1 ଆ, ବିନ୍‌ ଦେସ୍‌ନିକାର୍‌ ଇନେସ୍‌ ମି ମୁମ୍‌ଦ ତ୍ରିଗ୍‌ନାଦେର୍‌, ଇଦାଂକାଜିଂ ଏପ୍‌ ବିନ୍‌ପାକ୍ୟାରିଂ ମି ତର୍‌ ପୁନି କିନି କାଜିଂ, 2 ନାଣି କିଡ୍‌ଗାଂ ଆହିକିନି ଲାକେ, ନାଣିତ ଏଜ଼ୁଙ୍ଗ୍‌ ହେନେର୍‌ୱାନି ଲାକେ ଜଦି ଏପ୍‌ ଆକାସ୍‌ତାଂ ଜେୟାଜ଼ି ଜୁଦ୍‌ନିହିଂ ଆରି ମାଡ଼ିଂ ମି ମେହାଣ୍‌ତ ଚାଲା ଆନିହିଂ । 3 ଏଚେକାଡ଼୍‌ଦ ଏପେଙ୍ଗ୍‌ ମାଦାଂ ଆହା ବୟଙ୍କାର୍‍ କାମାୟ୍‌ କିତାୟ୍‌, ହେପାଦ୍‌ନା ଏନେଙ୍ଗ୍‌ ଜୁଜ଼ି ୱାତାୟ୍‌, ତ୍ରିଗ୍‌ଜି ହାଚାର୍‌ । 4 ଇନେକିଦେଂକି ଇନେନ୍‌ ଜାର୍‌ କାନାକାନ୍‌ ପାକ୍ୟାତ କାମାୟ୍‌ ସାଦନ୍‌ କିନାନ୍‌, ମାନାୟାର୍‌ ପ୍ଡାନି କାଡ଼୍‌ତାଂ ନିଙ୍ଗ୍‌ ପିସ୍ତି ବିନ୍‌ ପର୍‌ମେସ୍ୱର୍‌ ବିସ୍ରେ ୱେନ୍‌ୱାତାର୍ଣ୍ଣା, କି କିତୁଲ୍‌ତ ୱେନ୍‌ୱାତାର୍ଣ୍ଣା, କି କାଣ୍‌କୁ ହୁଡ଼୍‌ୱାତାର୍ଣ୍ଣା । 5 ଇମ୍‌ଣି ମାନାୟ୍‌ ୱାରିକିଜ଼ି ଦରମ୍‌ କିନାନ୍‌, ଇମ୍‌ଣାକାର୍‌ ନି ହାଜ଼ିତ ନିଙ୍ଗେଙ୍ଗ୍‌ ଏତୁ କିଦ୍‌ନାର୍‌, ଏପେଙ୍ଗ୍‌ ହେୱାର୍‌ ଲାହାଂ ମେହାନାଦେର୍‌; ହୁଡ଼ାଟ୍‌, ଏପେଙ୍ଗ୍‌ ରିସା ମାଚାଦେର୍‌ ଆରି ଆପେଙ୍ଗ୍‌ ପାପ୍‌ କିତାପ୍‌; ଆପେଙ୍ଗ୍‌ ବେସି କାଡ଼୍‌ ହେବେ ମାନାପା, ଆସେଙ୍ଗ୍‌ ଇନାକା ମୁକ୍ତି ଆନାସ୍‌ ? 6 ଇନେକିଦେଂକି ଆସେଙ୍ଗ୍‌ ୱିଜ଼ାସ୍‌ ବିଟାଡ଼୍‌ ମାନାୟ୍‌ ଲାକେ ଆତାସ୍‌ନା ଆରି ମାଦାଂ ଦରମ୍‌କରମ୍‌ୱିଜ଼ୁ ବିଟାଡ଼୍‌ ହେନ୍ଦ୍ରା ଲାକେ ଆତାସ୍‌ ଆରି ଆସେଙ୍ଗ୍‌ ୱିଜ଼ାସ୍‌ ଆକି ଲାକେ କମ୍‌ଜା ଆନାସା; ଆରେ, ମାଦାଂ ପାପ୍‌ସବୁ ଡ଼ୁଇ ଲାକେ ମାଙ୍ଗେଙ୍ଗ୍‌ ଉପ୍ତାନାତ୍ । 