜିଂ ବିଚାର୍ ମାତାକେ ଦେହା ମାନାତ୍, ଦାର୍ମିନିକା ମା ହାଙ୍ଗ୍ ଆହୁତ୍; ଆପେଙ୍ଗ୍ ଅଜଡ଼୍ କାଜିଂ କାନାପ୍, ମତର୍ ହୁଡ଼଼ାଟ୍, ମାଜ୍‌ଗା; ଅଜଡ଼୍ କାସି ମାନେତ୍, ମତର୍ ଆପେଙ୍ଗ୍ ମାଜ୍‌ଗାତ ବୁଲାନାସ୍ । 10 ଆସେଙ୍ଗ୍‌ କାଣା ମାନାୟ୍‌ ଲାକେ କାତି କାଜିଂ ଟାମ୍‌ଣ୍ଡା ଆନାସା, ଆଁ, କାଣ୍‌କୁହିଲ୍‌ୱି ମାନାୟାର୍‌ ଲାକେ ଆସେଙ୍ଗ୍ ଟାମ୍‌ଣ୍ଡା ଆନାସା; ଆସେଙ୍ଗ୍‌ ନାଣାୱାଡ଼ାଂ ଲାକେ ୱେଡ଼ାଲିଂ ଉଜ୍‌ନାସ୍‌; ଆପେଙ୍ଗ୍ ଦୁମା ମାନାୟାର୍‌ ବିତ୍ରେ ହାତାକାର୍‌ ଲାକେ ମାନାସ୍‌ । 11 ଆପ୍‌ ୱିଜ଼ାକାସ୍‌ ବାଲୁ ନ୍ୟାୟ ଗାର୍ଜାୟ୍‌ କିନାସ୍‌ ଆରି ପାଣ୍ଡ୍‌କା ଲାକେ ବେସି ଆଡ଼୍‌ବାନାସ୍‌; ଆସେଙ୍ଗ୍‌ ବିଚାର୍‌ କାନାସ୍‌, ମତର୍‌ ହେଦାଂ ଆକାୟ୍‌, ମୁକ୍‌ଡ଼ାନାକା କାନାସ୍‌, ହେଦାଂ ମା ତାଂ ଦେହା ମାନାତ୍‌ । 12 ଇନାକିଦେଂକି ମି ମେହାଣ୍‌ତ ମା ଅଦରମ୍‌ ବାଡା ଆନାତା ଆରି ମା ପାପ୍‌ ମା ବିରୁଦ୍‌ତ ସାକି ହିନାତା; ଇନେକିଦେଂକି ମା ଅଦାର୍ମି ସବୁ ମା ଲାହାଙ୍ଗ୍‌ ମାନାତ୍‌ ଆରି ମା ପାପ୍‌ସବୁ ଆସେଙ୍ଗ୍‌ ତ ପୁନାସ୍‌; 13 ହେଦାଂ ପାପ୍‌ ଆରି ନିତ୍ରେମାପ୍ରୁଙ୍ଗ୍‌ ମାନିକିୱାକା ଆରି ମା ପର୍‌ମେସ୍ୱର୍‌ ପାଚେହଲ୍‌ୱାଦାଂ ବିନେ ହାନାକା, ବାନ୍ୟାହାଜ଼଼ି ଆରି ବିରୁଦ୍‌ କାତା ଇନାକା, ମିଚ୍‌ କାତା ଆସ୍ତି ୱାସ୍କିତାଂ ହପ୍‌ନାକା ମାନାତ୍‌ । 14 ଇଦାଂ କାଜିଂ ବିଚାର୍‌ ପାଚେ ଗୁଚା ଆନାତା ଆରି ଦରମ୍‌ ଦେହା ନିଲ୍‌ଚି ହାନାତା; ଚକ୍‌ବାହାତ ହାତ୍‌ପା ୱିସ୍‌ତି ହାନାତା ଆରି ହୁଦାର୍‌ ହଣ୍ଡେଙ୍ଗ୍‌ ଆଡୁତା । 15 ଆଁ, ହାତ୍‌ପା ଅବାବ୍‌ ଆନାତା ଆରି ଇନେନ୍‌ ବାନ୍ୟାକାମାୟ୍‌ ପିହ୍‌ନାନ୍‌, ହେୱାନ୍‌ ଜାର୍‌ତିଂ ଚରିକିତି ଲାକେ ଆନାନ୍‌; ଆରେ, ନିତ୍ରେମାପ୍ରୁ ଇଦାଂ ହୁଡ଼୍‌ତିସ୍‌; ଆରେ, ନିୟାୟ୍‌ବିଚାର୍‌ ହିଲ୍‌ୱିତିଲେ ସାରିଆୱାତାନ୍‌ ।

