1 ଉସିୟ ରାଜା ହାକି ଆତି ବାର୍ହୁ ଆନ୍‌ ମାପ୍ରୁଙ୍ଗ୍‌ ର ଉଚା ଆରି ଉନ୍ନତି ଗାଦିତ କୁଚ୍‌ଚି ମାନାକା ହୁଡ଼୍‌ତାଂ, ହେୱାନ୍ତି ରାଜାର୍‌ହେନ୍ଦ୍ରା ନିପ ମନ୍ଦିର୍‌ତ ବାର୍ତି କିତାନ୍‌ । 2 ତା ଲାଗାଂ ଦୁତର୍ ନିଲ୍‌ତାର୍‌; ହେୱାନ୍‌ ୱିଜ଼ାର୍‌ତି ଚଅ ଚଅ ମାରା ମାଚାନ୍‌; ୱିଜ଼ାର୍‌ ରି ମାରାତ ଜାର୍‌ ଜାର୍‌ ୱେଇ ମୁଦ୍‌ କିତାର୍‌, ରି ମାରାତ ତାରେନ୍‌ ଡାବାୟ୍‌ କିତାର୍‌ ଆରି ରି ମାରାତାଂ ଉମ୍‌ତାର୍‌*6:2 ସାର୍ଗେନିଦୁତ । 3 ଆରେ, ହେୱାର୍‌ ହାରି କୁକ୍‌ଚି ଇଚାର୍‌, "ମେଲ୍ୟାର୍‌ଆଦିକାରି ନିତ୍ରେମାପ୍ରୁ ପୁଇପୁୟା, ପୁଇପୁୟା, ପୁଇପୁୟା; ୱିଜ଼ୁ ପୁର୍ତି ତା ପାଣ୍‌ତ ବାର୍ତି ।" 4 ହେପାଦ୍‌ନା ସୁଣାୟ୍‌କିନାକାର୍‌ କାଟ୍‌ତ ଚେରାଜ଼ି ଦୁୱାର୍ ଆରି ଲାଗେ ବାହାତ କୁନାଦି କଂପାତାତ୍‌ ଆରି ମନ୍ଦିର୍ତ କଦା ବାର୍ତି ଆତାତ୍‌ । 5 ଲାଗିଂ ଆନ୍‌ ଇଚାଙ୍ଗ୍‌, "ହାୟ୍‌ ହାୟ୍‌! ଆନ୍‌ ନସ୍ଟ ଆତାଙ୍ଗ୍‌; ଇନେକିଦେଂକି ଆନ୍‌ ସକଟ୍‌ଆୱି ଅଟି ଲାଗ୍‌ଦି କୁଟୁମ୍ ଆରି ଆନ୍‌ ସକଟ୍‌ ଆୱି ଅଟି ଲାଗ୍‌ଦି କୁଟୁମ୍‌ ବିତ୍ରେ ବାହା କିତାଦେର୍ଣ୍ଣା; ଆତିସ୍ପା ନା କାଣ୍‌କୁ ମେଲ୍ୟାର୍‌ଆଦିକାରି ନିତ୍ରେମାପ୍ରୁ ରାଜାଙ୍ଗ୍‌ ହୁଡ଼୍‌ତାଙ୍ଗ୍‌!" 6 ଇଦାଂପଚେ ହେ ଦୁତକ୍‌ ବିତ୍ରେତାଂ ରୱାନ୍‌ ନା ଲାଗାଂ ଉମ୍‌ଜି ୱାତାନ୍‌, ତା କେଇଦ ଇଚୁକ୍‌ ଆହ୍‌ନି ନାଣିଗଡା ମାଚାତ୍‌, ହେୱାନ୍‌ ପୁଜାଗାର୍‌ଣିତାଂ ଚିମ୍‌ଟା ହୁକେ ହେଦାଂ ଅଜ଼ି ମାଚାନ୍‌; 7 ଆରେ, ହେୱାନ୍‌ ତାପାଚେ ନା ମୁମ୍‌ ଡୁଜ଼ି ଇଚାନ୍‌, "ହୁଡ଼ାଟ୍‌, ଇଦାଂ ମି ଅଟି ଡୁତାୟ୍‌ନା; ଲାଗିଂ ମି ଅପ୍‌ରାଦ୍‌ ଦେହା ଆତାତ୍‌ ଆରି ମି ପାପ୍‌ କେମା ଆତାତ୍‌ ।" 