7 ଆରେ, ଇନେନ୍‌ ମି ତର୍‌ଦ ପାର୍ତାନା କିନାନ୍‌, ଇନେନ୍‌ ନିଙ୍ଗ୍‌ ଆସ୍ତିନି କାଜିଂ ଜାର୍‌ତିଂ ରିସା ଆନାନ୍‌, ଏଲେଙ୍ଗ୍‌ ଇନେର୍‌ ହିଲୁର୍‌; ଇନେକିଦେଂକି ଏପେଙ୍ଗ୍‌ ମାଙ୍ଗ୍‌ତାଂ ଜାର୍‌ ମୁମ୍‌ ଡ଼ୁକ୍ତାଦେର୍ଣ୍ଣା ଆରି ମାଦାଂ ପାପ୍‌ ହୁକେ ପିସ୍ତାଟ୍‌ । 8 ମତର୍‌ ନଂ ଏ ନିତ୍ରେମାପ୍ରୁ, ଏନେଙ୍ଗ୍‌ ମା ଆବା ଆତାୟ୍‌ନା; ଆପେଙ୍ଗ୍‌ ଚିକ୍‌ଲା, ଏନେଙ୍ଗ୍‌ ମା କୁମ୍‌ରେନ୍‌; ଆରେ, ଆପେଙ୍ଗ୍ ୱିଜ଼ାପ୍‌ ନି କେଇଦାଂ ରଚ୍‌ୟାତି କାମାୟ୍‌ । 9 ଏ ନିତ୍ରେମାପ୍ରୁ, ବେସି ରିସା ଆମା, କି ହାନିପାତେକ୍‌ ପାପ୍‌ ମାନ୍ତ ଇଟ୍‌ମା; ଆପେଙ୍ଗ୍‌ ଗୱାରି କିଦ୍‌ନାପା, ହୁଡ଼ା, ହୁଡ଼ା, ଆପ୍‌ ୱିଜ଼ାପ୍‌ ନି ଲକୁ । 10 ନି ପୁଇପୁୟା ଗାଡ଼୍‌ସବୁ ବାଟା ଆତାତ୍‌ନା, ସିୟନ୍‌ ବାଟା ଆତାତ୍‌ନା, ଜିରୁସାଲମ୍‌ ବୁଡାତିବାହା ଆତାତ୍‌ନା । 11 ମା ଆକର୍‌ଦାଦିର୍‌ ଇମ୍‌ଣି ବାହାତ ନି ୱାରିକିୟ୍ କିତାର୍‌, ମାଦାଂ ହେ ପୁଇପୁୟା ଆରି ହଲ୍‌ନି ଇଲ୍‌ ନାଣିତ କାଡ଼୍‌ତାତ୍‌ନା ଆରି ମାଦାଂ ମାନ୍‌ତିକିଂ ବିସ୍ରେସବୁ ଚିନ୍‌ବିନ୍ ଆତିକ୍‌ନା । 12 ଏ ନିତ୍ରେମାପ୍ରୁ, ଇସବୁ ଆତିସ୍‌ ନେ ଏନ୍‌ ଜେ ଜାର୍‌ତିଂ ଚିମ୍‌ରା ଆନାକା କିଜ଼ି ଇଡ୍‌ଜି ମାଞ୍ଜ୍‌ନାୟ୍‌ ? ଏନେଙ୍ଗ୍‌ କି ଚିମ୍‌ରା ଆଜ଼ି ମାନ୍‌ଜି ମାଙ୍ଗେଙ୍ଗ୍‌ ବେସି କସ୍ଟ ହିଦ୍‌ନାୟ୍‌ ?