16 ଆରେ, ହେୱାନ୍‌ ହୁଡ଼୍‌ତାନ୍‌ ଜେ, ଇମ୍‌ଣି ମାନାୟ୍‌ପା ନଙ୍ଗ୍‌ ହିଲୁର୍‌, ଆରେ ମାଦି ଇନେର୍‌ ହିଲୁର୍‌ ଇଞ୍ଜି ତ୍ରିପ୍‌କାତାନ୍‌; ଇଦାଂକାଜିଂ ତା ଜାର୍‌ ବାପାଙ୍ଗ୍‌ ତା କାଜିଂ ମୁକ୍‌ଡ଼ାୟ୍‌ କିତାତ୍‌ ଆରି ତା ଦାର୍ମି ନେ ତାଙ୍ଗ୍‌ ଆସ୍ତି ଇଡ଼୍‌ତାତ୍‌ । 17 ଆରେ, ହେୱାନ୍‌ ନେଞ୍ଜେଡାକି ଲାକେ ଦାର୍ମିନିକାତ ଆରି ମୁକ୍‌ଡ଼ାନି ଟପ୍ରି ଜାର୍‌ତି କାପ୍‌ଡ଼ାତ ତୁସ୍ତାନ୍‌; ଆରେ, ହେୱାନ୍‌ ପାଲ୍‌ଟା ଆନି ହେନ୍ଦ୍ରା ଉସ୍‌ପାତାନ୍‌ ଆରି ଜିବୁନ୍‌ତିଂ ରାକ୍ୟାକିନି ହେନ୍ଦ୍ରା ଲାକେ ତ୍ରିକାଡ଼୍‌ନି ହେନ୍ଦ୍ରା ଉସ୍‌ପାତାନ୍‌ । 18 ହେୱାର୍‌ତି କାମାୟ୍‌ ଇସାବ୍ରେ ହେୱାନ୍‌ ଜାର୍‌ ବିନ୍‌ପାକ୍ୟାରିଂ ବେସି ରିସା ଲାକେ ଆତାନ୍‌ ଆରି ଜାର୍‌ ସାତ୍ରୁରିଂ ପାତିପାଡ଼୍‌ ହିନାନ୍‌; ଏସ୍‌କୁପ୍‌ଲିତିଂ କାରୁମ୍‌ନି ପାତିପାଡ଼୍‌ ଦାନ୍‌ ହିନାନ୍‌ । 19 ହେବେ ମାନାୟାର୍‌ ୱେଡାହାନି ଦିଗ୍‌ତାଂ ନିତ୍ରେମାପ୍ରୁତି ତର୍‌ଦିଂ ଆରି ୱେଡ଼ାହତ୍‌ନି ବାହାତାଂ ମାନାୟାର୍‌ ତା ଗାଜା ଅଜଡ଼୍‌ତିଂ ପାଣ୍ଡ୍ରା ଆନାର୍‌; ଇନେକିଦେଂକି ନିତ୍ରେମାପ୍ରୁତି ନେଞ୍ଜ୍‌ନିତ ଚାଲାନି ବେସି ନାଗୁଡ଼୍‌ ଲାକେ ସାତ୍ରୁର୍‌ ୱାନାର୍‌ । 20 ଆରେ, ନିତ୍ରେମାପ୍ରୁ ଇନାନ୍‌, "ସିୟନ୍‌ତିଂ ଆରି ଜାକୁବ୍‌ ବିତ୍ରେ ଇମ୍‌ଣାକାର୍‌ ଅଦାର୍ମିତାଂ ଲେଉଟା ଆଦ୍‌ନାର୍‌, ହେୱାର୍‌ ଲାଗାଂ ର ମୁକ୍‌ଡ଼ାୟ୍‌କିନାକାନ୍‌ ୱାନାନ୍‌ ।" 21 ଜାର୍‌ ବିସ୍ରେ ନିତ୍ରେମାପ୍ରୁ ଇନାନ୍‌, "ହେୱାର୍‌ ଲାହାଂ ମା ନିୟମ୍‌ ଇଦାଂ, ମା ଇମ୍‌ଣି ଜିବୁନ୍‌ ମି ଜପି ଜୁଦ୍‌ନାତ୍‌ ଆରି ମା ସବୁ ବଚନ୍‌ ଆପ୍‌ ମି ୱେଇଦ ଇଡ୍‌ତାପ୍‌ନା, ହେଦାଂ ମି ୱେଇଦାଂ ଆରି ମି ଲାତ୍ରା ୱେଇଦାଂ ଆରି ମି ଲାତ୍ରାଉବ୍‌ଜାନି ଲାତ୍ରାନି ୱେଇଦାଂ ନେଞ୍ଜେଙ୍ଗ୍‌ତାଂ ୱିଜ଼୍‌ୱି କାଡ଼୍‌ ପାତେକ୍‌ ଦେହା କିୟା ଆଉତ୍‌," ଇଦାଂ ନିତ୍ରେମାପ୍ରୁ ଇନାନ୍‌ ।