8 ଇଦାଂପାଚେ "ଆନ୍‌ ଇନେରିଂ ପକ୍‌ନାଙ୍ଗ୍‌ ? ଆରି ଇନେର୍‌ ମା କାଜିଂ ହାନାର୍‌ ?" ମାପ୍ରୁତି ଇ କାଟ୍‌ ଆନ୍‌ ୱେଚାଙ୍ଗ୍‌ । ଲାଗିଂ ଆନ୍‌ ଇଚାଙ୍ଗ୍‌, "ଆନ୍‌ ମାନାଙ୍ଗ୍‌; ନାଙ୍ଗ୍‌ ପକ୍ତା ।" 9 ପଚେ ହେୱାନ୍‌ ଇଚାନ୍‌ "ହାଲାଟ୍‌ ଆରି ଇ କୁଟୁମ୍‌ତିଂ ଇନାଟ୍‌, ଏପେଙ୍ଗ୍‌ ୱେନାଦେରା ହାତେନେ, ମତର୍‌ ବୁଜା ଆଉଦେରା ଆରି ହୁଡ଼୍‌ନାରା ହାତେନେ ମତର୍‌ ପୁନୁଦେରା । 10 ଇ ମାନାୟାର୍‌ ଜାର୍‌ ଜାର୍‌ କାଣ୍‌ଗାତ ହୁଡ଼୍‌ଜି ଆରି କିତୁଲ୍‌ତ ୱେନ୍‌ଜି ଆରି ୱାସ୍କିତ ବୁଜାଜ଼ି ମାନ୍‌ ବାଦ୍‌ଲାୟ୍‌କିଜ଼଼ି ଇନେସ୍‌ ଉଜ୍‌ ଆଉର୍‌, ଇଦାଂ କାଜିଂ ଏପେଙ୍ଗ୍‌ ହେୱାର୍‌ତି ୱାସ୍କି ଗାଜା କିୟାଟ୍‌ ଆରି ହେୱାର୍‌ତି କିତୁଲିଂ ବଜ୍‌ କିୟାଟ୍‌ ଆରି ହେୱାର୍‌ତି କାଣ୍‌କୁ ମୁକାଟ୍‌ ।" 11 ଲାଗିଂ ଆନ୍‌ ଇଚାଙ୍ଗ୍‌, "ଏ ମାପ୍ରୁ, କେତେକ୍‌ କାଡ଼୍‌ ପାତେକ୍‌ ?" ହେବେ ହେୱାନ୍‌ ଉତର୍‌ କିତାନ୍‌, ଏଚେକ୍‌ପାତେକ୍‌ ଗାଡ଼୍‌ନି ମାନାୟାର୍‌ ସବୁ ବାହାକିୱାକାର୍‌ ଆରି ଇଲ୍‌ସବୁ ନାର୍‌ହିଲାକାର୍‌ ଆଜ଼ି ଡ୍ରିଙ୍ଗୁତ୍‌ ଆରି ବୁଇଁ ୱିଜ଼ୁ ଡ୍ରିଙ୍ଗୁତ୍‌, 12 ଆରେ, ନିତ୍ରେମାପ୍ରୁ ମାନାୟାର୍‌ରିଂ ବେସି ଦେହା କିଉନ୍‌ ଆରି ଦେସ୍‌ ବିତ୍ରେ ପିହ୍ୟାଆତି ବାହା ବେସି ଆକାୟ୍‌, ହେ ପାତେକ୍‌ । 13 ଆରେ, ହେବେ ଦସ୍ ବାଗ୍‌ ମାନ୍‌ଗାନାତ୍‌, ଆତିସ୍ପା ହେଦାଂ ଆରେରଗ ନସ୍ଟ ଆନାତ୍‌; ଏଲା ଆରି ଆଲନ୍‌ ମାର୍‌ କାତ୍‌ତିସ୍‌ ନେ ଇନେସ୍‌ ତା ଗ୍ରୁଚ୍‌ମାନାତ୍‌; ହେ ଲାକେ ହେ ପୁଇପୁୟା ଲାତ୍ରା ଇ କୁଟୁମ୍‌ନି ଗ୍ରୁଚ ଲାକେ ଆନାତ୍‌ ।